მომზადება დაგვეხმარება, რომ ეფექტური განმეორებითი მონახულებები გავაკეთოთ
1. რა მასშტაბებისთვის უნდა მიეღწია ქრისტიანულ მსახურებას?
1 იესომ კარგად მოამზადა თავისი მოწაფეები, რომ ეფექტურად ექადაგათ „სასიხარულო ცნობა სამეფოს შესახებ“ (მათ. 4:23; 9:35). დედამიწაზე ყოფნისას იესო თავის მოწაფეებთან ერთად მხოლოდ პალესტინაში ქადაგებდა, მაგრამ ზეცად ამაღლებამდე მან ამცნო თავის მიმდევრებს, რომ ქრისტიანული მსახურება უნდა გაფართოებულიყო, რათა მათ ‘მოწაფეებად მოემზადებინათ ხალხი ყველა ერიდან’ (მათ. 28:19, 20).
2. რა შედის ‘მოწაფეების მომზადების’ საქმეში?
2 ‘მოწაფეების მომზადების’ საქმის შესასრულებლად იესოს მიმდევრებს განმეორებით უნდა მიეკითხებინათ მათთვის, ვინც სამეფოს ცნობისადმი ინტერესს გამოავლენდა. გარდა ამისა, დაინტერესებულებისთვის მათ უნდა ესწავლებინათ იმ ყოველივეს დაცვა, რაც ქრისტემ მცნებად დაუდო. ეფექტური განმეორებითი მონახულებების გაკეთება რომ შეგვეძლოს, საჭიროა, კარგად მოვემზადოთ.
3. როგორ შეგიძლია პირველივე მისვლისას საფუძველი ჩაუყარო განმეორებით მონახულებას?
3 წინასწარ დაგეგმე: ზოგი მაუწყებელი პირველი მონახულების ბოლოს რაიმე კითხვას წამოჭრის ხოლმე და მობინადრეს ჰპირდება, რომ დაბრუნდება და შემდეგ იმსჯელებს ამ საკითხზე. როდესაც ისინი განმეორებით აკითხავენ მობინადრეს, აღნიშნულ საკითხზე მსჯელობენ წიგნიდან „რას გვასწავლის ბიბლია?“. ეს ეხმარება მაუწყებლებს, რომ მობინადრესთან ბიბლიის შესწავლა დაიწყონ.
4. რატომ არ უნდა დაველოდოთ ჟურნალის ახალი ნომრების გამოცემას განმეორებითი მონახულების გასაკეთებლად?
4 მართალია, ის ჟურნალები, რომლებსაც ვავრცელებთ, თვეში ერთხელ გამოდის, ეს იმას არ ნიშნავს, რომ უნდა ველოდოთ მომდევნო ნომრის გამოცემას და მხოლოდ შემდეგ მივაკითხოთ მობინადრეს. ჩვენ შეგვიძლია გავაღვივოთ მობინადრის ინტერესი, თუ მასთან ერთად განვიხილავთ იმ ჟურნალში მოცემულ რომელიმე საკითხს, რომელიც მას დავუტოვეთ.
5. რა კონკრეტული მიზანი შეიძლება გქონდეს განმეორებითი მონახულების გაკეთებისას?
5 გქონდეს კონკრეტული მიზანი: სანამ მობინადრეს განმეორებით მიაკითხავ, რამდენიმე წუთი გამოყავი იმისთვის, რომ თვალი გადაავლო ჩანაწერებს და განსაზღვრო, რა მიზნის მიღწევა გინდა. მაგალითად, შეიძლება შენი მიზანი იყოს ის, რომ ადრე დატოვებული პუბლიკაციიდან რაიმე საკითხი განიხილო; მობინადრეს დამატებითი ლიტერატურა მიუტანო იმ საკითხზე, რაზეც უკვე იმსჯელეთ; თუ ბოლოს რაიმე კითხვა წამოჭერი, პასუხი გასცე ამ კითხვას ან პირდაპირ ბიბლიიდან ამოიკითხო ის მუხლი, რომელიც მსჯელობის საგანს უკავშირდება.
6. რა მიზანი გვაქვს განმეორებითი მონახულების დროს?
6 მიზნად დაისახე ბიბლიის შესწავლის დაწყება: განმეორებითი მონახულების გაკეთებისას ჩვენი მიზანი ის არის, რომ ბიბლიის შესწავლა დავიწყოთ. ერთმა ძმამ განმეორებითი მონახულების დროს ერთ მამაკაცს ბიბლიის შესწავლა შესთავაზა, მაგრამ უარი მიიღო. რამდენიმე ხნის შემდეგ ძმა ახალი ჟურნალებით დაბრუნდა ამ კაცთან და უთხრა: „ბიბლიის საფუძველზე დღეს ჩვენ ერთ მნიშვნელოვან საკითხზე ვმსჯელობთ ხალხთან და პასუხს ვცემთ ერთ კითხვას“. მამაკაცის აზრის მოსმენის შემდეგ ძმამ წაიკითხა ბიბლიური მუხლი და შესაბამისი აბზაცი ბიბლიის შესწავლისთვის განკუთვნილი პუბლიკაციიდან. ეს დაეხმარა ძმას, ამ მამაკაცთან ბიბლიის შესწავლა დაეწყო.
7. თქვენ როგორ დაგეხმარათ კარგი მომზადება ბიბლიის შესწავლის დაწყებაში?
7 ნამდვილად ღირს დროის გამოყოფა იმისთვის, რომ მოვემზადოთ განმეორებითი მონახულებების გასაკეთებლად. ეს უფრო მეტ სიხარულს მოგვიტანს. გარდა ამისა, ჩვენ შევძლებთ დავეხმაროთ ‘მარადიული სიცოცხლისთვის განწყობილებს’, რომ სიცოცხლის გზას დაადგნენ (საქ. 13:48).