რა არის იეჰოვას მოწმეების დარბაზი?

იეჰოვას მოწმეების დარბაზი არის შენობა, რომელსაც იეჰოვას მოწმეები ღვთის მსახურებისთვის იყენებენ. მსოფლიოში ათიათასობით ასეთი დარბაზია. ამ დარბაზებში ყოველკვირეულად იეჰოვას მოწმეების 105 000-ზე მეტი კრება ატარებს შეხვედრებს.

ყველა დარბაზს აქვს აუდიტორია, სადაც პროგრამის მიხედვით განიხილავენ ბიბლიას და კითხულობენ მოხსენებებს. აუდიტორიათა უმრავლესობას აქვს სცენა, საიდანაც შეხვედრებს უძღვებიან. დარბაზში ადგილები 100—300 კაცზეა გათვლილი. დარბაზს შეიძლება ჰქონდეს ერთი ან რამდენიმე დამატებითი ოთახი, კაბინეტი და პატარა ბიბლიოთეკა, სადაც ბიბლიური ლიტერატურა და ცნობარები ინახება. მათი გამოყენება თითოეულ იეჰოვას მოწმეს შეუძლია პირადი გამოკვლევისთვის.

ეკლესიებისგან განსხვავებით იეჰოვას მოწმეების დარბაზებში ვერ ნახავთ რელიგიურ ნივთებსა და სიმბოლოებს. იქ არც საკურთხეველი, არც ხატები და არც ჯვრებია. რატომ? იეჰოვას მოწმეებს სწამთ, რომ მათი გამოყენება ეწინააღმდეგება ბიბლიაში ჩაწერილ მითითებას: „გაექეცით კერპთაყვანისმცემლობას“ (1 კორინთელები 10:14; იოანე 4:24). მრავალი ტაძარი მდიდრულად არის აშენებული და გაფორმებული. მათგან განსხვავებით, იეჰოვას მოწმეების დარბაზები სადა და პრაქტიკულია. შეხვედრების დროს მთავარი ყურადღება ბიბლიის შესწავლას ეთმობა და არა შენობას.

წარსულში იეჰოვას მოწმეების დარბაზს სამეფო დარბაზიც ეწოდებოდა. საიდან მოდის ეს სახელწოდება? იეჰოვას მოწმეების დარბაზში შეხვედრების დროს, ყურადღება ძირითადად მახვილდება ბიბლიაზე და მის მთავარ თემაზე, „ღვთის სამეფოზე“, რომელზეც იესო ქადაგებდა (ლუკა 4:43). ამიტომ სახელწოდება სამეფო დარბაზი, რომელიც მას 1930-იან წლებში ეწოდა, ზუსტად გადმოსცემდა ამ შენობის მიზანს — მოემსახუროს ჭეშმარიტი თაყვანისმცემლობის წინ წაწევას და სამეფოს შესახებ სასიხარულო ცნობის ქადაგებას (მათე 24:14). ასე რომ, იეჰოვას მოწმეების დარბაზები არც გასართობი ღონისძიებებისთვის არის განკუთვნილი და არც კომერციული საქმიანობისთვის. სამშენებლო, საექსპლუატაციო და მსოფლიო მასშტაბით სამქადაგებლო საქმიანობის მხარდასაჭერად გაწეული ხარჯები ნებაყოფლობითი შესაწირავებით იფარება. შესაწირავის გაღებას არავის აიძულებენ. ყველა დარბაზში არის სპეციალური ყუთები, რომლებშიც ყველას სურვილისამებრ შეუძლია ჩააგდოს გარკვეული თანხა.

მთელ მსოფლიოში იეჰოვას მოწმეების დარბაზები ერთ მიზანს ემსახურება, თუმცა მათი ფორმა და ზომა განსხვავდება. შენობის დიზაინის განსხვავებულობა განპირობებულია კონკრეტულ ტერიტორიაზე ხელმისაწვდომი სამშენებლო მასალით, კლიმატითა და ადგილობრივი იეჰოვას მოწმეების ფინანსური მდგომარეობით. ზოგი შენობა აგებულია აგურით, ხით ან ქვით. ზოგი დარბაზი ბამბუკით არის აგებული და ჩალით გადახურული, გვერდები კი ნაწილობრივ ღია აქვს.

იეჰოვას მოწმეების დარბაზში მისვლა ყველა მსურველს შეუძლია (ებრაელები 10:25). იქ ყოველ კვირა იკითხება მოხსენებები, რომლებიც ბიბლიაზეა დაფუძნებული და საინტერესოა, როგორც თითოეული იეჰოვას მოწმისთვის, ისე სტუმრებისთვის. ასე რომ, თქვენც შეგიძლიათ ეწვიოთ თქვენს ტერიტორიაზე არსებულ იეჰოვას მოწმეების დარბაზს.