ყველაფრის ‘აღდგინების ჟამი’ ახლოსაა!
იესოს ზეცაში ამაღლებამდე ცოტა ხნით ადრე, რამდენიმე ერთგულმა მოწაფემ ჰკითხა მას: „ამ ხანებში ხომ არ აღუდგენ, უფალო, ისრაელს სამეფოს?“. იესოს პასუხი გულისხმობდა, რომ გარკვეული დრო უნდა გასულიყო სამეფოს დაარსებამდე. ამ დროის განმავლობაში მის მიმდევრებს გრანდიოზული საქმიანობა უნდა შეესრულებინათ. მათ უნდა დაემოწმებინათ იესოს შესახებ „იერუსალიმში, მთელ იუდეასა და სამარიაში და ქვეყნის კიდემდე“ (საქმეები 1:6—8).
ეს დავალება ვერ შესრულდებოდა რამდენიმე დღის, კვირის ან თვის განმავლობაში. ამისდა მიუხედავად, მოწაფეები დაუყოვნებლივ შეუდგნენ ქადაგებას. მაგრამ მათ აღდგინების ჟამისადმი ინტერესი არ დაუკარგავთ. იერუსალიმში შეკრებილ ხალხთან ამის შესახებ საუბრისას, პეტრემ თქვა: «მოინანიეთ და მოიქეცით, რომ აღიხოცოს თქვენი ცოდვები. რათა დადგეს განახლების დღეები უფლის პირისაგან და მოგივლინოთ მან იესო ქრისტე, წინასწარ თქვენთვის განკუთვნილი, რომელიც ზეცამ უნდა მიიღოს, ვიდრე ყველაფერი აღდგებოდეს [„აღდგინების ჟამამდე“ სსგ], რასაც ღმერთი დასაბამიდან ამბობდა თავისი წმიდა წინასწარმეტყველების პირით» (საქმეები 3:19—21).
‘აღდგინების ჟამს’ უნდა მივეყვანეთ ‘განახლების დღეებამდე’, რომლებითაც იეჰოვა გვაკურთხებს. წინასწარმეტყველება აღდგენის შესახებ ორ ეტაპად შესრულდებოდა: პირველ რიგში ეს უნდა ყოფილიყო გამომაცოცხლებელი სულიერი განახლება, რომელიც ახლა მიმდინარეობს; მეორე მხრივ კი, ამას თან უნდა მოჰყვეს სამოთხის დაარსება დედამიწაზე.
აღდგენის ჟამი დაიწყო
როგორც მოციქულმა პეტრემ მიუთითა იერუსალიმში შეკრებილ ხალხს, იესო „ზეცაში იყო შეკავებული“ (აქ), რაც 1914 წლამდე გრძელდებოდა, ვიდრე იესო სამეფო ძალაუფლებას მიიღებდა და მმართველობას დაიწყებდა, როგორც ღვთის მიერ დანიშნული მეფე. პეტრემ იწინასწარმეტყველა, რომ იმ დროს იეჰოვა ‘მოავლენდა’ თავის ძეს იმ გაგებით, რომ იესოს ნებას მისცემდა, შეესრულებინა თავისი მოვალეობა, როგორც მთავარ ფიგურას ღვთის განზრახვებში. ბიბლია ამ მოვლენას სიმბოლური ენით აღწერს: „და შვა [ღვთის ზეციერმა ორგანიზაციამ] ძე, ვაჟი [ღვთის სამეფო იესო ქრისტეს მმართველობით], რომელმაც უნდა მწყემსოს ყველა ხალხი რკინის კვერთხით“ (გამოცხადება 12:5).
მაგრამ ერებს არ სურთ, დაემორჩილონ ქრისტეს მმართველობას. სინამდვილეში, ისინი გამოდიან მისი მიწიერი ქვეშევრდომების წინააღმდეგ, რომლებიც დღეს ცნობილი არიან, როგორც იეჰოვას მოწმეები. მოციქულების მსგავსად, მოწმეები მტკიცედ განაგრძობენ ‘იესოზე დამოწმებას’ (გამოცხადება 12:17). ამ ჭეშმარიტი ქრისტიანების საქმიანობისადმი წინააღმდეგობა ხან ერთ ქვეყანაში იჩენდა თავს, ხან — მეორეში. 1918 წელს ბრუკლინში (ნიუ-იორკი) საზოგადოება „საგუშაგო კოშკის“ მთავარი სამმართველოს პასუხისმგებელი წევრები სასამართლოს წინაშე ცრუ ბრალდებით წარადგინეს და უსამართლოდ, დიდი ხნით პატიმრობა მიუსაჯეს. გარკვეული ხნის მანძილზე ისე ჩანდა, რომ „ქვეყნის კიდემდე“ დამოწმების თანამედროვე საქმიანობამ მარცხი განიცადა (გამოცხადება 11:7—10).
მაგრამ 1919 წელს მთავარი სამმართველოს დაპატიმრებული წევრები გაათავისუფლეს და მოგვიანებით ყველა ცრუ ბრალდება მოუხსნეს. ისინი დაუყოვნებლივ შეუდგნენ სულიერი საქმიანობის აღდგენას. მას შემდეგ იეჰოვას ხალხის არნახული ზრდა დაიწყო.
ფართო მასშტაბიანი კამპანიის მიზანი იყო, რომ ყველა ეროვნების ადამიანებს ესწავლათ იმის შესრულება, რაც იესომ უბრძანა თავის მოწაფეებს (მათე 28:20). რა აღმაფრთოვანებელი იყო იმ ადამიანების ყურება, რომლებიც ერთ დროს სასტიკნი იყვნენ, მაგრამ შეიცვალეს თავიანთი თვალსაზრისი! მათ მოიცილეს ძველი პიროვნული თვისებები, მაგალითად, „მძვინვარება“, „გმობა“, „ბილწსიტყვაობა“ და შეიმოსნენ ახალ პიროვნებად, „რომელიც განახლებულია შემეცნებით მისი შემოქმედის ხატისამებრ“. სულიერი გაგებით დღეს უკვე სრულდება ესაიას წინასწარმეტყველის სიტყვები: „დადგება მგელი [ადამიანი, რომელიც მგლურ თვისებებს ავლენდა] ცხვართან [უწყინარ ადამიანთან] ერთად და ვეფხვი დაბინავდება ციკანთან ერთად. ხბო, ლომი და ნასუქალი პირუტყვი ერთად იქნებიან“ (კოლასელთა 3:8—10; ესაია 11:6, 9).
მომავალი აღდგინება ახლოსაა!
გარდა იმ აღდგინების, რომელიც დღესდღეობით სულიერ სამოთხეში მიმდინარეობს, ახლოვდება დრო, როცა ჩვენი პლანეტა სამოთხედ გადაიქცევა. დედამიწის პატარა ნაწილი სამოთხე იყო, როდესაც იეჰოვამ ჩვენი წინაპრები, ადამი და ევა, დაასახლა ედემის ბაღში (დაბადება 1:29—31). ამიტომ ვამბობთ, რომ სამოთხე უნდა აღდგეს; თუმცა, სანამ ეს მოხდება, დედამიწაზე უნდა მოისპოს ღვთის შეურაცხმყოფელი ცრუ რელიგია — მსოფლიოს პოლიტიკური ელემენტები იზრუნებენ ამაზე (გამოცხადება 17:15—18). ამის შემდგომ პოლიტიკური და კომერციული სისტემები, თავიანთ მხარდამჭერებთან ერთად, განადგურდებიან. საბოლოოდ, სატანა ეშმაკი და მისი დემონები დატყვევებული იქნებიან ათასი წლით — განახლების პერიოდის მანძილზე. ამ დროის მანძილზე კი „მოილხენს უდაბნო და ხრიოკი, გაიხარებს ტრამალი და შროშანივით აყვავდება“ (ესაია 35:1). მთელი დედამიწა გათავისუფლდება ყოველგვარი უწესრიგობისგან (ესაია 14:7). მილიონობით მკვდარი აღდგება დედამიწაზე საცხოვრებლად. გამომსყიდველური მსხვერპლისგან ყველა მიიღებს სარგებლობას (გამოცხადება 20:12—15; 22:1, 2). დედამიწაზე აღარავინ იქნება უსინათლო, სმენადახშული ან ხეიბარი. „არ იტყვის მცხოვრები: ავად ვარო“ (ესაია 33:24). სულ მალე მას შემდეგ, რაც ქრისტეს ათასწლიანი მმართველობა დასრულდება, ეშმაკი და მისი დემონები მცირე ხნით გათავისუფლებული იქნებიან და იხილავენ, როგორ შესრულდა ღვთის განზრახვა დედამიწასთან დაკავშირებით. საბოლოოდ კი ისინი სამუდამოდ განადგურდებიან (გამოცხადება 20:1—3).
აღდგინების ათასწლიანი პერიოდის დასასრულს ‘ყოველი სულდგმული’ განადიდებს იეჰოვას, და ეს ასე გაგრძელდება მარადიულად (ფსალმუნი 150:6). იქნები მათ შორის შენც? ეს შესაძლებელია.