არასოდეს გვქონია ასეთი სულიერი სიმდიდრე!

¹ მრავალი ადამიანი ისწრაფის იმ დღისკენ, როცა შეძლებს, თქვას: „არასოდეს გვქონია ასეთი სიმდიდრე!“ მათი აზრით, ეს დღე მოვა, როცა ისინი მატერიალურად უზრუნველყოფილნი იქნებიან და როცა თავს ნებას დართავენ, რომ ‘მოისვენონ, ჭამონ, სვან და იმხიარულონ’ (ლუკ. 12:19). ამის საპირისპიროდ, ახლავე შეგვიძლია, ვთქვათ, რომ, სულიერი გაგებით, არავითარი სიკეთე არ გვაკლია (ფსალმ. 33:11). როგორ არის ეს შესაძლებელი?

² იგავნის 10:22 აცხადებს: „უფლის კურთხევაა, რომ ამდიდრებს“. ჩვენ, რომლებიც განვიცდით ასეთ ღვთიურ წყალობას, შეგვიძლია ჭეშმარიტად ვთქვათ, რომ ღმერთი „ყველაფერს უხვად გვაძლევს მოსახმარად“ (1 ტიმ. 6:17). ეს კი ყველაზე მდიდარ ხალხად გვაქცევს დედამიწაზე!

³ ჩვენი კურთხევების შეცნობა: ჩვენგან ცოტას თუ აქვს მატერიალური ნივთების სიუხვე. მაგრამ კურთხეულნი ვართ, რადგან მეტისმეტად არ ვღელავთ ყოველდღიურ მოთხოვნილებებზე. იეჰოვამ იცის, რა გვესაჭიროება და აღგვითქვა, რომ უზრუნველგვყოფს ამით (მათ. 6:31–33). მისი სიტყვები ჩვენს გონებას სიმშვიდით ავსებს, რომელიც ჭეშმარიტად ფასდაუდებელია.

⁴ ჩვენი სულიერი კურთხევები კიდევ უფრო დიდია. ჩვენი სიცოცხლე დამოკიდებულია სულიერ საზრდოზე, რომელიც იეჰოვასგან მოდის (მათ. 4:4). ისინი, რომლებიც ქვეყნიურ წყაროებში ეძებენ სულიერ საზრდოს, მშივრები არიან, როცა ჩვენ უხვად ვიკვებებით სულიერი საზრდოთი (ეს. 65:13). ‘ერთგული მონა’ მარადიულ სიცოცხლემდე მიმყვანი შემეცნების ულევ მარაგს ხელმისაწვდომს ხდის ჩვენთვის (მათ. 24:45; იოან. 17:3).

⁵ ჩვენი ძვირფასი მსოფლიო საძმო დედამიწის ყოველ კუთხეში მცხოვრები, სიყვარულით აღსავსე ძმებისა და დების გულთბილ ურთიერთობას გვთავაზობს (იოან. 13:35). ადგილობრივი კრება მშვიდობიანი თავშესაფარია, სადაც ვპოულობთ სიმშვიდესა და გამოცოცხლებას. უხუცესები ფხიზლობენ ჩვენს სულებზე და გვეხმარებიან მრავალგვარი პრობლემის გამკლავებაში (ებრ. 13:17). ძმებთან დაახლოებას შედეგად მოაქვს ურთიერთგამხნევება, რაც გვაძლიერებს, რომ შეუდრეკელი ვიყოთ (რომ. 1:11, 12).

⁶ ჩვენი საქმიანობაც კი კურთხევაა. მრავალი სამუშაო მოსაბეზრებელი და განუხორციელებელია. კეთილი ცნობის ქადაგებას სხვებისთვის სიხარული მოაქვს და ჩვენთვის — ბედნიერება (საქ. 20:35). ჩვენ ჭეშმარიტად შეგვიძლია ვპოვოთ სიკეთე მთელი ჩვენი მძიმე შრომისთვის (ეკლ. 2:24).

⁷ პირველ ყოვლისა, გვაქვს მომავლის საუცხოო იმედი (რომ. 12:12). ჩვენ ველით სრულყოფილ, ახალ, სამართლიან ქვეყნიერებას, სადაც ჩვენს საყვარელ ადამიანებთან ერთად მარადიულად ვიცხოვრებთ, ბედნიერად და მშვიდობიანად! ეს იმედი იმაზე საუკეთესო საუნჯეა, რის შემოთავაზებაც ამ წუთისოფელს შეუძლია (1 ტიმ. 6:19).

⁸ როგორ შეგვიძლია მადლიერების გამოვლენა? იეჰოვას ვერასოდეს გადავუხდით იმას, რაც გაგვიკეთა. ჩვენ მხოლოდ მადლიერება შეგვიძლია გამოვავლინოთ 1) ყოველდღიური მადლობის შეწირვით დაუმსახურებელი სიკეთისთვის (ეფეს. 5:20), 2) მორჩილებით, რაც სიყვარულის გამოვლენაა (1 იოან. 5:3), 3) მისი სახელის განწმენდით, რასაც კეთილი ცნობის ქადაგებით გავაკეთებდით (ფსალმ. 82:19) და 4) მთელი გულით თანამშრომლობისას ქრისტიანული კრების მხარდაჭერით (1 ტიმ. 3:15).

⁹ სრული საფუძველი გვაქვს იმისთვის, რომ ვიყოთ დედამიწაზე ყველაზე ბედნიერი ხალხი (ფსალმ. 143:15ბ). დაე, ჩვენმა აზროვნებამ, ყოფაქცევამ და მსახურებამ აირეკლოს სიხარული, რომელსაც ვგრძნობთ ჩვენს სულიერ სამოთხეში. არასოდეს გვქონია ასეთი სიმდიდრე!