მნიშვნელოვანი ცვლილებები „საგუშაგო კოშკში“!

¹ ამ წლის დასაწყისში კრებებში მნიშვნელოვანი განცხადება გაკეთდა: 2008 წლის იანვრიდან „საგუშაგო კოშკი“ ორ განსხვავებულ გამოცემად გამოვა — ერთი განკუთვნილი იქნება ფართო მკითხველისთვის, მეორე კი ქრისტიანული საძმოსთვის! ალბათ გაინტერესებთ, რით იქნება განსხვავებული ერთმანეთისგან ეს ორი გამოცემა, რა სარგებლობას მოიტანს ასეთი ცვლილება და რა სიახლე იქნება ამ ორ გამოცემაში.

² განსხვავება: თვის პირველი რიცხვით დათარიღებული ნომერი ცნობილი იქნება როგორც „გამოცემა ფართო მკითხველისთვის“. ამ ნომერში შესული ყველა სტატია ისე იქნება მომზადებული, რომ გათვალისწინებული იქნება ფართო აუდიტორია. თვის 15 რიცხვით დათარიღებული ნომერი ცნობილი იქნება როგორც „სასწავლო გამოცემა“, რომელსაც არ გავავრცელებთ მსახურებაში. მასში შევა ყველა ის სასწავლო სტატია, რომელიც განიხილება მთელი თვის განმავლობაში, აგრეთვე ის სტატიები, რომლებიც განსაკუთრებულად საინტერესო იქნება მიძღვნილი ქრისტიანებისთვის. ფართო მკითხველისთვის განკუთვნილი გამოცემა, მოწმეების გარდა განსაკუთრებით დააინტერესებს მათ, ვინც არ არიან მოწმეები, მაგრამ სწამთ ბიბლიის. რაც შეეხება „გამოიღვიძეთ!“-ს, ის კვლავაც უფრო დიდი აუდიტორიისთვის იქნება გათვალისწინებული, მათ შორის სკეპტიკოსებისთვის და მათთვის, ვინც არც ერთ ქრისტიანულ რელიგიას არ მიეკუთვნება.

³ უპირატესობა: ადრე გვიწევდა ისეთი ტერმინების ახსნა, როგორიცაა მაგალითად პიონერი, რათა გასაგები ყოფილიყო მათთვის, ვინც მოწმე არ არის. ამჯერად, სასწავლო გამოცემაში საჭირო აღარ იქნება ასეთი ტერმინების ახსნა. ამ გამოცემაში შევა დროული ინფორმაცია იეჰოვას მოწმეებისთვის და ბიბლიის შემსწავლელებისთვის, რომლებიც სულიერად წინ მიიწევენ. რა შეიძლება ითქვას ფართო მკითხველისთვის განკუთვნილ გამოცემაზე? თემები ამ გამოცემისთვის ისე იქნება შერჩეული და ისეთი სტილით იქნება დაწერილი, რომ მათაც კი, ვინც მოწმეები არ არიან, დიდი ინტერესით წაიკითხონ მთელი ჟურნალი. თავისთავად ცხადია, რომ ამ გამოცემის თითოეული ნომერი ჩვენც ძალიან დიდ სარგებლობას მოგვიტანს. რადგან ყოველთვე ჩვენ „საგუშაგო კოშკისა“ და „გამოიღვიძეთ!“-ის მხოლოდ თითო ნომერს გავავრცელებთ მსახურებაში, მთელი თვე გვექნება იმისათვის, რომ შეთავაზებები ეფექტურად მოვამზადოთ.

⁴ ახალი თავისებურებები: „საგუშაგო კოშკის“ იმ გამოცემაში, რომელიც ფართო მკითხველისთვის იქნება განკუთვნილი, რამდენიმე სიახლე შევა. ერთი სიახლე ის იქნება, რომ ძირითადი ბიბლიური სწავლებები ძალიან მარტივი ენით იქნება გადმოცემული. გარდა ამისა, ამ გამოცემაში ნაჩვენები იქნება, როგორ ეხმარება ბიბლია ოჯახებს. ამასთანავე ჟურნალში სპეციალურად ახალგაზრდებისთვის მომზადებული იქნება თემები, რომლებიც მათ ბიბლიის შესწავლაში დაეხმარება. ჟურნალის თითოეულ ნომერში შესული იქნება სტატია, რომელიც ყურადღებას გაამახვილებს ბიბლიის იმ მონაკვეთებზე, რომლებიც იეჰოვას პიროვნებას გვაცნობს.

⁵ ვლოცულობთ, რომ იეჰოვამ აკურთხოს „საგუშაგო კოშკთან“ დაკავშირებული ეს ცვლილება. დაე, „საგუშაგო კოშკის“ ამ განახლებული გამოცემისა და „გამოიღვიძეთ!“-ის წყალობით კვლავაც ბევრი ღირსეული ადამიანის გულამდე მიაღწიოს სასიხარულო ცნობამ (მათ. 10:11).