როგორ გავიცნოთ ღმერთი?

ზოგი შეიძლება ფიქრობს, რომ ღმერთს არ სურს, ადამიანები იცნობდნენ მას და ამიტომ, საკუთარი თავის შესახებ არაფერს უმჟღავნებს მათ. მაგრამ, თუ ეს ასე არ არის, როგორ ეცნობა ის ადამიანებს?

მეთექვსმეტე საუკუნის პროტესტანტმა რეფორმატორმა ჟან კალვინმა სწორად დაასკვნა, რომ ადამიანები თავისით ვერ გაიცნობდნენ ღმერთს, თუკი ის თავად არ გააცნობდა მათ საკუთარ თავს. თუმცა, ზოგი შეიძლება ფიქრობს: სურს ღმერთს, რომ ადამიანებს გააცნოს საკუთარი თავი? და თუ სურს, როგორ აკეთებს ის ამას?

იეჰოვა, „დიდებული შემოქმედი“, უმიზნოდ არაფერს აკეთებს. გარდა ამისა, ის „ყოვლისშემძლე ღმერთია“, ამიტომ თავისუფლად შეუძლია თავისი განზრახვების განხორციელება (ეკლესიასტე 12:1; გამოსვლა 6:3). შეგვიძლია დარწმუნებული ვიყოთ, რომ მას სურს ადამიანებისთვის თავისი განზრახვების გამჟღავნება, როგორც ამას წინასწარმეტყველი ამოსი ღვთის შთაგონებით გვამცნობს: „უზენაესი უფალი იეჰოვა ისე არაფერს გააკეთებს, თუ საიდუმლო არ გაუცხადა თავის მსახურებს, წინასწარმეტყველებს“. მაგრამ, ყურადღება მიაქციეთ, რა არის ამ მუხლში ნათქვამი ღმერთზე — ის თავის განზრახვებს უმჟღავნებს მხოლოდ თავის მსახურებს, მათ, ვისაც გულწრფელად უყვართ ის. განა ეს ლოგიკური არაა? ვის უმხელთ საიდუმლოს? ნებისმიერ ადამიანს თუ უახლოეს მეგობრებს? (ამოსი 3:7; ესაია 40:13, 25, 26).

ღვთის სიბრძნე და ცოდნა თავმდაბალ ადამიანებში მოწიწების გრძნობას იწვევს, და ეს ასეც უნდა იყოს. მაგრამ, მხოლოდ მოწიწების გრძნობა არ არის საკმარისი, თუ გვსურს, რომ ღვთის სიბრძნემ და ცოდნამ სარგებლობა მოგვიტანოს. ბიბლია ხაზს უსვამს იმას, რომ ღვთის აზრების გასაგებად თავმდაბალი გული უნდა გვქონდეს: ‘ჩემს მცნებებს განძივით გაუფრთხილდი, ყური მიაპყარი სიბრძნეს, გული გამჭრიახობისკენ მიმართე, ითხოვე, რომ გაგების უნარი გქონდეს, და გამჭრიახობას მოუხმე, ვერცხლივით ეძებე ის’ (იგავები 2:1—4).

თავმდაბალი ადამიანი, რომელიც ამგვარ ძალისხმევას ახმარს ღვთის შესახებ ცოდნის შეძენას, შეძლებს ღვთის გაცნობას. „იგავების“ წიგნიდან აღებული ეს ბიბლიური მონაკვეთი შემდეგნაირად გრძელდება: „იეჰოვა თავად იძლევა სიბრძნეს; მისი პირიდან გამოდის ცოდნა და გამჭრიახობა“. ჭეშმარიტების გულწრფელ მაძიებლებს ნამდვილად შეუძლიათ ‘გაიგონ, რა არის სიმართლე, სამართლიანობა და პატიოსნება — ყოველივე ის, რაც კარგია’ (იგავები 2:6—9).

ჭეშმარიტების ძიებაში

„რელიგიის ენციკლოპედიაში“ ნათქვამია: „ადამიანი მთელი ცხოვრება ისწრაფვის იმისკენ, რომ ერთმანეთისგან განასხვავოს რეალური და არარეალური, ძლიერი და სუსტი, მართალი და ტყუილი, წმინდა და უწმინდური, გასაგები და გაუგებარი, და ჩასწვდეს ერთმანეთის საპირისპირო ცნებებს შორის არსებულ შუალედს“. ამ მოთხოვნილების დასაკმაყოფილებლად ადამიანები დიდი ხანია ეძებენ ჭეშმარიტებას. თუკი ისინი შეძლებისდაგვარად ეძებენ იეჰოვას, რომელსაც ფსალმუნმომღერალი „ჭეშმარიტების ღმერთს“ უწოდებს, იპოვიან ჭეშმარიტებას (ფსალმუნები 31:5).

სახელი იეჰოვა სიტყვასიტყვით ნიშნავს „აქცევინებს“ (დაბადება 2:4, სქოლიო). ღვთის სახელი ყურადღებას ამახვილებს იმაზე, რომ ის შემოქმედია და თავის განზრახვებს ასრულებს. იეჰოვას სახელის ცოდნა და გამოყენება ჭეშმარიტი რელიგიის დამახასიათებელი ნიშანია. იესოს კარგად ესმოდა ეს. მას თავისი მიმდევრები ჰყავდა მხედველობაში, როდესაც ლოცვაში ღმერთს უთხრა: „ვამცნე მათ შენი სახელი და კვლავაც ვამცნობ, რათა სიყვარული, რომლითაც შემიყვარე, მათში იყოს და მე მათთან ვიყო ერთობაში“ (იოანე 17:26).

ძველ დროს მცხოვრებ ებრაელ ახალგაზრდას, იოსებს, იეჰოვას მეგობრობისა და მისი მხარდაჭერის იმედი ჰქონდა, როდესაც სიზმარი უნდა აეხსნა; მან დარწმუნებით თქვა: „განა ღვთისგან არ არის ახსნა?“ (დაბადება 40:8; 41:15, 16).

რამდენიმე საუკუნის შემდეგ, ბაბილონის მეფე ნაბუქოდონოსორმა ნახა სიზმარი, რომლის ახსნაც მისმა ბრძენკაცებმა ვერ შეძლეს. წინასწარმეტყველმა დანიელმა მეფეს უთხრა: „ზეცაში არის ღმერთი, საიდუმლოთა განმცხადებელი, ის ამცნობს მეფე ნაბუქოდონოსორს, რა უნდა მოხდეს უკანასკნელ დღეებში“ (დანიელი 2:28).

იოსებისა და დანიელის შემთხვევები გვიჩვენებს, რომ ღვთისგან მომდინარე სიბრძნე და ცოდნა მხოლოდ იეჰოვა ღმერთის მსახურებს აქვთ. ღვთის კეთილგანწყობის მოსაპოვებლად საჭიროა ძველი შეხედულებების შეცვლა. პირველი საუკუნის იუდეველები, რომლებიც ქრისტიანები გახდნენ, ასე უნდა მოქცეულიყვნენ. ისინი ბავშვობიდანვე პატივს სცემდნენ და ემორჩილებოდნენ იუდეველების მიერ დადგენილ კანონებს; ამიტომ მათ დრო სჭირდებოდათ, მესიად ეღიარებინათ იესო, რომელმაც შეასრულა მოსეს კანონი, რაც „მომავალ კურთხევათა ჩრდილი“ იყო (ებრაელები 10:1; მათე 5:17; ლუკა 24:44, 45). მოსეს კანონი „ქრისტეს კანონმა“ შეცვალა, რადგან მასზე აღმატებულია (გალატელები 6:2; რომაელები 13:10; იაკობი 2:8).

თითოეული ჩვენგანი ღვთისგან გაუცხოებულ ქვეყნიერებაში დაიბადა. პირველი წყვილისგან მემკვიდრეობით გადმოგვეცა ცოდვა, ამიტომ დაბადებიდან ღვთის მტრები ვიყავით და მისი განზრახვების შესახებ ზუსტი ცოდნა არ გვქონდა. მემკვიდრეობით ასევე ‘ვერაგი გული’ გადმოგვეცა (იერემია 17:9; ეფესოელები 2:12; 4:18; კოლოსელები 1:21). თუ გვინდა, რომ ღვთის მეგობრები ვიყოთ, მის მსგავსად უნდა ვაზროვნებდეთ; ეს კი ადვილი არ არის.

შეიძლება ძნელი იყოს ცრუ რელიგიური შეხედულებებისა და წეს-ჩვეულებების მიტოვება, განსაკუთრებით მაშინ, თუ ამ ყოველივეს ბავშვობიდანვე გვინერგავდნენ. მაგრამ, განა გონივრულია, განვაგრძოთ არასწორი გზით სიარული? რა თქმა უნდა, არა! გონივრულია, რომ შევიცვალოთ აზროვნება და ღვთის მოწონება დავიმსახუროთ.

როგორ გვასწავლის ღმერთი?

რა დაგვეხმარება ღვთის სიტყვის ჭეშმარიტების გაგებასა და იმაში, რომ შემდეგ შესაბამისად ვიცხოვროთ? ძველ ისრაელში ღმერთმა დანიშნა სანდო და ერთგული ადამიანები, რომლებიც ერს ხელმძღვანელობდნენ. დღეს ქრისტიანული კრების თავი, ქრისტე, მსგავსად ხელმძღვანელობს მათ, ვინც გულწრფელად ეძებს ჭეშმარიტებას. ის ამას აკეთებს სანდო და ერთგული მიმდევრების მეშვეობით, რომლებიც ხელმძღვანელობენ და იცავენ ჭეშმარიტების გულწრფელ მაძიებლებს (მათე 24:45—47; კოლოსელები 1:18). მაგრამ როგორ შეგვიძლია გავიგოთ, როგორ ასწავლის ღმერთი თავის ხალხს?

იესო ქრისტეს ჭეშმარიტი მიმდევრები ცდილობენ, ისეთივე თვისებები გამოავლინონ, როგორიც იესოს ჰქონდა დედამიწაზე ყოფნისას. ამიტომ იმის გაგება, თუ ვინ არიან ქრისტეს ნამდვილი მიმდევრები, რთული არ არის, რადგან ქვეყნიერებაში, რომელიც სულ უფრო და უფრო ეფლობა ბოროტებაში, ისინი იესოს მსგავსად, სულიერ თვისებებს ავლენენ (იხილეთ ჩარჩო მე-6 გვერდზე). აქვთ ასეთი თვისებები თქვენი რელიგიის მიმდევრებს? შეიძლება იმავეს თქმა იმ რელიგიების მიმდევრებზე, რომლებსაც თქვენი ნაცნობები მიეკუთვნებიან? ნამდვილად ღირს ამ საკითხის გამოკვლევა ბიბლიის საშუალებით.

გიწვევთ, ბიბლიის შესწავლის მეშვეობით გაერკვეთ ამ საკითხში. გასულ წელს 235 ქვეყანაში იეჰოვას მოწმეები ბიბლიის 6 000 000-ზე მეტ შესწავლას ატარებდნენ. ღვთის სიბრძნე და ცოდნა ამოუწურავია და მათი შეძენა კმაყოფილებასა და კურთხევებს მოგიტანთ. კარგი იქნება, თუ დაუყოვნებლივ დაიწყებთ ღვთის სიბრძნისა და ცოდნის შეძენას. ამას არასოდეს ინანებთ. ჩვენ ნამდვილად შეგვიძლია, გავიცნოთ ღმერთი!

[ჩარჩო 6 გვერდზე]

ღვთის ნების შემსრულებლები . . .

პოლიტიკური კონფლიქტების დროს ნეიტრალიტეტს ინარჩუნებენ (ესაია 2:4).

კარგი ნაყოფით გამოირჩევიან (მათე 7:13—23).

ნამდვილ სიყვარულს ავლენენ ერთმანეთისადმი (იოანე 13:35; 1 იოანე 4:20).

ერთსულოვანნი არიან (მიქა 2:12).

არ ბაძავენ ქვეყნიერებას აზროვნებასა თუ ქცევებში (იოანე 17:16).

ჭეშმარიტებას ქადაგებენ და მოწაფეებს ამზადებენ (მათე 24:14; 28:19, 20).

რეგულარულად ატარებენ გამამხნევებელ შეხვედრებს (ებრაელები 10:25).

მთელ მსოფლიოში გაერთიანებულად ადიდებენ ღმერთს (გამოცხადება 7:9, 10).

[სურათები 7 გვერდზე]

ღვთის შესახებ ცოდნას ვიღებთ ბიბლიის შესწავლისას, ოჯახთან ერთად და კრებებზე.