უხვად თესვას, უხვი კურთხევები მოაქვს
1 თითოეული ჩვენგანი მოუთმენლად მოელის იმ დიდებული აღთქმების შესრულებას, რომლებიც ღვთის სიტყვაშია ჩაწერილი. იეჰოვა დღესაც გვაძლევს კურთხევებს, რომლებიც ცხოვრებას გვიხალისებს. ის, თუ რამდენად სარგებლის მომტანია პირადად ჩვენთვის ეს კურთხევები, ძირითადად, ჩვენს ძალისხმევაზეა დამოკიდებული. როგორც მოციქულმა პავლემ თქვა, „ვინც უხვად თესავს, უხვად მოიმკის“ (2 კორ. 9:6, სსგ). მოდი განვიხილოთ ის ორი სფერო, სადაც ამ პრინციპის გამოყენება შეგვიძლია.
2 ჩვენი მსახურება: ნებისმიერ დროს, როცა კი ამის გაკეთება შეგვიძლია, სასიხარულო ცნობის სხვებისთვის გაცნობას უამრავი კურთხევა მოაქვს (იგავ. 3:27, 28). მოსაწონია, რომ ბევრი მსახურების გაფართოებით უხვად თესავს. მაგალითად, დამხმარე პიონერად ან პიონერად იწყებს მსახურებას. თითოეულ ჩვენგანს შეუძლია უხვად თესოს დაინტერესებული ადამიანების განმეორებით მონახულებით და, როდესაც ეს შესაძლებელია, ბიბლიის შესწავლის შეთავაზებით (რომ. 12:11). ჩვენს ასეთ მცდელობას გამამხნევებელი შემთხვევები მოსდევს, რაც ჩვენს მსახურებას უფრო სასიხარულოს ხდის.
3 სამეფოს ინტერესების მხარდაჭერა: პავლემ „უხვად თესვა“ შესაწირავებთან დაკავშირებით მოიხსენია (2 კორ. 9:6, 7, 11, 13, სსგ). დღეს ჩვენც ბევრი რამის გაკეთება შეგვიძლია სამეფოს ინტერესების მხარდასაჭერად ფიზიკურად თუ ფინანსურად. შეიძლება მონაწილეობა მივიღოთ სამეფო და საკონგრესო დარბაზების მშენებლობაში ან ამ თაყვანისცემის ადგილების დასუფთავებასა და შეკეთებაში. გარდა ამისა, შეიძლება კრებისთვის ან მთელ მსოფლიოში სამეფოს შესახებ ქადაგებისა და მოწაფეების მომზადების საქმიანობისთვის შესაწირავები გავიღოთ. რადგან თითოეულ ჩვენგანს შეგვაქვს წვლილი ამ საქმიანობაში, დიდად გვახარებს იმის ხილვა, რომ იეჰოვა ამ დავალების შესრულებისას კურთხევებს არ გვაკლებს (მალ. 3:10; ლუკ. 6:38).
4 ღვთის სიტყვა მოგვიწოდებს, რომ ვიყოთ ‘ქველმოქმედნი, გავმდიდრდეთ კეთილი საქმეებით, ვიყოთ გულუხვნი და გამზიარებელნი’. თუ ყურად ვიღებთ ამ სიტყვებს, დღესვე უამრავ კურთხევას მივიღებთ. ამასთანავე, ‘დავიუნჯებთ საუნჯეს მტკიცე საფუძვლად მომავლისათვის [და] ჭეშმარიტ სიცოცხლეს’ (1 ტიმ. 6:18, 19).