ნათელი ეფინება იესო ქრისტეს თანდასწრებას
„როცა მოვა ძე კაცისა თავისი დიდებით. . . გამოარჩევს ცხვრებს თხებისაგან“ (მათე 25:31, 32).
ქრისტეს ოთხი მოწაფე, რომელთაც გააჩნდათ ახსნა-განმარტების მიღების გულწრფელი სურვილი, მის სიკვდილამდე სამი დღით ადრე, მივიდა იესოსთან და ჰკითხა: „გვითხარი, როდის იქნება ეს, და რა იქნება შენი მოსვლისა [ბერძნულად პა·როუ·სი·ა] და წუთისოფლის აღსასრულის ნიშანი?“ მათეს 24:3-ში ჩაწერილ, იესოს მიერ ნათქვამ ამ სიტყვებს, ასწლეულების განმავლობაში სამღვდელოება და ქრისტიანული სამყაროს მწერლები განმარტავენ, რომ კაცობრიობა კვლავ იხილავს მას ფიზიკურ სხეულში. ამიტომ, ისინი ასწავლიან, რომ ქრისტეს დაბრუნება იქნება დიდი, ბრწყინვალე სანახაობა. ისინი ამას ქრისტეს მეორედ მოსვლას უწოდებენ. მაგრამ სწორია თუ არა მათი ვარაუდი?
2 იეჰოვას ცხებულების, როგორც XIX საუკუნის სინათლის მატარებელთა, გაგება ქრისტეს დაბრუნებასთან დაკავშირებით უკვე 1889 წლისთვის გამოსწორდა. ნაშრომის, „წერილების გამოკვლევის“ (ინგლ.) მე-2 ტომში, 158–161-ე გვერდებზე, ჩარლზ ტ. რასელი, „უოტჩ ტაუერ ბაიბლ ენდ ტრექტ სოსაიეტის“ პირველი პრეზიდენტი, წერდა: «პა·როუ·სი·ა. . . ნიშნავს თანდასწრებას, და არასდროს უნდა ითარგმნოს სიტყვად მოსვლა, როგორც საყოველთაოდაა მიღებული ინგლისურ ბიბლიაში. . . „ემფეტიკ დაიაგლოტი“, ახალი აღთქმის ძალზე ძვირფასი თარგმანი, სწორად თარგმნის სიტყვა პა·როუ·სი·ას, სიტყვად თანდასწრება. . . არა სიტყვად მოსვლა, თითქოს ის შესაფერისი იყოს, არამედ სიტყვად თანდასწრება, თითქოს მოსვლის შემდეგ [იესო] ამბობს: ‘როგორც იყო ნოეს დღეებში, ისევე იქნება ძე კაცისას პა·როუ·სი·აც [თანდასწრება]’. ყურადღება მიაქციე, რომ აქ არაა შედარებული ნოეს მოსვლა ჩვენი უფლის მოსვლასთან. . . მაშასადამე, ‘წარღვნის წინ’ ადამიანთა შორის ნოეს თანდასწრების დრო შედარებულია მსოფლიოში ქრისტეს თანდასწრების დროსთან, მისი მეორედ მოსვლისას ‘ცეცხლის წინ’ — უფლის [იეჰოვას] დღის ჭირის უმაღლესი წერტილის წინა პერიოდთან, რომლითაც სრულდება ეს ხანა» (მათე 24:37).
3 ამგვარად, XIX საუკუნეში იეჰოვას მოწმეებმა სწორად გაიგეს, რომ ქრისტეს პა·როუ·სი·ა უხილავი იქნებოდა. ასევე, მათ გაიგეს, რომ წარმართთა დროის დასასრული დადგებოდა 1914 წლის შემოდგომაზე. რამდენადაც სულიერი სინათლე სულ უფრო ნათელი ხდებოდა, შემდგომ მათ გაიგეს, რომ იმავე წელს იესო ქრისტე დაჯდა თავის ზეციურ ტახტზე, როგორც სამეფოს მეფე (იგავნი 4:18; დანიელი 7:13, 14; ლუკა 21:24; გამოცხადება 11:15).
‘ჩვენი უფლის თანდასწრება’
4 ჩვენს დღეებში როგორ იგებენ ბიბლიურ გამოთქმას ‘უფლის იესო ქრისტეს მოსვლა [თანდასწრება, აქ]?’ (1 თესალონიკელთა 5:23). ერთ ავტორიტეტულ ისტორიულ წყაროში ახსნილია, რომ სიტყვა „თანდასწრება“ პა·როუ·სი·ა, „ოფიციალური ტერმინი გახდა, რომელიც ნიშნავს მაღალი რანგის პერსონალის ვიზიტს, განსაკუთრებით მეფეებისა და იმპერატორების მიერ რომელიმე პროვინციის მონახულებას“. ამიტომ ეს გამოთქმა მიეკუთვნება იესო ქრისტეს მეფურ თანდასწრებას მეფის ხარისხში, დაწყებული იმ დროიდან, რაც ის ზეციურ ტახტზე დაჯდა, 1914 წლიდან და შემდგომ. ის უხილავად ესწრება, რომ ‘იბატონოს თავის მტერთა შორის’ (ფსალმუნი 109:2). უკვე 79 წელია, რაც დედამიწაზე ადამიანები გრძნობენ ქრისტეს უხილავი მეფური თანდასწრების ზემოქმედებას.
5 ამ სამ სტატიაში განვიხილავთ ქრისტეს მეფობის პერიოდში მისი მიღწევების განსაცვიფრებელ მტკიცებებს. თავდაპირველად წარმოდგენილი იქნება ზოგიერთი ბიბლიური წინასწარმეტყველება, სადაც ლაპარაკია იმ მოვლენების შესახებ, რომლებიც უკვე მოხდა ან ჯერ კიდევ ხდება. შემდეგ აღიწერება დიდი სამუშაო, შესრულებული ერთგული და გონიერი მონის კლასის მიერ, რომელსაც იესო იყენებს თავისი მეფური თანდასწრების მთელი ამ პერიოდის განმავლობაში (მათე 24:45–47). მესამე სტატიაში აღწერილი იქნება „დიდი ჭირის“ პერიოდის გრანდიოზული დაგვირგვინება. ეს არის დრო, როცა იეჰოვას მიერ დანიშნული იესო მოდის აღმასრულებლად, რომ გაანადგუროს უსამართლო ადამიანები და იხსნას სამართლიანები (მათე 24:21, 29–31). განადგურების ეს პერიოდი პავლე მოციქულის მიერ აღწერილია, როგორც დრო, როდესაც მოგეცემათ, ‘თქვენ, შეჭირვებულთ, — მოსვენება ჩვენთან ერთად უფალ იესოს გამოცხადებაში ციდან, მისი ძალის ანგელოზებითურთ, რომელიც ცეცხლის ალით იძიებს შურს მათზე, ვინც არ შეიცნო ღმერთი და არ ემორჩილება უფლის იესოს სახარებას’ (2 თესალონიკელთა 1:7, 8).
ნიშანი
6 ცხრამეტი საუკუნის წინ იესოს მოწაფეებმა — სინათლის მატარებლებმა — ჰკითხეს მას ნიშნის, ანუ სამეფო ხელისუფლებით მისი მომავალი თანდასწრების მტკიცებების შესახებ. მის პასუხში, რომელიც ჩაწერილია მათეს სახარების 24-ე და 25-ე თავებში, წარმოდგენილია შედგენილი ნიშანი, რომლის ყველა ნაწილი სრულდება ახლა მსოფლიო მასშტაბით. ამ ნიშნის შესრულება ნიშნავს უბედურებებისა და დიდი განსაცდელის პერიოდს. იესო წინასწარ იტყობინებოდა: „გაფრთხილდით, რომ არავინ შეგაცდინოთ. ვინაიდან ბევრი მოვა ჩემი სახელით და იტყვის: მე ქრისტე ვარ; და მრავალს შეაცდენენ. ასევე მოისმენთ ომებსა და ხმებს ომების შესახებ, უყურეთ, ნუ შეძრწუნდებით, ვინაიდან ეს უნდა მოხდეს, მაგრამ ჯერ კიდევ არ არის აღსასრული“ (მათე 24:4–6).
7 შემდეგ იესომ იწინასწარმეტყველა, რომ იქნებოდა ომები უპრეცედენტო მასშტაბით. ორი მათგანი უკვე მოხდა, ისინი ეკუთვნის მსოფლიო ომების კატეგორიას: პირველი მიმდინარეობდა 1914–1918 წლებში, ხოლო მეორე 1939–1945 წლებში. შემდგომ, მან თქვა, რომ სხვადასხვა ადგილებში იქნებოდა სურსათის უკმარისობა და მოხდებოდა მიწისძვრები. ჭეშმარიტი ქრისტიანები სასტიკად დევნილნი იქნებოდნენ. წინასწარმეტყველების თანახმად, იეჰოვას მოწმეებმა, სინათლის თანამედროვე მატარებლებმა, გასული ოთხმოცი წლის განმავლობაში განიცადეს დევნა, ვინაიდან ქადაგებდნენ ღმერთის სამეფოს შესახებ კეთილ ცნობას „მთელ მსოფლიოში ყველა ხალხის დასამოწმებლად“ (მათე 24:7–14). „იეჰოვას მოწმეთა წელიწდეულის“ (ინგლ.) თითოეული გამოცემა შეიცავს იმის დამატებით მტკიცებას, რომ ნიშნის ეს ნაწილები სრულდება.
8 რამდენადაც ქრისტეს მეფობა მოიცავს მთელ დედამიწას, ყველა კონტინენტზე მიმდინარეობს ჭეშმარიტი თაყვანისმცემლობის გაფართოება. მისი მეფური თანდასწრება (პა·როუ·სი·ა) არის გლობალური შემოწმების დრო (1 პეტრე 2:12). მაგრამ არსებობს თუ არა დედაქალაქი, ანუ ცენტრი, სადაც შეიძლებოდა იესოსთან მიღებაზე მისვლა? ამაზე იესოს პასუხია მისი წინასწარმეტყველება, რომ, როდესაც მოსალოდნელი იქნებოდა მისი თანდასწრება, გამოჩნდებოდნენ ცრუ-ქრისტეები. ის იძლეოდა გაფრთხილებას: „თუ გითხრან: აი, ის უდაბნოშია, ნუ გამოხვალთ; აი, ის შიგნითა ოთახებშია, ნუ ერწმუნებით. ვინაიდან, როგორც ელვა გამოდის აღმოსავლეთიდან და თვით დასავლამდე ანათებს, ასევე იქნება ძე კაცისას მოსვლა [პა·როუ·სი·ა]“ (მათე 24:24, 26, 27).
9 იესომ, ‘ძე კაცისამ’, დედამიწაზე მყოფ ნებისმიერ ადამიანზე უკეთესად იცოდა, თუ სად იქნებოდა თავისი თანდასწრების დროს. ის არ იქნებოდა არც იქ, არც აქ, არც რაიმე განსაზღვრულ ადგილას დედამიწაზე. ის არ გამოჩნდება რომელიმე განცალკევებულ ადგილზე, „უდაბნოში“, რათა მათ, ვინც ეძებს მესიას, მისგან რჩევის მიღების შესაძლებლობა ჰქონდეთ იქ, ქვეყნის პოლიტიკური ხელმძღვანელების თვალთახედვის არისგან მოშორებით, სადაც იესოს მიმდევრებს შესაძლებლობა ექნებათ მისი ხელმძღვანელობით მიიღონ დამოძღვრა, რათა მოამზადონ პოლიტიკური გადატრიალება და ქრისტე დააყენონ მსოფლიოს მესიანურ მმართველად. ასევე, ის არ დაიმალება სადღაც „შიგნითა ოთახებში“, ადგილზე, რომელიც მხოლოდ რჩეული უმცირესობისთვის იქნება ცნობილი, რათა იქ, უჩინარსა და მიუგნებელს ჰქონდეს შესაძლებლობა, თავის თანამორწმუნეებთან ერთად შექმნას მსოფლიო მთავრობების ჩამოგდებისა და საკუთარი თავის აღთქმულ მესიად ცხების საიდუმლო გეგმები. არა!
10 პირიქით, არაფერი იქნება საიდუმლო იმასთან დაკავშირებით, რომ იესო მოვა როგორც მეფე და დაიწყებს მეფური ხელისუფლებით თანდასწრებას. როგორც იესომ იწინასწარმეტყველა, ბიბლიური ჭეშმარიტების ელვის სინათლე გლობალური მასშტაბით აგრძელებს კაშკაშს ვრცელ ტერიტორიაზე, აღმოსავლეთიდან დასავლეთამდე. იეჰოვას მოწმეები, როგორც სინათლის თანამედროვე მატარებლები, ნამდვილად არიან ‘ხალხების ნათელი, რომ ღმერთის [იეჰოვას] ხსნამ ქვეყნის კიდემდე მიაღწიოს’ (ესაია 49:6).
ანგელოზთა მოღვაწეობა
11 სხვა ტექსტებში, რომლებიც ეხება ქრისტეს თანდასწრებას, აღწერილია, რომ მას თან ახლავს ან, რომ ის „წარგზავნის“ ანგელოზთა გუნდს (მათე 16:27; 24:31). იგავში ხორბლისა და ღვარძლის შესახებ, იესომ თქვა, რომ ‘მინდორი არის მსოფლიო’ და „მკა კი არის წუთისოფლის აღსასრული, ხოლო მომკალნი ანგელოზები არიან“. მაგრამ ეს იმას არ ნიშნავს, რომ მეფური ხელისუფლებითა და დიდებით თავისი თანდასწრების დროს, დედამიწაზე თავისი დავალების შესასრულებლად, ის მხოლოდ ანგელოზებს გამოიყენებს. იესოს ხელმძღვანელობით ათას ცხრაას ცხრამეტი წლიდან ანგელოზებმა დაიწყეს პირველი მსოფლიო ომის შედეგად გაფანტული ხორბლის კლასის გამოყოფა, რომელიც შედგება დედამიწაზე სულით ჩასახული ცხებულებისგან და მოამზადეს ისინი მეფის სახელით შემდგომი მოღვაწეობისთვის (მათე 13:38–43). ათას ცხრაას ოციან წლებში სხვა ათასები დადგნენ უკვე დამყარებული ღმერთის სამეფოს მხარეს და ღმერთის სულით იყვნენ ცხებული. ეს ცხებულები წარმატებით შეუერთდნენ პირველდაწყებითი დარჩენილი ნაწილის რიგებს. ისინი, ყველანი ერთად, დღემდე შეადგენენ ერთგული და გონიერი მონის კლასს.
12 იესოს თანდასწრებისას ანგელოზების მონაწილეობის სხვა მაგალითი, რომელიც თან მოჰყვა 1914 წელს მის ტახტზე ასვლას, ჩაწერილია გამოცხადების 12:7–9-ში: „მიქაელი [იესო ქრისტე] და მისი ანგელოზები ებრძოდნენ დრაკონს, და იბრძოდნენ დრაკონი და მისი ანგელოზები, მაგრამ ვერ გაუძლეს და აღარც ადგილი აღმოჩნდა მათთვის ცაში. და გადმოგდებულ იქნა დიდი დრაკონი, ძველი გველი, რომელსაც ეშმაკი და სატანა ჰქვია, მსოფლიოს მაცდუნებელი, და მისი ანგელოზებიც გადმოყრილ იქნენ მასთან ერთად“. ამგვარად, ზეცა გათავისუფლდა და სამეფოს მხოლოდ მიწიერი სამფლობელო უნდა გაიწმინდოს მთლიანად, რათა განიწმინდოს იეჰოვას სახელი. მიმდინარე 1993 წელს ისევ მოქმედია გაფრთხილება: ‘ვაი მიწას. . . ვინაიდან თქვენთან ჩამოვიდა ეშმაკი დიდი მძვინვარებით, რადგან იცის, რომ დრო ცოტა აქვს’ (გამოცხადება 12:12).
ზეციური აღდგენა
13 სხვა საოცარი მოვლენა, იესო ქრისტეს თანდასწრების დროს, არის ზეციური აღდგენის დაწყება. პავლე მოციქულმა მიუთითა, რომ ცხებული ქრისტიანები, რომელთაც სამარხებში ეძინათ ხანგრძლივი დროის განმავლობაში, პირველნი აღდგებოდნენ და სულიერ სფეროში იცხოვრებდნენ იესო ქრისტესთან ერთად. წლების განმავლობაში წარმოდგენილი იყო მტკიცებები, რომ ეს უნდა დაწყებულიყო 1918 წლიდან. პავლე წერს: „ასევე გაცოცხლდებიან ქრისტეში. და თითოეული თავისი წესით: პირმშო — ქრისტე, ხოლო შემდეგ ქრისტესნი, მისი მოსვლისას [თანდასწრებისას, აქ (პა·როუ·სი·ა)]“ (1 კორინთელთა 15:22, 23). ცხებულთა აღდგენის შესახებ ცნობა დასტურდება 1 თესალონიკელთა 4:15–17-ში: „რამეთუ ამას გეუბნებით თქვენ უფლის სიტყვით, რომ ჩვენ, ცოცხლები, ვინც დავრჩით უფლის მოსვლამდე [თანდასწრებამდე, აქ (პა·როუ·სი·ა)], ვერ დავასწრებთ განსვენებულებს. . . უწინ ქრისტეში განსვენებულები აღდგებიან; შემდეგ ჩვენ, ცოცხლად დარჩენილები, მათთან ერთად ვიქნებით ზეატაცებულნი ღრუბლებში, რათა ჰაერში შევეგებოთ უფალს“. ამ შესანიშნავ ჯილდოს საბოლოო ჯამში მიიღებს 144 000 ცხებული, რომელიც ქრისტეს მიეკუთვნება (გამოცხადება 14:1).
14 როგორც პავლე მიუთითებს, დღეს მცხოვრები ცხებულთა დარჩენილი ნაწილის წევრები სამეფოს ვერ დაიმკვიდრებენ იმ ერთგულ, ცხებულ წამებულებსა და მოწაფეებზე წინ, რომლებიც მათზე ადრე იყვნენ. შემდგომ მოციქული იოანე აღწერს ცხებულებს, რომლებიც ჩვენს დღეებში კვდებიან, შემდეგი სიტყვებით: „ნეტარ არიან მიცვალებულნი, რომელნიც ამიერიდან უფალში იხოცებიან. დიახ, ამბობს სული, რათა მოისვენონ თავიანთ შრომათაგან და მათი საქმეები მიჰყვებიან მათ“, ესე იგი, იქ, სადაც ისინი აღდგებიან (გამოცხადება 14:13). ხოლო პავლე ამბობს: „აი, მე საიდუმლოს გეუბნებით: ყველანი არ განვისვენებთ, მაგრამ ყველანი შევიცვლებით ერთ წამში, თვალის დახამხამებაზე, უკანასკნელი ბუკისას; ვინაიდან დაჰკრავს ბუკს და მკვდრები აღდგებიან უხრწნელად, ხოლო ჩვენ შევიცვლებით“ (1 კორინთელთა 15:51, 52). რა საკვირველი სასწაულია!
15 ერთხელ, როცა იესო ღმერთის სამეფოს შესახებ ქადაგებდა თავისი მიმდევრების ჯგუფთან, მან გამოიყენა თვალსაჩინო მაგალითი, რომელიც მათ დაეხმარებოდა არასწორი წარმოდგენების გამოსწორებაში. ცნობაში ნათქვამია: „მათ ეგონათ, უცბად უნდა გამოჩნდესო ღმერთის სასუფეველი. ამის გამო თქვა: ერთი კეთილშობილი კაცი წავიდა შორეულ ქვეყანაში, რომ სამეფო მიეღო და უკან დაბრუნებულიყო. დაუძახა თავის ათ მონას, მისცა ათი მინა და უთხრა: ვიდრე დავბრუნდებოდე, ივაჭრეთ. . . როცა სამეფო მიიღო და უკან დაბრუნდა, ბრძანა გამოეძახათ მასთან ის მონები, რომლებსაც ვერცხლი მისცა, რომ გაეგო, ვინ რა ივაჭრა“ (ლუკა 19:11–15).
16 ის „კაცი“, რომელიც ზეცაში წავიდა, „შორეულ ქვეყანაში“, სადაც სამეფო უნდა მიეღო, იყო იესო. ეს სამეფო მან მიიღო 1914 წელს. მალე, ამის შემდეგ, იესომ, როგორც მეფემ, ბრძანა ანგარიში ჩაებარებინათ მათ, ვინც საკუთარ თავს მის მიმდევრად თვლიდა, რომ დაედგინა, თუ როგორ იზრუნეს მათთვის მინდობილი სამეფოს ინტერესების შესახებ. ერთგული უმცირესობა ამორჩეული იყო, რათა უფლისაგან ქება მიეღო: „კარგი, კეთილო მონავ, რაკი მცირედზე ერთგული იყავი, ათ ქალაქზე გექნეს ძალაუფლება“ (ლუკა 19:17). ქრისტეს თანდასწრების ეს პერიოდი მოიცავს სამეფოს შესახებ შემდგომ ინტენსიურ ქადაგებას, რომელშიც შედის ბოროტებზე ღმერთის განაჩენის გამოცხადება, და ამ სამუშაოზე ზედამხედველობა შედიოდა ‘კეთილი მონისთვის’ მიცემულ უფლებამოსილებაში.
მსოფლიო ქადაგება
17 კიდევ რა უნდა მომხდარიყო პა·როუ·სი·ას ამ პერიოდის განმავლობაში? ეს უნდა ყოფილიყო დიდი სიხარულის დრო სამქადაგებლო საქმიანობასა და ახლების დახმარებაში იმისთვის მოსამზადებლად, რომ გადაიტანონ მოახლოებული დიდი ჭირი. „უამრავი ხალხის“ ეს წევრები, რომლებიც მხარს უჭერენ დარჩენილ ნაწილს, გახდნენ „სარეკომენდაციო წერილები“ (გამოცხადება 7:9; 2 კორინთელთა 3:1–3, აქ). პავლე, მკის ამ სიხარულის მომტან სამუშაოს მოიხსენიებს, როცა ამბობს: „რამეთუ რა არის ჩვენი იმედი, ან ჩვენი სიხარული, ან ჩვენი კვეხნის გვირგვინი? განა თქვენც არა ხართ ჩვენი უფლის იესო ქრისტეს წინაშე მისი მოსვლისას? [თანდასწრებისას, აქ (პა·როუ·სი·ა)]“ (1 თესალონიკელთა 2:19).
დარჩი სუფთა და უმწიკვლო
18 პავლე, ასევე, ლოცულობდა ქრისტეს თანდასწრების დროს მცხოვრებთა განწმენდის შესახებ: „და თვითონ მშვიდობის ღმერთმა კი წმიდა გყოთ თქვენ სრულად და თქვენ მთლიანად: სული, მშვინვა და სხეული დაცულ იქნეს უბიწოდ ჩვენი უფლის იესო ქრისტეს მოსვლისათვის [თანდასწრებისთვის, აქ (პა·როუ·სი·ა)]“ (1 თესალონიკელთა 5:23). დიახ, დღეს, ცხებულთა დარჩენილი ნაწილის თუ სხვა ცხვრების უამრავი რაოდენობის წევრნი ვართ, თანამშრომლობის სული გვაერთიანებს ერთობლივ ერთგულებაში, რათა შევძლოთ ამ უნიკალურ დროს სუფთად და უმწიკვლოდ დარჩენა. მსგავსი სახით, ჩვენ უნდა გამოვავლინოთ მოთმინება. იაკობი წერდა: „ამიტომ, ძმებო, სულგრძელნი იყავით უფლის მოსვლამდე [თანდასწრებამდე, აქ (პა·როუ·სი·ა)]. . . გულები გაიმაგრეთ, რამეთუ მოახლოებულია უფლის მოსვლა [თანდასწრება, აქ (პა·როუ·სი·ა)]“ (იაკობი 5:7, 8).
19 პეტრე მოციქული ასევე მოგვმართავს ჩვენ, დღეს მცხოვრებ ადამიანებს. მან გაგვაფრთხილა დამცინავების შესახებ, რომლებიც მრავლად არიან დედამიწის ნებისმიერ ნაწილში, პეტრე ამბობს: „უპირველესად იცოდეთ, რომ უკანასკნელ დღეებში მოვლენ დაცინვით დამცინავები, რომელნიც საკუთარი გულისთქმისამებრ იქცევიან. და ამბობენ: სად არის მისი მოსვლის [თანდასწრების, აქ (პა·როუ·სი·ა)] აღთქმა? რამეთუ მას შემდეგ, რაც მიიცვალნენ მამები, ყოველივე ისევე რჩება, როგორც დასაბამიდან“ (2 პეტრე 3:3, 4). ქრისტეს თანდასწრების დროს დამცინავთა სიუხვის მიუხედავად, იეჰოვას ხალხი აგრძელებს ნათებას, როგორც შუქი მსოფლიოში, მრავალთა გადარჩენის მიზნით.
კითხვები გამეორებისთვის
◻ როგორ განათლდნენ თანდათანობით იეჰოვას მსახურები პა·როუ·სი·ასთან დაკავშირებით?
◻ როგორ ხდება მათეს 24:4–8-ის შესრულება?
◻ როგორ თანამშრომლობენ ანგელოზები ტახტზე აღზევებულ იესოსთან?
◻ რა საკვირველი სასწაულის მოხდენა იწყება პა·როუ·სი·ას დროს?
◻ რა სასიხარულო მოვლენა ხდება დღეს და ვინ მონაწილეობს მასში?
[სასწავლო კითხვები]
1. ქრისტიანული სამყაროს სამღვდელოება როგორ განმარტავს მათეს 24:3-ში მოცემული სიტყვების მნიშვნელობას?
2, 3. ა) რა განსხვავება იყო გაკეთებული ნაშრომის, „წერილების გამოკვლევის“, მე-2 ტომში სიტყვებს შორის: „მოსვლა“ და „თანდასწრება“? ბ) რა გაიგეს იეჰოვას მსახურებმა ქრისტეს პა·როუ·სი·ასთან დაკავშირებით?
4. რას ეხება გამოთქმა ‘უფლის იესო ქრისტეს თანდასწრებისათვის’?
5. პა·როუ·სი·ას განმავლობაში მომხდარი რომელი მოვლენები იქნება ამ ჟურნალის სამ სასწავლო სტატიაში განხილული?
6. რომელი შედგენილი ნიშანია აღწერილი მათეს სახარების 24-ე და 25-ე თავებში?
7. ნიშნის რომელი ნაწილების შესრულებას ვხედავთ 1914 წლიდან?
8, 9. ა) რას მოიცავს თავის თავში იესოს მეფური თანდასწრება? ბ) რას აჩვენებს ცრუ ქრისტეების შესახებ იესოს წინასწარმეტყველება მისი თანდასწრების ადგილისა და ხასიათის თაობაზე?
10. რანაირად კაშკაშებს ბიბლიური ჭეშმარიტების ელვის სინათლე გლობალური მასშტაბით?
11. ა) რა სახით გამოიყენება ანგელოზების გუნდი სამეფოს ნათელის მოფენაში? ბ) როდის და რომელ ჯგუფში იყვნენ გაერთიანებულნი ხორბლის კლასის წევრები?
12. რომელ განმწმენდ სამუშაოში მიიღეს ანგელოზებმა მონაწილეობა და დედამიწისთვის რა შედეგებით?
13, 14. ა) როგორც საღვთო წერილშია მითითებული, რა მოვლენები დაიწყო 1918 წლიდან? ბ) რას გვიცხადებენ პავლე და იოანე დღეს არსებულ ცხებულთა დარჩენილი ნაწილის შესახებ?
15, 16. ა) რა თვალსაჩინო მაგალითი მოიყვანა იესომ ლუკას 19:11–15-ში და რა მიზეზით? ბ) როგორ ხდება ამ წინასწარმეტყველების შესრულება?
17. რა სიხარულის აღმნიშვნელია პა·როუ·სი·ა?
18. ა) რომელ ლოცვაში მოიხსენიებს პავლე პა·როუ·სი·ას? ბ) რა სულისკვეთება უნდა გამოვავლინოთ ამ დროს და რა მხრივ?
19. რა გაფრთხილებას იძლეოდა პეტრე პა·როუ·სი·ასთან დაკავშირებით და როგორი უნდა იყოს ამაზე ჩვენი რეაგირება?