7. ფასეულობები

ᲠᲐᲡ ᲜᲘᲨᲜᲐᲕᲡ

ზნეობრივ ფასეულობებში იგულისხმება სახელმძღვანელო ნორმები, რომელთა თანახმადაც ვცხოვრობთ. მაგალითად, თუ ცდილობთ, ყველაფერში პატიოსანი იყოთ, ალბათ, სურვილი გექნებათ, რომ შვილებს ამგვარი ფასეულობები ჩაუნერგოთ.

ᲠᲐᲢᲝᲛ ᲐᲠᲘᲡ ᲐᲣᲪᲘᲚᲔᲑᲔᲚᲘ

დღევანდელ ტექნოლოგიურ ეპოქაში უაღრესად მნიშვნელოვანია ზნეობრივი ფასეულობების ჩანერგვა. ერთი დედა, სახელად კარინი, ამბობს: „ელექტრონული მოწყობილობების საშუალებით შვილები შეიძლება ნებისმიერ დროს მოექცნენ ცუდი ზეგავლენის ქვეშ. ისინი შესაძლოა გვერდით გეჯდნენ და, ამავდროულად, ათას უმსგავსობას უყურებდნენ“.

ᲑᲘᲑᲚᲘᲣᲠᲘ ᲞᲠᲘᲜᲪᲘᲞᲘ: მოწიფულებმა „გაიწაფეს გონება კარგისა და ცუდის გასარჩევად“ (ებრაელები 5:14).

ᲔᲪᲐᲓᲔᲗ, ᲐᲡᲔ ᲛᲝᲘᲥᲪᲔᲗ

აუხსენით შვილებს, როგორია თქვენი ფასეულობები. მაგალითად, როგორც გამოკვლევები ცხადყოფს, ის ახალგაზრდები, რომელთა მშობლებიც ქორწინებამდელ სექსს მიუღებლად მიიჩნევენ და ამას დაუფარავად აფიქსირებენ, დიდი ალბათობით, თავს შეიკავებენ ასეთი საქციელისგან.

ᲒᲐᲘᲗᲕᲐᲚᲘᲡᲬᲘᲜᲔᲗ ᲨᲔᲛᲓᲔᲒᲘ: შვილთან ზნეობრივ ფასეულობებზე რომ წამოიწყოთ საუბარი, ყურადღება მიმდინარე მოვლენებზე გაუმახვილეთ. მაგალითად, თუ საინფორმაციო საშუალებებით გადმოიცა, რომ ვიღაცამ სიძულვილის ნიადაგზე დანაშაული ჩაიდინა, შეგიძლიათ ასეთი რამ უთხრათ: „როგორ შეიძლება ასე გძულდეს ვინმე! შენი აზრით, რამ მიიყვანა ეს ადამიანი ასეთ სისასტიკემდე?“.

„შვილებს სწორის არასწორისგან გარჩევა გაუჭირდებათ, თუ არავინ ეტყვის მათ, რა არის სწორი და რა — არასწორი“ (ბრენდონი).