სიყვარულის უდიდესი გამოვლინება

4. როგორ მიხვდა რომაელი ჯარისკაცი, რომ იესო ჩვეულებრივი ადამიანი არ ყოფილა და რა დაასკვნა მან?

⁴ რომაელი ასისთავი, რომელიც იესოს სიკვდილით დასჯას ხელმძღვანელობდა, შეძრა სიბნელემ და ძლიერმა მიწისძვრამ. „მართლა ღვთის ძე ყოფილაო“, — თქვა მან (მათე 27:54). ცხადია, იესო ჩვეულებრივი ადამიანი არ ყოფილა. ასისთავი უზენაესი ღვთის მხოლოდშობილი ძის სიკვდილით დასჯას ხელმძღვანელობდა! რამდენად ძვირფასი იყო ღვთის ძე მამისთვის?

5. როგორ აღწერდით იეჰოვასა და მისი ძის ზეცაში ერთად ყოფნის ხანგრძლივ პერიოდს?

⁵ ბიბლია იესოს უწოდებს „ყველა სხვა ქმნილებაზე უწინ შობილს“ (კოლოსელები 1:15). წარმოიდგინე, იეჰოვას ძე ჯერ კიდევ მატერიალური სამყაროს შექმნამდე არსებობდა. რამდენ ხანს იყვნენ მამა-შვილი ერთად? ზოგი მეცნიერის ვარაუდით, სამყარო 13 მილიარდი წლისაა. შეგიძლია დროის ამ ხანგრძლივობის წარმოდგენა? მეცნიერების მიერ ნავარაუდევი თარიღი ადვილად წარმოსადგენი რომ იყოს, ერთ პლანეტარიუმში წარმოდგენილია 110 მ სიგრძის დროის დიაგრამა. როდესაც დამთვალიერებლები დროის დიაგრამის გასწვრივ მოძრაობენ, მათ მიერ გადადგმული თითოეული ნაბიჯი სამყაროს არსებობის დაახლოებით 75 მილიონ წელს შეესაბამება. დროის დიაგრამის ბოლოში მთელი კაცობრიობის ისტორია დაახლოებით ადამიანის თმის ერთი ღერის სიმსხო ხაზითაა წარმოდგენილი. ეს ვარაუდი სწორიც რომ იყოს, დროის მთელი დიაგრამა მაინც საკმარისად ვერ წარმოგვიდგენდა იეჰოვას ძის სიცოცხლის ხანგრძლივობას! რას აკეთებდა ის მთელი ამ ხნის განმავლობაში?

6. ა) რა საქმით იყო დაკავებული იეჰოვას ძე განკაცებამდე? ბ) რა მტკიცე კავშირი არსებობს იეჰოვასა და ძეს შორის?

⁶ ძე სიხარულით ემსახურებოდა მამას, „როგორც ოსტატი“ (იგავები 8:30). ბიბლია ამბობს: „მის გარეშე არაფერი შექმნილა“ (იოანე 1:3). ესე იგი, იეჰოვა და ძე ერთად ქმნიდნენ მთელ სამყაროს. რა საინტერესო და ბედნიერი დრო იქნებოდა! ალბათ, ბევრი დაგვეთანხმება, რომ მშობელსა და შვილს შორის არსებული სიყვარული საოცრად ძლიერია, ამასთანავე სიყვარული „სრულყოფილი გამაერთიანებელი კავშირია“ (კოლოსელები 3:14). ამიტომ, რომელ ჩვენგანს შეუძლია ჩასწვდეს ისეთი კავშირის სიმტკიცეს, რომელსაც უთვალავი წლის წინ ჩაეყარა საფუძველი? ნათელია, რომ იეჰოვა და მისი ძე სიყვარულის უძლიერესი კავშირით არიან შეკრული.

7. იესოს ნათლობისას როგორ გამოხატა იეჰოვამ თავისი გრძნობები ძისადმი?

⁷ მიუხედავად ამისა, მამამ თავისი ძე დედამიწაზე გამოგზავნა, რათა ადამიანად დაბადებულიყო. ეს კი იმას ნიშნავდა, რომ გარკვეული ხანი იეჰოვას თავის საყვარელ შვილთან განშორება მოუწევდა. იეჰოვა დიდი ინტერესით ადევნებდა თვალს ზეციდან, როგორ ყალიბდებოდა ზრდასრულ ადამიანად მისი სრულყოფილი ძე. დაახლოებით 30 წლის ასაკში იესო მოინათლა. ადვილი წარმოსადგენია, რას გრძნობდა ამ დროს იეჰოვა. მამამ პირადად განაცხადა ზეციდან: „ეს არის ჩემი საყვარელი ძე, რომელიც მე მოვიწონე!“ (მათე 3:17). მამა ნამდვილად კმაყოფილი და გახარებული იქნებოდა, როდესაც ხედავდა, როგორ ერთგულად ასრულებდა იესო მის შესახებ დაწერილ ყველა წინასწარმეტყველებას, ყველაფერს, რაც კი მოეთხოვებოდა! (იოანე 5:36; 17:4).

8, 9. ა) როგორ აწამეს იესო ახ. წ. 33 წლის 14 ნისანს და როგორ იმოქმედა ამან მის ზეციერ მამაზე? ბ) რატომ დაუშვა იეჰოვამ თავისი ძის წამება და სიკვდილი?

⁸ წარმოგიდგენია, როგორი გრძნობა დაეუფლებოდა იეჰოვას ახ. წ. 33 წლის 14 ნისანს? რას იგრძნობდა იესოს გაცემისას, ან იმ ღამით, როდესაც ბრბომ ის შეიპყრო? როცა მეგობრებმა მიატოვეს ან როცა უკანონოდ დასდეს მსჯავრი? ან მაშინ, როდესაც დასცინოდნენ, აფურთხებდნენ, მუშტებსა და შოლტს ურტყამდნენ და ზურგი ეფლითებოდა? როდესაც ხის ძელზე გააკრეს, ფეხებითა და ხელებით მიალურსმეს და თან დასცინოდნენ? რა მდგომარეობაში იქნებოდა მამა, როდესაც მისი საყვარელი შვილი ძლიერი ტკივილებისგან იტანჯებოდა და მას შეღაღადებდა? რას იგრძნობდა იეჰოვა, როდესაც იესოს უკანასკნელი სიტყვა აღმოხდა და, სამყაროს გაჩენის დღიდან პირველად, მისმა ძვირფასმა ძემ არსებობა შეწყვიტა? (მათე 26:14—16, 46, 47, 56, 59, 67; 27:38—44, 46; იოანე 19:1).

⁹ რა გამაოგნებელია! შეუძლებელია, სიტყვებით გადმოსცე ის ტკივილი, რომელიც იეჰოვამ თავისი ძის სიკვდილით განიცადა. მაგრამ, შესაძლებელია იმის ახსნა, თუ რატომ დაუშვა იეჰოვამ, რომ პირადად გამოეცადა ასეთი მტკივნეული გრძნობები. იოანეს 3:16-ში იეჰოვა საოცარ ინფორმაციას გვიმხელს. ეს ბიბლიური მუხლი იმდენად მნიშვნელოვანია, რომ მას „მინიატურული სახარებაც“ კი უწოდეს. მასში ნათქვამია: „ღმერთმა ქვეყნიერება ისე შეიყვარა, რომ თავისი მხოლოდშობილი ძე მისცა, რათა ვისაც ის სწამს, არ დაიღუპოს, არამედ მარადიული სიცოცხლე ჰქონდეს“. ასე რომ, მიზეზი შეიძლება ერთი სიტყვით შეგვეჯამებინა: სიყვარული. იეჰოვას ძღვენი — თავისი ძის დედამიწაზე გამოგზავნა, რათა წამებულიყო და ჩვენთვის მომკვდარიყო — სიყვარულის უდიდესი მტკიცებაა.

¹² ბიბლიაში მოხსენიებული სიტყვა აგაპე, ძირითადად, იმ სახის სიყვარულია, რომელსაც პრინციპები მართავს. ასეთი სიყვარული პირად გრძნობებსა და ემოციებზე არ არის დაფუძნებული. ის ბევრად მეტს მოიაზრებს — გააზრებულ და მიზანმიმართულ მოქმედებას. და რაც ყველაზე მნიშვნელოვანია, ქრისტიანულ სიყვარულს ეგოიზმთან საერთო არაფერი აქვს. მაგალითად, კიდევ ერთხელ დავუკვირდეთ იოანე 3:16-ს. რა არის ქვეყნიერება, რომელიც ისე შეიყვარა ღმერთმა, რომ თავისი მხოლოდშობილი ძე მისცა? მასში კაცობრიობა იგულისხმება, რომელსაც გამოსყიდვა ესაჭიროებოდა. ის მოიცავს უამრავ ცოდვილ ადამიანს. ნუთუ იეჰოვას ისე უყვარს თითოეული ადამიანი, როგორც თავისი მეგობარი, ერთგული აბრაამი უყვარდა? (იაკობი 2:23). არა, მაგრამ იეჰოვა სიყვარულით ავლენს სიკეთეს თითოეული ჩვენგანის მიმართ, თუნდაც ეს დიდ ფასად დაუჯდეს. მისი სურვილია, ყველამ მოინანიოს და ცხოვრების წესი შეიცვალოს (2 პეტრე 3:9). ბევრი ასეც იქცევა. ასეთებს სიხარულით იღებს თავის მეგობრებად.