მარტივი კითხვა, რომლის დასმაც ღირს

მერი და მისი მეუღლე ჯონიa ისეთ ქვეყანაში ცხოვრობენ, სადაც ბევრი ფილიპინელია სამუშაოდ ჩასული. შესაბამისად, მათ იმის შესაძლებლობა ეძლევათ, რომ ფილიპინელ ემიგრანტებს სასიხარულო ცნობა გაუზიარონ. კოვიდპანდემიის დროს მერიმ არაერთი ბიბლიის შესწავლა დაიწყო როგორც ადგილობრივად, ისე სხვა ქვეყნებშიც. ალბათ გაინტერესებთ, როგორ შეძლო ეს.

მერი ბიბლიის შემსწავლელებს ეკითხებოდა, ხომ არ ეგულებოდათ ვინმე, ვისაც ბიბლიის შესწავლა სურდა. თუ შემსწავლელს ასეთი ადამიანი ეგულებოდა, მერი მასთან დაკავშირებას სთხოვდა. რატომ არის ასეთი მარტივი მიდგომა ხშირ შემთხვევაში ეფექტური? იმიტომ რომ მას, ვინც აფასებს ღვთის სიტყვას, როგორც წესი, სურვილი უჩნდება, ნასწავლი ოჯახის წევრებსა და მეგობრებს გაუზიაროს. რა შედეგი მოჰყვა მერის მცდელობას?

ერთმა ბიბლიის შემსწავლელმა, ჯასმინმა, მას ოთხი ადამიანი გააცნო, რომლებსაც ბიბლიის შესწავლა სურდათ. ერთ-ერთი იყო ქრისტინა. მას ისე მოეწონა ბიბლიის შესწავლა, რომ მერის სთხოვა, კვირაში ორჯერ შეხვედროდნენ. მერიმ ქრისტინასაც ჰკითხა, მის ნაცნობებს შორის ვინმე ხომ არ მოისურვებდა ბიბლიის შესწავლას. სულ რამდენიმე კვირაში მერიმ ქრისტინას ოთხ მეგობართან დაიწყო შესწავლა. მოგვიანებით ქრისტინამ მას კიდევ სხვა მეგობრებიც გააცნო, რომლებმაც, თავის მხრივ, თავიანთი მეგობრები დააკავშირეს მერისთან.

ქრისტინას უნდოდა, რომ ფილიპინებში თავის ოჯახსაც შეესწავლა ბიბლია. ამ საკითხზე ის ჯერ თავის ქალიშვილს, ანდრეას, დაელაპარაკა. ანდრეას არასწორი წარმოდგენა ჰქონდა მოწმეებზე. ეგონა, რომ ისინი სექტანტები იყვნენ, არ სწამდათ იესო და მხოლოდ „ძველ აღთქმას“ იყენებდნენ. თუმცა პირველივე შესწავლის შემდეგ წარმოდგენა სრულიად შეეცვალა. შესწავლის დროს ის ხშირად წამოიძახებდა ხოლმე, რახან ეს ბიბლიაში წერია, სიმართლე უნდა იყოსო.

მოგვიანებით ანდრეამაც გააცნო მერის თავისი ორი მეგობარი და ერთი თანამშრომელი. შესწავლა მათაც დაიწყეს. როცა მერი ანდრეასთან შესწავლას ატარებდა, თურმე ამას ანდრეას უსინათლო მამიდა ანჯელაც ისმენდა. ერთ დღეს მანაც ითხოვა ბიბლიის შესწავლა. მას ძალიან მოსწონდა, რასაც სწავლობდა. სულ რაღაც ერთ თვეში მან ბევრი ბიბლიური მუხლი დაიზეპირა და იმის სურვილი გამოთქვა, რომ შესწავლა კვირაში ოთხჯერ ჩაეტარებინათ. ანდრეას დახმარებით ის რეგულარულად ესწრებოდა კრების შეხვედრებსაც ვიდეოკონფერენციის მეშვეობით.

ქრისტინასთან შესწავლის ჩატარების დროს მერი ხედავდა, რომ მისი მეუღლე ჯოშუაც იქვე ტრიალებდა. ამიტომ მასაც შესთავაზა, რომ დასწრებოდა მათ ერთობლივ განხილვას. ჯოშუა დათანხმდა, ოღონდ იმ პირობით, რომ მისთვის კითხვები არ უნდა დაესვათ. წინააღმდეგ შემთხვევაში ის ოთახიდან გავიდოდა. თუმცა შესწავლის დაწყებიდან 5 წუთიც არ იყო გასული, რომ თვითონვე დასვა არაერთი კითხვა და ბიბლიის შესწავლის გაგრძელებაც მოინდომა.

მერის მიერ დასმულმა ერთმა უბრალო კითხვამ საოცარი შედეგი გამოიღო. მთლიანობაში მან 28 ბიბლიის შესწავლა დაიწყო ოთხ ქვეყანაში. მერიმ ზოგიერთი შესწავლა სხვა და-ძმებსაც გადააბარა.

ჯასმინი, მერის პირველი ბიბლიის შემსწავლელი, 2021 წლის აპრილში მოინათლა, ქრისტინა კი – 2022 წლის მაისში და ფილიპინებში ოჯახს დაუბრუნდა. მოინათლა სხვა ორი შემსწავლელიც, რომლებიც მერის ქრისტინამ გააცნო. ქრისტინას ნათლობიდან რამდენიმე თვეში ანჯელაც მოინათლა და დღეს ის უკვე პიონერად მსახურობს. რაც შეეხება ქრისტინას ქმარ-შვილს და კიდევ რამდენიმე ბიბლიის შემსწავლელს, ისინი კვლავაც აგრძელებენ ბიბლიის შესწავლას.

პირველ საუკუნეში სასიხარულო ცნობა სწრაფად გავრცელდა იმის წყალობით, რომ ადამიანები ამ ცნობას ოჯახის წევრებსა და მეგობრებს უზიარებდნენ (იოან. 1:41, 42ა; საქ. 10:24, 27, 48; 16:25–33). თქვენც ხომ არ მოსინჯავდით ამ მიდგომას და ჰკითხავდით ბიბლიის შემსწავლელებს ან სხვა დაინტერესებულებს, ვინმე ხომ არ ეგულებათ, ვისაც ბიბლიის შესწავლა სურს. ამ ერთი მარტივი კითხვის დასმამ შეიძლება ისეთი შედეგები მოიტანოს, რომ თავადაც გაკვირვებულები დარჩეთ.