დაგეხმარებათ ბიბლია, თუ სუიციდური ფიქრები გაქვთ?

ბიბლია გვპასუხობს:

დიახ! ბიბლიის ავტორი ღმერთია, „რომელიც გულდამძიმებულებს ანუგეშებს“ (2 კორინთელები 7:6). მართალია, ბიბლია არ არის ფსიქოლოგიური სახელმძღვანელო, მაგრამ ის ბევრს დაეხმარა, თავიდან ამოეგდო სუიციდური აზრები. მასში ჩაწერილი პრაქტიკული რჩევები თქვენც დაგეხმარებათ.

• რა პრაქტიკულ რჩევებს გვთავაზობს ბიბლია?

• მოგვითხრობს ბიბლია იმ ადამიანებზე, რომლებიც სიკვდილს ნატრობდნენ?

• რომელი ბიბლიური მუხლები დაგეხმარებათ, თავიდან ამოიგდოთ სუიციდური აზრები?

• როგორ უნდა მოიქცეთ, თუ მეგობარი გეუბნებათ: „სიკვდილი მინდა“?

• რა უნდა გააკეთოთ, თუ ოდესმე თავის მოკვლა გიცდიათ?

რა პრაქტიკულ რჩევებს გვთავაზობს ბიბლია?

• ● ესაუბრეთ სხვებს თქვენს გრძნობებზე.

  ბიბლია ამბობს: „ნამდვილ მეგობარს ყოველთვის ეყვარები; ის გასაჭირისთვის დაბადებული ძმაა“ (იგავები 17:17).

  არსი: როცა უარყოფითი ფიქრები მოგვეძალება, ამ დროს სხვების დახმარება გვჭირდება.

  თუ გრძნობებს არავის გაუმხელთ, უარყოფითი ფიქრები მოსვენებას დაგიკარგავთ, ხოლო თუ ამის შესახებ სხვებს მოუყვებით, გულზე მოგეშვებათ და შეძლებთ თქვენს მდგომარეობას დადებითად შეხედოთ.

  

  ეცადეთ, ასე მოიქცეთ: დღესვე ესაუბრეთ ვინმეს, მაგალითად ოჯახის წევრს ან სანდო მეგობარს.a აგრეთვე შეგიძლიათ გრძნობები ფურცელზე გადაიტანოთ.

• ● უარი არ თქვათ სამედიცინო დახმარებაზე.

  ბიბლია ამბობს: „ექიმი ჯანმრთელებს კი არა, ავადმყოფებს სჭირდებათ“ (მათე 9:12).

  არსი: როგორც წესი, როცა ავად ვართ, დახმარებისთვის ექიმს მივმართავთ.

  სუიციდური ფიქრები შეიძლება ემოციური და ფსიქიკური პრობლემების მანიშნებელი იყოს. ფიზიკური ტკივილის მსგავსად არც მენტალური პრობლემებია სასირცხვილო. ფსიქიკური და ემოციური დაავადებები განკურნებადია.

  ეცადეთ, ასე მოიქცეთ: რაც შეიძლება მალე მიმართეთ კვალიფიციურ ექიმს.

• ● გახსოვდეთ, რომ ღმერთი ზრუნავს თქვენზე.

  ბიბლია ამბობს: „განა ხუთ ბეღურას ორ მონეტად არ ყიდიან? მაგრამ ღმერთს არც ერთი მათგანი არ ავიწყდება ... ნუ გეშინიათ: უამრავ ბეღურაზე ძვირფასნი ხართ“ (ლუკა 12:6, 7).

  არსი: ღვთის თვალში ძალიან ძვირფასი ხართ.

  შეიძლება თავს მარტოსულად გრძნობთ, მაგრამ იცოდეთ, რომ ღმერთს კარგად ესმის, რას განიცდით. ის ზრუნავს თქვენზე, მაშინაც კი, თუ დაკარგული გაქვთ ცხოვრების ხალისი. ფსალმუნის 51:17-ში ნათქვამია: „მომნანიებელ და მოდრეკილ გულს შენ არ უგულებელყოფ, ღმერთო“. ღმერთს უნდა, რომ იცოცხლოთ, რადგან მას ძალიან უყვარხართ.

  ეცადეთ, ასე მოიქცეთ: ბიბლიიდან გამოიკვლიეთ იმის დამადასტურებელი არგუმენტები, რომ ღმერთს უყვარხართ. ამ მხრივ დიდ სამსახურს გაგიწევთ 24-ე თავის განხილვა ბიბლიის კვლევაში დამხმარე სახელმძღვანელოდან „დაუახლოვდი იეჰოვას“.

• ● ილოცეთ

  ბიბლია ამბობს: „ყველა თქვენი საწუხარი მას [ღმერთს] მიანდეთ, რადგან ის ზრუნავს თქვენზე“ (1 პეტრე 5:7).

  არსი: ღმერთი მოგიწოდებთ, გული გადაუშალოთ მას და გულწრფელად უთხრათ ყველაფერი, რაც გაწუხებთ.

  ღმერთს შეუძლია მოგცეთ შინაგანი სიმშვიდე და მოთმინების ძალა (ფილიპელები 4:6, 7, 13). სწორედ ასე ეხმარება ღმერთი მათ, ვინც წრფელი გულით მიმართავს ლოცვით (ფსალმუნი 55:22).

  

  ეცადეთ, ასე მოიქცეთ: დღესვე მიმართეთ ღმერთს ლოცვით. ლოცვის დროს მოიხსენიეთ ღვთის სახელი იეჰოვა და უთხარით, რასაც გრძნობთ (ფსალმუნი 83:18). სთხოვეთ მას, ძალა მოგცეთ სიცოცხლის ხალისის დასაბრუნებლად.

• ● იფიქრეთ ბიბლიურ იმედზე.

  ბიბლია ამბობს: „ეს სანდო და მტკიცე იმედი ღუზასავით არის ჩვენთვის“ (ებრაელები 6:19).

  არსი: როგორც შტორმის დროს ირყევა გემი, ასევე შეიძლება „ირყეოდეს“ თქვენი განწყობაც: ხან ძალიან კარგ ხასიათზე იყოთ, ხან – ძალიან ცუდზე. თუმცა ღუზის მსგავსად, ბიბლიური იმედი წონასწორობის შენარჩუნებაში დაგეხმარებათ.

  ეს იმედი მხოლოდ ოცნება არ არის. ეს არის ღვთის დანაპირები, რომლის თანახმადაც ღმერთი მოსპობს ტკივილის გამომწვევ ყველა მიზეზს (გამოცხადება 21:4).

  ეცადეთ, ასე მოიქცეთ: მეტი გაიგეთ ღვთის ამ დანაპირების შესახებ. ამისათვის წაიკითხეთ სტატია „უკეთესი მომავლის რეალური იმედი“.

• ● დაკავდით სასიამოვნო საქმით.

  ბიბლია ამბობს: „მხიარული გული მკურნალივითაა“ (იგავები 17:22).

  არსი: როცა სასიამოვნო საქმით ვართ დაკავებული, განწყობა გვიუმჯობესდება, რაც დადებითად აისახება ჩვენს ემოციურ მდგომარეობაზე.

  

  ეცადეთ, ასე მოიქცეთ: გააკეთეთ ის, რაც სიხარულს განიჭებთ. მაგალითად, მოუსმინეთ ისეთ მუსიკას, რომელიც განწყობას აგიმაღლებთ, წაიკითხეთ რამე გამამხნევებელი ან სხვა საყვარელი საქმით დაკავდით. აგრეთვე თავს უფრო ბედნიერად იგრძნობთ, თუ სხვებს სიკეთეს გაუკეთებთ და დაეხმარებით, თუნდაც მცირედით (საქმეები 20:35).

• ● იზრუნეთ თქვენს ფიზიკურ ჯანმრთელობაზე.

  ბიბლია ამბობს: „ფიზიკური ვარჯიში ... სასარგებლოა“ (1 ტიმოთე 4:8).

  არსი: ჩვენი ორგანიზმისთვის სასარგებლოა ფიზიკური ვარჯიში, საკმარისი ძილი და ჯანსაღი საკვები.

  ეცადეთ, ასე მოიქცეთ: იარეთ სწრაფი ნაბიჯით, დღეში თუნდაც 15 წუთი.

• ● გახსოვდეთ, რომ ცხოვრებაში ყველაფერი ცვალებადია, მათ შორის, ჩვენი განცდები და ემოციები.

  ბიბლია ამბობს: „ის კი არ იცით, რას მოგიტანთ ხვალინდელი დღე“ (იაკობი 4:14).

  არსი: ნებისმიერი პრობლემა, ისეთიც კი, რომელიც ერთი შეხედვით მოუგვარებელი ჩანს, დროებითია.

  რაც არ უნდა გამოუვალ სიტუაციაში იყოთ დღეს, ხვალ შეიძლება ყველაფერი რადიკალურად შეიცვალოს. ასე რომ, ეძებეთ თქვენს პრობლემასთან გასამკლავებელი გზები (2 კორინთელები 4:8). დიდი ალბათობით, თქვენი მდგომარეობა დროთა განმავლობაში უკეთესობისკენ შეიცვლება, მაგრამ თუ თვითმკვლელობას ჩაიდენთ, სიცოცხლეს უკან ვეღარ დაიბრუნებთ.

  ეცადეთ, ასე მოიქცეთ: წაიკითხეთ ბიბლიური მონაკვეთები, სადაც მოთხრობილია იმ ადამიანების შესახებ, რომლებიც გულგატეხილობის გამო სიკვდილს ნატრობდნენ. დააკვირდით, საბოლოოდ როგორ გაუმჯობესდა მათი სიტუაცია, თანაც ისე, რომ ხშირ შემთხვევაში ამას ვერც კი წარმოიდგენდნენ. ქვემოთ მოცემულია ამის რამდენიმე მაგალითი.

მოგვითხრობს ბიბლია რამეს იმ ადამიანებზე, რომლებიც სიკვდილს ნატრობდნენ?

დიახ. ბიბლია მოგვითხრობს იმ ადამიანებზე, რომლებმაც მძიმე განსაცდელში ყოფნისას სიკვდილი ინატრეს. ამის გამო ღმერთს არ გაუკიცხავს ისინი. პირიქით, მათ დახმარება აღმოუჩინა. მას თქვენი დახმარებაც შეუძლია.

ელია

• ● ვინ იყო ის? ელია უშიშარი წინასწარმეტყველი იყო. თუმცა გულგატეხილობისგან არც ის იყო დაზღვეული. „ელიაც ჩვენნაირი ადამიანი იყო“, – ვკითხულობთ იაკობის 5:17-ში.

• ● რატომ ნატრობდა სიკვდილს? იმიტომ, რომ რაღაც მომენტში თავს მარტოსულად და უღირსად გრძნობდა. ის ემუდარებოდა ღმერთს: „ნუღარ მაცოცხლებ, იეჰოვა“ (1 მეფეები 19:4).

• ● რა დაეხმარა მას? ელიამ გული გადმოუღვარა იეჰოვას. როგორ გაამხნევა ღმერთმა ის? ღმერთმა აჩვენა მას, რომ ზრუნავდა მასზე და დაანახვა, რა ძალას ფლობდა. მან დაარწმუნა ელია, რომ ის კვლავაც ძვირფასი იყო მის თვალში და საჭირო დახმარება აღმოუჩინა.

• ▸ წაიკითხეთ ელიას შესახებ: 1 მეფეები 19:2–18

იობი

• ● ვინ იყო ის? იობი მდიდარი კაცი იყო, რომელსაც დიდი ოჯახი ჰყავდა. ის ჭეშმარიტი ღვთის ერთგული თაყვანისმცემელი იყო.

• ● რატომ ნატრობდა სიკვდილს? იობის ცხოვრება მოულოდნელად თავდაყირა დადგა: მან მთელი ქონება დაკარგა; მისი ყველა შვილი უბედურმა შემთხვევამ შეიწირა; თავად მას კი საშინელი სენი შეეყარა; გარდა ამისა, ვერაგულად დასწამეს ცილი იმაში, რომ ღირსი იყო და იმიტომ დაატყდა თავს ამდენი პრობლემა. სასოწარკვეთილმა იობმა თქვა: „მომძულდა, აღარ მინდა ცხოვრება“ (იობი 7:16).

• ● რა დაეხმარა მას? იობი ლოცულობდა და თავის გრძნობებს სხვებსაც უზიარებდა (იობი 10:1–3). ის ანუგეშა მეგობარმა ელიჰუმ, რომელმაც თანაგრძნობით მოუსმინა; ის დაეხმარა იობს, თავისი მდგომარეობისთვის სხვა კუთხით შეეხედა. ყველაზე მნიშვნელოვანი კი ის არის, რომ იობმა მიიღო ღვთის შეგონება და დახმარება.

• ▸ წაიკითხეთ იობის შესახებ: იობი 1:1–3, 13–22; 2:7; 3:1–13; 36:1–7; 38:1–3; 42:1, 2, 10–13.

მოსე

• ● ვინ იყო ის? მოსე ძველ დროში მცხოვრები ისრაელი ერის წინამძღოლი და ღვთის ერთგული წინასწარმეტყველი იყო.

• ● რატომ ნატრობდა სიკვდილს? მოსეს უზარმაზარი პასუხისმგებლობა ეკისრა; მას გაუთავებლად აკრიტიკებდნენ, რაც ძალებს აცლიდა. ერთხელ მან ღმერთს შეჰღაღადა: „მაშინ მომკალი“ (რიცხვები 11:11, 15).

• ● რა დაეხმარა მას? მოსე ღმერთს თავის გრძნობებზე ესაუბრა. ღმერთმა უთხრა მას, პასუხისმგებლობები სხვებისთვის გადაენაწილებინა, რითაც ტვირთს შეიმსუბუქებდა.

• ▸ წაიკითხეთ მოსეს შესახებ: რიცხვები 11:4–6, 10–17.