დაუახლოვდით ღმერთს

„აიყვანე შენი ვაჟი“

2 მეფეები 4:8—37

ადამიანისთვის შვილის სიკვდილი უდიდესი ტრაგედია და დანაკარგია. იეჰოვა ღმერთს შეუძლია, დაუბრუნოს მას ასეთი დანაკარგი. ჩვენ ვიცით, რომ ეს ჭეშმარიტებაა, რადგან ბიბლიურ დროში მან რამდენიმე კაცს მისცა მკვდრების აღდგენის ძალა. 2 მეფეების 4:8—37-ში აღწერილია, თუ როგორ აღადგინა წინასწარმეტყველმა ელისემ ერთი ყმაწვილი.

ეს მოხდა ქალაქ შუნემში. ერთი უშვილო ქალი და მისი ქმარი დიდ სიკეთეს ავლენდნენ ელისეს მიმართ. ისინი ყოველთვის უმასპინძლდებოდნენ მას და ღამის გასათევსაც აძლევდნენ. ერთ დღესაც მადლიერმა წინასწარმეტყველმა ქალს უთხრა: „გაისს ამ დროს ვაჟს ჩაიხუტებ“. ის ვერც კი იფიქრებდა, რომ ოდესმე ბავშვი ეყოლებოდა, მაგრამ ელისეს სიტყვები გამართლდა. სამწუხაროდ, ქალის სიხარული ხანმოკლე აღმოჩნდა. რამდენიმე წლის შემდეგ, როცა ბავშვი ყანაში იყო, ძალიან ასტკივდა თავი და სახლში წაიყვანეს, სადაც ის დედის მუხლებზე მოკვდა (მუხლები 16, 19, 20). მგლოვიარე დედამ აიღო შვილის ცხედარი და დაასვენა იმ ტახტზე, სადაც წინასწარმეტყველს ხშირად ეძინა.

ქალი დაუყოვნებლივ ადგა, მეუღლეს თანხმობა სთხოვა, დაადგა 30-კილომეტრიან გზას და ელისესთან მივიდა ქარმელის მთაზე. მასთან შეხვედრისას ის არ გოდებდა, არ ტიროდა და არც სხვა რაიმე სახით გამოხატავდა თავის მწუხარებას. იქნებ იმიტომ, რომ გაგონილი ჰქონდა, როგორ აღუდგინა ვაჟი ქვრივს ელისეს წინამორბედმა, ელიამ? (1 მეფეები 17:17—23). სჯეროდა ამ შუნამელ ქალს, რომ ელისეს შეეძლო მისი ვაჟის გაცოცხლება? როგორც არ უნდა ყოფილიყო, მან ელისეს უთხრა, რომ, თუ არ გაჰყვებოდა სახლში, ადგილიდან ფეხს არ მოიცვლიდა.

შუნემში ჩასული ელისე მარტო შევიდა თავისთვის კარგად ნაცნობ ოთახში და დაინახა, როგორ ესვენა ბავშვის უსიცოცხლო სხეული ტახტზე (მუხლი 32). წინასწარმეტყველმა ხვეწნა-მუდარით მიმართა ღმერთს დახმარებისთვის. შემდეგ შეეხო მიცვალებულს; „ნელ-ნელა გაუთბა ბავშვს სხეული“ და მისი გული კვლავ აძგერდა. ელისემ დაუძახა ბავშვის დედას და ისეთი რამ უთხრა, რამაც ის უსაზღვროდ გაახარა: „აიყვანე შენი ვაჟი“ (მუხლები 34, 36).

შუნამელი ქალის ვაჟის მკვდრეთით აღდგენის შემთხვევა ჩვენთვის იმედისა და ნუგეშის მომცემია. იეჰოვას ესმის, თუ რა მტკივნეულია მშობლებისთვის შვილის დაკარგვა. და რაც ყველაზე მთავარია, მას ერთი სული აქვს, როდის დაუბრუნებს მათ ამ დანაკარგს (იობი 14:14, 15). ბიბლიურ დროში ელისესა და სხვების მიერ მკვდრების აღდგენის შემთხვევები იმაზე მიანიშნებს, რასაც იეჰოვა გააკეთებს მომავალში უფრო დიდი მასშტაბით, როცა მისი სამართლიანი ახალი ქვეყნიერება დამყარდება.a

მკვდრეთით აღდგომის ბიბლიური იმედი მთლიანად ვერ გააქარწყლებს საყვარელი ადამიანის დაკარგვით გამოწვეულ ტკივილს. ერთმა ერთგულმა ქრისტიანმა მამაკაცმა, რომელსაც ერთადერთი შვილი მოუკვდა, თქვა: „მანამ არ გაქრება სრულად ჩემი ტკივილი, სანამ ჩემ საყვარელ შვილს კვლავ არ ჩავეხუტები“. წარმოიდგინეთ, რომ თქვენი საყვარელი ადამიანები, რომლებიც გარდაცვლილები არიან, კვლავ თქვენთან იქნებიან. იმაზე დაფიქრებაც კი, რომ კვლავ შეძლებთ მათ გულში ჩაკვრას, ტკივილს შეგიმსუბუქებთ. გსურთ, უფრო მეტი გაიგოთ იმ ღმერთზე, რომელიც ამ დიდებულ იმედს გვაძლევს?

[სქოლიო]