აირჩიეთ იეჰოვას მსახურება

ახალგაზრდებო, თუ მოუნათლავი მაუწყებლები ხართ ან ბიბლიას სწავლობთ, ალბათ, მონათვლა ერთ-ერთი თქვენი მთავარი მიზანია. რატომ უნდა ვისწრაფოთ ნათლობისკენ? როცა თავს ვუძღვნით იეჰოვას და ვინათლებით, მასთან განსაკუთრებულ ურთიერთობას ვუყრით საფუძველს (ფსალმ. 91:1). გარდა ამისა, ნათლობა ჩვენს ხსნას ემსახურება (1 პეტ. 3:21). რა ნაბიჯები უნდა გადადგა, რომ მონათლული ქრისტიანი გახდე?

დარწმუნდი, რომ, რასაც სწავლობ, ჭეშმარიტებაა. როცა კითხვები დაგებადება, უფრო ღრმად გამოიკვლიე საკითხები (რომ. 12:2). დააკვირდი, რაში გჭირდება გამოსწორება და კარგად გააანალიზე შენი მოტივები — ცდილობ თუ არა, ყველაფერი იეჰოვას მოსაწონად აკეთო (იგავ. 27:11; ეფეს. 4:23, 24). ყოველთვის სთხოვე იეჰოვას დახმარება ლოცვაში. დარწმუნებული იყავი, რომ იეჰოვა მხარს დაგიჭერს და თავისი უშრეტი ძალით, წმინდა სულით გაგაძლიერებს (1 პეტ. 5:10, 11). ძალისხმევა უეჭველად დაგვიფასდება, რადგან იეჰოვას მსახურება ცხოვრების საუკეთესო გზაა! (ფსალმ. 16:11).

უყურე ვიდეორგოლს „ნათლობა — უმნიშვნელოვანესი ნაბიჯი“ და უპასუხე შემდეგ კითხვებს:

რა დაბრკოლებები გადალახა ზოგმა იმისთვის, რომ მონათლულიყო?
როგორ უნდა განივითარო რწმენა, რომ თავი მიუძღვნა იეჰოვას?
რამ აღძრა ზოგი და-ძმა, მომზადებულიყვნენ ნათლობისთვის?
რა კურთხევებს იღებენ ისინი, რომლებიც იეჰოვას მსახურებას ირჩევენ?
რას ნიშნავს მიძღვნა და ნათლობა?

ნათლობის მოხსენების შემდეგ მომხსენებელი მონათვლის მსურველებს სთხოვს, ფეხზე წამოდგნენ და ხმამაღლა უპასუხონ ორ კითხვას:

მოინანიე ცოდვები, მიუძღვენი თავი იეჰოვას და გწამს, რომ ღმერთი იესო ქრისტეს მეშვეობით გვიხსნის?

გესმის, რომ ნათლობით იეჰოვას მოწმე ხდები და იეჰოვას ორგანიზაციას უერთდები?

ამ კითხვებზე გაცემული დადებითი პასუხები იმის მაჩვენებელია, რომ მონათვლის მსურველები „სახალხოდ აღიარებენ“, რომ ქრისტეს გამოსასყიდს ხსნის ძალა აქვს და საჯაროდ ადასტურებენ, რომ იეჰოვას მიუძღვნეს თავიანთი სიცოცხლე (რომ. 10:9, 10).