მსოფლიოში ინფლაციის დონე სწრაფად იზრდება — რას ამბობს ბიბლია?

„მსოფლიო ეკონომიკა კვლავ საფრთხეშია. ინფლაციის დონე კატასტროფულად მატულობს, შემოსავალი კი მნიშვნელოვნად მცირდება“, — აღნიშნავს მსოფლიო ბანკის პრეზიდენტი 2022 წლის ივნისის ანგარიშში.

„საწვავსა და სურსათზე ფასებმა საგრძნობლად იმატა, რაც ყველაზე მძიმედ აისახა განვითარებად ქვეყნებში მცხოვრებ მოსახლეობაზე“, — აცხადებს საერთაშორისო სავალუტო ფონდი.

ბიბლია გვიხსნის, რატომ არის მსოფლიო ეკონომიკური პრობლემების წინაშე; გვასწავლის, როგორ ვიცხოვროთ დღევანდელ რეალობაში და იმედს გვისახავს, რომ ამ პრობლემას ერთხელ და სამუდამოდ მოეღება ბოლო.

ინფლაცია „ბოლო დღეებში“

• ბიბლია ჩვენს დროს „ბოლო დღეებს“ უწოდებს (2 ტიმოთე 3:1).

• იესომ თქვა, რომ ბოლო დღეებისთვის დამახასიათებელი იქნებოდა საზარელი და შიშის მომგვრელი მოვლენები (ლუკა 21:11). ფასების ზრდის გამო ადამიანებს ხვალინდელი დღე აშინებთ, რადგან ფიქრობენ, რომ ვერ შეძლებენ ოჯახების რჩენას.

• წიგნ „გამოცხადებაში“ ნაწინასწარმეტყველებია, რომ ბოლო დღეებში საკვებზე ფასები საგრძნობლად მოიმატებდა. «გავიგონე რაღაც ხმა, . . ეს ხმა ამბობდა: „ერთი საწყაო ხორბალი დინარად [ერთი დღის გასამრჯელო] და სამი საწყაო ქერი დინარად“» (გამოცხადება 6:6).

თუ გსურთ, მეტი გაიგოთ ბოლო დღეებისა და წიგნ „გამოცხადებაში“ ჩაწერილი წინასწარმეტყველების შესახებ, უყურეთ ვიდეოს „როგორ შეიცვალა მსოფლიო 1914 წლის შემდეგ“ და გაეცანით სტატიას „რას განასახიერებს ოთხი მხედარი?“.

გამოსავალი ეკონომიკური პრობლემებიდან

• „ააშენებენ სახლებს და იცხოვრებენ მათში, ჩაყრიან ვაზს და შეჭამენ მის ნაყოფს. არ ააშენებენ იმისთვის, რომ სხვამ იცხოვროს, და არც იმისთვის დარგავენ, რომ სხვამ შეჭამოს“ (ესაია 65:21, 22).

• „უხვად იქნება მარცვლეული დედამიწაზე, მთის მწვერვალებზეც უხვად იქნება“ (ფსალმუნი 72:16).

• «„საწყალთა ჩაგვრისა და საბრალოთა ოხვრის გამო მათ საშველად წამოვიმართები“, — ამბობს იეჰოვა» (ფსალმუნი 12:5).a

მალე ღმერთი საბოლოოდ აღმოფხვრის ეკონომიკურ პრობლემებს მთელ მსოფლიოში და არა მხოლოდ ერთ რომელიმე ქვეყანაში. იმის გასაგებად, თუ როგორ გააკეთებს ამას, გაეცანით სტატიას „იარსებებს ოდესმე ეკონომიკური თანასწორობა?“.

ბიბლია დღესვე გვეხმარება, თავი გავართვათ ეკონომიკურ სირთულეებს. ის პრაქტიკულ რჩევებს გვაძლევს, როგორ გამოვიყენოთ ფული გონივრულად (იგავები 23:4, 5; ეკლესიასტე 7:12). მეტი ინფორმაციისთვის წაიკითხეთ სტატიები „გაუფრთხილდით საარსებო საშუალებებს“ და „როგორ ვიმყოფინოთ შემოსავალი?“.