ქვეყნიური განათლება და შენი სულიერი მიზნები
1 სკოლაში კარგად სწავლა დაგეხმარება აუცილებელი საშუალო ცოდნის მიღებაში — ისწავლი წერა-კითხვას, გექნება ზოგადი წარმოდგენა გეოგრაფიაში, ისტორიაში, მათემატიკასა და საბუნებისმეტყველო საგნებში. ამ პერიოდში შენ შეგიძლია განივითარო საღი აზროვნების, ფაქტების გაანალიზების, პრობლემების გადაჭრისა და ნაყოფიერი იდეების წამოყენების უნარი. ასეთი ცოდნის მიღება მომავალში კარგ სამსახურს გაგიწევს. როგორ შეგიძლია ქვეყნიური განათლების სულიერ მიზნებთან დაკავშირება და როგორ დაგეხმარება ეს ‘პრაქტიკული სიბრძნისა და განსჯის უნარის’ შეძენაში? (იგავ. 3:21, 22, აქ).
2 მოემზადე ღვთისმსახურებისთვის. სკოლაში სწავლის დროს კლასში ყურადღებით იყავი და საშინაო დავალებები კარგად შეასრულე. თუ კითხვასა და სწავლაში გაიწაფები, უფრო გაგიადვილდება ღვთის სიტყვის გამოკვლევა და სულიერი სიძლიერის შენარჩუნება (საქ. 17:11). კარგი ცოდნა მსახურების დროს დაგეხმარება ნებისმიერი ინტერესისა და რწმენის მქონე სხვადასხვა წარმოშობის ადამიანებთან კონტაქტის დამყარებაში. სკოლაში მიღებული განათლება სასარგებლო იქნება ღვთის ორგანიზაციაში ქრისტიანული პასუხისმგებლობების შესასრულებლად (შეადარე 2 ტიმოთე 2:21; 4:11).
3 ისწავლე, რომ თავი ირჩინო. სკოლის დამთავრების შემდეგ შეგიძლია ისეთი რამ ისწავლო, რომ თავი ირჩინო (შეადარე 1 ტიმოთე 5:8). კარგად მოიფიქრე, რას ისწავლი. იმის ნაცვლად, რომ აირჩიო დარგი, რომელიც ნაკლებად საჭიროა, ისეთი რამე ისწავლე, რაც სამსახურის პოვნას გაგიადვილებს (იგავ. 22:29). ამგვარი მომზადება თავის რჩენის შესაძლებლობას მოგცემს, თუ გადაწყვეტილი გაქვს, იმსახურო იქ, სადაც მეტი მოთხოვნილებაა (შეადარე საქმეები 18:1–4).
4 სკოლაში მიღებული კარგი ზოგადი ცოდნა დაგეხმარება მსახურების გაფართოებაში. გულმოდგინედ აწონ-დაწონე, რას ისწავლი, რომ თავიც ირჩინო და იეჰოვასაც ემსახურო. ასეთი განათლება ხელს შეგიწყობს სულიერი მიზნების მიღწევაში.