„სასიხარულო ცნობის“ ქადაგება ავსტრალიის ჩრდილოეთ კუნძულებზე

იესომ თქვა: „ამ სასიხარულო ცნობას სამეფოს შესახებ იქადაგებენ მთელ მსოფლიოში“ (მათე 24:14). იეჰოვას მოწმეები მიჰყვებიან იესოს ამ მითითებას და ცდილობენ, მსოფლიოს ნებისმიერ კუთხეში მიაწვდინონ ადამიანებს ბიბლიაში ჩაწერილი ცნობა (მათე 28:19, 20). ამ საქმეს ისინი ნებაყოფლობით ასრულებენ მიუხედავად იმისა, რომ ეს ზოგჯერ სირთულეებთან და ხარჯებთან არის დაკავშირებული.

მაგალითად, ნეითანმა და კარლიმ შეცვალეს თავიანთი ცხოვრება, რათა ტორესის სრუტეში მიმოფანტულ კუნძულებზე ექადაგათ. 2003 წელს იეჰოვას მოწმეების ავსტრალიის ფილიალის წარმომადგენელმა სთხოვა მათ, რომ თერზდეის კუნძულზე გადასულიყვნენ და ადგილობრივ კრებას დახმარებოდნენ. ეს ერთ-ერთი კუნძულია იმ კუნძულებს შორის, რომლებიც ავსტრალიასა და ახალ გვინეას შორის, წყნარი ოკეანის ლაჟვარდოვან წყალში მწვანე, ძვირფასი ქვებივით არიან მიმოფანტული.

2007 წელს მათ შეიძინეს ხის ძველი მოზრდილი ნავი, რომელსაც „ტეისან-უაი“ ერქვა. მათ საკუთარი ხარჯებით შეაკეთეს ნავი, საცხოვრებლად კუნძულ თერზდეიზე გადავიდნენ და ათ დაშორებულ კუნძულზე დაიწყეს ქადაგება. ქვემოთ მოცემულია დღიური, რომელშიც მათი მოგზაურობებია აღწერილი.

2008 წლის იანვარი: დღეს ჩემი პატარა ნავით ბამაგაში წავედი და ექვს ადგილობრივ მოწმესთან ერთად უკან დავბრუნდი. მთლიანობაში 80 კილომეტრი გავიარე. შემდეგ „ტეისან-უაით“ უორაბერისა და ფორუმას კუნძულებისკენ გავცურეთ. ავზების გასავსებად 5 500 ლიტრი საწვავი ვიყიდეთ. თითო ლიტრში 2 დოლარი გადავიხადეთ. ჩვენი ნავი ძალიან ნელა, 10 კმ/სთ სიჩქარით მიდიოდა. მშვენიერი ამინდი იყო და ოკეანეც ლივლივებდა.

ნავი უორაბერის ნაპირიდან ცოტა მოშორებით გავაჩერეთ და ღუზა ჩავუშვით. ნაპირამდე პატარა ნავით იმ მოწმეებთან ერთად მივედით, რომელთაც ამ კუნძულზე ნათესავები ჰყავდათ. კუნძულის საბჭოს წევრს, რომელიც ამავე დროს ადგილობრივი ეკლესიის პასტორიც იყო, ქადაგების ნებართვა ვთხოვეთ. მან უარი არ გვითხრა. ქადაგების უფლება კუნძულ ფორუმაზეც მოგვცეს. აქ ხალხი ძალიან თბილად შეგვხვდა, ლიტერატურაც სიხარულით გამოგვართვეს და ბევრი ბიბლიის შესწავლაც დავიწყეთ.

2008 წლის აპრილი: პაპუა-ახალი გვინეის საზღვართან მდებარე სამი კუნძულის — დაუანის, საიბაისა და ბოიგუს მონახულება გვქონდა დაგეგმილი. მაგრამ ამინდი გაფუჭდა, ამიტომ გეზი კუნძულ მაბიოგისკენ ავიღეთ. ეს კუნძული ჩვენი პორტიდან მხოლოდ 70 კილომეტრით არის დაშორებული, მაგრამ წყალქვეშა რიფებისთვის გვერდი რომ აგვევლო, მიხვეულ-მოხვეული გზით 140 კილომეტრის გავლა მოგვიწია.

დიდმა ტალღამ „ტეისან-უაიზე“ მიმაგრებული პატარა ნავი მოგლიჯა. უშველებელ ტალღებში მოგვიწია „ტეისან-უაის“ მობრუნება, რომ ნავი ისევ ჩაგვება. ჩვენი ეკიპაჟის წევრების უმეტესობა რყევისგან ცუდად გახდა.

ქადაგების ნებართვა მაბიოგზეც მოგვცეს. ადგილობრივებმა ისე თბილად მიგვიღეს, რომ სულ დაგვაგვიწყდა, როგორ ვიწვალეთ. ერთ ქალს, რომელიც ბიბლიოთეკაში მუშაობდა, ისე გაუხარდა სასიხარულო ცნობის მოსმენა, რომ დამატებითი ლიტერატურა გამოგვართვა ბიბლიოთეკაში დასაწყობად.

2008 წლის მაისიდან ოქტომბრამდე: უამინდობის გამო ვერ ვახერხებდით კუნძულებამდე მიღწევას. დროს უქმად არ ვკარგავდით — ვქადაგებდით, ვმუშაობდით და ნავს ვარემონტებდით.

ნავს სერიოზული შეკეთება სჭირდებოდა, ამიტომ უეიპას პორტში შევედით და ნავი უშველებელ ავტომისაბმელზე დავდეთ. სათქმელად ადვილია, გაკეთების რა მოგახსენოთ! ადგილობრივი კრების წევრები გვეხმარებოდნენ შედუღებაში, ღებვასა და სადურგლო საქმეებში. ზოგს საჭმელი მოჰქონდა, ზოგი იმ აუცილებლით გვამარაგებდა, რაც მომავალი მგზავრობისთვის დაგვჭირდებოდა. შეუძლებელია, არ დააფასო მათი გულუხვობა და დახმარება.

2008 წლის დეკემბერი: გეზი ისევ დაუანისკენ, საიბაისა და ბოიგუსკენ ავიღეთ. რადარის წყალობით თავი ავარიდეთ ტროპიკულ შტორმებს და ელექტრონული სანავიგაციო სისტემის დახმარებით გზა გავიკვლიეთ რიფებს შორის. მართალია, დაუანამდე ჩასასვლელად 12 საათი დაგვჭირდა, მაგრამ ის ყველაზე ლამაზი კუნძულია, რაც კი ოდესმე გვინახავს. ცადაზიდული კლდეები ღრუბლებშია მიმალული. დაუანელები სიამოვნებით ისმენდნენ სასიხარულო ცნობას. შევთანხმდით, რომ ბიბლიურ თემებზე საუბარს სახლში დაბრუნების შემდეგ ტელეფონით გავაგრძელებდით.

ერთ ქალს, ლეტის, საიდანღაც ხელში ჩაუვარდა ჩვენი ჟურნალები და ფილიალს მისწერა, რომ უფრო მეტი ლიტერატურის მიღება სურდა. ავსტრალიის ფილიალმა მას ლიტერატურა გაუგზავნა, ჩვენ კრებას კი წერილობით სთხოვა, როგორმე დავკავშირებოდით მას. საბოლოოდ ჩვენ შევხვდით ლეტის. გვიხარია, რომ შევძელით მცირე წვლილი შეგვეტანა მისი სულიერი მოთხოვნილებების დაკმაყოფილებაში.

კუნძულ საიბაიზე ადგილობრივი საბჭოს წევრმა არ მოგვცა ქადაგების უფლება, მაგრამ იმის ნება დაგვრთო, რომ ნათესავები მოგვენახულებინა და მათთან გვესაუბრა. ადგილობრივ ხელისუფლებასთან ხელშეკრულება მქონდა დადებული, რომ საიბაიზე პატარ-პატარა სამუშაოები შემესრულებინა და ასე დამეფარა სხვადასხვა ხარჯები.

ჩვენი ერთი და, ტესი, პაპუა-ახალი გვინეის ერთ-ერთი სოფლიდან არის, რომელიც საიბაიდან სულ რაღაც 4 კილომეტრში მდებარეობს. ავსტრალიის ხელისუფლებასთან დადებული ხელშეკრულება პაპუა-ახალი გვინეის მოსახლეობას საიბაიზე ვაჭრობის უფლებას აძლევს. ტესის საიბაიზე იმდენი თანასოფლელი შეხვდა, რომ ყველა მათგანისთვის ლიტერატურა არ ეყო. მას შემდეგ, რაც იეჰოვას მოწმე გახდა, ის პირველად შეხვდა თავის თანასოფლელებს. ჩვენ ნავიდან მას კიდევ ერთი ყუთი ლიტერატურა მივუტანეთ. ამ პუბლიკაციების უმეტესობა პაპუა-ახალი გვინეის პიჯინზე ანუ ტოკ-პისინის ენაზე იყო. ტესი ერთად შეკრებილ 30-ზე მეტ ადამიანს ესაუბრა სასიხარულო ცნობის შესახებ და მთელი ყუთი ლიტერატურა გაავრცელა. ტესის მშობლიურ სოფელში მისვლა მხოლოდ ნავითაა შესაძლებელი, რის გამოც იეჰოვას მოწმეები შეიძლება იქ ვერც კი მისულიყვნენ.

უკანასკნელ კუნძულამდე, ბოიგუმდე მისვლა არც ისე ადვილი იყო. კუნძულიდან მხოლოდ 4 კილომეტრით ვიყავით მოშორებული. წყლის სიღრმე სულ რაღაც 2,5 მეტრი იყო, რის გამოც ფსკერიდან ნავის ძირამდე მხოლოდ 70 სანტიმეტრი რჩებოდა. მე და ჩვენი ეკიპაჟის ერთ-ერთი წევრი პატარა ნავით ვცდილობდით კუნძულამდე მისასვლელი გზის პოვნას. კოკისპირულად წვიმდა და სულ დავსველდით. გზის გაკვლევას ორი საათი მოვანდომეთ.

როცა კუნძულს მივადექით, გაოცებულმა ადგილობრივებმა გვითხრეს, რომ არასწორი რუკა გვქონდა და იმ მხრიდან, საიდანაც ჩვენ შევედით, არც სანაპირო დაცვა და არც სხვა გემები შედიოდა. ადგილობრივი საბჭოს წევრმა ქადაგებაზე უარი გვითხრა, მაგრამ ნება დაგვრთო, კუნძულზე მცხოვრები ნათესავები მოგვენახულებინა და მათთვის გვექადაგა. ჩვენ გავითვალისწინეთ მისი სურვილი და მხოლოდ ერთ ოჯახს ვესტუმრეთ. ერთმა კაცმა გამოგვართვა წიგნი „რას გვასწავლის ბიბლია სინამდვილეში?“.a მან წიგნის კითხვა მაშინვე დაიწყო და კითხვები თავისი ბიბლიის უკანა ყდაზე ჩამოწერა. ის მოგვიანებით კვლავ შეხვდა მოწმეებს, როცა თერზდეის კუნძულს ესტუმრა.

2009 წლის იანვარი: კუნძულ მოასა და მაბიოგზე კვლავ მოვინახულეთ ისინი, ვინც ბიბლიით დაინტერესდნენ. ორივე კუნძულზე ძალიან თბილად მიგვიღეს. მოას ერთ-ერთი სოფლის, სენტ-პოლის მოსახლეობამ გვთხოვა, რომ მომავალში უფრო მალე მივსულიყავით. საბჭოს წევრმაც გვითხრა, რომ შეგვეძლო, სოფელში ნებისმიერ დროს გვექადაგა.

ტორესის სრუტეში 17 დასახლებული კუნძულია. რთულია იმის თქმა, შევძლებთ თუ არა ამ კუნძულებზე მცხოვრებ ყველა ადამიანთან დაკავშირებას, მაგრამ ერთი რამ კი ვიცით, რომ ჩვენს კრებაში, რომელიც ავსტრალიის შორეულ კუნძულზე მდებარეობს, ყველას გვიხარია, რომ შეგვიძლია განვადიდოთ იეჰოვა, ჩვენი დიდებული შემოქმედი.

[სქოლიო]

[რუკა 23 გვერდზე]

(სრული ტექსტი იხილეთ პუბლიკაციაში)

ავსტრალია

უეიპა

ბამაგა

ტორესის კუნძულები

პაპუა-ახალი გვინეა

[საავტორო უფლება]

Based on NASA/Visible Earth imagery

[რუკა 24, 25 გვერდებზე]

ბამაგა

კუნძული თერზდეი

კუნძული მოა

კუნძული უორაბერი

კუნძული ფორუმა

კუნძული მაბიოგი

კუნძული საიბაი

კუნძული დაუანი

კუნძული ბოიგუ

პაპუა-ახალი გვინეა

[საავტორო უფლება]

Based on NASA/Visible Earth imagery

[სურათი 24 გვერდზე]

გადმოვდივართ კუნძულ თერზდეის სანაპიროზე

[სურათი 24 გვერდზე]

კუნძულ საიბაიზე მივდივართ ხალხის მოსანახულებლად

[სურათი 25 გვერდზე]

სასიხარულო ცნობის ქადაგება ტოკ-პისინზე