სარგებლობა, რომელიც ერთგულების გამოვლენას მოაქვს
ზოგიერთ ქვეყანაში ბავშვებს უხარიათ, როდესაც თანატოლებს შალის ჯემპრზე ბირკებს აკრობენ. ბავშვი დადის, დარბის თუ ხტუნაობს, ბირკები არ შორდება. ერთადერთი საშუალება ბირკების სათითაოდ მოცილებაა. სხვა ბავშვებს კი ამის დანახვა ძალიან ახარებთ.
რა თქმა უნდა, არავის მოსწონს, ბირკებს რომ ტანსაცმელზე აკრობენ. მაგრამ ყველა განცვიფრებულია ტანსაცმელზე ბირკის მიკრობის უნარით. ერთგულ პიროვნებასაც მსგავსი თვისება აქვს. ის ახლო და ხანგრძლივ ურთიერთობას ინარჩუნებს სხვასთან და რთულ სიტუაციებშიც კი ზუსტად ასრულებს იმ ვალდებულებებს, რასაც ერთგულება აკისრებს. სიტყვა „ერთგულება“ ასოცირდება ისეთ დადებით თვისებებთან, როგორიცაა ნდობა, საიმედოობა და თავდადება. მართალია, შეიძლება აფასებთ, როდესაც თქვენ მიმართ ერთგულებას ავლენენ, მაგრამ პირადად თქვენ თუ ცდილობთ, იყოთ ერთგული? თუ ცდილობთ, ვის უნდა უერთგულოთ?
ერთგულება — ძირითადი მოთხოვნა ქორწინებაში
ქორწინება ერთ-ერთი სფეროა, სადაც ერთგულება ძალიან მნიშვნელოვანია. სამწუხაროდ, ერთგულების ნაკლებობა ხშირად სწორედ დაქორწინებულ წყვილებში შეიმჩნევა. მეუღლეები, რომლებიც საქორწინო აღთქმისადმი ერთგულებას ინარჩუნებენ — სიცოცხლის ბოლომდე ერთად არიან და ერთმანეთის კეთილდღეობაზე ზრუნავენ — მნიშვნელოვან ნაბიჯს დგამენ ბედნიერებისა და უსაფრთხოებისკენ. რატომ? იმიტომ, რომ ადამიანს მოთხოვნილება აქვს, უერთგულონ მას და თვითონაც გამოავლინოს ერთგულება. როდესაც ღმერთმა ედემის ბაღში ქორწინება დააფუძნა, თქვა: „მიატოვებს კაცი თავის მამას და თავის დედას და მიეკრობა თავის დედაკაცს“. ეს ცოლსაც ეხებოდა, ისიც უნდა „მიკრობოდა“ ქმარს. ისინი ერთმანეთის ერთგულნი უნდა ყოფილიყვნენ და ერთმანეთთან ეთანამშრომლათ (დაბადება 2:24; მათე 19:3—9).
მას შემდეგ საუკუნეები გავიდა. ნიშნავს ეს იმას, რომ დღეს ერთგულება ქორწინებაში მოძველებულია? უმეტესობა ასე არ ფიქრობს. გერმანიაში ჩატარებულმა გამოკითხვამ აჩვენა, რომ 80 პროცენტისთვის ერთგულება ქორწინებაში ძალიან მნიშვნელოვანია. მეორე გამოკვლევისას მამაკაცებსა და ქალებს სთხოვეს, ჩამოეთვალათ ხუთი თვისება, რაც ყველაზე მეტად იზიდავთ საპირისპირო სქესის წარმომადგენლებში; მამაკაცებმაც და ქალებმაც პირველ ადგილზე ერთგულება დააყენეს.
დიახ, ერთგულება წარმატებული ქორწინებისთვის ძლიერი საძირკვლის შემადგენელი ნაწილია. მაგრამ, როგორც წინა სტატიიდან დავინახეთ, ერთგულებას უფრო მეტად აფასებენ, ვიდრე ავლენენ. მაგალითად, მრავალ ქვეყანაში არსებული განქორწინების რიცხვი გვიჩვენებს, რომ მეუღლეები ნაკლებად არიან ერთმანეთის ერთგულნი. როგორ შეუძლიათ დაქორწინებულ წყვილებს წინ აღუდგნენ ამ პრობლემას და ერთმანეთის ერთგულები დარჩნენ?
ერთგულება — ხანგრძლივი ქორწინების საწინდარი
მეუღლეები ერთმანეთისადმი მაშინ ავლენენ ერთგულებას, როდესაც ამისთვის შესაძლებლობებს ეძებენ. მაგალითად, უკეთესია თქვა „ჩვენი“, ვიდრე „ჩემი“ — „ჩვენი მეგობრები“, „ჩვენი ბავშვები“, „ჩვენი სახლი“, „ჩვენი გამოცდილება“ და ასე შემდეგ. როდესაც რაიმე გეგმაა შესადგენი ან გადაწყვეტილებაა მისაღები — მაგალითად სახლთან, სამუშაოსთან, ბავშვების აღზრდასთან, გართობასთან, შვებულებასთან თუ რელიგიურ საქმიანობასთან დაკავშირებით — ცოლ–ქმარმა უნდა გაითვალისწინოს ერთმანეთის აზრი და გრძნობები (იგავები 11:14; 15:22).
ერთგულება მაშინ ვლინდება, როდესაც მეუღლეები ერთმანეთს აგრძნობინებენ, რომ საჭირონი და ძვირფასნი არიან. პიროვნებას შიშისა და უნდობლობის გრძნობა ეუფლება, როდესაც მისი მეუღლე საპირისპირო სქესის წარმომადგენლის მიმართ მეტისმეტ ყურადღებას იჩენს. ბიბლია მამაკაცს ურჩევს, მიეკრას „სიყრმის ცოლს“. ქმარმა გულს იმის უფლება არ უნდა მისცეს, რომ სხვა ქალით უფრო მოიხიბლოს, ვიდრე ცოლით. ცხადია, ქმარმა არ უნდა იმრუშოს. ბიბლია გვაფრთხილებს: „ვინც ქალთან მრუშობს, უგუნურია. სპობს თავის სულს, ვინც ამას სჩადის“. ცოლისგანაც ერთგულების ასეთი მაღალი ნორმები მოითხოვება (იგავები 5:18; 6:32).
ღირს ქორწინებაში ერთგულებისთვის ძალისხმევის მოხმარება? რა თქმა უნდა. ასეთი მოქმედებით ქორწინება უფრო მტკიცე და ხანგრძლივი იქნება, და თითოეული სარგებლობას მიიღებს. მაგალითად, როდესაც ქმარი ერთგულად ზრუნავს ცოლის კეთილდღეობაზე, ცოლი თავს მშვიდად გრძნობს, რაც საუკეთესო თვისებების გამოვლენაში ეხმარება. იგივე შეიძლება ითქვას ქმარზე. გადაწყვეტილება, რომ ცოლის ერთგული იყოს, ეხმარება ქმარს, ცხოვრების ნებისმიერ მხარეში სამართლიანი პრინციპები განივითაროს.
ცხოვრებაში რთული მომენტების დროს ცოლქმარს ერთგულება დაეხმარება, რომ თავი დაცულად იგრძნოს. ხოლო წყვილი თუ ერთმანეთის ერთგული არ არის, როდესაც პრობლემა წამოიჭრება, ხშირად გამოსავალს ისინი განცალკევებით ცხოვრებაში ან განქორწინებაში ხედავენ. ეს პრობლემას კი არ გადაჭრის, არამედ სხვა პრობლემას გამოიწვევს. 80–იან წლებში ერთი კარგად ცნობილი მოდელიერი ცოლ–შვილს გაშორდა. მიაღწია მან ამით ბედნიერებას? ოცი წლის შემდეგ აღიარა, რომ ოჯახთან განშორებამ მას, «მარტოობისა და მწუხარების გრძნობა გაუჩინა; ენატრება, რომ შვილებს „ძილი ნებისა“ უთხრას».
ერთგულება მშობლებსა და შვილებს შორის
ცოლ–ქმარი როცა ერთმანეთის ერთგულია, უფრო მეტი ალბათობა არსებობს, რომ შვილებიც ისწავლიან ერთგულების გამოვლენას. ერთგულ და მოსიყვარულე ოჯახში აღზრდილ ბავშვს მოგვიანებით გაუადვილდება პასუხისმგებლობის საკუთარ თავზე აღება როგორც მეუღლესთან, ისე დაუძლურებულ მშობლებთან დაკავშირებით (1 ტიმოთე 5:4, 8).
რა თქმა უნდა, ავადმყოფობის გამო მხოლოდ მშობლები არ საჭიროებენ ზრუნვას. ზოგჯერ შვილს ესაჭიროება ერთგულად მზრუნველობა. სწორედ ასე მოხდა ჰერბერტისა და გერტრუდის ოჯახში; ისინი 40 წელია, რაც იეჰოვას ემსახურებიან. მათ ვაჟს, დიტმარს, დაბადებიდან კუნთების პროგრესული დისტროფია ჰქონდა. მას სიკვდილამდე, 2002 წლის ნოემბრამდე, ბოლო შვიდი წელი ოცდაოთხსაათიანი მზრუნველობა სჭირდებოდა. მშობლები სიყვარულით ზრუნავდნენ შვილზე. მათ სამედიცინო მოწყობილობაც კი დაიდგეს სახლში და სპეციალური სწავლება გაიარეს. ოჯახში ერთგულების გამოვლენის რა შესანიშნავი მაგალითია!
ერთგულება ძალიან მნიშვნელოვანია მეგობრობისთვის
„ადამიანი შეიძლება ბედნიერი იყოს ცხოვრების თანამგზავრის გარეშე, მაგრამ ძნელია იყოს ბედნიერი უმეგობროდ“, — ამბობს ბირგიტი. შესაძლოა ამას თქვენც ეთანხმებით. მიუხედავად იმისა, დაოჯახებული ხართ თუ არა, მეგობრის ერთგულება გულს გაგითბობთ და თქვენს ცხოვრებას გაამდიდრებს. რა თქმა უნდა, თუ დაოჯახებული ხართ, თქვენი ყველაზე ახლო მეგობარი მეუღლეა.
მეგობარი უბრალოდ ნაცნობი არ არის. შეიძლება ბევრი ნაცნობი გყავდეთ — მეზობელი, კოლეგა, ან ისინი, რომლებსაც ხშირად ხვდებით. ნამდვილი მეგობრობა მოითხოვს დროს, ენერგიასა და ვალდებულების გრძნობას. დიდი პატივია, ვინმეს მეგობარი იყო. მეგობრობას სარგებლობა მოაქვს, და ამავე დროს პასუხისმგებლობასაც გვაკისრებს.
მეგობართან ხშირი კომუნიკაცია უნდა გვქონდეს. ზოგჯერ ამისკენ შეიძლება საჭიროებამ აღგვძრას. „თუ რომელიმე ჩვენგანს პრობლემები გვაქვს, კვირაში ორჯერ მაინც ვურეკავთ ერთმანეთს. ძალიან მანუგეშებს იმის ცოდნა, რომ ის მზად არის, მომისმინოს“, — ამბობს ბირგიტი. მანძილი არ უნდა იყოს მეგობრობის ბარიერი. გერდას და ჰელგას ათასობით კილომეტრი აშორებს ერთმანეთს, მაგრამ უკვე 35 წელია, რაც კარგი მეგობრები არიან. „ჩვენ ერთმანეთს რეგულარულად ვწერთ წერილებს, — გვეუბნება გერდა. — გრძნობებს ვუზიარებთ და როგორც სასიამოვნო, ისე სამწუხარო შემთხვევებს ვუყვებით. ჰელგასგან მიღებული წერილი უდიდეს სიხარულს მანიჭებს. ჩვენ გვესმის ერთმანეთის“.
ერთგულება მეგობრობისთვის ძალიან მნიშვნელოვანია. ორგულობამ შეიძლება ხანგრძლივი მეგობრობაც კი დაამსხვრიოს. ჩვეულებრივ, მეგობრებმა ერთმანეთს რჩევები უნდა მისცენ კონფიდენციალურ საკითხებშიც კი. მეგობრები ერთმანეთს გულწრფელად უნდა ესაუბრონ; იმის შიში არ უნდა ჰქონდეთ, რომ ერთმანეთის თვალში დამცირდებიან ან მათი საიდუმლო გაცემული იქნება. ბიბლია ამბობს: „მეგობარი მუდამ მოყვარულია და ძმა გაჭირვებისთვის იბადება“ (იგავები 17:17, სსგ).
მეგობრები გავლენას ახდენენ ჩვენს აზროვნებაზე, საქციელსა და გრძნობებზე. ამიტომ მნიშვნელოვანია ისეთი მეგობრები ავირჩიოთ, რომელთა ცხოვრების წესი ჩვენსას შეესაბამება. მაგალითად, მეგობრობ მასთან, რომელსაც ისეთივე რწმენა აქვს, როგორიც შენ? იზიარებს შენს თვალსაზრისს ზნეობრიობასთან და იმასთან დაკავშირებით, თუ რა არის სიკეთე და რა ბოროტება? დაგეხმარება ის მიზნების მიღწევაში? რატომ უნდა იმეგობრო მასთან, ვისაც განსხვავებული ნორმები და თვალსაზრისი აქვს ზნეობაზე?! ბიბლია გვიჩვენებს, თუ რამდენად მნიშვნელოვანია მეგობრის სწორად შერჩევა: „ბრძენებთან დამავალი დაბრძენდება, რეგვენთა მოყვასი კი გაუბედურდება“ (იგავები 13:20).
ერთგულების სწავლა შესაძლებელია
ბავშვი, როცა სხვის ტანსაცმელზე ბირკების მიკრობას სწავლობს, სურვილი აქვს, რომ ეს ხშირად აკეთოს. იგივე შეიძლება ითქვას ერთგულ პიროვნებაზე. რატომ? იმიტომ, რომ რაც უფრო ხშირად ვავლენთ ერთგულებას, მით უფრო გვიადვილდება ამის კეთება. თუ პიროვნება ოჯახში ადრეული ასაკიდანვე სწავლობს ერთგულებას, მას გაუადვილდება მეგობრობაში ერთგულების გამოვლენა. ასეთმა ძლიერმა, ხანგრძლივმა მეგობრობამ შეიძლება მომავალში მეუღლის მიმართ ერთგულებას შეუწყოს ხელი და, აგრეთვე, დაეხმაროს პიროვნებას, რომ ერთგული იყოს ყველაზე მნიშვნელოვან მეგობრობაში.
იესომ თქვა, რომ უპირველესი მცნებაა, გვიყვარდეს იეჰოვა ღმერთი მთელი გულით, სულით, გონებითა და ძალით (მარკოზი 12:30). ეს ნიშნავს, რომ ღვთისადმი ურყევი ერთგულება უნდა გამოვავლინოთ. იეჰოვა ღმერთისადმი ერთგულება მრავალ კურთხევებს მოგვიტანს. ის იმედს არასოდეს გაგვიცრუებს, რადგან ამბობს: „ერთგული ვარ“ (იერემია 3:12, აქ). დიახ, ღვთისადმი ერთგულება მარადიულ კურთხევებს მოგვიტანს (1 იოანე 2:17).
[ჩანართი 6 გვერდზე]
მეგობრის ერთგულება გულს გაგითბობთ.
[სურათი 5 გვერდზე]
ერთგული ოჯახის წევრები ერთმანეთზე ზრუნავენ.