იეჰოვას ცხვარს ესაჭიროება სათუთი მზრუნველობა

‘უწყოდეთ, რომ უფალია ღმერთი. . . ჩვენ ვართ მისი ცხვარი, სამწყსო მისი’ (ფსალმუნი 99:3).

1. როგორ ეპყრობა იეჰოვა თავის მსახურებს?

იეჰოვა დიდებული მწყემსია. თუ ჩვენ მისი მსახურები ვართ, მის თვალში ცხვარს წარმოვადგენთ და სათუთად ზრუნავს ჩვენზე. ჩვენი ზეციერი მამა გვანუგეშებს, გვახალისებს და მიგვიძღვის ‘სიმართლის კვალზე თავისი სახელის გულისათვის’ (ფსალმუნი 22:1–4). შესანიშნავ მწყემსს, იესო ქრისტეს, ისე ძალიან ვუყვარვართ, რომ საკუთარი სული გაიღო ჩვენთვის (იოანე 10:7–15).

2. როგორ პირობებში იმყოფება ღვთის ხალხი?

² ჩვენ, რომლებზეც იეჰოვა ასე ზრუნავს, ფსალმუნმომღერალთან ერთად შეგვიძლია ვთქვათ: „ემსახურეთ უფალს სიხარულით, მიდით მის წინაშე სიმღერით. უწყოდეთ, რომ უფალია ღმერთი. მან შეგვქმნა ჩვენ და მისთვის ვართ ჩვენ — ხალხი მისი და ცხვარი, სამწყსო მისი“ (ფსალმუნი 99:2, 3, „ახალი აღთქმა და ფსალმუნები“, კიკნაძისა და სონღულაშვილის თარგმანი). დიახ, ჩვენ სიხარულით ვართ აღსავსე და უსაფრთხოებაში ვიმყოფებით. დიახ, ეს ისეა თითქოს ბოროტი მტაცებლებისგან ვართ დაცული, ვიმყოფებით ფარეხში, რომელსაც მტკიცე ქვის კედლები აქვს (რიცხვნი  32:16; პირველი მეფეთა 24:3; სოფონია 2:6).

სამწყსოს მოხალისე მწყემსები

3. როგორ ეპყრობიან ღვთის სამწყსოს უხუცესებად დანიშნული ქრისტიანები?

³ არ არის გასაკვირი, რომ ჩვენ, როგორც ღვთის ცხვარი, სიხარულით ვართ აღსავსენი! ჩვენს შორის ხელმძღვანელობას საკუთარ თავზე იღებენ უხუცესებად დანიშნული პირები. ისინი არ ‘ბატონობენ’, არ უფლობენ ჩვენზე და არც ჩვენს რწმენაზე ზეგავლენის მოხდენას ცდილობენ (რიცხვნი 16:13; მათე 20:25–28; 2 კორინთელთა 1:24; ებრაელთა 13:7). პირიქით, ისინი არიან მოსიყვარულე მწყემსები, რომლებიც იყენებენ პეტრე მოციქულის რჩევას: „მწყემსეთ ღვთის სამწყსო, რომელიც თქვენს შორისაა, არა იძულებით, არამედ ნებით და ღვთისათვის სათნოდ, არა ბილწი ანგარებისათვის, არამედ გულმოდგინებით. ნუკი ეუფლებით ღვთის სამკვიდრებელს, არამედ მაგალითი იყავით სამწყსოსათვის“ (1 პეტრე 5:2, 3). პავლე მოციქულმა თანაუხუცესებს უთხრა: „ყურადღებით მოექეცით თქვენს თავსაც და თქვენს სამწყსოსაც, რომლის ზედამხედველადაც სულიწმიდამ დაგაყენათ, რათა მწყემსავდეთ ღვთის კრებას, რომელიც მან საკუთარი ძის სისხლით შეიძინა“. და რამდენად მადლიერია ცხვარი, რომ სულიწმიდით დაყენებული მამაკაცები „სათუთად ეპყრობიან სამწყსოს“ (საქმეები 20:28–30, აქ).

4. სამწყსოსთან როგორი ურთიერთობით იყო ცნობილი ჩარლზ ტ. რასელი?

⁴ იესომ კრებას მისცა ‘ძღვენი ადამიანთა სახით’ (აქ), რომლებიც „მოძღვრები“ ანუ მწყემსები არიან და რომლებიც სათუთად ეპყრობიან იეჰოვას სამწყსოს (ეფესელთა 4:8, 11). ერთ-ერთი მათგანი იყო ჩარლზ ტ. რასელი, საგუშაგო კოშკის საზოგადოების პირველი პრეზიდენტი. მას მოძღვარ რასელსაც უწოდებდნენ, რადგან მთავარი მწყემსის, იესო ქრისტეს ხელმძღვანელობით სიყვარულითა და თანაგრძნობით მწყემსავდა სამწყსოს. დღეს ქრისტიანი უხუცესები ინიშნებიან იეჰოვას მოწმეების ხელმძღვანელი კორპორაციის მიერ და ყურადღება ექცევა, რომ არ იყოს გამოყენებული ისეთი წოდებები, როგორიცაა „მოძღვარი“, „უხუცესი“ ან „მასწავლებელი“, როგორც ტიტულები (მათე 23:8–12). მაგრამ დღეს იეჰოვას სამწყსოში უხუცესები ცხვრის სასიკეთოდ ასრულებენ სამწყემსო, ანუ დამოძღვრით საქმიანობას.

5. რატომ უნდა გაეცნონ ახლები ქრისტიანულ კრებაში დანიშნულ უხუცესებს?

⁵ როგორც მწყემსებს, უხუცესებს მნიშვნელოვანი ადგილი უკავიათ ახლების სულიერ წინსვლაში. ამიტომაც ახალი წიგნი „მარადიულ სიცოცხლემდე მიმყვანი შემეცნება“ 168-ე გვერდზე ამბობს: «გაეცანი კრებაში დანიშნულ უხუცესებს. მათ აქვთ ღვთის შემეცნების გამოყენების გამოცდილება, რადგან ისინი ზედამხედველობისთვის იმ მოთხოვნებს შეესაბამებიან, რომლებიც აღწერილია ბიბლიაში (1 ტიმოთე 3:1–7; ტიტე 1:5–9). ნუ მოგერიდება მიმართო ერთ-ერთ მათგანს, თუ გესაჭიროება სულიერი დახმარება რამე ჩვევის ან თვისების დასაძლევად, რომელიც ღმერთის მოთხოვნებს არ შეესაბამება. შენ ნახავ, რომ უხუცესები მიჰყვებიან პავლეს შეგონებას: „ანუგეშეთ სულმოკლენი, მხარი დაუჭირეთ უძლურთ და სულგრძელნი იყავით ყველას მიმართ“ (1 თესალონიკელთა 2:7, 8; 5:14)».

როდესაც ახლებს სურთ იქადაგონ

6. რა ეტაპები უნდა გაიაროს ბიბლიის შემსწავლელმა თუ სურს გახდეს სამეფოს მაუწყებელი?

⁶ მას შემდეგ, რაც ბიბლიის შემსწავლელმა შეიძინა ცოდნა და გარკვეული დროის განმავლობაში ესწრება ქრისტიანულ შეხვედრებს, შესაძლოა სურს, რომ იყოს სამეფოს მაუწყებელი, კეთილი ცნობის მქადაგებელი (მარკოზი 13:10). თუ ასეა, პიროვნება, რომელიც მასთან ბიბლიის შესწავლას ატარებდა, უნდა დაუკავშირდეს თავმჯდომარე ზედამხედველს, რომელიც იზრუნებს, რომ კრების სამსახურებრივი კომიტეტის ერთ-ერთი უხუცესი და კიდევ სხვა უხუცესი შეხვდნენ ბიბლიის შემსწავლელსა და მის მასწავლებელს. საუბარი დაფუძნებული უნდა იყოს წიგნზე „ორგანიზებულნი ვართ ჩვენი მსახურების შესასრულებლად“, გვერდები 98 და 99 (ინგლ.). თუ ეს ორი უხუცესი ხედავს, რომ ახალს სწამს ბიბლიის ძირითადი სწავლებები და შეესაბამება ღვთის ნორმებს, ეტყვიან, რომ კვალიფიცირებულია საჯარო მსახურებაში მონაწილეობის მისაღებადa. როდესაც ახალი მაუწყებელი აბარებს თავისი სამქადაგებლო სამსახურის ანგარიშს, მაშინ ამ ანგარიშის ჩაწერა მოხდება კრების მაუწყებლების ანგარიშების ბარათზე, რომელიც მის სახელზეა გახსნილი. ახლა ახალ მაუწყებელს შეუძლია ჩააბაროს თავისი დამოწმებითი საქმიანობის შესახებ ანგარიში სხვა მილიონობით მქადაგებელთან ერთად, რომლებიც სიხარულით აღსავსენი ‘ქადაგებენ ღვთის სიტყვას’ (საქმეები 13:5). კრებაზე აგრეთვე გაკეთდება განცხადება, რომ ის წარმოადგენს მოუნათლავ მაუწყებელს.

7, 8. რა საშუალებებით შეიძლება მოუნათლავ მაუწყებელს მსახურებაში გაეწიოს დახმარება?

⁷ მოუნათლავ მაუწყებელს დახმარება ესაჭიროება უხუცესებისა და მოწიფული ქრისტიანებისგან. მაგალითად, მისი სულიერი წარმატებით დაინტერესებული უნდა იყოს იმ წიგნის შესწავლის ხელმძღვანელი, რომელსაც ეს პიროვნება ესწრება. ახალი მაუწყებლისთვის, შესაძლოა, ძნელია კარდაკარ მსახურებისას ეფექტურად ქადაგება (საქმეები 20:20). ასე რომ, მისთვის შესაძლოა სასურველი იყოს დახმარება, განსაკუთრებით კი იმ პიროვნებისგან, ვინც მასთან ბიბლიის შესწავლას „შემეცნების“ საშუალებით ატარებდა. ასეთი პრაქტიკული დახმარება სათანადოა, რადგან თვით იესო ქრისტე ამზადებდა თავის მოწაფეებს მსახურებისთვის (მარკოზი 6:7–13; ლუკა 10:1–22).

⁸ ჩვენი მსახურება უფრო ეფექტური რომ იყოს, აუცილებელია წინასწარ კარგი მომზადება. გარდა ამისა, ორმა მაუწყებელმა ერთად უნდა გაივარჯიშოს შეთავაზებები, რომლებიც მოცემულია „ჩვენი სამეფო მსახურების“ ყოველთვიურ გამოცემებში. საველე მსახურების დაწყებისას, უფრო გამოცდილს შეუძლია პირველ ორ კართან იქადაგოს. თავაზიანი შესავლის შემდეგ ორივე მაუწყებელს შეუძლია მონაწილეობა მიიღოს დამოწმებაში. მსახურებისას რამდენიმე კვირიანი თანამშრომლობის შედეგად, შეიძლება შესანიშნავი განმეორებითი მონახულებები და ბიბლიის შესწავლაც ჩატარდეს წიგნით „მარადიულ სიცოცხლემდე მიმყვანი შემეცნება“. უფრო გამოცდილ მაუწყებელს შეუძლია, გარკვეული დროით წაიყვანოს შესწავლა და შემდეგ გადასცეს სამეფოს ახალ მაუწყებელს. რამდენად ბედნიერები იქნებიან ისინი, თუ ბიბლიის შემსწავლელი მადლიერების გრძნობით მოეპყრობა ღვთის შემეცნებას!

9. რა ღონისძიებები ტარდება, თუ მოუნათლავ მაუწყებელს სურს, მოინათლოს?

⁹ როდესაც მოუნათლავი მაუწყებელი წინ მიიწევს სულიერად, ის შესაძლოა უძღვნის თავს ღმერთს და სურს, მოინათლოს (შეადარე მარკოზი 1:9–11). მან თავისი სურვილი უნდა აცნობოს კრების თავმჯდომარე ზედამხედველს, რომელიც იზრუნებს, რომ უხუცესებმა მაუწყებელთან განიხილონ საკითხები, რომლებიც მოცემულია ბროშურაში „ბიბლიის სწავლების საწყისები“. კითხვები, რომლებიც დაყოფილია ოთხ ნაწილად, შეიძლება განიხილონ სამი შეხვედრით და თუ შესაძლებელია, სამივე შეხვედრა სხვადასხვა უხუცესმა წაიყვანოს. თუ ისინი ეთანხმებიან იმ აზრს, რომ მოუნათლავ მაუწყებელს აქვს საკმაო წარმოდგენა ბიბლიის სწავლებებზე და შეესაბამება მის ნორმებს, ისინი ნებას დართავენ მას, რომ მოინათლოს. თავისი მიძღვნისა და ნათლობის შედეგად მას ‘ნიშანი’ ედება გადარჩენისთვის (ეზეკიელი 9:4–6).

შეხვედრების განსაკუთრებული საჭიროება

10. როდესაც პიროვნება ამთავრებს „შემეცნების“ შესწავლას და ინათლება, როგორ შეუძლია უფრო მეტად შეიძინოს საღვთო წერილიდან გამომდინარე შემეცნება?

¹⁰ მას შემდეგ, რაც პიროვნებამ დაამთავრა ბიბლიის შესწავლა „შემეცნების“ დახმარებით და მოინათლა, აუცილებელი აღარ არის, რომ მასთან კვლავ ჩატარდეს შესწავლა მეორე წიგნით, მაგალითად, როგორიცაა: „ერთადერთი ჭეშმარიტი ღვთისადმი თაყვანისმცემლობაში გაერთიანებულნი“ (ინგლ.)b. რასაკვირველია ახალი მონათლული პიროვნება უფრო მეტს ისწავლის, თუ ემზადება ქრისტიანული შეხვედრებისთვის და რეგულარულად ესწრება მათ. ის ასევე შეიძენს დამატებით ცოდნას, რადგან ჭეშმარიტების წყურვილით პირადადაც კითხულობს, ამასთანავე სწავლობს ქრისტიანულ პუბლიკაციებს და წერილებიდან გამომდინარე საკითხებზე თანამორწმუნეებთან მსჯელობს. მაგრამ როგორ უნდა მოიქცეს, თუ განსაკურებული ვითარებები წამოიჭრება?

11. ა) რა დახმარება გაუწიეს აპოლონს აკვილამ და პრისკილამ? ბ) რა დახმარება უნდა გაეწიოს ახალ მონათლულ ახალგაზრდას, რომელსაც გადაწყვეტილი აქვს დაქორწინდეს?

¹¹ თვით აპოლონისთვის, რომელიც იყო „ძლიერი წერილებში“ და ზუსტად ასწავლიდა ქრისტეს შესახებ, სასარგებლო იყო, როდესაც გამოცდილმა ქრისტიანებმა აკვილამ და პრისკილამ „თან წაიყვანეს და უფრო ზუსტად აუხსნეს უფლის გზა“ (საქმეები 18:24–26; შეადარე საქმეები 19:1–7). დავუშვათ, ახალ მონათლულ ახალგაზრდას გადაწყვეტილი აქვს ვინმეს დაუახლოვდეს და დაქორწინდეს. უფრო გამოცდილ ქრისტიანს შეუძლია დაეხმაროს მას, რომ ამ საკითხთან დაკავშირებით საგუშაგო კოშკის საზოგადოების პუბლიკაციებში ნახოს ინფორმაცია. მაგალითად, ამ საკითხთან დაკავშირებით დამხმარე მასალის ნახვა შეიძლება წიგნში „ახალგაზრდები იძლევიან შეკითხვებს — პრაქტიკული პასუხები“, მეშვიდე ნაწილიc (ინგლ.). მაუწყებელს, რომელიც მასთან ბიბლიის შესწავლას ატარებდა, შეუძლია განიხილოს ეს საკითხი, მაგრამ არ უნდა მოეწყოს რეგულარული შესწავლა.

12. რა დახმარება უნდა გაეწიოს ახალ მონათლულ დაქორწინებულ წყვილს, თუ მათ პრობლემები აქვთ?

¹² განვიხილოთ მეორე მაგალითიც. დავუშვათ, ახალ მონათლულ წყვილს აქვს გარკვეული პრობლემები ღვთის ნორმების ქორწინებაში გამოყენებასთან დაკავშირებით. მათ რჩევისთვის უნდა მიმართონ უხუცესს, რომელიც რამდენიმე საღამოს დაუთმობს მათთან ერთად საღვთო წერილის განხილვას და მიუთითებს საგუშაგო კოშკის საზოგადოების პუბლიკაციებში მოცემულ ინფორმაციებზე. მაგრამ უხუცესმა არ უნდა განაახლოს მათთან ბიბლიის რეგულარული შესწავლა.

როდესაც ახალი მონათლული სცოდავს

13. რატომ უნდა მოეპყრონ კრების უხუცესები გულმოწყალებით ახალ მონათლულ პიროვნებას, რომელმაც შესცოდა, მაგრამ ინანიებს?

¹³ უხუცესები ჰბაძავენ დიდებულ მწყემსს, იეჰოვას, რომელმაც თქვა: „მე თავად დავმწყესავ ჩემს ცხვარს. . . დაჭრილს ჭრილობებს შევუხვევ, დაუძლურებულს მოვაძლიერებ“ (ეზეკიელი 34:15, 16; ეფესელთა 5:1). ამავე სულისკვეთებით წერდა მოწაფე იუდა, რომ გულმოწყალება გამოვლენილიყო იმ ცხებული ქრისტიანების მიმართ, რომლებსაც ან რაიმე ეჭვი ჰქონდათ, ან კიდევ ცოდვა ჩაიდინეს (იუდა 22, 23). რასაკვირველია, სამართლიანია, რომ ჩვენ უფრო მეტს მოველით გამოცდილი ქრისტიანებისგან, მაგრამ გულმოწყალება უნდა გამოვლინდეს ახალი მონათლულის — კრავის — მიმართ, რომელმაც შესცოდა, მაგრამ ინანიებს (ლუკა 12:48; 15:1–7). უხუცესები, რომლებიც იეჰოვას ‘მსაჯულები’ არიან, ასეთი ცხვრის მიმართ იჩენენ სათუთ მზრუნველობას და გულთბილად არიგებენ (მეორე ნეშტთა 19:6; საქმეები 20:28, 29; გალატელთა 6:1).

14. რა უნდა გაკეთდეს იმ შემთხვევაში, როდესაც ახალმა მონათლულმა მაუწყებელმა სერიოზული ცოდვა ჩაიდინა და როგორ შეიძლება დახმარება გაეწიოს მას?

¹⁴ დავუშვათ, ახალ მონათლულ მაუწყებელს წარსულში სპირტიან სასმელებთან დაკავშირებით ჰქონდა პრობლემები და თავისი დაუდევრობით რამდენჯერმე გადამეტებით დალია. ან შესაძლოა მან დასძლია თამბაქოს წევის დიდი ხნის ჩვეულება, მაგრამ დანებდა ცდუნებას და ფარულად ერთი-ორჯერ მოწია. მიუხედავად იმისა, რომ მან ღვთისადმი ლოცვაში მოინანია, დახმარებისთვის აუცილებლად უნდა მიმართოს უხუცესს, რომ ცოდვა ჩვეულებად არ ექცეს (ფსალმუნი 31:1–5; იაკობი 5:14, 15). როდესაც ის თავისი დანაშაულის შესახებ ეტყვის რომელიმე უხუცესს, ეს უხუცესი უნდა შეეცადოს, რომ თანაგრძნობით დაარიგოს ახალი (ფსალმუნი 129:3). წერილებიდან გამომდინარე რჩევა შეიძლება საკმარისი იყოს მის დასახმარებლად, რომ მან შემდგომში თავისი ნაბიჯები სწორად წარმართოს (ებრაელთა 12:12, 13). ამ უხუცესმა ვითარების შესახებ უნდა იმსჯელოს კრების თავმჯდომარე ზედამხედველთან, რომ მიღებული იქნეს გადაწყვეტილება, თუ შემდგომში როგორ გაეწიოს დახმარება.

15. რა არის აუცილებელი ზოგიერთ შემთხვევაში, როდესაც ახალმა მონათლულმა ჩაიდინა ცოდვა?

¹⁵ ზოგიერთ შემთხვევაში უფრო მეტია საჭირო. თუ შემთხვევა გახმაურდა და საფრთხეს წარმოადგენს სამწყსოსთვის ან სხვა სერიოზულ პრობლემებთანაა დაკავშირებული, უხუცესთა კორპორაციამ საკითხის გამოსაკვლევად უნდა დანიშნოს ორი უხუცესი. თუ ეს უხუცესები ნახავენ, რომ საქმე საკმაოდ სერიოზულია და აუცილებელია სამართლებრივი კომიტეტის ჩარევა, უნდა შეატყობინონ უხუცესთა კორპორაციას. უხუცესთა კორპორაცია დანიშნავს სამართლებრივ კომიტეტს, რომ დახმარება გაუწიონ ცოდვის ჩამდენს. სამართლებრივი კომიტეტი თანაგრძნობით უნდა მოექცეს მას. ისინი უნდა შეეცადონ დარიგება მისცენ საღვთო წერილიდან. თუ ცოდვის ჩამდენი დადებითად რეაგირებს სამართლებრივი კომიტეტის სიკეთით აღსავსე დახმარებაზე, მაშინ სამართლებრივი კომიტეტი გადაწყვეტს, იქნება თუ არა რაიმე მხრივ სასარგებლო თუ ეს პიროვნება სამეფო დარბაზში შეხვედრების დროს მონაწილეობას არ მიიღებს სცენაზე გამოსვლაში ან თუ არ ექნება უფლება შეხვედრებზე კომენტარი გააკეთოს.

16. რისი გაკეთება შეუძლიათ უხუცესებს ცოდვის ჩამდენის დასახმარებლად?

¹⁶ თუ ცოდვის ჩამდენი დადებითად რეაგირებს, სამართლებრივი კომიტეტის ერთ ან ორ უხუცესს შეუძლია მოაწყოს სამწყემსო მონახულება, რომ გააძლიეროს მისი რწმენა და განამტკიცოს მასში ღვთის სამართლიანი ნორმების მიმართ მადლიერების გრძნობა. დროდადრო ყოველმა მათგანმა უნდა ითანამშრომლოს მასთან საველე მსახურებისას. შესაძლოა მათ რამდენჯერმე ისაუბრონ მასთან საღვთო წერილის საკითხებზე და გამოიყენონ შესაფერისი სტატიები ჟურნალებიდან „საგუშაგო კოშკი“ და „გამოიღვიძეთ!“ მაგრამ უნდა გაითვალისწინონ ისიც, რომ არ დაიწყონ ბიბლიის რეგულარული შესწავლა. ისინი ასეთი სათუთი მზრუნველობით აძლიერებენ მას, რომ მან მომავალში წინააღმდეგობა გაუწიოს ხორციელ სისუსტეებს.

17. რა ზომები უნდა იქნეს მიღებული, როცა ცოდვის ჩამდენი მონათლული არ ინანიებს და არ ტოვებს ცოდვილ გზას?

¹⁷ რასაკვირველია, ის ფაქტი, რომ მოუნანიებელი ცოდვის ჩამდენი ახალი მონათლულია, არ არის საპატიო მიზეზი (ებრაელთა 10:26, 27; იუდა 4). თუ რომელიმე მონათლული არ ინანიებს ცოდვას და არ ტოვებს ცოდვილ გზას, უნდა გაირიცხოს კრებიდან (1 კორინთელთა 5:6, 11–13; 2 თესალონიკელთა 2:11, 12; 2 იოანე 9–11). როდესაც ასეთი ზომების მიღება აუცილებელია, უხუცესთა კორპორაცია ირჩევს სამართლებრივ კომიტეტს. თუ ხდება გარიცხვა, კეთდება მოკლე განცხადება: „ესა და ეს პიროვნება გაირიცხა“d.

დავეხმაროთ ‘სრულყოფილებისაკენ სწრაფვაში’

18. რატომ შეგვიძლია ვიყოთ დარწმუნებული, რომ როგორც ახალ მონათლულებს, ასევე სხვებსაც ყოველთვის ესაჭიროებათ უფრო მეტი ისწავლონ იეჰოვასა და მისი ნების შესახებ?

¹⁸ ღვთის მსახურთა უმრავლესობა დარჩება სამწყსოში. საბედნიეროდ, ყოველ ჩვენგანს შეგვწევს უნარი უფრო დავუახლოვდეთ ზეციერ მამას, რადგან ყოველთვის შეგვიძლია უფრო მეტი ვისწავლოთ როგორც თავად ზეციერი მამის, აგრეთვე მისი ნების შესახებ (ეკლესიასტე 3:11; იაკობი 4:8). რასაკვირველია, ახალი წელთაღრიცხვით 33 წლის ორმოცდამეათე დღის დღესასწაულზე ათასობით მონათლულს უფრო მეტი უნდა ესწავლა (საქმეები 2:5, 37–41; 4:4). ასევე მოიქცნენ წარმართებიც, რომლებიც ადრე საერთოდ არ იცნობდნენ საღვთო წერილს. მაგალითად, ასევე მოხდა იმათ შემთხვევაში, რომლებიც ათენის არეოპაგში პავლეს სიტყვის შემდეგ მოინათლნენ (საქმეები 17:33, 34). დღესაც ბევრი აქვთ სასწავლი ახალ მონათლულებს, მათ ესაჭიროებათ დრო და დახმარება, რათა უფრო გაუმტკიცდეთ გადაწყვეტილება — აკეთონ ის, რაც სამართლიანია ღვთის თვალში (გალატელთა 6:9; 2 თესალონიკელთა 3:13).

19. როგორ შეიძლება ახალი მონათლული ქრისტიანებისთვის ‘სრულყოფილებისაკენ სწრაფვაში’ დახმარების გაწევა?

¹⁹ ყოველწლიურად ათასობით ადამიანი ინათლება და მათ ესაჭიროებათ მხარდაჭერა ‘სრულყოფილებისაკენ სწრაფვაში’ (ებრაელთა 6:1–3). მაგალითად, შენ შეგიძლია სიტყვიერი და პრაქტიკული დახმარება გაუწიო ზოგიერთ მათგანს იმაში, რომ შესძლოს შეიმოსოს ახალ პიროვნებად და ‘იაროს ჭეშმარიტებით’ (3 იოანე 4; კოლასელთა 3:9, 10, „ახალი აღთქმა და ფსალმუნი“, 1990 წლის გამოცემა). თუ გამოცდილი მაუწყებელი ხარ, შესაძლოა, უხუცესებმა გთხოვონ, რომ დაეხმარო ახალ თანამორწმუნეს საველე მსახურებაში ან რამდენიმე კვირის მანძილზე საღვთო წერილის ზოგიერთი საკითხის განხილვაში, რომ გააძლიერო მასში ღვთის მიმართ რწმენა, ქრისტიანული შეხვედრების მიმართ მადლიერების გრძნობა და ასე შემდეგ. მწყემსის ურთიერთობა სამწყსოსთან მამის შეგონებისა და დედის სინაზის მსგავსია (1 თესალონიკელთა 2:7, 8, 11). მაგრამ რამდენიმე უხუცესი და სამსახურებრივი თანაშემწე ვერ გასწვდება ყოველივე იმას, რაც კრებაშია აუცილებელი. ჩვენ ყველა წარმოვადგენთ ოჯახს, რომლის წევრებიც ერთმანეთს ეხმარებიან. თითოეულ ჩვენგანს შეუძლია თანამორწმუნის მხარდაჭერა. შენ, შენი მხრივ შეგიძლია გაამხნევო, ანუგეშო დეპრესიაში მყოფი და თანადგომა გამოავლინო სუსტების მიმართ (1 თესალონიკელთა 5:14, 15).

20. რა შეგიძლია გააკეთო, რომ გაავრცელო ღვთის შემეცნება და სათუთად იზრუნო იეჰოვას სამწყსოს ცხვარზე?

²⁰ კაცობრიობას ესაჭიროება ღვთის შემეცნება და შენ, როგორც იეჰოვას ერთ-ერთ მოწმეს, შეგიძლია სიხარულით მიიღო მონაწილეობა ამ შემეცნების გავრცელებაში. იეჰოვას ცხვარს ესაჭიროება სათუთი მზრუნველობა და შენც შეგიძლია სიყვარულით მიიღო ამ მზრუნველობაში მონაწილეობა. დაე, იეჰოვამ აკურთხოს შენი მსახურება და დაე, დაგაჯილდოვოს გულმოდგინე მსახურებისთვის, რადგან შენც ეხმარები მისი სამწყსოს ცხვარს.

[სქოლიოები]

როგორ უპასუხებდი?

◻ როგორ ეპყრობა იეჰოვა თავის ცხვარს?

◻ რა კეთდება, როდესაც ახლებს სურთ იქადაგონ?

◻ როგორ შეუძლიათ თანამორწმუნეებს, დაეხმარონ ახლებს, რომლებსაც განსაკუთრებით ესაჭიროებათ თანადგომა?

◻ როგორი დახმარება შეუძლიათ გაუწიონ უხუცესებმა მათ, რომლებმაც შესცოდეს, მაგრამ ინანიებენ?

◻ როგორ შეგიძლია დაეხმარო ახალ მონათლულს ‘სრულყოფილებისაკენ სწრაფვაში’?

[სურათი მე-11 გვერდზე]

ჩარლზ ტ. რასელი კარგად იყო ცნობილი, როგორც სამწყსოს მოსიყვარულე მწყემსი.

[სურათი მე-15 გვერდზე]

თანამგრძნობი მწყემსები ღვთის ცხვარს სათუთად ეპყრობიან.