რას ნიშნავს, იყო ქრისტიანი? – რას ამბობს ბიბლია?

დღეს ბევრი სიამაყით აღნიშნავს, რომ ქრისტიანია. თუმცა მათი ცხოვრების წესი სხვებისთვის ზიანის მომტანია. ზოგიერთი მათგანი ეგოისტი, არაკეთილსინდისიერი და უხეშია. ზოგი კი ქორწინების აღთქმის ერთგული არ რჩება. ამის შემყურე ბევრს უჩნდება კითხვა: სინამდვილეში რას ნიშნავს, იყო ქრისტიანი?

რას ნიშნავს, იყო ქრისტიანი?

ძალიან მარტივია, ადამიანმა საკუთარ თავს ქრისტიანი უწოდოს, თუმცა ეს საკმარისი არ არის. ბიბლიიდან ვიგებთ, რომ ქრისტიანები იესოს მიმდევრებს ეწოდებათ (საქმეები 11:26). იესომ თქვა: „თუ ჩემი სიტყვისამებრ იქცევით, ნამდვილად ჩემი მოწაფეები ხართ“ (იოანე 8:31). ფაქტია, იესოს სიტყვების სრულყოფილად შესრულება არავის შეუძლია. მაგრამ ქრისტიანები უნდა ითვალისწინებდნენ იესოს მითითებებს და ცდილობდნენ, ყველაფერში მიჰბაძონ მას. განვიხილოთ რამდენიმე მაგალითი.

ქრისტიანები უანგარო სიყვარულს ავლენენ

რას ამბობდა იესო: „ახალ მცნებას გაძლევთ: გიყვარდეთ ერთმანეთი! როგორც მე შეგიყვარეთ, თქვენც ისე გიყვარდეთ ერთმანეთი! ჩემი მოწაფეები რომ ხართ, იმით გაიგებენ, თუკი ერთმანეთი გეყვარებათ“ (იოანე 13:34, 35).

როგორ იქცეოდა იესო: იესო ყველას მიმართ ავლენდა სიყვარულს მათი სოციალური სტატუსისა თუ წარსულის მიუხედავად. ის კურნავდა ავადმყოფებს და აპურებდა მშივრებს. მან საკუთარი სიცოცხლეც კი გაწირა ადამიანებისთვის (მათე 14:14–21; 20:28).

როგორ იქცევიან ქრისტიანები: ქრისტიანები უანგარო სიყვარულს ავლენენ. ისინი ხელგაშლილები, მიუკერძოებლები და მიმტევებლები არიან. ეხმარებიან გასაჭირში მყოფთ და რაც შეუძლიათ, ყველაფერს აკეთებენ სხვებისთვის (1 იოანე 3:16).

ქრისტიანები პატიოსნები არიან

რას ამბობდა იესო: „მე ვარ... ჭეშმარიტება“ (იოანე 14:6).

როგორ იქცეოდა იესო: იესო ყოველთვის სიმართლეს ამბობდა და ყველაფერში პატიოსნად იქცეოდა. ის არ ცდილობდა სხვების მოტყუებას ან შეცდომაში შეყვანას. იესო მაშინაც კი ავლენდა პატიოსნებას, როცა ამის გამო შეიძლებოდა პრობლემები შექმნოდა (მათე 22:16; 26:63–67).

როგორ იქცევიან ქრისტიანები: ქრისტიანები არ იტყუებიან, არ იპარავენ, პატიოსნად იხდიან გადასახადებს და კეთილსინდისიერად ასრულებენ თავიანთ სამუშაოს (რომაელები 13:5–7; ეფესოელები 4:28). მათ არ შეჰყავთ სხვები შეცდომაში, არ თაღლითობენ გამოცდების დროს და არც მცდარ ინფორმაციას აწვდიან დამსაქმებელს იმ მიზნით, რომ სამსახური დაიწყონ (ებრაელები 13:18).

ქრისტიანები კეთილად ეპყრობიან სხვებს

რას ამბობდა იესო: „მოდით ჩემთან, მძიმედ მშრომელნო და ტვირთმძიმენო, და მე გამოგაცოცხლებთ. დაიდგით ჩემი უღელი და ისწავლეთ ჩემგან, რადგან რბილი და თავმდაბალი ვარ, და გამოცოცხლდებით. ჩემი უღელი ადვილი სატარებელია, ჩემი ტვირთი კი – მსუბუქი!“ (მათე 11:28–30).

როგორ იქცეოდა იესო: იესო მეგობრული და თბილი ადამიანი იყო. მას ძალიან უყვარდა ბავშვები, ზრუნავდა გულდამწუხრებულ ადამიანებზე და ყველას ღირსეულად აგრძნობინებდა თავს (მარკოზი 10:13–15; ლუკა 9:11).

როგორ იქცევიან ქრისტიანები: ქრისტიანები თავაზიანად და პატივისცემით ესაუბრებიან სხვებს. ისინი უხეშად არავის ექცევიან და არც შეურაცხყოფას აყენებენ გარშემომყოფთ (ეფესოელები 4:29, 31, 32). გულწრფელად ინტერესდებიან სხვებით და ხელიდან არ უშვებენ მათი დახმარების შესაძლებლობას.

ქრისტიანები მეუღლის ერთგულები არიან

რას ამბობდა იესო: „ამიტომ, ვინც ღმერთმა შეაუღლა, კაცი ნუ დააშორებს მათ“ (მარკოზი 10:9).

როგორ იქცეოდა იესო: მართალია, იესო არასდროს დაქორწინებულა, მაგრამ ის წყვილებს მოუწოდებდა, რომ მეუღლისთვის არ ეღალატათ (მათე 19:9). იესო ურჩევდა მათ, რომ ისეთი არაფერი გაეკეთებინათ, რაც ქორწინებას ბზარს გაუჩენდა (მათე 5:28).

როგორ იქცევიან ქრისტიანები: ქრისტიანები სიტყვითა თუ საქმით არასდროს ამცირებენ თავიანთ მეუღლეებს (ებრაელები 13:4). ქრისტიანი წყვილები სიყვარულითა და პატივისცემით ეპყრობიან ერთმანეთს (ეფესოელები 5:28, 33).