იეჰოვა გვამზადებს ამ საქმისთვის

1. კიდევ რას აკეთებს იეჰოვა, როცა ადამიანებს დავალებას აძლევს?

¹ როცა იეჰოვა ადამიანებს დავალებას აძლევს, ის მის შესრულებაშიც ეხმარება. მაგალითად, ღმერთმა ნოეს კიდობნის აშენება დაავალა. მას მსგავსი რამ მანამდე არასდროს გაუკეთებია. ამიტომ ღმერთმა ისიც უთხრა, თუ როგორ გაეკეთებინა კიდობანი (დაბ. 6:14—16). როდესაც თვინიერ მწყემსს მოსეს ღმერთმა ისრაელის უხუცესებთან და ფარაონთან მისვლა დაავალა, ის დაარწმუნა: „მე თვითონ ვიქნები შენს ბაგესთან და მე გასწავლი, რა უნდა თქვა“ (გამ. 4:12). როცა საქმე სასიხარულო ცნობის შესახებ ქადაგებას ეხება, იეჰოვა დახმარების გარეშე არც ჩვენ გვტოვებს. ის ამ საქმისთვის თეოკრატიული მსახურების სკოლისა და სამსახურებრივი შეხვედრების საშუალებით გვამზადებს. როგორ შეგვიძლია სარგებლობის მიღება ასეთი მომზადებისგან?

2. როგორ შეგვიძლია სარგებლობის მიღება თეოკრატიული მსახურების სკოლიდან?

² თეოკრატიული მსახურების სკოლა: წაიკითხე და მოამზადე ყოველკვირეული შეხვედრისთვის განკუთვნილი მასალა. ეს დაგეხმარება, დაინახო თუ როგორ იყენებენ გამომსვლელები გეგმაში მოცემულ ინფორმაციას თავიანთ მოხსენებებში და ასეთი სახით გაიუმჯობესებ სხვების სწავლების უნარს (იგავ. 27:17). შეხვედრებზე ყოველთვის თან იქონიე და გამოიყენე თეოკრატიული სკოლის წიგნი. როდესაც სკოლის ზედამხედველი მოხსენების შემდეგ გამომსვლელს წიგნში მოცემულ აზრებზე გაუმახვილებს ყურადღებას, წიგნის მინდორზე ჩაინიშნე ის, რასაც პირადად გამოიყენებდი. მაგრამ თეოკრატიული მსახურების სკოლიდან სრული სარგებლობა რომ მიიღო, თავად უნდა იყო სკოლაში ჩაწერილი. ხარ ჩაწერილი? როდესაც დავალებას მიიღებ, კარგად მოამზადე ის და გაითვალისწინე წინა გამოსვლის შემდეგ მიღებული რჩევები. სკოლაში ნასწავლი გამოიყენე მსახურების დროს.

3. რა დაგვეხმარება სამსახურებრივი შეხვედრიდან სარგებლობის მიღებაში?

³ სამსახურებრივი შეხვედრა: შეხვედრაზე განხილული თემების უკეთ დამახსოვრებაში დაგვეხმარება მათი წინასწარ წაკითხვა და კომენტარების მომზადება. მოკლე კომენტარების გაკეთება, სხვებსაც მისცემს მონაწილეობის საშუალებას. ყურადღებით მოუსმინე ინსცენირებებს და გამოიყენე ნებისმიერი რჩევა, რომელსაც თვლი, რომ შენს მსახურებას ეფექტურს გახდის. შეინახე „ჩვენი სამეფო მსახურების“ ის სტატიები, რომლებიც მომავალში გამოგადგება.

4. რატომ უნდა გამოვიყენოთ ყველაფერი, რითაც იეჰოვა გვამზადებს?

⁴ ნოესა და მოსესთვის მიცემული დავალებების მსგავსად, მთელ მსოფლიოში სასიხარულო ცნობის ქადაგების დავალების შესრულება არ არის ადვილი (მათ. 24:14). თუ მივენდობით იეჰოვას, ჩვენს დიდებულ მოძღვარს, და გამოვიყენებთ მის მიერ მოცემულ ყველა რჩევას, წარმატებული ვიქნებით (ეს. 30:20).