ახალი სარაიონო კონგრესის პროგრამა

¹ ჩვენმა წინამძღოლმა, იესო ქრისტემ, იწინასწარმეტყველა, რომ ქრისტიანები გასაჭირში ჩაცვივდებოდნენ (მათე 24:9). რა თვალსაზრისი უნდა გვქონდეს განსაცდელზე? რა დაგვეხმარება იმაში, რომ გავუძლოთ გასაჭირს? 2004 სამსახურებრივი წლის სარაიონო კონგრესის პროგრამა პასუხს გაგვცემს ამ კითხვებზე. კონგრესის თემაა „იხარეთ იმედში, მომთმენნი იყავით გასაჭირში“ (რომაელთა 12:12).

² ორი მოხსენებათა სერია: პირველ მოხსენებათა სერიაში, სახელწოდებით „მოთმინებით გამოიღეთ ნაყოფი“, განხილული იქნება, როგორ შეგვიძლია ნაყოფის გამოღება. ჩართული იქნება ინტერვიუები რამდენიმე მაუწყებელთან, რომლებიც გაგვიზიარებენ თავიანთ გამოცდილებას, თუ როგორ ქადაგებენ და ასწავლიან ხალხს ღვთის სიტყვას დღეს, როდესაც დრო არ ითმენს. მშობლებისთვის განსაკუთრებით საყურადღებო იქნება მოხსენება სახელწოდებით „როდესაც იეჰოვა გვწვრთნის“, რომელიც დაგვანახვებს, როგორ უნდა იმსჯელონ მშობლებმა შვილებთან. ამ მოხსენებათა სერიაში ბოლო გამომსვლელი ყურადღებას გაამახვილებს იმაზე, თუ როგორ უნდა დავიცვათ თავი წუთისოფლის მხრიდან შემოტევებისგან, რათა უნაყოფოები არ გავხდეთ (მარკოზი 4:19).

³ „მოთმინებით გაირბინეთ სარბიელი“ — ასეთია მეორე მოხსენებათა სერიის სახელწოდება. მასში განხილული იქნება, რით ჰგავს ჩვენი ცხოვრების გზა სარბიელს. რატომ გვჭირდება სარბიელის გარბენისას წესების დაცვა? როგორ უნდა ჩამოვიცილოთ ყოველგვარი ტვირთი, რათა სიცოცხლის მოსაპოვებლად რბოლისას არ გადავიღალოთ? ბიბლიაზე დაფუძნებული დროული რჩევები თითოეულს დაგვეხმარება რბოლის მოთმინებით გაგრძელებაში.

⁴ მოთმინებას ღვთის მოწონება მოაქვს. მოხსენებები, რომლებსაც მიმომსვლელი ზედამხედველები წარმოთქვამენ, რწმენის განმამტკიცებელი იქნება მათთვის, ვინც ყურადღებით ისმენს და იყენებს რჩევებს. საოლქო ზედამხედველის ერთ-ერთი მოხსენების სახელწოდებაა „მოთმინებას ღვთის მოწონება მოაქვს“. საჯარო მოხსენებაში პასუხები გაეცემა კითხვებს, ვისზე უნდა დაამყარონ იმედი ერებმა და რა იგულისხმება ამაში. დასკვნით მოხსენებაში „მოთმინებით მოიპოვებთ თქვენს სულებს“ განხილული იქნება, როგორ შეძლო იესომ უსამართლობის ატანა ისე, რომ მის გულს ბოროტება არ გაჰკარებია.

⁵ არ დაგავიწყდეთ, მოიტანოთ თეოკრატიული სამსახურის სკოლის სახელმძღვანელო და „საგუშაგო კოშკი“, რომელშიც მოცემული იქნება კონგრესის კვირაში განსახილველი სასწავლო სტატია. გააკეთეთ ჩანაწერები, რომლებიც მოსმენაში დაგეხმარებათ და მომავალშიც დაგჭირდებათ. კონგრესის პროგრამას მოგვიანებით კრებებში გავიმეორებთ.

⁶ ეს სულიერი ნადიმი იეჰოვამ მოგვიმზადა. მობრძანდით და მიირთვით სულიერი საზრდო! სიხარულით ვიყიჟინებთ, თუ დავესწრებით კონგრესს, რათა სარგებლობა მივიღოთ მთელი პროგრამიდან (ესაია 65:14, სსგ).