ხელმძღვანელი საბჭოს წერილი

„წყალობა და მშვიდობა თქვენ ჩვენი მამა ღმერთისა და უფალ იესო ქრისტესგან“. ასეთი მისალმებით იწყებდა პავლე ბევრ თავის წერილს, რომლებსაც კრებებს უგზავნიდა. ჩვენც ამ სიტყვებით გვსურს, მოგესალმოთ (ეფეს. 1:2).

რამდენად მადლიერნი ვართ იეჰოვას მიერ გამოვლენილი წყალობისთვის — იესო ქრისტეს მსხვერპლისთვის! გამოსასყიდის საშუალებით შეგვიძლია ღვთის მოწონება მივიღოთ. რაც უნდა გულმოდგინედ შევისწავლოთ ბიბლია, ვიქადაგოთ სასიხარულო ცნობა ან კარგი საქმეები ვაკეთოთ, ჩვენი ძალისხმევით ღვთის მოწონებას ვერასოდეს დავიმსახურებთ. ცოდვების მიტევება და მარადიული სიცოცხლე ჩვენი ძალისხმევის საზღაური კი არ არის, არამედ ღვთის ძღვენია, რითაც იეჰოვას წყალობა ვლინდება (რომ. 11:6).

პავლემ თანამორწმუნეებს მისწერა: «გეხვეწებით, ისე არ მიიღოთ ღვთის წყალობა, რომ მხედველობიდან გამოგრჩეთ მისი მიზანი, რადგან ის ამბობს: „სასურველ დროს მოგისმინე და ხსნის დღეს დაგეხმარე“. აი ახლაა ყველაზე სასურველი დრო. აი ახლაა ხსნის დღე». პირველ საუკუნეში იერუსალიმის განადგურებამდე „სასურველი დრო“ იყო. გულწრფელი ადამიანები, რომლებსაც უყვარდათ იეჰოვა, სულიერად დახსნილნი იქნენ. შედეგად, ერთგული ქრისტიანები, რომლებიც იერუსალიმის განადგურებამდე, ახ. წ. 70 წლამდე, მთებში გაიქცნენ, ფიზიკურადაც გადარჩნენ (2 კორ. 6:1, 2).

დღეს ჩვენც „სასურველ დროს“ ვცხოვრობთ; ახლაა „ხსნის დღე“. მათ, ვისაც იეჰოვა თავის მსახურებად ირჩევს და სულიერ ხსნას სთავაზობს, გადარჩენის შესაძლებლობა ეძლევათ „უფლის დიდ დღეს“, რომელიც ძალიან ახლოსაა (სოფ. 1:14).

იეჰოვას დღის მოსვლა სერიოზულ პასუხისმგებლობას გვაკისრებს. ჩვენი მოვალეობაა, გავაფრთხილოთ ხალხი იეჰოვას დღის შესახებ და დავეხმაროთ კეთილი გულის ადამიანებს, მიიღონ იეჰოვას წყალობა, რათა ისინიც გადარჩნენ. პავლე ესმოდა, რამდენად სერიოზული პასუხისმგებლობა ეკისრა. მან დაწერა: „მაგრამ, ვაი მე, თუ არ ვაუწყებ სასიხარულო ცნობას!“ თავისი გრძნობები მან შემდეგი სიტყვებით გადმოსცა: „ბრძენთა და უგუნურთა მოვალე ვარ. ამიტომაც ვისწრაფვი, რომ სასიხარულო ცნობა გაუწყოთ“ (1 კორ. 9:16; რომ. 1:14, 15).

თუ უარს ვიტყვით ამ სასიცოცხლოდ მნიშვნელოვანი დავალების შესრულებაზე და ხალხს არ გავაფრთხილებთ, იეჰოვას წინაშე ვაგებთ პასუხს. ჩვენთვის ცნობილია, თუ რა უთხრა იეჰოვამ წინასწარმეტყველ ეზეკიელს: „ძეო კაცისავ! ისრაელის სახლის გუშაგად დაგაყენე და ჩემი პირიდან მოისმენ სიტყვას და გააფრთხილებ მათ ჩემგან. როდესაც მე ვეტყვი ბოროტმოქმედს: მოკვდები! და შენ არ გააფრთხილებ მას მისი ბოროტი გზების გამო, რათა გადარჩეს, ის ბოროტმოქმედი თავის ურჯულოებაში მოკვდება, მის სისხლს კი შენი ხელიდან მოვიკითხავ“ (ეზეკ. 3:17, 18).

ჩვენ ძნელად ასატან ბოლო დღეებში ვცხოვრობთ. იოლი არ არის ოჯახისა და სამსახურის საქმეები კრების შეხვედრებსა და ქადაგებას შევუთავსოთ. გარდა ამისა, ბევრ თქვენგანს ავადმყოფობასთან, დეპრესიასთან და ხანდაზმულობასთან დაკავშირებულ პრობლემებთან გიწევთ გამკლავება. ზოგი წინააღმდეგობებს ხვდებით. უმეტესობა კი ‘მძიმე ტვირთს’ ატარებთ. გვსურს, ჩვენი გრძნობები იესოს სიტყვებით გამოვხატოთ: „მოდით ჩემთან, მძიმედ მშრომელნო და ტვირთმძიმენო, და მე გამოგაცოცხლებთ“ (მათ. 11:28). ქებას იმსახურებთ ყველა, ვინც სირთულეების მიუხედავად, მთელი გულით ცდილობთ, იეჰოვასადმი ერთგულება შეინარჩუნოთ.

იეჰოვას კურთხევისა და თქვენი გულმოდგინე მსახურების შედეგად, მსოფლიოში ყოველკვირა საშუალოდ 4 764 ადამიანი ინათლება. გასულ სამსახურებრივ წელს 1 417 კრება ჩამოყალიბდა. ვლოცულობთ და ვიმედოვნებთ, რომ ახალი წიგნი „რას გვასწავლის ბიბლია სინამდვილეში?“, რომელიც 120-ზე მეტ ენაზეა ხელმისაწვდომი, მილიონებს დაეხმარება, მიიღონ იეჰოვას წყალობა და მშვიდობა „ხსნის დღეს“.

გვიყვარხართ და ვლოცულობთ თქვენთვის. მადლობას გიხდით, რომ თქვენც ლოცულობთ ჩვენთვის.

თქვენი ძმები,

იეჰოვას მოწმეთა ხელმძღვანელი საბჭო