მზად ხარ იმსახურო იქ, სადაც დახმარებაა საჭირო?
1 გიფიქრია როდისმე საცხოვრებლად ისეთ ადგილას გადასვლაზე, სადაც მაუწყებლები ცოტანი არიან? გადასვლა რომ შემოეთავაზებინათ, მიბაძავდი პავლე მოციქულის მიერ დატოვებულ მაგალითს და გადახვიდოდი? (საქ. 16:9, 10). ბევრ კრებაში საკმარისად არ არიან სულიერად მოწიფული ოჯახები. ტერიტორიის დასამუშავებლად პიონერების დახმარებაა საჭირო. ასევე საჭირონი არიან უხუცესები და მომსახურეები. ჩვენს ტერიტორიაზე ასეთი საჭიროება დიდ ქალაქებშიც კი არის. ზოგჯერ კრების ტერიტორიაში შედის პატარა დასახლებები, რომლებიც საკმაოდ შორიშორს მდებარეობს. უახლოესი სამეფო დარბაზი შეიძლება ძალიან შორს იყოს. სამუშაოს შოვნა არც ისე ადვილია. ამინდიც ყოველთვის არ არის კარგი. გადახვიდოდი ასეთ ადგილას? იქნებოდა ასეთი ნაბიჯის გადადგმა კურთხევების მომტანი?
2 საჭიროა რწმენა და ნდობა: ღვთის მითითების შესაბამისად, აბრამმა დატოვა მშობლიური ქალაქი ური და ცოლთან, ძმისშვილთან და ხანდაზმულ მამასთან, თერახთან, ერთად ხარანისკენ გაემართა, რომელიც ურიდან დაახლოებით 1 000 კილომეტრში მდებარეობდა (დაბ. 11:31, 32; ნეემ. 9:7). თერახის სიკვდილის შემდეგ იეჰოვამ აბრამს უთხრა: „დატოვე შენი ქვეყანა, სანათესავო . . . და წადი იმ ქვეყანაში, რომელსაც გიჩვენებ“. აბრამი ამ დროს 75 წლის იყო. ის, სარა და ლოტი დაემორჩილნენ ამ მითითებას და გზას გაუდგნენ (დაბ. 12:1, 4, 5, აქ). მართალია, აბრამს საცხოვრებელი ადგილი იმის გამო არ შეუცვლია, რომ სადმე მისი დახმარება სჭირდებოდათ. მაგრამ, რა დაეხმარა მას ასეთი გაბედული ნაბიჯის გადადგმაში?
3 ასეთი გაბედული ნაბიჯის გადადგმაში აბრამს რწმენა და ღვთისადმი ნდობა დაეხმარა. ის მზად იყო, შეეცვალა საკუთარი შეხედულებები და ცხოვრების წესი. მას უარის თქმა მოუწია მყუდრო ცხოვრებაზე, რომელიც ნათესავებს შორის ექნებოდა. მაგრამ აბრამს სწამდა, რომ იეჰოვა იზრუნებდა მასზე და მის ოჯახზე. დღეს მრავალი და-ძმა მსგავსად ავლენს იეჰოვასადმი ნდობას.
4 მოკლევადიანი დანიშვნები: განგიცდია როდისმე კურთხევები, რომლებიც დაუნიშნავ ტერიტორიაზე ქადაგებას მოჰყვება? მაგალითად, გასულ წელს რუსეთში დაახლოებით 600 ჯგუფი ქადაგებდა დაუნიშნავ ტერიტორიებზე. წლის განმავლობაში 4 177-მა მაუწყებელმა მიიღო მონაწილეობა ასეთი სახის მსახურებაში. ამ დავალების შესასრულებლად ზოგს საკმაოდ დიდი მანძილის გავლა უწევდა. გამოიღო შედეგი ასეთმა ძალისხმევამ?
5 ჩვენ მივიღეთ მრავალი წერილი მაუწყებლებისგან, სადაც ისინი მადლიერებას გამოთქვამენ. მოვიყვანთ რამდენიმე ციტატას: „ჩვენს ტერიტორიაში დაახლოებით 250 სახლი შედიოდა. ასე რომ, ის არ იყო ძალიან დიდი. სამაგიეროდ, საგულდაგულოდ დავამუშავეთ . . . როცა ვბრუნდებოდით, მეგობრებივით გამოგვაცილეს და გვთხოვეს, რომ კიდევ მივსულიყავით. ზოგს ცრემლებიც კი წამოსცვივდა. იმ ქუჩის მაცხოვრებლებიდან, რომელზეც ჩვენ ვცხოვრობდით, თითქმის ყველა გამოვიდა ჩვენს გასაცილებლად. ჩვენ დიდი სიხარული განვიცადეთ და ძალიან გავმხნევდით, ასევე შევიძინეთ ბევრი ახალი მეგობარი“. ერთი და წერს: „მსახურებისას ბევრი დაგვთანხმდა წერილების მეშვეობით ურთიერთობის გაგრძელებაზე. ახლა ბიბლიის 77 შესწავლას ვატარებთ წერილების მეშვეობით . . . პირადად მე ეს ორი კვირა ძალიან დიდ პერიოდად მომეჩვენა. ეს იყო შესანიშნავი დრო, რადგან უკეთესად ვისწავლე იეჰოვაზე მინდობა, ასევე ლოცვებზე პასუხისა და მისი ხელმძღვანელობის დანახვა“. მაუწყებელთა უმრავლესობა თვლის, რომ ცოტა ხნით ყოფნაც კი ისეთ ტერიტორიებზე, სადაც მაუწყებლები საკმარისად არ არიან, დაეხმარა მათ მსახურების უფრო მეტად დაფასებაში. გაესაუბრე მათ, ვინც უკვე იყო ასეთ ტერიტორიებზე. მათი საუბრიდან გაიგებ, რომ მათ სულიერობაზე ამან ძალიან კარგად იმოქმედა და, ალბათ, კიდევ წავლენ დაშორებულ ტერიტორიაზე, თუ მიეცემათ ამის შესაძლებლობა.
6 დროებითი დანიშვნის მიღება ისეთ ტერიტორიაზე, სადაც მაუწყებლები ცოტანი არიან, შეიძლება კიდევ ერთ მიზანს მოემსახუროს — ეს დაგეხმარება ‘იმ ხარჯების გამოთვლაში’, რომელიც ქვეყნის სხვა ნაწილში საცხოვრებლად გადასვლისთვის იქნებოდა საჭირო (ლუკა 14:28).
7 იეჰოვას განზრახვის თანახმად, სასიხარულო ცნობა აღსასრულის მოსვლამდე „მსოფლიოში ყველა ხალხს“ უნდა ექადაგოს (მათე 24:14). აქედან გამომდინარე, თუ მდგომარეობა საშუალებას გაძლევს, ხომ არ გადახვიდოდი საცხოვრებლად იქ, სადაც დახმარებაა საჭირო? დახმარება კი ბევრგან არის საჭირო.
8 საცხოვრებლად გადასვლა იქ, სადაც დახმარებაა საჭირო. თუ სერიოზულად ფიქრობ სხვაგან გადასვლაზე, ჰკითხე კრების სამსახურებრივ კომიტეტს, რომელ ქალაქებშია მაუწყებლების საჭიროება. სამსახურებრივი კომიტეტი ოფისის საშუალებით დაგეხმარება ამ ინფორმაციის მიღებაში. შეგიძლია გადახვიდე იქ, სადაც დახმარებაა საჭირო? გასული ხარ პენსიაზე? გაქვს სტაბილური შემოსავალი? შეგიძლია მომსახურების ამა თუ იმ სფეროში იმუშაო? შეგიძლია თავის რჩენა პარიკმახერად, ფეხსაცმლის შემკეთებლად, მეეზოვედ, დამლაგებლად ან კომპიუტერზე მუშაობით? თუ პირადად შენ ვერ მოახერხებ გადასვლას, შეგიძლია ოჯახის წევრს დაეხმარო, სხვა ტერიტორიაზე იმსახუროს?
9 თუ ლოცვით აწონ-დაწონვის შემდეგ იმ დასკვნამდე მიხვალ, რომ შეგიძლია სხვა ტერიტორიაზე გადასვლა, ამის შესახებ ოჯახის წევრებს და შენი კრების უხუცესებს გაესაუბრე. შემდეგ დაწერე წერილი და გადაეცი უხუცესებს, რათა ოფისში გაგზავნამდე სარეკომენდაციო წერილიც დაურთონ.
10 რა უნდა მოიხსენიო წერილში? ასაკი, მონათვლის თარიღი, ოჯახური მდგომარეობა და პასუხისმგებლობები კრებაში. ასევე მოიხსენიე, გყავს თუ არა არასრულწლოვანი ბავშვები. აღნიშნე, თუ შენი პირობების გათვალისწინებით სად ამჯობინებდი მსახურებას. მაგალითად, შეგიძლია იცხოვრო იქ, სადაც ცხელა ან ნოტიო ჰავაა? შეძლებ იქ მსახურებას, სადაც ცივი ზამთარი იცის? ხომ არ გაგიჭირდება მაღალმთიან რეგიონებში ცხოვრება? რომელიმე სხვა ენა თუ იცი? ოფისი შეეცდება იმ კრებასთან დაგაკავშიროს, რომელიც ზრუნავს შესაბამის ტერიტორიაზე.
11 გაქვს სხვა ტერიტორიაზე გადასვლის დიდი სურვილი? გაძლევს პირობები იქ მსახურების საშუალებას, სადაც დახმარებაა საჭირო? თუ ასეა, იმოქმედე და შენც გახდები იმის მოწმე, თუ რა უხვად აკურთხებს იეჰოვა მათ, ვინც ენდობა მას და თავგანწირვის სულს ავლენს! (ფსალმ. 33:9; მალ. 3:10).