რატომ არის პირადი და ოჯახური შესწავლა განსაკუთრებით მნიშვნელოვანი?

1. რა განსაკუთრებულ მზრუნველობას ავლენს დღეს ხელმძღვანელი საბჭო ჩვენ მიმართ და რატომ?

¹ ხელმძღვანელი საბჭო დღეს, ისევე როგორც პირველ საუკუნეში, განსაკუთრებულად ზრუნავს იეჰოვას ხალხის კეთილდღეობაზე (საქ. 15:6, 28). დიდი გასაჭირი ახლოსაა, ამიტომ დღეს განსაკუთრებით მნიშვნელოვანია, რომ სამეფოს მაუწყებლებს ახლო ურთიერთობა ჰქონდეთ იეჰოვა ღმერთთან. როგორ გამოიყენებთ იმ დროს, რომელიც ადრე წიგნის შესწავლისთვის გქონდათ გამოყოფილი? მოგიწოდებთ, რომ ეს დრო ოჯახთან ერთად თაყვანისცემისთვის გამოიყენოთ. ეს დაგეხმარებათ, უფრო ღრმად გამოიკვლიოთ ღვთის მიერ შთაგონებული სიტყვა და უფრო მეტად დაეწაფოთ სიცოცხლის მომცემ წყალს (ფსალმ. 1:1—3; რომ. 11:33, 34).

2. როგორ უნდა ჩატარდეს ოჯახთან ერთად თაყვანისცემის საღამო?

² ოჯახთან ერთად თაყვანისცემის საღამო: ოჯახის თავებს იეჰოვას წინაშე პასუხისმგებლობა აკისრიათ, რომ რეგულარულად ჩაატარონ შინაარსიანი ოჯახური შესწავლა (კან. 6:6, 7). დაუქორწინებელ და-ძმებს, რომელთაც არ აკისრიათ ოჯახზე ზრუნვის პასუხისმგებლობა, შეუძლიათ ეს დრო პირადი შესწავლისა და კვლევისთვის გამოიყენონ. ძალიან მნიშვნელოვანია, რომ თითოეულმა ჩვენგანმა შესწავლისა და ფიქრისთვის ‘გამოვისყიდოთ ჩვენთვის ხელსაყრელი დრო’, რათა სულიერი სიმტკიცე შევინარჩუნოთ ‘ამ ბოროტ დღეებში’ (ეფეს. 5:15, 16).

3, 4. რა მასალა შეგიძლიათ გამოიყენოთ განსახილველად და რა მიზანი უნდა გქონდეთ?

³ რა უნდა შეისწავლოთ: „საგუშაგო კოშკის პუბლიკაციების საძიებელი“ ან „საგუშაგო კოშკის“ ბიბლიოთეკა კომპაქტ-დისკზე დაგეხმარებათ, მოძებნოთ ისეთი ინფორმაცია, რაც თქვენს შესწავლას უფრო სასიამოვნოს გახდის. ოჯახებმა შესწავლის დროს შეიძლება განიხილონ ის სტატიები, რომლებიც მოცემულია „საგუშაგო კოშკის“ შემდეგ რუბრიკებში: „რჩევები ოჯახებისთვის“, „ასწავლეთ შვილებს“ და „ახალგაზრდა მკითხველებისთვის“. გარდა ამისა, „გამოიღვიძეთ!“-ის რუბრიკა „ახალგაზრდების შეკითხვები“ და ის სტატიები, რომლებიც შემოქმედებაზე ამახვილებს ყურადღებას, საინტერესოს გახდის თქვენს შესწავლას.

⁴ ოჯახის თითოეულ წევრს ღვთის პრინციპები ღრმად ჩაებეჭდება გულსა და გონებაში, თუ ისინი ერთად წაიკითხავენ ბიბლიას აუჩქარებლად და გააზრებულად (ებრ. 4:12). ზოგჯერ შეიძლება უყუროთ და განიხილოთ ჩვენი ორგანიზაციის მიერ გამოცემული ვიდეოფილმები. არჩევანი მართლაც დიდი გაქვთ. კარგი იქნება, თუ ჰკითხავთ ოჯახის წევრებს, რის განხილვას ისურვებენ.

5. რატომ არის პირადი და ოჯახური შესწავლა დღეს განსაკუთრებით მნიშვნელოვანი?

⁵ რატომ არ უნდა დავაყოვნოთ: თუ სულიერად გავძლიერდებით, ‘მტკიცედ ვიდგებით და ვიხილავთ იეჰოვასგან ხსნას’ (გამ. 14:13). მშობლებს ღვთის ხელმძღვანელობა სჭირდებათ, რომ შვილები აღზარდონ „უსინდისო და უკუღმართ თაობაში“ (ფილ. 2:15). მშობლები, რომელთა ბავშვებიც სკოლაში სწავლობენ, უნდა დაეხმარონ შვილებს, რომ მათზე გავლენა არ მოახდინოს ქვეყნიურმა აზროვნებამ (იგავ. 22:3, 6). დაქორწინებულმა წყვილებმა ურთიერთობა უნდა განიმტკიცონ იეჰოვასთან, რომ არ გაწყდეს „სამმაგი ძაფი“ (ეკლ. 4:12). მოდი, ყველამ გონივრულად გამოვიყენოთ ის დრო, რომელიც ადრე წიგნის შესწავლისთვის იყო გამოყოფილი და „უწმინდეს რწმენაზე“ აღვაშენოთ საკუთარი თავი! (იუდ. 20).