მოემზადე ესაიას წინასწარმეტყველების შესასწავლად!

¹ „ღვთის ერთგულ თაყვანისმცემლებს შეუძლიათ დარწმუნებული იყვნენ, რომ იეჰოვა. . . ერთი დღითაც კი არ გადააცილებს სატანის წუთისოფლის აღსასრულს, ვიდრე ამას სამართლიანობა მოითხოვს“. რა გამამხნევებელი აზრია! საიდან არის ციტირებული? „ესაიას წინასწარმეტყველება — სინათლე მთელი კაცობრიობისთვის I“. გვაძლევს ესაიას წინასწარმეტყველება იმის მიზეზს, რომ ასეთ გამამხნევებელ დასკვნამდე მივიდეთ? დიახ! ბიბლიის ამ წიგნში გადარჩენის თემა განსაკუთრებულად და ნათლად არის ხაზგასმული (ეს. 25:9). ამიტომაც ჩვენთვის ძალიან გამამხნევებელი იქნება ღვთის სიტყვის ამ ნაწილის შესწავლა კრების წიგნის შესწავლებზე. ამისათვის დავესწრებით მას ყოველკვირეულად? რატომ უნდა დავესწროთ?

² ესაიას 30:20-ში იეჰოვას „[დიდებული, აქ] მოძღვარი“ ეწოდება. თითოეულმა ქრისტიანმა ყურადღებით უნდა მოუსმინოს იეჰოვას, რომელიც თავისი სიტყვისა და ‘ერთგული და გონიერი მონის’ მიერ მოწოდებული, ბიბლიაზე დაფუძნებული პუბლიკაციების მეშვეობით გვესაუბრება (მათ. 24:45; ეს. 48:17, 18). იგივე შეიძლება ითქვას წიგნზე „ესაიას წინასწარმეტყველება — სინათლე მთელი კაცობრიობისთვის I“. როგორ შეგიძლია მაქსიმალურად ისარგებლო მისი შესწავლით?

³ მოემზადე მონაწილეობის მისაღებად. ყოველკვირეულად საკმარისი დრო გამოუყავი წიგნის შესწავლისთვის მომზადებას. წაიკითხე განსახილველი მასალის ყოველი აბზაცი. დაუფიქრდი თითოეულ კითხვას. შენს წიგნში მონიშნე პასუხები. ესაიადან ციტირებული მუხლები წიგნში შავი შრიფტით არის მოცემული. ყურადღებით წაიკითხე ისინი. რაც შეეხება სხვა მუხლებს, მოძებნე, რომ გაიგო, თუ როგორ უკავშირდება მასალას. იფიქრე ნასწავლზე. შემდეგ ის, რაც მოამზადე, შენი წიგნის შესწავლის ჯგუფს გაუზიარე.

⁴ წიგნის შესწავლის ხელმძღვანელი უნდა დაეხმაროს ყველა დამსწრეს, რომ ისარგებლონ ბიბლიით და შეაფასონ განხილული მასალის პრაქტიკული ღირებულება. თუ პირველ კომენტარს აკეთებ, მარტივად და კონკრეტულად უპასუხე. თუ სხვამ უკვე უპასუხა, შეგიძლია უფრო დეტალურად განიხილო მოცემული საკითხი. შეგიძლია ახსნა, თუ როგორ უკავშირდება განხილული ბიბლიური მუხლი თემას. ეცადე, საკუთარი სიტყვებით უპასუხო და ისიამოვნე განხილვაში მონაწილეობის მიღებით.

⁵ დაე ერთობლივად, გულმოდგინედ განვიხილოთ ესაიას წიგნში მოცემული ძვირფასი ცნობა. ეს წაგვახალისებს, რომ ყოველდღიურად სიხარულით მოველოდეთ იეჰოვასგან ხსნას! (ეს. 30:18).