კურთხევები პიონერულ მსახურებაში

1, 2. რა კურთხევებთან არის დაკავშირებული პიონერული მსახურება და რატომ?

¹ „ვიცი, რომ ვერავითარი სამუშაო ვერ მომიტანდა იმ კმაყოფილებას, რაც ჭეშმარიტების სხვებისთვის გაზიარებას მოაქვს“, — თქვა ერთმა პიონერმა. სხვამ კი აღნიშნა: „ყოველ ღამე ტკბილად მძინავს და გული სიხარულით მაქვს სავსე“. ეს სიტყვები ყველა იმ დისა და ძმის აზრს გამოხატავს, რომლებმაც გამოცადეს პიონერული მსახურების კურთხევები (იგავ. 10:22).

² ღვთის სიტყვის სასიცოცხლო ცოდნის შეძენაში სხვებისთვის დახმარებას ნამდვილი კმაყოფილება მოაქვს (საქ. 20:35; 1 თეს. 2:19, 20). „ამაღელვებელი და რწმენის განმამტკიცებელია იმის ხილვა, თუ რამდენად ძლიერია ღვთის სიტყვა, რომელიც აღძრავს ადამიანებს, შეიცვალონ ცხოვრების წესი“, — წერდა ერთი ძმა, რომელიც დიდი ხანია, რაც პიონერად მსახურობს. დიახ, სხვების დახმარებითა და ბიბლიის შესწავლების ჩატარებით პიონერები იღებენ ასეთ კურთხევებს.

3, 4. როგორ გვეხმარება პიონერული მსახურება იეჰოვაზე მინდობის სწავლაში და სულიერ ზრდაში?

³ იეჰოვაზე მინდობა. მსახურებისას პიონერებს ყოველდღიურად უწევთ ღვთის სულზე მინდობა. ეს მათ იცავს და ეხმარება „სულის ნაყოფის“ განვითარებაში (გალ. 5:16, 22, 23). გარდა ამისა, პიონერები გამუდმებით იყენებენ ღვთის სიტყვას. ამიტომ, ჩვეულებრივ, ისინი დახელოვნებულები არიან ბიბლიის გამოყენებაში ჭეშმარიტების დასაცავად და სხვების გასამხნევებლად (2 ტიმ. 2:15). ძმა, რომელიც ათეული წლების განმავლობაში პიონერად მსახურობდა, შენიშნავს: „პიონერული მსახურება დამეხმარა ბიბლიის ღრმა გაგებაში. ამ ცოდნას იმისათვის ვიყენებ, რომ დავეხმარო ადამიანებს, გაიგონ იეჰოვასა და მისი განზრახვების შესახებ“. რა დიდი კურთხევაა!

⁴ პიონერები იეჰოვას სხვა მხრივაც უნდა ენდობოდნენ. მათი რწმენა კიდევ უფრო მტკიცდება, როდესაც ხედავენ, თუ როგორ აკურთხებს იეჰოვა მათ მცდელობებს მატერიალური საჭიროებების დასაკმაყოფილებლად. ერთი 72 წლის ძმა, რომელიც უკვე 55 წელია მსახურობს პიონერად, ამბობს: „იეჰოვას არასოდეს გაუცრუებია ჩემთვის იმედი“. უფრო მეტიც, რადგანაც უბრალოდ ცხოვრობენ, პიონერები დაცულნი არიან მრავალი ცხოვრებისეული საზრუნავისგან. განა არ გიზიდავთ ეს? (მათ. 6:22; ებრ. 13:5, 6).

5. როგორ გვეხმარება პიონერობა იეჰოვასთან დაახლოებაში?

⁵ ღმერთთან დაახლოება. ღმერთთან ურთიერთობა ყველაზე ძვირფასი განძია (ფსალმ. 62:4). როდესაც იეჰოვას სიყვარულის გამო ვმონაწილეობთ მსახურებაში, მას ვუახლოვდებით (იაკ. 4:8). ძმა, რომელიც 18 წელზე მეტია მსახურობს პიონერად, ამბობს: „პიონერული მსახურება საშუალებას გვაძლევს, ‘განვიცადოთ და ვნახოთ, რომ კარგია’ იეჰოვა და დღითი დღე უფრო განვიმტკიცოთ ურთიერთობა ჩვენს შემოქმედთან“ (ფსალმ. 33:9).

6. რა არის საჭირო იმისათვის, პიონერი რომ იყო და მათ გარდა კიდევ ვინ იღებს კურთხევებს?

⁶ გარდა იმისა, რომ პიონერული მსახურებისთვის შესაბამისი პირობებია საჭირო, პიონერს უნდა ჰქონდეს მტკიცე რწმენა და იეჰოვასა და მოყვასის ნამდვილი სიყვარული; ასევე მზად უნდა იყოს მსხვერპლის გასაღებად (მათ. 16:24; 17:20; 22:37—39). და მაინც, როგორც მთელ მსოფლიოში პიონერების ბედნიერი სახეები გვკარნახობს, პიონერული მსახურების კურთხევები გაცილებით აღემატება ნებისმიერ მსხვერპლს (მალ. 3:10). ეს კურთხევები მარტო პიონერებს როდი აქვთ: პიონერების მიერ გამოვლენილი შესანიშნავი სულის გამო დიდ სარგებლობას იღებენ მათი ოჯახებიც და კრებებიც (ფილ. 4:23).