ღვთისადმი სიყვარულს მსახურებით ვავლენთ
1. რისკენ აღძრავდა იესოს ღვთისადმი სიყვარული?
1 სიყვარული იესოს მსახურებისკენ აღძრავდა. იეჰოვასადმი დიდი სიყვარული მისი მსახურების ყველა სფეროში ჩანს. იესომ თქვა: „იმისათვის, რომ ქვეყნიერებამ იცოდეს, რომ მამა მიყვარს, რაც მამამ დამიდო მცნებად, იმას ვაკეთებ“ (იოან. 14:31). ჩვენ, ქრისტეს მიმდევრებს, წილად გვხვდა პატივი, რომ ვიმსახუროთ და ამით ღვთისადმი სიყვარული გამოვავლინოთ (მათ. 22:37; ეფეს. 5:1, 2).
2. რა გავლენას ახდენს იეჰოვასადმი სიყვარული ჩვენს მსახურებაზე?
2 „განიწმინდოს შენი სახელი“: როდესაც ნებისმიერ შესაძლებლობას ვიყენებთ, რომ იეჰოვასა და მისი სამეფოს შესახებ სხვებს ვესაუბროთ, ამით ღვთისადმი სიყვარულს ვავლენთ და, შესაბამისად, მისი სახელის განწმენდაში ვიღებთ მონაწილეობას (ფსალმ. 83:18; ეზეკ. 36:23; მათ. 6:9). იესოს მსგავსად მსახურებით იმის გულწრფელ სურვილს ვავლენთ, რომ განიწმინდოს იეჰოვას სახელი და მისი ნება შესრულდეს (მათ. 26:39).
3. როგორ გვეხმარება იეჰოვასადმი სიყვარული სირთულეების დაძლევაში?
3 სიყვარული დაბრკოლებების გადალახვაში გვეხმარება: იეჰოვასადმი სიყვარული ყველანაირი წინააღმდეგობის გადალახვაში გვეხმარება (1 კორ. 13:4, 7). იესო ცხოვრებაში მრავალ სირთულეს ხვდებოდა, რასაც შეეძლო, მისთვის მსახურების სურვილი წაერთმია. მაგრამ სირთულეებთან გამკლავებაში მას ღვთისადმი ძლიერი სიყვარული და იეჰოვას ნების შესრულების სურვილი ეხმარებოდა (მარ. 3:21; 1 პეტ. 2:18—23). ღვთისადმი სიყვარული ჩვენც გვეხმარება სირთულეების დაძლევაში. თუ ერთგულად მივყვებით ქრისტეს ნაკვალევს, სირთულეები მსახურების სურვილს ვერ დაგვიკარგავს. ოჯახის წევრების წინააღმდეგობა, სუსტი ჯანმრთელობა, ასაკი თუ ხალხის გულგრილობა ხელს ვერ გვიშლის იმაში, რომ შეძლებისდაგვარად მაქსიმუმი გავაკეთოთ მსახურებაში და ამით იეჰოვასადმი სიყვარული გამოვავლინოთ.
4. რა კურთხევა გვაქვს თითოეულს?
4 სიყვარულს დიდი ძალა აქვს და ჩვენთვის დიდი კურთხევაა, რომ მსახურებით შეგვიძლია ღვთისადმი მთელი გულით სიყვარული გამოვავლინოთ (1 კორ. 13:13). სწრაფად ახლოვდება ის დღე, როცა იეჰოვას სახელი ერთხელ და სამუდამოდ განიწმინდება, ამიტომ გვსურს, რომ ჩვენი „სიყვარული უფრო და უფრო გაიზარდოს“ (ფილ. 1:9; მათ. 22:36—38).