ეკომეგობრული შენობები

იეჰოვას მოწმეებს გვჯერა, რომ ღმერთი მალე გამოასწორებს იმ ზიანს, რაც ადამიანებმა მიაყენეს დედამიწას (გამოცხადება 11:18). თუმცა, სანამ ეს დრო დადგება, ყველაფერს ვაკეთებთ, რომ გავუფრთხილდეთ ჩვენს პლანეტას. მაგალითად, ვცდილობთ, ჩვენი თეოკრატიული შენობები იყოს ეკოლოგიური დიზაინის, რათა ხელი შევუწყოთ გარემოს დაცვას.

ჩვენი შენობების მოწყობა ისე იგეგმება, რომ მაქსიმალურად შემცირდეს გარემოზე უარყოფითი ზემოქმედება. ამგვარი პროექტები „მწვანე ინიციატივის“ სახელითაა ცნობილი. ვნახოთ, რა სახის პროექტები განხორციელდა „მწვანე ინიციატივის“ ფარგლებში და როგორ დაიზოგა შემოწირული თანხები.

გაგრილების სისტემა საკონგრესო დარბაზში

მოზამბიკში მატოლას ღია საკონგრესო დარბაზი ლითონის სახურავით იყო გადახურული. სახურავს მზე რომ დააჭერდა, დარბაზში ყოფნა გაუსაძლისი ხდებოდა. ერთი ადგილობრივი ძმა ამბობს: „დარბაზში ისე ცხელოდა, რომ ოფლში ვიწურებოდით. პროგრამა დამთავრდებოდა თუ არა, მაშინვე გარეთ გავრბოდით, სუფთა ჰაერი რომ ჩაგვესუნთქა და გავგრილებულიყავით“. რა გაკეთდა იმისთვის, რომ პროგრამის მოსასმენად და-ძმებს კომფორტული გარემო ჰქონოდათ?

გადავწყვიტეთ, სახურავზე დაგვემონტაჟებინა სავენტილაციო სისტემა, რომელიც შენობაში ჰაერის განახლებას უზრუნველყოფს. გარდა ამისა, გავაკეთეთ იზოლაცია, რაც სიგრილის შენარჩუნებას უწყობს ხელს. ვენტილატორები ქარზე მუშაობს, შენობიდან ცხელი ჰაერი გააქვს და გრილი ჰაერი შემოაქვს. ერთი ვენტილატორის ღირებულება დაახლოებით 50 აშშ დოლარს შეადგენს.

ზემოაღნიშნული მიდგომის შედეგად საკონგრესო დარბაზში გაუმჯობესდა ჰაერის ხარისხი – შენობაში აღარ დგება მძიმე ჰაერი და ტენიანობაც ნაკლებია. ამასთანავე, ეს სისტემა უზრუნველყოფს შიდა სივრცეში უფრო მეტი ჟანგბადის მიწოდებას. შესაბამისად, კონგრესის დამსწრეებს არ უჭირთ პროგრამის ყურადღებით მოსმენა. ძმა, რომელიც ზემოთ მოვიხსენიეთ, ასეთ რამეს ამბობს: „ახლა უკვე პროგრამის დასრულებისთანავე გარეთ აღარ გავრბივართ. შესვენების დროს ვრჩებით დარბაზში და და-ძმებთან ურთიერთობით ვხარობთ. ისეთი შეგრძნება გვაქვს, თითქოს პაპანაქება სიცხეში უზარმაზარი ხის ჩრდილს ვაფარებთ თავს“.

განახლებადი ენერგიის წყარო

მთელ მსოფლიოში არსებულ არაერთ თეოკრატიულ შენობაში დავამონტაჟეთ მზის პანელები, რომელთაც ფოტოელექტრულ სისტემასაც უწოდებენ. ეს სისტემა, რომელიც განახლებადი ენერგიის წყაროს წარმოადგენს, მზის ენერგიას ელექტროენერგიად გარდაქმნის. შედეგად, დიდად აღარ ვართ დამოკიდებული წიაღისეული საწვავიდან მიღებულ ელექტროენერგიაზე. აღნიშნული სისტემა ნაკლებად აბინძურებს გარემოს და შემოწირული თანხებიც იზოგება.

2023 წელს მზის პანელები სლოვენიის ფილიალში დავამონტაჟეთ. ეს პანელები შენობის ფუნქციონირებისთვის საჭირო ელექტროენერგიის 30%-ს გვაწვდის. იმ შემთხვევაში, თუ სისტემა საჭიროზე მეტ ელექტროენერგიას გამოიმუშავებს, ზედმეტი ენერგია სახელმწიფო ელექტროენერგიის ქსელს მიეწოდება. შეძენილი მოწყობილობების ღირებულებამ 360 000 აშშ დოლარი შეადგინა. ახლა ფილიალი ელექტროენერგიის ნაკლებ გადასახადს იხდის, რაც იმას ნიშნავს, რომ 4 წლის განმავლობაში იმაზე მეტი თანხა დაიზოგება, ვიდრე ამ სისტემის შესასყიდად დაიხარჯა.

2024 წელს მზის პანელები და დიდი ზომის ბატარეა შრი-ლანკის ფილიალშიც დავამონტაჟეთ. ამ პროექტზე დაახლოებით 3 მილიონი აშშ დოლარი დაიხარჯა. ეს სისტემა ფილიალის შენობის ფუნქციონირებისთვის საჭირო ელექტროენერგიის 70%-ს გამოიმუშავებს, რის შედეგადაც მომდევნო 3 წლის განმავლობაში იმაზე გაცილებით მეტი თანხა დაიზოგება, ვიდრე გადავიხადეთ. იმავე წელს ფოტოელექტრული სისტემა ნიდერლანდების ფილიალშიც დავამონტაჟეთ, რომლის ღირებულებამაც 1,1 მილიონი დოლარი შეადგინა. ის ფილიალისთვის საჭირო ელექტროენერგიის 35%-ს გამოიმუშავებს. ამ სისტემაში გადახდილი თანხის ანაზღაურება 9 წელიწადში მოხდება.

მზის პანელები მექსიკის მთარგმნელობით ოფისებშიც დავაყენეთ. მაგალითად, ასეთი პროექტი განხორციელდა ჩიუაუაში მდებარე ტარაჰუმარას მთარგმნელობით ოფისში. ამ ტერიტორიაზე ზამთარში ტემპერატურა 0 გრადუსამდე ეცემა, ზაფხულში კი 40 გრადუსს აჭარბებს. აქ ელექტროენერგიის გადასახადი ძალიან მაღალია, ამიტომ და-ძმები ცდილობდნენ, იშვიათად გამოეყენებინათ გათბობა-გაგრილების სისტემები. ერთი ძმა სახელად იონათანი, რომელიც ტარაჰუმარას მთარგმნელობით ოფისში მსახურობს, ამბობს: „ზამთარში თბილ ტანსაცმელს ვიცვამდით და პლედებში ვეხვეოდით, პაპანაქება ზაფხულში კი ოფისში ფანჯრებს ვაღებდით“.

ამ მთარგმნელობით ოფისში მზის პანელები 2024 წელს დავამონტაჟეთ, რაშიც 21 480 აშშ დოლარი დაიხარჯა. ამ თანხის ანაზღაურება 5 წელიწადში მოხდება. და-ძმებს ახლა უკვე შეუძლიათ გამოიყენონ გათბობა-გაგრილების სისტემები. იონათანი ასეთ რამეს ამბობს: „დღეს უფრო მეტ სიხარულს გვანიჭებს ჩვენი დავალების შესრულება და გაცილებით პროდუქტიულებიც ვართ. ასევე გვიხარია, რომ ჩვენი ორგანიზაციის ფინანსები ეფექტურად იხარჯება და გარემოს დაცვასაც ვუწყობთ ხელს“.

წვიმის წყლის შეგროვება

აფრიკაში ზოგიერთ დარბაზს რეგულარულად არ მიეწოდება სუფთა წყალი, რის გამოც და-ძმებს რამდენიმე კილომეტრიდან უწევთ წყლის მოტანა. ზოგიერთ ტერიტორიაზე კი ძმები წყალს ყიდულობენ და დარბაზამდე სატვირთო მანქანით მიაქვთ, რაც ძვირი ჯდება და გარემოც ბინძურდება.

და-ძმებისთვის მდგომარეობის შესამსუბუქებლად მთელი აფრიკის მასშტაბით არაერთი დარბაზის სახურავზე დავამაგრეთ საწვიმარი ღარები და გარეთ დავდგით დიდი მოცულობის წყლის ავზები. დანადგარების დამონტაჟებამდე ძმებმა შეისწავლეს ადგილობრივი კლიმატური პირობები, რათა ამ სისტემით მაქსიმალურად ბევრი წყალი შეეგროვებინათ. ამგვარი მოწყობილობის დამონტაჟება საშუალოდ 600-დან 3 000 აშშ დოლარამდე ჯდება. ამ ყველაფრის შედეგად შემცირდა დარბაზების საექსპლუატაციო ხარჯები, რადგან ძმებს აღარ უწევთ წყლის ყიდვა.

წვიმის წყლის შემგროვებელი სისტემების მეშვეობით და-ძმებს საქმე დიდად შეუმსუბუქდათ. ერთი მოზამბიკელი და ნოემია აღნიშნავს: „ადრე დარბაზამდე წყლის მოსატანად ძალიან დიდი მანძილის გავლა გვიწევდა. კრებაზე დაღლილ-დაქანცულები მივდიოდით. არასაკმარისი წყლის გამო ჰიგიენის დაცვაც გვიჭირდა. ახლა კი ყველას შეუძლია ხელების დაბანა. რადგან წყლის ზიდვა აღარ გვიწევს, დაღლილებიც აღარ ვართ და შეხვედრებზე დასწრება მეტ სიხარულს გვანიჭებს. ძალიან დიდი მადლობა!“.

როგორ იფარება ამ ყველაფრის ხარჯები? მსოფლიო სამქადაგებლო საქმიანობისთვის გაღებული შესაწირავებით, რომელთა გადარიცხვაც უმეტესად ვებსაიტის donate.jw.org-ის მეშვეობით ხდება. დიდ მადლობას გიხდით თქვენი გულუხვი შესაწირავებისთვის!