„თქვენ ნამდვილად შეესაბამებით ღვთის მოთხოვნებს“
„უფლის გულისათვის“ ხელისუფლებასთან თანამშრომლობით ქრისტიანები, როგორც ‘კეთილის მოქმედნი’, ქებას იმსახურებენ (1 პეტრე 2:13–15). ასეთი ქება ახლახანს სამხრეთ აფრიკელმა იეჰოვას მოწმეებმაც დაიმსახურეს საოლქო კონგრესზე, რომელიც კოლეჯის ტერიტორიაზე არსებულ დარბაზში ჩატარდა.
კონგრესის პირველ დღეს კოლეჯის პოლიცია დაძაბული იყო, რადგან იცოდა, რომ სხვა სახის შეკრებებზე განრისხებული დელეგატები წესრიგს არღვევდნენ. რადგანაც არასდროს ჰქონიათ საქმე იეჰოვას მოწმეებთან, მათ გაოცება ელოდათ.
ჩვეულებრივ, უშიშროების მიზნით პოლიცია ჭიშკარში აჩერებდა და ჩხრეკდა ყველა შემავალ და გამომავალ მანქანას. ისინი გაოცებული იყვნენ, რადგან მათ მეგობრულად ესალმებოდნენ, მოთმინებით და პატივისცემით ეპყრობოდნენ, მიუხედავად იმისა, რომ ჩხრეკა აფერხებდა დელეგატებს. ადგილი არ ჰქონია არავითარ შეწინააღმდეგებას, შეკამათებას ან ლანძღვას, რაც ხშირად ხდება ხოლმე სხვებში. პოლიციის ერთმა თანამშრომელმა აღნიშნა: „სხვებისგან განსხვავებით თქვენ თავმდაბლობასა და კეთილშობილებას ავლენთ, რასაც ყველა კარგად ვამჩნევთ“.
როდესაც პოლიციის უფროსი მიხვდა, რომ იეჰოვას მოწმეებს თანამშრომლობის სული ჰქონდათ, შეწყვიტა მათი მანქანების ჩხრეკა, „რადგან, — როგორც მან თქვა, — თქვენ წესრიგის მოყვარული ადამიანები ხართ“. ასე რომ, მანქანებს, რომელთაც ეწერათ „ JW“ (იეჰოვას მოწმეები), გაჩხრეკის გარეშე უშვებდნენ.
კონგრესის ბოლოს პოლიციის უფროსმა გამოთქვა იმედი, რომ იეჰოვას მოწმეები კვლავ ჩაატარებდნენ იქ კონგრესს. „არასოდეს გვინახავს ასეთი კარგი ყოფაქცევის ხალხი, — აღნიშნა მან, — თქვენ ნამდვილად შეესაბამებით ღვთის მოთხოვნებს“. ასეთი ქება დამატებითი სტიმულია ჭეშმარიტი ქრისტიანებისთვის, რომ ‘კარგად მოიქცნენ’, რათა სხვებმა ‘დაინახონ მათი კეთილი საქმეები და ადიდონ ღმერთი’ (1 პეტრე 2:12).