თაყვანისცემისთვის განკუთვნილი ახალი სიმღერები
1 «პენსილვანიის „საგუშაგო კოშკის“, ბიბლიისა და ტრაქტატების საზოგადოების» ყოველწლიურ შეხვედრაზე, რომელიც 2014 წლის 4 ოქტომბერს გაიმართა, გაკეთდა განცხადება იმის თაობაზე, რომ მზადდება სიმღერების კრებულის, „უმღერეთ იეჰოვას“, გადამუშავებული გამოცემა ინგლისურ ენაზე. ეს მართლაც გასაოცარი სიახლე იყო. ყოველწლიურ შეხვედრაზე დამსწრეთ შეახსენეს, თუ რა მნიშვნელოვან როლს ასრულებს სამეფოს სიმღერები ჩვენს თაყვანისმცემლობაში (ფსალმ. 96:2).
2 შეიძლება იკითხო: რატომ გახდა საჭირო სიმღერების წიგნის განახლება ინგლისურ ენაზე? საამისოდ არსებობს რამდენიმე მიზეზი: პირველი, დროთა განმავლობაში უფრო და უფრო მეტ ბიბლიურ მუხლს ეფინება ნათელი, რის გამოც სიმღერების ტექსტებშიც უნდა მოხდეს ცვლილებები (იგავ. 4:18). მეორე, ბევრი სიტყვა თუ ფრაზა, რომელიც ამჟამინდელ კრებულშია გამოყენებული, აღებულია „ახალი ქვეყნიერების თარგმანის“ წინა გამოცემიდან ინგლისურ ენაზე. სიმღერების ტექსტები შეცვლას საჭიროებს, ვინაიდან ის სრულ თანხვედრაში უნდა იყოს ბიბლიის გადამუშავებული გამოცემის ტექსტთან. ვინაიდან ეს კოლოსალურ შრომას მოითხოვს, გადაწყდა, რომ მთელ რიგ ცვლილებებთან ერთად კრებულში ახალი სიმღერებიც შევიდეს.
3 მართალია, ქართულ ენაზე ჯერჯერობით არ იგეგმება გადამუშავებული სიმღერების კრებულის გამოცემა, მაგრამ წამოიჭრება კითხვა: გვექნება სამეფოს ახალი სიმღერები, რომლებიც განახლებულ კრებულს დაემატება ინგლისურ ენაზე? რა თქმა უნდა! გვსურს, სიხარულით გაუწყოთ, რომ მომდევნო თვეების განმავლობაში ჩვენს ვებ-გვერდზე jw.org. განთავსდება რამდენიმე ახალი სიმღერა. ვებ-გვერდზე ყოველი ახალი სიმღერის განთავსების შემდეგ სამსახურებრივი შეხვედრის გეგმაში მოცემული იქნება მითითება — „ახალი სიმღერა“.
4 როგორ ვისწავლოთ ახალი სიმღერები: ახალი სიმღერის შესწავლა არც ისე ადვილია. მაგრამ ჩვენ გვსურს, რომ ფსალმუნმომღერლის მსგავსად მთელი გულით ვუმღეროთ ღმერთს და კრების შეხვედრებზე არ ვდუმდეთ (ფსალმ. 30:12). ქვემოთ მოცემული რჩევები ახალი სიმღერის შესწავლაში დაგვეხმარება.
ხშირად მოუსმინე სამეფო სიმღერის ფორტეპიანოზე შესრულებულ აუდიოჩანაწერს, რომელიც ჩვენს ვებ-გვერდზე განთავსდება. რაც უფო ხშირად მოისმენ მელოდიას, მით უფრო გაგიადვილდება მისი დამახსოვრება.
ეცადე, დაიხსომო ტექსტი.
იმღერე მელოდიის თანხლებით. მანამ იმღერე, სანამ კარგად არ გამოგივა.
ოჯახთან ერთად თაყვანისცემის საღამოზე რამდენიმეჯერ შეასრულე ახალი სიმღერები, რათა გაგიადვილდეს მათი მღერა.
5 თუ მომდევნო თვეებში, სამსახურებრივი შეხვედრის გეგმაში მოცემული იქნება მითითება, რომ შეხვედრის ბოლოს უნდა შესრულდეს ახალი სიმღერა, კრება ჯერ მოისმენს ფორტეპიანოზე შესრულებულ ახალი მელოდიის აუდიოჩანაწერს, ხოლო მელოდიის კვლავ ჩართვის შემდეგ შეასრულებს ახალ სიმღერას.
6 იფიქრე იმაზეც, რომ როცა და-ძმებთან ერთად კრების შეხვედრებზე ვმღერით, ერთხმად განვადიდებთ იეჰოვას. ჩვევად არ უნდა გვექცეს სერიოზული მიზეზის გარეშე ჩვენი ადგილების დატოვება მაშინ, როდესაც კრების შეხვედრაზე სიმღერის შესრულების დრო დგება.
7 არსებობს კიდევ ერთი საშუალება, რითაც შეგვიძლია ცხადვყოთ, რომ ვაფასებთ სამეფოს მელოდიებს. კონგრესებზე პროგრამის ორივე ნაწილი მუსიკით იწყება. წელიწადში ორჯერ დედამიწის სხვადასხვა კუთხეში მცხოვრები სულიერად მოწიფული და-ძმები თავიანთი ხარჯებით ჩადიან პატერსონში (ნიუ-იორკი), რათა შექმნან ლამაზი მელოდიები, რომელიც ჩვენი თაყვანისმცემლობის ნაწილია. სწორედ ამიტომ, როდესაც შეხვედრის თავმჯდომარე მოგვიწოდებს, რომ დავიკავოთ ადგილები და მოვუსმინოთ ჩვენთვის მომზადებულ მელოდიებს საორკესტრო შესრულებით, ჩვენ უნდა მივყვეთ მითითებას. ეს დაგვეხმარება, გული განვაწყოთ პროგრამის მოსასმენად (ეზრ. 7:10).
8 შეხვედრის დასასრულ, ჩვენ ვიმღერებთ ახალი სიმღერებიდან ერთ-ერთს სახელწოდებით „დაე, მოვიდეს ღვთის სამეფო, რომელიც უკვე მმართველობს!“. ეს სიმღერა ყოველწლიურ შეხვედრაზე უკვე ფართო აუდიტორიამ მოისმინა და სპეციალურად სამეფოს მმართველობის 100 წლისთავისთვის შეიქმნა.
9 ახალი სიმღერები მართლაც ერთ-ერთი ძღვენია იმ ყოველივე კარგიდან, რასაც იეჰოვა გვაძლევს (მათ. 12:35ა). მოდი, მიზნად დავისახოთ, რომ ვისწავლოთ ახალი სიმღერები, მთელი გულით ვიმღეროთ ისინი და ამგვარად ხოტბა შევასხათ ჩვენს ღმერთს, იეჰოვას (ფსალმ. 147:1).