სამსახურებრივი თანაშემწეები ძვირფას სამსახურს სწევენ

¹ „მათ დანიშვნამდე დაამტკიცეს, რომ ერთგულები არიან, და თავიანთი რწმენა გამოავლინეს სამეფო მსახურებაში გულმოდგინებით და სხვებისთვის რწმენის განმტკიცებაში დახმარების აღმოჩენით“. ამას ამბობს წიგნი „ორგანიზებული ვართ ჩვენი მსახურების შესასრულებლად“ (რუს.) 57-ე გვერდზე სამსახურებრივი თანაშემწეების შესახებ. მართლაც, მისაბაძია ჩვენი სამსახურებრივი თანაშემწეების სულიერი მაგალითი. მათთან და უხუცესებთან თანამშრომლობა ‘ზრდის სხეულს თავისი თავის სიყვარულში აღსაშენებლად’ (ეფეს. 4:16).

² კრებაში სამსახურებრივ თანაშემწეებს მნიშვნელოვანი როლი აკისრიათ. დაფიქრდი, რა ძვირფას სამსახურს ასრულებენ ისინი! ეს ძმები ზრუნავენ კრების ფინანსებზე, ლიტერატურაზე, ჟურნალებსა და უბნებზე; ასრულებენ მომსახურეების მოვალეობას; ემსახურებიან ხმის გამაძლიერებელ აპარატურას და ზრუნავენ სამეფო დარბაზის ტექნიკურ მომსახურებაზე; მონაწილეობენ თეოკრატიული სამსახურის სკოლაში და სამსახურებრივ შეხვედრაზე. ზოგი მათგანი შეიძლება საჯარო მოხსენებებითაც გამოდის ან კრების რომელიმე შეხვედრასაც უძღვება. ფიზიკური სხეულის ასოების მსგავსად, სამსახურებრივი თანაშემწეები ჩვენთვის საჭირო სამსახურს ასრულებენ (1 კორ. 12:12–26).

³ როცა სხვები ხედავენ, რომ სამსახურებრივი თანაშემწეები ურთიერთპატივისცემითა და გაგებით ჰარმონიულად თანამშრომლობენ უხუცესებთან როგორც მსახურთა ერთი ჯგუფის ნაწილი, თვითონაც აღიძვრებიან იმავესკენ (კოლ. 2:19). ყოველკვირა თავიანთი მოვალეობების ერთგულად შესრულებით და სხვებისადმი ინტერესის გამოვლენით სამსახურებრივ თანაშემწეებს წვლილი შეაქვთ კრების სულიერ წინსვლაში.

⁴ როგორ გამოვხატოთ მადლიერება მძიმედ მომუშავე სამსახურებრივი თანაშემწეებისთვის? უნდა გავეცნოთ მათს მოვალეობებს და მზადყოფნით ვითანამშრომლოთ მათთან, როცა დახმარებას გვთხოვენ. სიტყვითა თუ საქმით უნდა ვაგრძნობინოთ, რომ ვაფასებთ მათს შრომას (იგავ. 15:23). ისინი, ვინც ჩვენთვის მძიმედ შრომობს, გულწრფელ მადლიერებას იმსახურებენ (1 თეს. 5:12, 13).

⁵ სამსახურებრივი თანაშემწეებისთვის ღვთის სიტყვაში მოცემულია როლი, რომელსაც ისინი ასრულებენ, და მოთხოვნები, რომლებსაც შეესაბამებიან (1 ტიმ. 3:8–10, 12, 13). მათი ძვირფასი წმინდა მსახურება აუცილებელია კრების ფუნქციონირებისთვის. ეს ძმები იმსახურებენ მუდმივ გამხნევებას, რადგან მათაც ‘უხვად აქვთ უფლის საქმე’ (1 კორ. 15:58).