ᲡᲐᲡᲬᲐᲕᲚᲝ ᲡᲢᲐᲢᲘᲐ 10
ᲡᲘᲛᲦᲔᲠᲐ 31 იარე ღმერთთან ერთად
დაემსგავსეთ იეჰოვასა და იესოს აზროვნებაში
„ქრისტე ხორციელ სხეულში იტანჯა და თქვენც ასეთივე განწყობა უნდა გქონდეთ“ (1 ᲞᲔᲢ. 4:1).
ᲛᲘᲖᲐᲜᲘ
ამ სტატიიდან დავინახავთ, როგორ ჩასწვდა მოციქული პეტრე იესოს აზროვნებას და ჩვენ რა დაგვეხმარება ამაში.
1, 2. ა) როგორ ვაჩვენებთ, რომ გვიყვარს იეჰოვა? ბ) რა მაგალითი დაგვიტოვა იესომ ამ მხრივ?
ᲔᲠᲗᲮᲔᲚ იესომ შემდეგნაირად ჩამოაყალიბა კანონის უმთავრესი მცნება: „გიყვარდეს იეჰოვა, შენი ღმერთი, მთელი გულით, მთელი სულით, მთელი გონებით და მთელი ძალით“ (მარ. 12:30). ეს სიტყვები იმაზე მიანიშნებს, რომ მთელი არსებით უნდა გვიყვარდეს იეჰოვა, რაც ჩვენს სურვილებსა და გრძნობებზეც უნდა აისახებოდეს. ამასთანავე, იეჰოვა გონებითაც უნდა გვიყვარდეს, რაც იმას ნიშნავს, რომ საკითხებს მისი თვალით ვუყუროთ და ვეცადოთ, მას დავემსგავსოთ აზროვნებაში. რა თქმა უნდა, იეჰოვას აზროვნებას ბოლომდე ვერასდროს ჩავწვდებით. თუმცა, გარკვეულწილად მაინც შევძლებთ ამას, თუ შევიცნობთ „ქრისტეს გონებას“ ანუ გავიგებთ, როგორ აზროვნებდა ის. იესო ხომ სრულყოფილად ირეკლავდა მამის პიროვნებას (1 კორ. 2:16).
2 იესოს მთელი გონებით უყვარდა იეჰოვა. საიდან გამოჩნდა ეს? მან კარგად იცოდა, რის გაკეთებას მოითხოვდა იეჰოვა მისგან და გადაწყვეტილი ჰქონდა, უდიდესი ტანჯვის ფასადაც კი შეესრულებინა მამის ნება. ამიტომ მისთვის ღვთის ნების შესრულება არასდროს გამხდარა მეორეხარისხოვანი.
3. რისი შესაძლებლობა ჰქონდა მოციქულ პეტრეს და რისკენ მოუწოდა თანაქრისტიანებს? (1 პეტრე 4:1).
3 პეტრესა და სხვა მოციქულებს შესაძლებლობა ჰქონდათ, რომ ახლოს გაცნობოდნენ იესოს და დაენახათ, როგორ აზროვნებდა ის. ამიტომ, როცა პეტრემ თანაქრისტიანებს პირველი წერილი მისწერა, მათაც მოუწოდა, ქრისტეს მსგავსი განწყობაa ჰქონოდათ. დედანში 1 პეტრეს 4:1-ში (წაიკითხეთ) მოციქულმა სამხედრო ტერმინი გამოიყენა, რაც სიტყვასიტყვით ასე ითარგმნება: „აღიჭურვეთ“. მას იმის თქმა სურდა, რომ, თუ ქრისტიანები იესოს მსგავსი განწყობით და აზროვნებით „აღიჭურვებოდნენ“, მათ ხელთ მძლავრი იარაღი ექნებოდათ ცოდვილ მიდრეკილებებთან და სატანის ქვეყნიერებასთან საბრძოლველად (2 კორ. 10:3–5; ეფეს. 6:12).
4. როგორ დაგვეხმარება ეს სტატია პეტრეს რჩევის გათვალისწინებაში?
4 ამ სტატიაში ვიმსჯელებთ, როგორ აზროვნებდა იესო და როგორ შეგვიძლია მივბაძოთ მას. მისი მაგალითის განხილვა დაგვანახებს: 1) როგორ დავემსგავსოთ იეჰოვას აზროვნებაში, 2) რა დაგვეხმარება, ვიყოთ თავმდაბლები და 3) რა არის საჭირო, რომ საღად ვიაზროვნოთ.
ᲓᲐᲔᲛᲡᲒᲐᲕᲡᲔᲗ ᲘᲔᲰᲝᲕᲐᲡ ᲐᲖᲠᲝᲕᲜᲔᲑᲐᲨᲘ
5. საიდან გამოჩნდა, რომ პეტრე ყოველთვის ვერ უყურებდა საკითხებს იეჰოვას თვალით?
5 დავფიქრდეთ ერთ შემთხვევაზე, როცა პეტრემ ვერ შეძლო, იეჰოვას თვალით შეეხედა საკითხისთვის. იესოს თავისი მოციქულებისთვის ნათქვამი ჰქონდა, რომ იერუსალიმში უნდა წასულიყო, სადაც მას გასცემდნენ, აწამებდნენ და ბოლოს მოკლავდნენ (მათ. 16:21). თუმცა პეტრეს წარმოუდგენლად მიაჩნდა, რომ იეჰოვა ისრაელის მხსნელის და აღთქმული მესიის სიკვდილს დაუშვებდა (მათ. 16:16). ამიტომაც უთხრა იესოს: „შეიწყალე თავი, უფალო! ნუ დამართებ თავს ამას!“ (მათ. 16:22). ფაქტია, პეტრეს ამ საკითხისთვის იეჰოვას თვალით რომ შეეხედა, იესოს გადარწმუნებას არ შეეცდებოდა.
6. საიდან გამოჩნდა, რომ იესოს გათავისებული ჰქონდა იეჰოვას აზროვნება?
6 პეტრესგან განსხვავებით იესოს გათავისებული ჰქონდა ზეციერი მამის აზროვნება. ამიტომ პეტრეს უთხრა: „მომცილდი, სატანა! დაბრკოლება ხარ ჩემთვის, რადგან ღვთიურზე კი არა, ადამიანურზე ფიქრობ!“ (მათ. 16:23). როგორც ჩანს, პეტრეს ცუდი მოტივი არ ჰქონდა, მაგრამ მისი რჩევა იეჰოვას ნების საწინააღმდეგო იყო. ამიტომ იესომ არ გაითვალისწინა ის. ამ შემთხვევამ პეტრეს იმის აუცილებლობა დაანახა, რომ მეტად უნდა გაეთავისებინა იეჰოვას აზროვნება. მისი მაგალითი ჩვენთვისაც საყურადღებოა.
7. საიდან გამოჩნდა, რომ პეტრე ცდილობდა, დამსგავსებოდა იეჰოვას აზროვნებაში? (იხილეთ სურათი).
7 მოგვიანებით მომხდარი ერთი შემთხვევიდან გამოჩნდა, რომ პეტრე მზად იყო, იეჰოვას თვალით შეეხედა საკითხისთვის. როცა წინადაუცვეთელ უცხოტომელებსაც მიეცათ იეჰოვას თაყვანისცემის შესაძლებლობა, პეტრეს დაევალა, უცხოტომელ კორნელიუსთან მისულიყო და მისთვის ექადაგა. იმის ფონზე, რომ იუდეველები უცხოტომელებთან ურთიერთობას ერიდებოდნენ, ბუნებრივია, პეტრეს ამ დავალების შესასრულებლად დამოკიდებულების შეცვლა მოუწევდა. ამჯერად ის ჩასწვდა, რა იყო იეჰოვას ნება. ამიტომ ყოველგვარი ყოყმანის გარეშე წავიდა კორნელიუსთან (საქ. 10:28, 29). შედეგად კორნელიუსი და მისი სახლეულობა პირველი წინადაუცვეთელი უცხოტომელი ქრისტიანები გახდნენ (საქ. 10:21–23, 34, 35, 44–48).
პეტრე კორნელიუსის სახლში შედის (იხილეთ აბზაცი 7).
8. საიდან გამოჩნდება, რომ იეჰოვას თვალით ვუყურებთ საკითხებს? (1 პეტრე 3:8).
8 წლების შემდეგ პეტრემ თანაქრისტიანებს მოუწოდა, „ერთი აზრისანი“ ყოფილიყვნენ (წაიკითხეთ 1 პეტრეს 3:8). ამას იმ შემთხვევაში შევძლებთ, თუ ბიბლიიდან ღვთის თვალსაზრისს გავიგებთ და გავითავისებთ. მაგალითად, წარმოიდგინეთ, რომ თქვენს კრებაში ვინმემ სრული დროით მსახურება გადაწყვიტა, რადგან სურს, გაითვალისწინოს იესოს რჩევა და პირველ ადგილზე დააყენოს ღვთის სამეფო (მათ. 6:33). როგორ მოიქცევით? თუ ამ საკითხს თქვენც იეჰოვას თვალით შეხედავთ, სრული დროით მსახურებაზე გულს არ აუცრუებთ. პირიქით, წაახალისებთ და თქვენს მხარდაჭერაში დაარწმუნებთ მას.
ᲘᲧᲐᲕᲘᲗ ᲗᲐᲕᲛᲓᲐᲑᲚᲔᲑᲘ
9, 10. საიდან გამოჩნდა იესოს განსაკუთრებული თავმდაბლობა?
9 სიკვდილის წინა საღამოს იესომ პეტრესა და სხვა მოციქულებს თავმდაბლობის ფასი დაანახა. ცოტა ხნით ადრე მან პეტრე და იოანე გაგზავნა, რომ საპასექო ვახშმისთვის ყველაფერი მოემზადებინათ. ისინი იმაზეც იზრუნებდნენ, რომ ფეხების დასაბანად ტაშტი და პირსახოცი ჰქონოდათ. მაგრამ ვის ეყოფოდა იმის თავმდაბლობა, რომ იქ მისულებისთვის ფეხები დაებანა?
10 მოწაფეების გასაკვირად ეს საქმე, რომელსაც ჩვეულებრივ მსახური ასრულებდა, საკუთარ თავზე იესომ აიღო. მან მოსასხამი გაიხადა, პირსახოცი წელზე შემოირტყა, ტაშტში წყალი ჩაასხა და მოწაფეებისთვის ფეხების დაბანა დაიწყო (იოან. 13:4, 5). თორმეტივე მოციქულისთვის ფეხების დაბანა საკმაო დროს წაიღებდა. აღსანიშნავია, რომ იესომ არც იუდა გამოტოვა, რომელიც სულ ცოტა ხანში მას გასცემდა. თუმცა იესომ თავი დაიმდაბლა და ეს საქმე ბოლომდე მიიყვანა. ბოლოს მათ ასეთი სიტყვები უთხრა: „ხვდებით, რატომ დაგბანეთ ფეხები? თქვენ მოძღვარსა და უფალს მიწოდებთ, და მართლებიც ხართ, რადგან ასეცაა. ამიტომ, თუკი მე, უფალმა და მოძღვარმა, დაგბანეთ ფეხები, თქვენც უნდა დაბანოთ ერთმანეთს ფეხები“ (იოან. 13:12–14).
თავმდაბლობა ჩანს იმაში, თუ რა წარმოდგენა აქვს ადამიანს საკუთარ თავზე თუ სხვებზე.
11. საიდან გამოჩნდა, რომ პეტრემ კარგად დაინახა თავმდაბლობის ფასი? (1 პეტრე 5:5; იხილეთ აგრეთვე სურათი).
11 საიდან გამოჩნდა, რომ პეტრემ კარგად დაინახა თავმდაბლობის ფასი? ერთხელ, როცა იესო უკვე ზეცად იყო ამაღლებული, მან დაბადებიდან წელსქვემოთ მოწყვეტილი კაცი განკურნა (საქ. 1:8, 9; 3:2, 6–8). ამის დანახვაზე მას განცვიფრებული ხალხი შემოეხვია ირგვლივ და ის ყურადღების ცენტრში მოექცა (საქ. 3:11). შეიფერებდა პეტრე ამას? ის ხომ ისეთ კულტურაში იყო გაზრდილი, სადაც მდგომარეობას დიდი მნიშვნელობა ენიჭებოდა. პეტრეს ამ სიტუაციაში თავმდაბლობა არ დაუკარგავს და მთელი დიდება დამსახურებულად იეჰოვასა და იესოს შემდეგი სიტყვებით მიაგო: „ეს კაცი, რომელსაც ხედავთ და იცნობთ, იესოს სახელმა და ამ სახელისადმი ჩვენმა რწმენამ გააძლიერა“ (საქ. 3:12–16). მოგვიანებით პეტრემ ქრისტიანებსაც მისწერა, რომ თავმდაბლად მოქცეოდნენ ერთმანეთს, რაც დედნისეულ ენაზე ასე ჟღერს: „თავმდაბლობით შემოისარტყლეთ“. ამ სიტყვებმა შეიძლება ზუსტად ის მომენტი გაგვახსენოს, როცა იესომ პირსახოცი წელზე შემოირტყა და მოციქულებს ფეხები დაბანა (წაიკითხეთ 1 პეტრეს 5:5).
როცა პეტრემ სასწაული მოახდინა, მთელი დიდება თავმდაბლურად იეჰოვასა და იესოს მიაგო. მსგავსად, ჩვენი თავმდაბლობაც იმაში გამოჩნდება, თუ სიკეთეს სხვების დასანახად არ გავაკეთებთ და სანაცვლოდ რაიმეს არ დაველოდებით (იხილეთ აბზაცები 11, 12).
12. როგორ მივბაძოთ პეტრეს?
12 პეტრემ შეძლო, რომ თავმდაბალი ადამიანი გამხდარიყო და ჩვენც ბევრი რამის სწავლა შეგვიძლია მისგან. თავმდაბლობა მხოლოდ სიტყვებით არ ვლინდება. „თავმდაბლობად“ ნათარგმნი სიტყვა, რომელიც პეტრემ გამოიყენა, მიუთითებს იმაზე, თუ რა წარმოდგენა აქვს ადამიანს საკუთარ თავზე თუ სხვებზე. ჩვენ სიკეთის კეთებისკენ იეჰოვასა და ადამიანების სიყვარული აღგვძრავს და არა თავის წარმოჩენის სურვილი. თუ ნამდვილად თავმდაბლები ვართ, ჩვენთვის მნიშვნელობა არ ექნება, შეამჩნევენ თუ არა სხვები იმას, რასაც იეჰოვასა და თანაქრისტიანებისთვის ვაკეთებთ (მათ. 6:1–4).
„ᲡᲐᲦᲐᲓ ᲘᲐᲖᲠᲝᲕᲜᲔᲗ“
13. საიდან გამოჩნდება, რომ საღად ვაზროვნებთ?
13 რაში ჩანს, რომ ქრისტიანი საღად აზროვნებს? (1 პეტ. 4:7). იმაში, რომ გადაწყვეტილების მიღების დროს ითვალისწინებს იეჰოვას თვალსაზრისს. გარდა ამისა, გააზრებული აქვს, რომ იეჰოვასთან ურთიერთობა უმთავრესი უნდა იყოს მის ცხოვრებაში. ისიც ესმის, რომ ყოვლისმცოდნე არ არის, ამიტომ საკუთარ თავზე არ არის დაიმედებული. ის ხშირად მიმართავს იეჰოვას ლოცვით, რადგან მასზეა მინდობილი.b
14. როდის ვერ შეძლო პეტრემ იეჰოვაზე მინდობა?
14 სიკვდილის წინა ღამეს იესომ თავის მოწაფეებს უთხრა: „ამაღამ ყველანი მიმატოვებთ“. მაგრამ პეტრემ თავდაჯერებით განაცხადა: „ყველამ რომ მიგატოვოს, მე არ მიგატოვებ!“. იმავე ღამეს იესომ პეტრესა და სხვა მოწაფეებს ურჩია: „იფხიზლეთ და განუწყვეტლივ ილოცეთ“ (მათ. 26:31, 33, 41). პეტრეს ეს რჩევა რომ გაეთვალისწინებინა, არ შეშინდებოდა და იესოს საჯაროდ არ უარყოფდა, მოგვიანებით ეს არც სანანებელი გაუხდებოდა (მათ. 26:69–75).
15. საიდან გამოჩნდა, რომ იესოს სიკვდილის მოლოდინშიც არ დაუკარგავს საღი აზროვნება?
15 მიუხედავად იმისა, რომ იესო სრულყოფილი იყო, ის საკუთარ თავზე არ იყო დანდობილი. ეს იქიდანაც გამოჩნდა, რომ სიკვდილის წინა ღამეს არაერთხელ მიმართა მამას ლოცვით. სწორედ ეს დაეხმარა, გაბედულად შეესრულებინა იეჰოვას ნება (მათ. 26:39, 42, 44; იოან. 18:4, 5). ეჭვგარეშეა, პეტრეს მთელი ცხოვრება ემახსოვრებოდა ლოცვის მიმართ იესოს დამოკიდებულება.
16. საიდან გამოჩნდა, რომ პეტრემ ისწავლა საღად აზროვნება? (1 პეტრე 4:7).
16 დროთა განმავლობაში პეტრემ ისწავლა, რამდენად მნიშვნელოვანი იყო ლოცვა და იეჰოვაზე მინდობა. ამაზე მოწმობს ის, რაც იესოს მკვდრეთით აღდგომის შემდეგ მოხდა. იესო პეტრესა და სხვა მოციქულებს დაჰპირდა, რომ სასიხარულო ცნობის საქადაგებლად წმინდა სულს მიიღებდნენ. თუმცა გააფრთხილა, რომ წმინდა სულის მიღებამდე იერუსალიმში დარჩენილიყვნენ (ლუკ. 24:49; საქ. 1:4, 5). რას აკეთებდა პეტრე მთელი იმ დროის მანძილზე, ვიდრე დანაპირების შესრულებას ელოდა? ის და სხვა მოწაფეები „გამუდმებით ლოცულობდნენ“ (საქ. 1:13, 14). მოგვიანებით პეტრემ თავის პირველ წერილში სხვა ქრისტიანებსაც მოუწოდა, საღად ეაზროვნათ და გამუდმებით ელოცათ (წაიკითხეთ 1 პეტრეს 4:7). აშკარაა, მან ისწავლა იეჰოვაზე მინდობა და კრების ბურჯიც კი გახდა (გალ. 2:9).
17. რა არ უნდა შევწყვიტოთ არასდროს? (იხილეთ აგრეთვე სურათი).
17 საღი აზროვნება რომ შევინარჩუნოთ, ხშირად უნდა ვილოცოთ. უნდა გვესმოდეს, რომ რა ნიჭი და უნარიც არ უნდა გვქონდეს, იეჰოვას ხელმძღვანელობა მაინც გვჭირდება. ეს განსაკუთრებით მაშინაა აუცილებელი, როცა მნიშვნელოვან გადაწყვეტილებებს ვიღებთ. ეს იმის მაჩვენებელი იქნება, რომ ვენდობით იეჰოვას და ეჭვი არ გვეპარება, რომ მან უკეთ იცის, რა არის ჩვენთვის საუკეთესო.
პეტრემ ისწავლა, რამდენად მნიშვნელოვანი იყო ლოცვა და იეჰოვაზე მინდობა. ჩვენც შევძლებთ საღად აზროვნებას, თუ ლოცვაში დახმარებას ვთხოვთ იეჰოვას, განსაკუთრებით კი მაშინ, როცა მნიშვნელოვან გადაწყვეტილებებს ვიღებთ (იხილეთ აბზაცი 17).c
18. როგორ შეგვიძლია უფრო მეტად დავემსგავსოთ იეჰოვას აზროვნებაში?
18 რაოდენ მადლიერი ვართ, რომ იეჰოვამ თავის ანარეკლად შეგვქმნა და შეგვიძლია ისეთივე თვისებები განვივითაროთ, როგორიც მას აქვს (დაბ. 1:26). ცხადია, იეჰოვას მიბაძვას სრულყოფილად ვერასდროს შევძლებთ (ეს. 55:9). თუმცა პეტრეს მსგავსად ჩვენც უნდა ვეცადოთ, უფრო მეტად დავემსგავსოთ იეჰოვას აზროვნებაში, ვიყოთ თავმდაბლები და საღად ვიაზროვნოთ.
ᲡᲘᲛᲦᲔᲠᲐ 30 ჩემო მამა, ჩემო ღმერთო, ჩემო მეგობარო!
a 1 პეტრეს 4:1-ში „განწყობად“ ნათარგმნი ბერძნული სიტყვა აგრეთვე შეიძლება ითარგმნოს, როგორც „დამოკიდებულება“, „აზროვნება“.
b მეტი ინფორმაცია იმის შესახებ, თუ რა იგულისხმება საღ აზროვნებაში ვებსაიტზე jw.org ან აპლიკაციაში JW ბიბლიოთეკა იხილეთ „ბიბლიური მუხლების ახსნა“, სტატია „2 ტიმოთეს 1:7 – „არ მოგვცა ჩვენ ღმერთმა სული მოშიშებისა“, აბზაცი „საღი აზროვნება“.
c ᲡᲣᲠᲐᲗᲘᲡ ᲐᲦᲬᲔᲠᲐ: დამსაქმებელთან გასაუბრებამდე და გულში ლოცულობს.