თავი 5
ნამდვილად ღმერთისგან არის თუ არა ბიბლია?
1. რატომ არის გონივრული გვჯეროდეს, რომ ღმერთი მოგვაწოდებდა ინფორმაციას საკუთარი თავის შესახებ?
მოგვცა თუ არა იეჰოვა ღმერთმა ინფორმაცია საკუთარი თავის შესახებ? გვამცნო თუ არა, რა გააკეთა დღემდე და რა აქვს განზრახული მომავალში? მოსიყვარულე მამა ბევრ რამეს უყვება შვილებს. ხოლო იქიდან, რაც განვიხილეთ, დავინახეთ, რომ იეჰოვა ნამდვილად მოსიყვარულე მამაა.
2. ა) რა შესანიშნავი შესაძლებლობა ჰქონდა იეჰოვას, ეცნობებინა ჩვენთვის საკუთარი თავის შესახებ? ბ) ამიტომ, როგორი კითხვები წამოიჭრება?
2 როგორ შეეძლო იეჰოვას, მიეწოდებინა ინფორმაცია დედამიწის სხვადასხვა ნაწილსა და დროის სხვადასხვა პერიოდში მცხოვრები ადამიანებისთვის? შესანიშნავი საშუალება იქნებოდა, ეზრუნა წიგნის დაწერაზე, შემდეგ კი თვალყური ედევნებინა, რომ ეს წიგნი ყველასთვის ყოფილიყო ხელმისაწვდომი. არის თუ არა ბიბლია ასეთი წიგნი ღმერთისგან? როგორ შეგვიძლია ამის გაგება?
არ არსებობს ბიბლიის თანასწორი წიგნი
3. რა მხრივ არის ბიბლია ცნობილი წიგნი?
3 თუ ბიბლია ნამდვილად ღმერთისგანაა, ოდესმე დაწერილი წიგნებიდან ის ყველაზე ცნობილი უნდა იყოს. არის თუ არა ეს ასე? დიახ, არის და საამისოდ მრავალი მიზეზი არსებობს. უპირველესად, ის უძველესია; ხომ არ მოელოდი, რომ ყველა ადამიანისთვის განკუთვნილი ღმერთის სიტყვა ახლახან იქნებოდა დაწერილი? ბიბლიის წერა დაიწყო ებრაულ ენაზე დაახლოებით 3 500 წლის წინ, ხოლო 2 200 წელზე მეტი ხნის წინ, მისი თარგმნა დაიწყეს სხვადასხვა ენებზე. დღეს ბიბლიის წაკითხვა მშობლიურ ენაზე შეუძლია დედამიწაზე მცხოვრებ თითქმის ყველა ადამიანს.
4. სხვა წიგნებთან შედარებით რა რაოდენობით გამოიცა ბიბლია?
4 ამასთანავე, ვერც ერთი სხვა წიგნი ვერ გაუთანაბრდება ბიბლიას ეგზემპლარების რაოდენობით. თუ რომელიმე წიგნის მხოლოდ რამდენიმე ათასი ეგზემპლარია გამოქვეყნებული, მას შეიძლება ეწოდოს „ბესტსელერი“. ბიბლია კი ყოველწლიურად მილიონობით იბეჭდება. ხოლო ასწლეულების მანძილზე გამოცემული იქნა მილიარდობით ეგზემპლარი. დედამიწაზე თითქმის არ არსებობს ისეთი ადგილი, თუნდაც ძალიან დაშორებულიც კი, სადაც არ მოიპოვება ბიბლია. ნუთუ არ მოელოდი ამას წიგნისგან, რომელიც ნამდვილად ღმერთისგან არის?
5. რა ზომებს ღებულობდნენ, რომ გაენადგურებინათ ბიბლია?
5 რადგან მტრები ცდილობდნენ ბიბლიის განადგურებას მისი ასე ფართოდ გავრცელება მით უფრო გასაოცარია. ნუთუ არ უნდა გვქონოდა მოლოდინი, რომ ღმერთის წიგნზე ეშმაკის დამქაშების თავდასხმა იქნებოდა? ეს ასეც მოხდა. იყო დრო, როდესაც ბიბლიის დაწვა ჩვეულებრივი მოვლენა იყო; ხოლო ვისაც ბიბლიის კითხვის დროს წაასწრებდნენ, უმრავლეს შემთხვევაში, სიკვდილით სჯიდნენ.
6. ა) რომელ მნიშვნელოვან კითხვებზე იძლევა პასუხს ბიბლია? ბ) თავიანთი მტკიცების თანახმად, საიდან იღებდნენ ბიბლიის მწერლები ინფორმაციებს?
6 შენ, ალბათ, მოელი, რომ წიგნში, რომელიც არის ღმერთისგან, განხილულია ისეთი საკითხები, რომლებიც აინტერესებს თითოეულ ჩვენგანს. მაგალითად: საიდან წარმოიშვა სიცოცხლე? რატომ ვართ ჩვენ აქ? რას მოგვიტანს მომავალი? ეს მხოლოდ ზოგიერთია იმ კითხვებიდან, რომლებზეც ბიბლია იძლევა პასუხს. ბიბლია ნათლად ამბობს, რომ ინფორმაცია, რომელსაც ის შეიცავს, გამომდინარეობს იეჰოვა ღმერთისგან. ბიბლიის ერთ-ერთმა მწერალმა თქვა: „უფლის [იეჰოვას, აქ] სული მეტყველებს ჩემით და ენაზე მაქვს მისი სიტყვა“ (მეორე მეფეთა 23:2). მეორე კი წერდა: „მთელი წერილი ღვთივსულიერია“ (2 ტიმოთე 3:16). რადგანაც ბიბლია ნათლად ამტკიცებს, რომ ღმერთის სიტყვაა, ნუთუ გონივრული არ იქნებოდა გამოგვეკვლია იგი, რომ გვენახა, ნამდვილად ასეა თუ არა?
როგორ დაიწერა ბიბლია
7. ა) ვინ წერდა ბიბლიას? ბ) მაშინ რატომ შეიძლება ითქვას, რომ ის ღმერთის სიტყვაა?
7 შეიძლება დაგებადოს კითხვა: „როგორ შეიძლება ბიბლია იყოს ღმერთისაგან, თუ ადამიანების მიერ დაიწერა?“ მართალია, ბიბლიის წერაში მონაწილეობა მიიღო დაახლოებით 40-მა მამაკაცმა. ეს ადამიანები, უშუალოდ, ბიბლიის ჩაწერაში მონაწილეობდნენ, ათი მცნების გამოკლებით, რომელიც პირადად ღმერთის სულიწმიდით იყო დაწერილი ქვის ორ ფილაზე (გამოსვლა 31:18). ის ფაქტი, რომ ბიბლია დაიწერა ადამიანების მიერ, არ აუფასურებს ღმერთის სიტყვას, რადგან მასში ახსნილია: „ადამიანები, სულიწმიდის მიერ აღძრულნი, ღვთისაგან წარმოთქვამდნენ მას“ (2 პეტრე 1:21). დიახ, ღმერთმა როგორც ზეცის, დედამიწისა და ცოცხალი არსებების შესაქმნელად გამოიყენა მძლავრი სულიწმიდა, ასევე გამოიყენა ეს ძალა, რომ ხელმძღვანელობა გაეწია ბიბლიის წერისთვის.
8, 9. ჩვენი დროის რომელი მაგალითები დაგვეხმარება, გავიგოთ, როგორ ხელმძღვანელობდა ღმერთი ბიბლიის წერას?
8 ეს კი ნიშნავს, რომ ბიბლიას ჰყავს მხოლოდ ერთი ავტორი — იეჰოვა ღმერთი. ბიბლიური ცნობების დასაწერად ის იყენებდა ადამიანებს, როგორც თანამდებობის პირი იყენებს მდივან-მემანქანეს, წერილის დასაწერად. წერილს წერს მდივანი, მაგრამ მასში ამ თანამდებობის პირის აზრები და იდეებია. ასე რომ, წერილი მისია და არა მდივნის. ზუსტად ასევე, ბიბლია ღმერთის წიგნია და არა ადამიანების, რომლებიც გამოყენებული იყვნენ მის დასაწერად.
9 თუ მხედველობაში მივიღებთ, რომ ღმერთმა შექმნა გონება, რა თქმა უნდა, მისთვის ძნელი არ იქნებოდა დაკავშირებოდა თავისი მსახურების გონებას, ბიბლიის დასაწერად აუცილებელი ინფორმაციების მისაწოდებლად. დღეს სახლში მყოფ ადამიანსაც კი შეუძლია მიიღოს ცნობები შორეული ქვეყნიდან, რადიოთი ან ტელევიზიით. ღმერთის მიერ შექმნილი ფიზიკური კანონების თანახმად, ბგერები და გამოსახულებები დიდ მანძილზე გადაიცემა. ამიტომ, ადვილი გასაგებია, რომ იეჰოვას თავისი შორეული, ზეციერი ადგილსამყოფელიდან შეეძლო მიეთითებინა ადამიანებისთვის, ჩაეწერათ ის ინფორმაციები, რომელთა მოწოდებაც სურდა საკაცობრიო ოჯახისთვის.
10. ა) რამდენი წიგნისგან შედგება ბიბლია და დროის რა მონაკვეთში დაიწერა? ბ) რა ძირითადი თემა გასდევს მთელ ბიბლიას?
10 ამის შედეგია საოცარი წიგნი, ბიბლია, რომელიც შედგება 66 პატარა წიგნისგან. „ბიბლია“ ბერძნული სიტყვაა და ნიშნავს „პატარა წიგნებს“. ეს წიგნები, ანუ წერილები იწერებოდა დაახლოებით 1 600 წლის განმავლობაში. მისი წერა დაიწყო ძველი წელთაღრიცხვით 1513 წელს და დამთავრდა ახალი წელთაღრიცხვით 98 წელს. ბიბლიის ყოველი წიგნი ერთმანეთთან თანხმობაშია, რადგან მას მხოლოდ ერთი ავტორი ჰყავს. მთელ ბიბლიას გასდევს ერთი ძირითადი თემა, კერძოდ ის, რომ იეჰოვა ღმერთი თავისი სამეფოს საშუალებით დაამყარებს სამართლიან პირობებს. ბიბლიის პირველი წიგნი „დაბადება“ მოგვითხრობს, როგორ დაიკარგა დედამიწაზე სამოთხე, ღმერთის წინააღმდეგ ამბოხების გამო, ხოლო ბოლო წიგნი „გამოცხადება“ აღწერს ღმერთის მმართველობის დროს როგორ გადაიქცევა დედამიწა კვლავ სამოთხედ (დაბადება 3:19, 23; გამოცხადება 12:10; 21:3, 4).
11. ა) რომელ ენებზე იწერებოდა ბიბლია? ბ) რომელ ორ ძირითად ნაწილად იყოფა ბიბლია, და რა ცხადყოფს მათ ერთიანობას?
11 ბიბლიის პირველი 39 წიგნი ძირითადად ებრაულ ენაზე დაიწერა, მცირე ნაწილი კი — არამეულზე. შემდეგი 27 წიგნი დაიწერა იესოსა და მისი ქრისტიანი მიმდევრების დროს ფართოდ გავრცელებულ ბერძნულ ენაზე. ამ ორ ძირითად ნაწილს მართებულად ეწოდება „ებრაული წერილები“ და „ბერძნული წერილები“. მათ შორის სრული თანხმობა ჩანს იქიდან, რომ ებრაული წერილებიდან ბერძნულ წერილებში კეთდება დაახლოებით 320 ციტირება და დაახლოებით 570 დამატებითი დაყრდნობა.
როგორ გახდა ბიბლია ყველასთვის ხელმისაწვდომი
12. რატომ იზრუნა იეჰოვამ ბიბლიის ასლების დამზადებისთვის?
12 თუ მხოლოდ წერილების ორიგინალი იარსებებდა, ყველა ვერ შეძლებდა ღმერთის სიტყვის წაკითხვას. ამიტომ, იეჰოვამ იზრუნა ებრაული წერილების ასლების დამზადებისთვის (მეორე რჯული 17:18). მაგალითად, მამაკაცი, სახელად ეზრა, მოხსენიებულია, როგორც „მწიგნობარი [გადამწერი, აქ], მოსეს რჯულში ჩახედული, რომელიც მისცა უფალმა, ისრაელის ღმერთმა“ (ეზრა 7:6). დამზადდა აგრეთვე ბერძნული წერილების ათასობით ასლი.
13. ა) რა იყო აუცილებელი, რომ მრავალ ადამიანს შესძლებოდა ბიბლიის კითხვა? ბ) პირველად, როდის გადაითარგმნა ბიბლია?
13 შეგიძლია ბერძნულ ან ებრაულ ენაზე კითხვა? თუ არა, შენ ვერ შეძლებ ბიბლიის ადრინდელი ხელნაწერი ასლების წაკითხვას, რომელთაგანაც ზოგიერთი ჯერ კიდევ არსებობს. ამიტომ, ბიბლიის წაკითხვა რომ შეგძლებოდა, ვინმეს უნდა ეთარგმნა იმ ენაზე, რომელიც იცი. ასეთი თარგმანები მრავალ ადამიანს აძლევს ღმერთის სიტყვის წაკითხვის შესაძლებლობას. მაგალითად, დედამიწაზე იესოს ცხოვრებამდე დაახლოებით 300 წლით ადრე ადამიანთა უმრავლესობამ ბერძნულ ენაზე დაიწყო ლაპარაკი. ასე რომ, ძველი წელთაღრიცხვით 280 წლიდან ებრაული წერილები გადაითარგმნა ბერძნულ ენაზე. ამ ადრეულ თარგმანს ეწოდება „სეპტუაგინტა“.
14. ა) რატომ ეწინააღმდეგებოდა ზოგიერთი რელიგიური ხელმძღვანელი ბიბლიის თარგმნას? ბ) რა გვიჩვენებს, რომ მათ მარცხი განიცადეს?
14 მოგვიანებით, საერთაშორისო ენა გახდა ლათინური და ბიბლია ლათინურ ენაზეც გადაითარგმნა. მაგრამ საუკუნეების განმავლობაში მცირდებოდა ლათინურ ენაზე მოსაუბრე ადამიანთა რიცხვი. ადამიანთა უმრავლესობა ლაპარაკობდა სხვა ენებზე, როგორიცაა: არაბული, ფრანგული, ესპანური, პორტუგალიური, იტალიური, გერმანული და ინგლისური. იყო დრო, როდესაც კათოლიკური რელიგიის ხელმძღვანელები ეწინააღმდეგებოდნენ ბიბლიის თარგმნას უბრალო ადამიანთა ენაზე. ისინი კოცონზეც კი წვავდნენ მათ, ვისაც ბიბლია ჰქონდა. ეს იმიტომ ხდებოდა, რომ ბიბლია ნიღაბს ხდიდა მათ ცრუ სწავლებებსა და უხამს ქცევებს. დროთა განმავლობაში რელიგიურმა ხელმძღვანელებმა მარცხი განიცადეს. დაიწყო ბიბლიის თარგმნა მრავალ ენაზე და დიდი რაოდენობით გავრცელება. დღეს ბიბლიის წაკითხვა, მთლიანად ან ნაწილობრივ, შეიძლება 2 000-ზე მეტ ენაზე.
15. რატომ არის კარგი, რომ გვქონდეს ბიბლიის უახლესი თარგმანები?
15 დროთა განმავლობაში ერთსა და იმავე ენაზე გაკეთდა ბიბლიის მრავალი თარგმანი. მაგალითად, ინგლისურ ენაზე არსებობს ბიბლიის ათობით თარგმანი. რატომ? ნუთუ საკმარისი არ იქნებოდა მხოლოდ ერთი? არა, რადგან წლების მანძილზე ენა იცვლება. ამიტომ, თუ ბიბლიის ძველ თარგმანს ახალთან შეადარებ, უსათუოდ შეამჩნევ ენის ცვლილებას. მიუხედავად იმისა, რომ თარგმანები თითქმის ყოველთვის ერთსა და იმავე აზრს გადმოსცემენ, შეამჩნევ, რომ უახლეს დროში დაბეჭდილი თარგმანი უფრო ადვილი გასაგებია. ასე რომ, ჩვენ მადლიერები უნდა ვიყოთ ბიბლიის ახალი თარგმანებისთვის, რადგან ღმერთის სიტყვას გვაწვდიან ფართოდ გავრცელებულ, ჩვენი დროისთვის ადვილად გასაგებ ენაზე.
იყო თუ არა შეცვლილი ბიბლია?
16. რატომ ფიქრობს ზოგიერთი ადამიანი, რომ ბიბლია შეცვლილი იყო?
16 მაგრამ შეიძლება დაგებადოს კითხვა: „რით შეგვიძლია დავრწმუნდეთ, რომ დღეს ბიბლიაში ზუსტად იგივე ცნობებია მოცემული, რომლებიც ბიბლიის მწერლებმა მიიღეს ღმერთისაგან?“ ასობით და თვით ათასობით წლების განმავლობაში, ბიბლიური წიგნების მუდმივი გადაწერისას, ხომ არ შემოიპარა შეცდომები? დიახ, მაგრამ ეს შეცდომები აღმოაჩინეს და შეასწორეს ბიბლიის თანამედროვე თარგმანებში. რასაც დღეს ბიბლიაში ვკითხულობთ, სავსებით შეესაბამება ღმერთის ხელმძღვანელობით ბიბლიის მწერლების მიერ თავდაპირველად ჩაწერილ ცნობებს. არის თუ არა ამის დამამტკიცებელი საბუთები?
17. რა ადასტურებს, რომ ბიბლია უცვლელი დარჩა?
17 ამის დასტურია 1947—1955 წლებში ნაპოვნი გრაგნილები, რომლებიც ცნობილია, როგორც მკვდარი ზღვის ხელნაწერები. ეს უძველესი გრაგნილები შეიცავს ებრაული წერილების წიგნთა ასლებს. ისინი დათარიღებულია იესოს შობამდე 100–200 წლით ადრე. ერთ-ერთი გრაგნილი არის ესაიას წიგნის ასლი. მანამდე ნაპოვნი ესაიას წიგნის უძველესი ასლი ებრაულ ენაზე გაკეთებული იყო იესოს შობიდან დაახლოებით 1 000 წლის შემდეგ. ამ ორი ასლის ერთმანეთთან შედარებისას აღმოაჩინეს სულ რაღაც უმნიშვნელო სხვაობები და ისიც, უმეტესწილად, მართლწერაში. ეს მიუთითებს იმაზე, რომ 1 000 წელზე მეტი ხნის განმავლობაში ბიბლიის გადაწერას მნიშვნელოვანი ცვლილებები არ გამოუწვევია!
18. ა) როგორ შესწორდა გადამწერთა მიერ დაშვებული შეცდომები? ბ) რა შეიძლება ითქვას ბერძნული წერილების სიზუსტეზე?
18 ამჟამად არსებობს ებრაული წერილების სხვადასხვა ნაწილის 1 700-ზე მეტი უძველესი ასლი. ამ უამრავი უძველესი ასლის გულდასმითი შედარებით, აღმოჩენილი და შესწორებული იყო გადამწერების მიერ დაშვებული თვით მცირე შეცდომებიც კი. ასევე, არსებობს ბერძნული წერილების ათასობით უძველესი ასლი, რომელთაგან ზოგიერთი დათარიღებულია თითქმის იესოსა და მისი მოციქულების მოღვაწეობის დროით. ამის საფუძველზე სერ ფრედერიკ კენიონმა განაცხადა: „უკანასკნელი საფუძველი რაიმე ეჭვისთვის, რომ საღვთო წერილმა ჩვენამდე ძირითადად ისე მოაღწია, როგორც დაწერილი იყო, აღარ არსებობს“ („ბიბლია და არქეოლოგია“ [The Bible and Archaeology], გვერდები 288, 289).
19. ა) ბიბლიაში ჩამატების მცდელობის რა მაგალითი არსებობს? ბ) რატომ არ მიეკუთვნება ღმერთის სიტყვას 1 იოანეს 5:7-ში მოცემული სიტყვები, რომელიც გვხვდება ბიბლიის ზოგიერთ თარგმანში?
19 მაგრამ ეს არ ნიშნავს, რომ არ ყოფილა ღმერთის სიტყვაში ცვლილებების შეტანის მცდელობები. ამის თვალსაჩინო მაგალითია 1 იოანეს 5:7. ბიბლიაში „საქართველოს საპატრიარქოს გამოცემა“ ვკითხულობთ: „რადგან სამნი მოწმობენ ზეცად: მამა, სიტყვა და სული წმიდა; და ეს სამნი ერთი არიან“. მაგრამ ეს სიტყვები ბიბლიის არც ერთ უძველეს ასლში არ არის. ის ჩამატებული იყო სამების მოძღვრების მხარდამჭერთა მიერ. რამდენადაც ეს სიტყვები აშკარად არ არის ღმერთის სიტყვის ნაწილი, შეცდომა შესწორდა და მეტად აღარ გვხვდება ბიბლიის უახლეს თარგმანებში.
20. რატომ შეიძლება გვჯეროდეს, რომ ბიბლია უცვლელად არის შემონახული?
20 ამრიგად, თუ ვინმე ამბობს, რომ ბიბლია არ შეიცავს თავდაპირველად ჩაწერილ ინფორმაციებს, ის უბრალოდ არ იცნობს ფაქტებს. იეჰოვა ღმერთმა იზრუნა, დაეცვა თავისი სიტყვა არა მარტო გადამწერთა შეცდომებისგან, არამედ სხვების მიერ დამატებების შეტანის მცდელობისგანაც. თვითონ ბიბლიაშია მოცემული ღმერთის დანაპირები, რომ მისი სიტყვა უცვლელად იქნებოდა შემონახული ჩვენთვის (ფსალმუნი 11:7, 8; დანიელი 12:4; 1 პეტრე 1:24, 25; გამოცხადება 22:18, 19).
ნამდვილად ჭეშმარიტია თუ არა ბიბლია?
21. როგორი თვალსაზრისი ჰქონდა ღმერთის სიტყვის შესახებ იესოს?
21 იესო ქრისტემ ღმერთის მიმართ ლოცვისას თქვა: „შენი სიტყვა ჭეშმარიტებაა“ (იოანე 17:17). მაგრამ მტკიცდება თუ არა ეს ფაქტებით? ბიბლიის გულმოდგინედ გამოკვლევისას ვამჩნევთ თუ არა, რომ იგი ნამდვილად ჭეშმარიტია? ბიბლიის შემსწავლელი ისტორიკოსები ხშირად გაოცებულან მისი სიზუსტით. ბიბლია შეიცავს ზუსტ სახელებსა და წვრილმანებს, რომლებიც შეიძლება დადასტურდეს. განვიხილოთ ზოგიერთი მაგალითი.
22–25. რომელი მაგალითები გვიჩვენებს, რომ ბიბლია შეიცავს ზუსტ ისტორიას?
22 შეხედე ქალაქ კარნაკის (ეგვიპტე) ტაძრის კედელზე გამოსახულ ნახატებსა და წარწერებს. ის მოგვითხრობს იმ გამარჯვების შესახებ, რომელიც იუდას სამეფოზე მოიპოვა ფარაონმა შიშაკმა, დაახლოებით 3 000 წლის წინ, სოლომონის ძის, რობოამის მმართველობის დროს. ამასვე მოგვითხრობს ბიბლია (მესამე მეფეთა 14:25, 26).
23 ასევე, დახედე მეშას ქვას, რომლის ორიგინალის ნახვა შეიძლება პარიზში, ლუვრის მუზეუმში (საფრანგეთი). მეშას ქვის წარწერები მეტყველებენ ისრაელის წინააღმდეგ მოაბის მეფის, მეშას, ამბოხების შესახებ. ეს შემთხვევაც ჩაწერილია ბიბლიაში (მეოთხე მეფეთა 1:1; 3:4–27).
24 აქ, მარჯვნივ, მოჩანს იერუსალიმში არსებული სილოამის წყალსატევი და 533 მეტრი სიგრძის წყლის გვირაბის შესასვლელი. მრავალ თანამედროვე ტურისტს გაუვლია ამ გვირაბით. მისი არსებობა ბიბლიის ჭეშმარიტების დამატებითი მტკიცებაა. რატომ? იმიტომ რომ, ბიბლიაში მოცემული ახსნის თანახმად, მეფე იეხიზკიაჰუმ ეს გვირაბი 2 500-ზე მეტი წლის წინ ააშენა, რომ თავდამსხმელი ჯარებისაგან დაეცვა წყალსატევი (მეოთხე მეფეთა 20:20; მეორე ნეშტთა 32:2–4, 30).
25 ბრიტანეთის მუზეუმის დამთვალიერებლებს შეუძლიათ იხილონ ნაბონიდის მატიანე, რომლის გამოსახულებასაც ვხედავთ მარჯვნივ, ქვემოთ. ამ ქვაზე, ისევე როგორც ბიბლიაში, აღწერილია ბაბილონის დაცემა (დანიელი 5:30; 6:1). მაგრამ ბიბლია ამბობს, რომ ამ დროს ბაბილონის მეფე იყო ბელშაცარი, ხოლო ნაბონიდის მატიანე საერთოდ არ იხსენიებს ბელშაცარის სახელს. ყველა უძველესი ხელნაწერი, რომელიც ადრე იყო ცნობილი, მიუთითებდა, რომ ნაბონიდი იყო ბაბილონის უკანასკნელი მეფე. ამიტომ, ვისაც არ სწამდა ბიბლიის, ამტკიცებდა, რომ, თითქოს, ბელშაცარი არასოდეს არსებობდა და ბიბლია არასწორ ინფორმაციებს შეიცავს. მაგრამ ბოლო წლებში ნაპოვნი იყო უძველესი ხელნაწერები, რომლებშიც ნათქვამია, რომ იმ დროს ბაბილონში ბელშაცარს ეწოდებოდა ნაბონიდის ძე და თანამმართველი! დიახ, როგორც უამრავი მაგალითით მტკიცდება, ბიბლია ნამდვილად ჭეშმარიტია.
26. რომელი ფაქტები გვიჩვენებს, რომ ბიბლია ზუსტია მეცნიერული თვალსაზრისით?
26 ბიბლია არა მარტო ზუსტ ისტორიას შეიცავს, არამედ ყველაფერი, რაც მასშია მოცემული, სიმართლეა. ის საოცრად ზუსტია მაშინაც კი, როცა მეცნიერულ თემებს ეხება. აი, მხოლოდ ორი მაგალითი: უძველეს დროში სწამდათ, რომ დედამიწას ჰქონდა ხილული საყრდენი, თითქოს გიგანტზე იყო დავანებული. მაგრამ მეცნიერულ ფაქტებთან სრული თანხმობით ბიბლია გვამცნობს, რომ ღმერთმა „არაფერზე დაჰკიდა დედამიწა“ (იობი 26:7). ნაცვლად იმისა, რომ თქვას, დედამიწა ბრტყელია, როგორც ეს მრავალს სწამდა წინათ, ბიბლია ამბობს, რომ ღმერთს „უპყრიეს სიმრგულეa ქუჱყანისანი“ (ესაია 40:22, „ძველი აღთქმის ორტომეული“, 1884 წლის გამოცემა).
27. ა) რა არის ყველაზე ძლიერი მტკიცება, რომ ბიბლია ღმერთისგანაა? ბ) რა იწინასწარმეტყველა ებრაულმა წერილებმა ღმერთის ძის შესახებ?
27 ხოლო იმის უდიდესი მტკიცება, რომ ბიბლია ნამდვილად ღმერთისგანაა, არის მისი ზუსტი წინასწარმეტყველებები მომავლის შესახებ. ისტორიულ მოვლენებს, ვიდრე ისინი მოხდებოდეს, ადამიანის მიერ დაწერილი ვერც ერთი წიგნი ვერ აღწერს უშეცდომოდ; ბიბლია კი აკეთებს ამას. ის აღსავსეა ზუსტი წინასწარმეტყველებებით, დიახ, ნამდვილად წინასწარ დაწერილი ისტორიით. ზოგიერთი შესანიშნავი წინასწარმეტყველება დაკავშირებულია ღმერთის ძის დედამიწაზე მოსვლასთან. ებრაულმა წერილებმა ასეული წლებით ადრე ზუსტად იწინასწარმეტყველა, რომ აღთქმული დაიბადებოდა ბეთლემში, რომ მას შობდა ქალწული, გაიცემოდა 30 ვერცხლად, ჩაითვლებოდა ცოდვილად, მისი არც ერთი ძვალი არ გადატყდებოდა, მის სამოსელს წილისყრით გაინაწილებდნენ და სხვა მრავალი დაწვრილებითი ცნობა (მიქა 5:1; მათე 2:3–9; ესაია 7:14; მათე 1:22, 23; ზაქარია 11:12, 13; მათე 27:3–5; ესაია 53:12; ლუკა 22:37, 52; 23:32, 33; ფსალმუნი 33:21; იოანე 19:36; ფსალმუნი 21:19; მათე 27:35).
28. ა) რატომ შეიძლება ვიყოთ დარწმუნებული, რომ ის წინასწარმეტყველებებიც შესრულდება, რომლებიც მომავალს ეხება? ბ) რაში დავრწმუნდებით, თუ კვლავაც გავაგრძელებთ ბიბლიის შესწავლას?
28 როგორც ამ წიგნის პირველ თავში იყო ნათქვამი, ბიბლიამ ისიც იწინასწარმეტყველა, რომ დღევანდელი ძველი სისტემა მალე განადგურდება და შეიცვლება ახალი სამართლიანი სისტემით (მათე 24:3–14; 2 პეტრე 3:7, 13). შეგვიძლია თუ არა მივენდოთ ამ წინასწარმეტყველებას, რომელიც ჯერ კიდევ არ შესრულებულა? თუ ვინმემ ასჯერ გითხრა სიმართლე, ნუთუ მოულოდნელად ეჭვი შეგეპარებოდა, როცა რაიმე ახალს გეტყოდა? დაეჭვდებოდი მასში, თუ არასოდეს აღმოგიჩენია მის ნათქვამში სიცრუე? როგორი არაგონივრული იქნებოდა ეს! ასევე არაგონივრულია, თუ ეჭვი გვეპარება ღმერთის დანაპირებში. მის სიტყვას შეიძლება ვენდოთ! (ტიტე 1:2). ბიბლიის შესწავლის გაგრძელებით, ფაქტები უფრო მეტად დაგარწმუნებენ, რომ ბიბლია ნამდვილად ღმერთისგანაა.
[სქოლიოები]
a დევიდსონის „სიმფონიის“ (Concordance) და ვილსონის „ძველი აღთქმის სიტყვების გამოკვლევის“ (Old Testament Word Studies) თანახმად, ებრაული სიტყვა „ხუგ“ შეიძლება გადაითარგმნოს სიტყვით „სფერო“.
[სურათი 49-ე გვერდზე]
ღმერთმა ბიბლიის დასაწერად გამოიყენა ადამიანები, როგორც თანამდებობის პირი იყენებს მდივან-მემანქანეს, წერილის დასაწერად.
[სურათი 50-ე გვერდზე]
ზოგიერთი რელიგიური ბელადი მთელი ძალებით ცდილობდა, რომ ბიბლია ხელმისაწვდომი არ ყოფილიყო უბრალო ადამიანებისთვის. ისინი კოცონზეც კი წვავდნენ მათ, ვისაც ბიბლია ჰქონდა.
[სურათი 52, 53 გვერდებზე]
ესაიას წიგნის მკვდარი ზღვის ხელნაწერი.
[სურათები 54, 55 გვერდებზე]
კარნაკის ტაძრის კედელი (ეგვიპტე).
მეშას ქვა.
ნაბონიდის მატიანე.
იეხიზკიაჰუს გვირაბის შესასვლელი და სილოამის წყალსატევი.