ხელმძღვანელი საბჭოს ახალი წევრები

2024 ᲬᲚᲘᲡ 5 ოქტომბერს გამართულ ყოველწლიურ შეხვედრაზე გაკეთდა განცხადება, რომ იეჰოვას მოწმეთა ხელმძღვანელ საბჭოს შეემატა ორი ახალი წევრი: ჯოდი ჯედელი და ჯეიკობ რამფი. ორივე ძმა უკვე წლებია, რაც ერთგულად ემსახურება იეჰოვას.

ჯოდი ჯედელი დაიბადა მისურის შტატში (აშშ). ის ჭეშმარიტებაში გაიზარდა. იმ ტერიტორიაზე, სადაც მისი ოჯახი ცხოვრობდა, ცოტა იეჰოვას მოწმე იყო. ამიტომ იქ ქვეყნის სხვადასხვა კუთხიდან ბევრი მაუწყებელი ჩადიოდა ქადაგების მიზნით. ამ და-ძმების სიყვარულმა და ერთობამ დიდი შთაბეჭდილება მოახდინა ჯოდიზე. ის 1983 წლის 15 ოქტომბერს მოინათლა, როცა ჯერ კიდევ მოზარდი იყო. ჯოდის ძალიან უყვარდა მსახურება, ამიტომ სკოლის დამთავრების შემდეგ 1989 წლის სექტემბერში პიონერობა დაიწყო.

ბავშვობაში მშობლებს ჯოდი და მისი უმცროსი და ბეთელში მიჰყავდათ ხოლმე სტუმრად. ამან მათ ბეთელში მსახურების სურვილი გაუჩინა. ორივემ აიხდინა ეს სურვილი. ჯოდიმ 1990 წლის სექტემბერში დაიწყო უოლკილში მსახურება. თავიდან ის დასუფთავების განყოფილებაში მუშაობდა, მოგვიანებით კი – ბეთელის სამედიცინო განყოფილებაში.

იმ პერიოდში ახლომდებარე ესპანურენოვანი კრებები სწრაფად იზრდებოდა; შესაბამისად, უფრო მეტი ძმა იყო საჭირო. ჯოდიმაც გადაწყვიტა, ერთ-ერთ ასეთ კრებაში გადასულიყო და ესპანური ესწავლა. მალევე გაიცნო ერთი პიონერი და დამარისი, რომელიც იმავე რაიონის სხვა კრებაში მსახურობდა. დაქორწინების შემდეგ დამარისმაც ჯოდისთან ერთად გააგრძელა ბეთელში მსახურება.

2005 წელს მათ ბეთელი დატოვეს, რომ მშობლებზე ეზრუნათ. იმ პერიოდში ისინი პიონერებად მსახურობდნენ. ჯოდი პიონერული მსახურების სკოლის ინსტრუქტორიც იყო, აგრეთვე მსახურობდა საავადმყოფოებთან თანამშრომლობის კომიტეტსა და რეგიონულ სამშენებლო კომიტეტში.

2013 წელს ჯედელები უორიკში მიიწვიეს სამშენებლო პროექტზე. მოგვიანებით ისინი პატერსონსა და უოლკილშიც მსახურობდნენ. ჯოდი ადგილობრივ საპროექტო-სამშენებლო განყოფილებასა და სამედიცინო მომსახურების საინფორმაციო ცენტრში მუშაობდა. 2023 წლის მარტში ის სამსახურებრივი კომიტეტის დამხმარედ დაინიშნა. მსახურებაში გატარებულ წლებზე ის ასეთ რამეს ამბობს: „როცა ახალ დავალებას იღებ, შეიძლება შიში დაგეუფლოს. ზუსტად ამ დროს უნდა მიენდო იეჰოვას და გახსოვდეს, რომ ის იმად გაქცევს, რადაც საჭიროა“.

ჯეიკობ რამფი კალიფორნიაში (აშშ) დაიბადა. დედამისი არააქტიური მაუწყებელი იყო, თუმცა მაინც ცდილობდა, პატარა ჯეიკობისთვის ბიბლიიდან რაღაც-რაღაცები ესწავლებინა. ამასთანავე, ჯეიკობი ყოველ წელს ბებიასთან ჩადიოდა, რომელიც იეჰოვას ერთგული მსახური იყო. ბებიამ მას ჭეშმარიტებისადმი ინტერესი გაუღვივა. 13 წლის რომ გახდა, ჯეიკობმა ბიბლიის შესწავლა მოისურვა. ის 1992 წლის 27 სექტემბერს მოინათლა. საბედნიეროდ, დედამისმა კრებაზე დასწრება და მსახურება განაახლა. საბოლოოდ დანარჩენი ოჯახის წევრებიც მოინათლნენ.

ჯეიკობი ხედავდა, როგორი ბედნიერები იყვნენ პიონერები. ამიტომ სკოლის დამთავრების შემდეგ 1995 წლის სექტემბერში მანაც პიონერობა დაიწყო. 2000 წელს ის ეკვადორში გადავიდა, სადაც მქადაგებლებზე დიდი მოთხოვნა იყო. იქ მან კანადიდან ჩასული პიონერი და ინგა გაიცნო. დაქორწინების შემდეგ ისინი ეკვადორის ერთ პატარა ქალაქში მსახურობდნენ, სადაც მაუწყებლების მცირერიცხოვანი ჯგუფი იყო. დღეს ამ ქალაქში უკვე კრებაა.

მოგვიანებით რამფები ჯერ სპეციალურ პიონერებად დაინიშნენ, შემდეგ კი სარაიონო მსახურებას შეუდგნენ. 2011 წელს ისინი სკოლა „გალაადის“ 132-ე კლასში მიიწვიეს. სკოლის დამთავრების შემდეგ სხვადასხვა ქვეყანაში სხვადასხვა დავალებას ასრულებდნენ როგორც ბეთელში, ისე მისიონერულ თუ სარაიონო მსახურებაში. ჯეიკობი რაღაც პერიოდი მახარობელთა სკოლის ინსტრუქტორიც იყო.

კოვიდ-19 პანდემიის გამო რამფებს შეერთებულ შტატებში მოუწიათ დაბრუნება. ისინი უოლკილში მიიწვიეს, სადაც ჯეიკობმა სამსახურებრივ განყოფილებაში გაიარა მომზადება. ამის შემდეგ ისევ ეკვადორში გაგზავნეს, სადაც ჯეიკობმა ფილიალის კომიტეტში დაიწყო მსახურება. 2023 წელს უორიკში გადანიშნეს. 2024 წლის იანვარში ჯეიკობი სამსახურებრივი კომიტეტის დამხმარედ დაინიშნა. მსახურებაში გატარებულ წლებს ის ასე აფასებს: „მნიშვნელობა არა აქვს, სად მსახურობ, მთავარი ის ხალხია, ვისთან ერთადაც მსახურობ“.

ჩვენ ძალიან ვაფასებთ ამ ძმებს და მათ შრომას (ფილ. 2:29).