რას გამოააშკარავებს იეჰოვას დღე?

„იეჰოვას დღე ქურდივით მოვა . . . დედამიწა და მისი საქმეები კი გამოაშკარავდება“ (2 პეტ. 3:10).

1, 2. ა) როგორ განადგურდება დღევანდელი ბოროტი ქვეყნიერება? ბ) რა კითხვებს გაეცემა პასუხი ამ სტატიაში?

დღევანდელი ბოროტი ქვეყნიერება ერთ დიდ ტყუილს ეფუძნება, კერძოდ იმას, რომ ადამიანი ღვთის დახმარების გარეშეც წარმატებით მართავს მსოფლიოს (ფსალმ. 2:2, 3). შეიძლება მარადიულად იარსებოს იმან, რასაც საფუძვლად სიცრუე უდევს? ნამდვილად არა! თუმცა ჩვენ იმის ლოდინი არ მოგვიწევს, თავისით როდის განადგურდება სატანის ქვეყნიერება, რადგან გვჯერა, რომ ამ ქვეყნიერებას ღმერთი გაანადგურებს დანიშნულ დროს ზუსტად ისე, როგორც მან განიზრახა. ბოროტ ქვეყნიერებაზე განაჩენის აღსრულებისას სრულყოფილად წარმოჩნდება ღვთის სამართლიანობა და სიყვარული (ფსალმ. 92:7; იგავ. 2:21, 22).

² მოციქულმა პეტრემ დაწერა: „იეჰოვას დღე ქურდივით მოვა. მაშინ ცა გრგვინვით სწრაფად გადაივლის, ხოლო შემადგენელი ნაწილები სიმხურვალისგან დაიშლება, დედამიწა და მისი საქმეები კი გამოაშკარავდება“ (2 პეტ. 3:10). რა იგულისხმება „ცაში“ და რა — „დედამიწაში“? რა „შემადგენელი ნაწილები“ დაიშლება? რა ჰქონდა პეტრეს მხედველობაში, როცა თქვა, რომ დედამიწა და მისი საქმეები გამოაშკარავდებოდა? ამ კითხვებზე პასუხები დაგვეხმარება, მომზადებულები შევხვდეთ იმ შიშის მომგვრელ მოვლენებს, რომლის მომსწრენიც უახლოეს მომავალში გავხდებით.

ცა და დედამიწა, რომელიც გადაივლის

3. რა იგულისხმება 2 პეტრეს 3:10-ში მოხსენიებულ „ცაში“ და როგორ გადაივლის ის?

³ ბიბლიაში „ცას“ ზოგჯერ სიმბოლური მნიშვნელობა აქვს და მასში ხშირად იგულისხმება მმართველი ძალები, რომლებიც თავიანთ ქვეშევრდომებზე არიან აღზევებულნი (ეს. 14:13, 14; გამოცხ. 21:1, 2). ‘ცით, რომელიც გადაივლის’, წარმოდგენილია ადამიანთა მთავრობები, რომლებიც უღვთო საზოგადოებაზე მმართველობენ, ხოლო ცის გრგვინვით გადავლა შესაძლოა მის მყისიერ განადგურებას ნიშნავს.

4. რა არის წარმოდგენილი „დედამიწით“ და როგორ განადგურდება ის?

⁴ „დედამიწით“ წარმოდგენილია ღვთისგან გაუცხოებული ადამიანები. ასეთი ადამიანები ნოეს დროსაც ცხოვრობდნენ და ღვთის ნებით წარღვნით განადგურდნენ. „ახლანდელი ცა და დედამიწა კი იმავე სიტყვით ცეცხლისთვის არის გამზადებული და შემონახული უღვთოთა გასამართლებისა და დაღუპვის დღისთვის“ (2 პეტ. 3:7). წარღვნის დროს უღვთოები ერთდროულად მოისპნენ, ხოლო „დიდი გასაჭირის“ დროს დღევანდელი ქვეყნიერება ეტაპობრივად განადგურდება (გამოცხ. 7:14). დიდი გასაჭირის პირველ ეტაპზე ღმერთი აღძრავს მსოფლიოს პოლიტიკურ მმართველებს, გაანადგურონ „დიდი ბაბილონი“, რაც იმის მაჩვენებელი იქნება, რომ ეს რელიგიური მეძავი საძულველია ღვთისთვის (გამოცხ. 17:5, 16; 18:8). შემდეგ, დიდი გასაჭირის ბოლო ეტაპზე, არმაგედონში, უკვე იეჰოვა მოსპობს სატანის დარჩენილ ქვეყნიერებას (გამოცხ. 16:14, 16; 19:19—21).

„შემადგენელი ნაწილები . . . დაიშლება“

5. რა იგულისხმება „შემადგენელ ნაწილებში“?

⁵ რა იგულისხმება „შემადგენელ ნაწილებში“, რომლებიც დაიშლება? ერთი ბიბლიური ლექსიკონის თანახმად, „შემადგენელი ნაწილები“ განიმარტება როგორც „საწყისები“ ან „საფუძვლები“. მასში ნათქვამია, რომ სიტყვათა ეს შეთანხმება გამოიყენებოდა ანბანთან მიმართებით. ვინაიდან ანბანი ენის საფუძველია, პეტრეს მიერ მოხსენიებულ „შემადგენელ ნაწილებში“ იგულისხმება ის ძირითადი ნაწილები, რისგანაც ეს ქვეყნიერება შედგება — უღვთოთათვის დამახასიათებელი თვისებები, შეხედულებები, ცხოვრების წესი და მიზნები. მასში აგრეთვე შედის „ქვეყნიერების სული“, რომელიც „ურჩობის ძეებში მოქმედებს“ (1 კორ. 2:12; წაიკითხეთ ეფესოელების 2:1—3). სატანის ქვეყნიერება გაჟღენთილია ამ სულით ანუ „ჰაერით“. ეს სული ადამიანებზე გავლენას ახდენს და მათი აზროვნება, საუბარი, გეგმები თუ საქციელი ირეკლავს ამაყი და მოჯანყე „ჰაერის ძალაუფლების მთავრის“, სატანის აზროვნებას.

6. როგორ მოქმედებს ქვეყნიერების სული ადამიანებზე?

⁶ ქვეყნიერების სულით მოწამლული ადამიანები, ნებსით თუ უნებლიეთ, სატანას უფლებას აძლევენ, მათ გულსა და გონებაზე იმოქმედოს; ეს კი მათ აზროვნებასა და შეხედულებებზე აისახება. ისინი იმას აკეთებენ, რაც მოესურვებათ და არაფრად აგდებენ ღვთის მცნებებს. მათი ქცევები იმაზე მეტყველებს, რომ ამაყები, ეგოისტები, ხელისუფლებისადმი დაუმორჩილებლები და ‘ხორცისა და თვალთა სურვილს’ აყოლილნი არიან (წაიკითხეთ 1 იოანეს 2:15—17 ).a

7. რატომ უნდა გავუფრთხილდეთ გულს?

⁷ ზემოთქმულიდან გამომდინარე, ძალიან მნიშვნელოვანია, რომ გულს გავუფრთხილდეთ და ღვთიური სიბრძნით ვიხელმძღვანელოთ, როცა მეგობრებს, საკითხავ მასალასა და გართობას ვირჩევთ ან ინტერნეტის ვებ-გვერდებს ვსტუმრობთ (იგავ. 4:23). მოციქულმა პავლემ დაწერა: „ფრთხილად იყავით: შეიძლება ვინმემ გაგიტაცოთ ფილოსოფიითა და ფუჭი ცდუნებით, რომლებიც ეთანხმება ადამიანთა ადათ-წესებსა და ქვეყნიერების პრინციპებს და არა ქრისტეს“ (კოლ. 2:8). ეს გაფრთხილება განსაკუთრებით დღეს არის ყურადსაღები, რადგან იეჰოვას დღე ახლოვდება და მისი ჯერ არნახული სიმხურვალე სატანის ქვეყნიერების ყველა „შემადგენელ ნაწილს“ დაადნობს. ამ დროს გამოაშკარავდება, რომ ეს „შემადგენელი ნაწილები“ საერთოდ არ ყოფილა ცეცხლგამძლე. შესაძლოა გახსენდებათ მალაქიას 4:1-ში ჩაწერილი სიტყვები: „მოდის ღუმელივით გავარვარებული დღე და ყველა კადნიერი და ბოროტმოქმედი ნამჯასავით იქნება. შთანთქავს მათ ეს მომავალი დღე“.

„დედამიწა და მისი საქმეები გამოაშკარავდება“

8. როგორ გამოაშკარავდება დედამიწა და მისი საქმეები?

⁸ რას გულისხმობდა პეტრე სიტყვებში „დედამიწა და მისი საქმეები კი გამოაშკარავდება“? იმას, რომ დიდი გასაჭირის დროს იეჰოვა სააშკარაოზე გამოიტანს სატანის ქვეყნიერების საქმეებს. ამ დროს, ცხადი გახდება, რომ ეს ქვეყნიერება იეჰოვასა და მის სამეფოს მტრობდა და ამიტომ იმსახურებს განადგურებას. ესაიას 26:21-ში ამ დროზე ნაწინასწარმეტყველებია: „იეჰოვა მოდის თავისი ადგილიდან, რომ პასუხი მოჰკითხოს ქვეყნის მკვიდრს მის წინააღმდეგ ჩადენილი დანაშაულისთვის. ქვეყანა გამოაჩენს სისხლის ღვრას და მეტად აღარ დაფარავს თავის დახოცილებს“.

9. ა) რაზე უნდა ვთქვათ უარი და რატომ? ბ) რა უნდა განვივითაროთ და რატომ?

⁹ იეჰოვას დღეს ისინი, ვინც ქვეყნიერებამ და მისმა სულმა თავის ყალიბში მოაქცია, თავიანთ ნამდვილ სახეს გამოაჩენენ და ერთმანეთსაც კი დახოცავენ. დღეს ბევრი ერთობა ძალადობის შემცველი პოპულარული გართობებით. მათი გონება, ასე ვთქვათ, დღესვე ემზადება იმ დროისთვის, როცა თითოეულის „ხელი თავისი მოძმის ხელის წინააღმდეგ აღიმართება“ (ზაქ. 14:13). მაშ, რამდენად მნიშვნელოვანია, უარი ვთქვათ კინოფილმებზე, წიგნებზე, ვიდეოთამაშებსა და იმ ყველაფერზე, რაც ღვთისთვის საძულველ თვისებებს განგვივითარებს, მაგალითად, სიამაყესა და ძალადობის სიყვარულს (2 სამ. 22:28; ფსალმ. 11:5). მოდი, განვივითაროთ ღვთის წმინდა სულის ნაყოფი, რადგან ეს თვისებები იეჰოვას დღეს ცეცხლგამძლე აღმოჩნდება (გალ. 5:22, 23).

„ახალი ცა და ახალი დედამიწა“

10, 11. რა არის „ახალი ცა“ და „ახალი დედამიწა“?

¹⁰ წაიკითხეთ 2 პეტრეს 3:13. „ახალი ცა“ არის ღვთის ზეციერი სამეფო, რომელიც 1914 წელს დამყარდა, ანუ იმ დროს, როცა „უცხოტომელთათვის დანიშნული დროები“ დასრულდა (ლუკ. 21:24). ამ ხელისუფლების სათავეში დგას ქრისტე იესო და მასთან ერთად მმართველობს 144 000, რომელთა უმეტესობამ ზეციერი ჯილდო უკვე მიიღო. წიგნ „გამოცხადებაში“ ეს რჩეული მმართველები წარმოდგენილი არიან როგორც „წმინდა ქალაქი, ახალი იერუსალიმი, ზეციდან, ღვთისგან ჩამომავალი და გამზადებული, როგორც ქმრისთვის მორთული პატარძალი“ (გამოცხ. 21:1, 2, 22—24). მიწიერი იერუსალიმი ძველი ისრაელის სატახტო ქალაქი იყო, ახალი იერუსალიმი და მისი პატარძალი კი ახალი ქვეყნიერების ხელისუფლებას წარმოადგენს. ეს ზეციერი ქალაქი ‘ზეციდან ჩამოვა’, რაც იმას ნიშნავს, რომ ის ზეციდან დედამიწაზე იმმართველებს.

¹¹ „ახალი დედამიწა“ არის ადამიანთა ახალი საზოგადოება, რომელიც დედამიწაზე იცხოვრებს. ისინი ღვთის სამეფოს მორჩილი ქვეშევრდომები იქნებიან. სულიერი სამოთხე, რომლითაც დღეს უკვე ხარობს ღვთის ხალხი, ბოლოს და ბოლოს მთელ „მომავალ ქვეყნიერებაში“ გავრცელდება (ებრ. 2:5). ჩვენ როგორ შეგვიძლია გავხდეთ ამ ახალი ქვეყნიერების მოქალაქენი?

მოემზადეთ იეჰოვას დიდი დღისთვის

12. რატომ იქნება ქვეყნიერებისთვის იეჰოვას დიდი დღე თავზარდამცემი?

¹² პავლე და პეტრე მოციქულებმა იწინასწარმეტყველეს, რომ იეჰოვას დღე ისე მოვიდოდა, როგორც ქურდი — ჩუმად და მოულოდნელად (წაიკითხეთ 1 თესალონიკელების 5:1, 2). ეს იმდენად მოულოდნელად მოხდება, რომ ჭეშმარიტი ქრისტიანებიც კი, რომლებიც იეჰოვას დღის მოლოდინით ცხოვრობენ, გაკვირვებულები დარჩებიან (მათ. 24:44). მაგრამ ქვეყნიერებისთვის ეს გაკვირვებაზე მეტი იქნება. მოციქულმა პავლემ დაწერა: „როცა ილაპარაკებენ [იეჰოვასგან გაუცხოებული ადამიანები], მშვიდობა და უსაფრთხოებაო, მაშინ დაატყდებათ თავს მოულოდნელი განადგურება, როგორც ორსულ ქალს — მშობიარობის ტკივილები, და თავს ვერ დააღწევენ“ (1 თეს. 5:3).

13. რა უნდა გავაკეთოთ, რომ სატანის ტყუილს არ წამოვეგოთ?

¹³ „მშვიდობისა და უსაფრთხოების“ ძახილი სატანის მორიგი ტყუილი იქნება, თუმცა იეჰოვას მსახურები ამ ტყუილს არ წამოეგებიან. „სიბნელეში არა ხართ, რომ იმ დღემ მოგისწროთ, როგორც ქურდებს, რადგან თქვენ სინათლის ძეები და დღის ძეები ხართ“, — დაწერა პავლემ (1 თეს. 5:4, 5). ასე რომ, მოდი კვლავაც სინათლეში ვიაროთ, რათა არ აღმოვჩნდეთ სატანის ქვეყნიერების სიბნელეში. პეტრე წერდა: „საყვარელნო, რაკი ეს წინასწარ იცით, გაფრთხილდით, რომ თქვენც მათსავით [ქრისტიანულ კრებაში ცრუ მასწავლებლებივით] არ აგიყოლიოთ კანონის უგულებელმყოფელთა მცდარმა აზროვნებამ და არ დაკარგოთ სიმტკიცე“ (2 პეტ. 3:17).

14, 15. ა) რის ღირსად ჩაგვთვალა იეჰოვამ? ბ) რომელი ღვთივშთაგონებული სიტყვები უნდა ჩავიბეჭდოთ გულში?

¹⁴ დაუკვირდით, იეჰოვამ მხოლოდ ის კი არ გვითხრა, რომ ფრთხილად ვყოფილიყავით, არამედ იმის ღირსად ჩაგვთვალა, წინასწარ გვცოდნოდა ის ძირითადი მოვლენები, რაც მომავალში უნდა განვითარებულიყო.

¹⁵ სამწუხაროდ, ზოგი არაფრად აგდებს, ან უფრო უარესი, ცინიკურად უყურებს სულიერ სიფხიზლესთან დაკავშირებულ ღვთის შეხსენებებს. ისინი შეიძლება ამბობენ, რომ ეს გაფრთხილება ათეულობით წელია ესმით. მაგრამ მათ უნდა იცოდნენ, რომ ასეთი აზროვნებით სინამდვილეში ეჭვქვეშ აყენებენ არა მხოლოდ გონიერი მონის, არამედ იეჰოვასა და იესოს გაფრთხილებებს. იეჰოვა გვეუბნება: „დაელოდე“! (აბაკ. 2:3). იესომაც გვითხრა: „იფხიზლეთ, რადგან არ იცით, რომელ დღეს მოვა თქვენი უფალი“ (მათ. 24:42). გარდა ამისა, პეტრე წერდა: „მაშ, როგორები უნდა იყოთ წმინდა საქციელსა და ღვთისადმი ერთგულებაში თქვენ, ვინც ელით და ყოველთვის გახსოვთ ის დრო, როცა დადგება იეჰოვას დღე!“ (2 პეტ. 3:11, 12). ხელმძღვანელი საბჭო და მთლიანობაში გონიერი მონა ამ სიტყვებს არასერიოზულად არასდროს მოეკიდება!

16. როგორი აზროვნება არ უნდა განგვივითარდეს და რატომ?

¹⁶ სინამდვილეში, „ბოროტი მონა“ ფიქრობს, რომ ბატონი აყოვნებს (მათ. 24:48). ეს ბოროტი მონა ერთ-ერთი დამცინავთაგანია, ვისზეც 2 პეტრეს 3:3, 4-შია საუბარი. პეტრემ დაწერა: „ბოლო დღეებში მოვლენ დამცინავები, . . . [რომლებიც] თავიანთი სურვილებისამებრ მოიქცევიან“ და დაცინვას დაუწყებენ მათ, ვისაც ახსოვს და მორჩილად ელოდება იეჰოვას დღეს. ნაცვლად იმისა, რომ მთელი ყურადღება სამეფოს ინტერესებზე გადაიტანონ, ეს დამცინავები მხოლოდ საკუთარი ეგოისტური სურვილების დაკმაყოფილებაზე ფიქრობენ. მოდი, ნუ გავხდებით დაუმორჩილებლები და ნუ განვივითარებთ ასეთ საშიშ აზროვნებას! პირიქით, ‘უფლის მოთმინება ხსნად მივიჩნიოთ’ და დავკავდეთ სამეფოს შესახებ ცნობის ქადაგებითა და მოწაფეების მომზადებით; ზედმეტად არ ვიფიქროთ იმაზე, თუ როდის მოხდება ესა თუ ის მოვლენა, რადგან ეს მხოლოდ იეჰოვა ღმერთის საქმეა (2 პეტ. 3:15; წაიკითხეთ საქმეების 1:6, 7 ).

მიენდეთ ხსნის ღმერთს

17. როგორ და რატომ გამოეხმაურნენ ერთგული ქრისტიანები იესოს რჩევას, გაქცეულიყვნენ იერუსალიმიდან?

¹⁷ მას შემდეგ, რაც ახ. წ. 66 წელს რომის ჯარი იუდეაში შეიჭრა, ერთგულმა ქრისტიანებმა ყურად იღეს იესოს გაფრთხილება და პირველივე შესაძლებლობისთანავე იერუსალიმიდან გაიქცნენ (ლუკ. 21:20—23). რატომ იმოქმედეს მათ ასე სწრაფად და გადაუდებლად? უეჭველია, ერთგულ ქრისტიანებს ახსოვდათ იესოს გაფრთხილება. მათ იესოსგან კარგად იცოდნენ, რომ ქალაქიდან გაქცევას სირთულეები მოჰყვებოდა; მაგრამ ისიც იცოდნენ, რომ იეჰოვა არასდროს მიატოვებდა თავის ერთგულ მსახურებს (ფსალმ. 55:22).

18. როგორ მოქმედებს ლუკას 21:25—28-ში ჩაწერილი იესოს სიტყვები თქვენს შეხედულებაზე დიდ გასაჭირთან დაკავშირებით?

¹⁸ ჩვენც ბოლომდე უნდა მივენდოთ იეჰოვას, რადგან მხოლოდ ის გვიხსნის, როცა ეს ქვეყნიერება არნახული გასაჭირის მომსწრე გახდება. დიდი გასაჭირის დაწყებიდან რომელიღაც მონაკვეთში, სანამ იეჰოვა სისრულეში მოიყვანს თავის განაჩენს დარჩენილ ქვეყნიერებაზე, „ხალხს გული წაუვა შიშით და იმის მოლოდინით, რა დაატყდება თავს მსოფლიოს“. მაგრამ იმ დროს, როცა ღვთის მტრები შიშისგან იკანკალებენ, იეჰოვას ერთგული მსახურები უშიშრად იქნებიან. უფრო მეტიც, ისინი გაიხარებენ, რადგან ეცოდინებათ, რომ მათი ხსნა ახლოვდება (წაიკითხეთ ლუკას 21:25—28).

19. რას განვიხილავთ მომდევნო სტატიაში?

¹⁹ მართლაც, არაჩვეულებრივი მომავალი ელით მათ, ვინც გამოყოფილია ქვეყნიერებისგან და მისი „შემადგენელი ნაწილებისგან“! შემდეგი სტატიიდან გავიგებთ, რომ მარადიული სიცოცხლის მისაღებად უფრო მეტია საჭირო, ვიდრე ცუდი საქმეებისგან თავის შეკავება, კერძოდ, ჩვენ იეჰოვას სასურველი თვისებები უნდა განვივითაროთ და მისი მოსაწონი საქმეები ვაკეთოთ (2 პეტ. 3:11).

[სქოლიო]

„როგორები უნდა იყოთ!“

„თუ ყველაფერი ასე დაიშლება, მაშ, როგორები უნდა იყოთ წმინდა საქციელსა და ღვთისადმი ერთგულებაში!“ (2 პეტ. 3:11).

1. რატომ იყო დროული პეტრეს მეორე წერილი პირველი საუკუნის ქრისტიანებისთვის?

მოციქულმა პეტრემ, როცა მეორე წერილი დაწერა, ქრისტიანულ კრებას მრავალი წინააღმდეგობა და დევნა ჰქონდა გადატანილი. მაგრამ დევნამ ვერც ქრისტიანების ენთუზიაზმი ჩააცხრო და ვერც მათი რიცხობრივი ზრდა შეაჩერა. ამიტომ ეშმაკმა სხვა ტაქტიკას მიმართა, რომელიც მანამდეც არაერთხელ გამოუყენებია წარმატებით. პეტრეს თქმით, სატანა ცდილობდა ღვთის ხალხის გარყვნას ცრუ მასწავლებლებით, რომლებსაც ‘თვალები მრუშობით ჰქონდათ სავსე, გული კი სიხარბეში ჰქონდათ გაწაფული’ (2 პეტ. 2:1—3, 14; იუდ. 4). ამიტომ პეტრე მეორე წერილში გულითადად მოუწოდებს ქრისტიანებს ერთგულების შენარჩუნებისკენ.

2. რაზე ამახვილებს ყურადღებას პეტრეს მეორე წერილის მე-3 თავი და რა კითხვები უნდა დავუსვათ საკუთარ თავს?

² პეტრემ დაწერა: „მე სწორად მიმაჩნია, შეხსენებებით გამოგაფხიზლოთ, სანამ ამ კარავში ვიმყოფები, რადგან ვიცი, რომ ჩემს კარავს მალე დავტოვებ . . . ასე რომ, ყოველთვის ყველაფერს გავაკეთებ, რათა ჩემი წასვლის შემდეგ თავად შეძლოთ ამის გახსენება“ (2 პეტ. 1:13—15). პეტრემ იცოდა, რომ მალე მოკვდებოდა და სურდა, ქრისტიანებს მისი დროული შეხსენებები ხსომებოდათ. ეს ასეც მოხდა, პეტრეს წერილი ბიბლიის ნაწილად იქცა და მისი წაკითხვა დღეს ყველას შეუძლია. პეტრეს მეორე წერილის მე-3 თავი ჩვენთვის განსაკუთრებით მნიშვნელოვანია, რადგან ის ყურადღებას ამახვილებს ქვეყნიერების „ბოლო დღეებზე“ და ფიგურალური ცისა და დედამიწის განადგურებაზე (2 პეტ. 3:3, 7, 10). რა რჩევას გვაძლევს პეტრე? როგორ დაგვეხმარება მისი რჩევა, გავხდეთ იეჰოვას მოსაწონები?

3, 4. ა) რისკენ მოუწოდა პეტრემ ქრისტიანებს და რა გაფრთხილება მისცა? ბ) რომელ სამ საკითხს განიხილავს ეს სტატია?

³ მას შემდეგ, რაც პეტრემ სატანის ქვეყნიერების დაშლაზე ილაპარაკა, დაწერა: „მაშ, როგორები უნდა იყოთ წმინდა საქციელსა და ღვთისადმი ერთგულებაში!“ (2 პეტ. 3:11, 12). ცხადია, პეტრეს ეს ნათქვამი მოწოდება იყო და არა კითხვა. პეტრემ იცოდა, რომ „ღვთის შურისძიების დღეს“ მხოლოდ ისინი გადარჩებოდნენ, ვინც იეჰოვას ნებას ასრულებდა და ღვთიურ თვისებებს ავლენდა (ეს. 61:2). ამიტომ მან დასძინა: „საყვარელნო, რაკი ეს წინასწარ იცით, გაფრთხილდით, რომ თქვენც მათსავით [ცრუმასწავლებლებივით] არ აგიყოლიოთ კანონის უგულებელმყოფელთა მცდარმა აზროვნებამ და არ დაკარგოთ სიმტკიცე“ (2 პეტ. 3:17).

⁴ პეტრე ერთ-ერთი იყო, ვინც ‘წინასწარ იცოდა’, რომ ბოლო დღეებში ქრისტიანებს განსაკუთრებით უნდა ეფხიზლათ ერთგულების შესანარჩუნებლად. მოგვიანებით იოანე მოციქულმა ამის მიზეზი გასაგებად ახსნა. მან ხილვაში ნახა ზეციდან გადმოგდებული სატანა, რომელიც „დიდად განრისხებული“ იყო მათზე, „ვინც იცავს ღვთის მცნებებს და ვისაც იესოს შესახებ დამოწმების საქმე აკისრია“ (გამოცხ. 12:9, 12, 17). ღვთის ერთგულ ცხებულ მსახურებსა და მათ თანამსახურ „სხვა ცხვარს“ სატანა უმწიკვლობას ვერ დააკარგვინებს (იოან. 10:16). მაგრამ რისი თქმა შეგვიძლია საკუთარ თავზე? ბოლომდე შევინარჩუნებთ ერთგულებას? შევინარჩუნებთ თუ: 1) გამოვიმუშავებთ ღვთიურ თვისებებს, 2) დავრჩებით ზნეობრივად და სულიერად უმწიკვლოები და უმანკოები, და 3) დადებითი განწყობით შევხვდებით განსაცდელებს. ამ საკითხებზე შემდეგ აბზაცებში იქნება საუბარი.

გამოვიმუშავოთ ღვთიური თვისებები

5, 6. რა თვისებები უნდა გამოვიმუშავოთ და რატომ უნდა მოვახმაროთ ამას „ყოველი ღონე“?

⁵ მეორე წერილის დასაწყისში პეტრე წერს: „თქვენი მხრივ, ყოველი ღონე იხმარეთ, რომ რწმენას დაურთოთ ზნეობა, ზნეობას — ცოდნა, ცოდნას — თავშეკავება, თავშეკავებას — მოთმინება, მოთმინებას — ღვთისადმი ერთგულება, ღვთისადმი ერთგულებას — ძმათმოყვარეობა, ძმათმოყვარეობას კი — სიყვარული. თუ ეს ყველაფერი გაქვთ და თანაც უხვად, აღარ იქნებით უმოქმედო ან უნაყოფო ჩვენი უფლის იესო ქრისტეს შესახებ საფუძვლიან ცოდნაში“ (2 პეტ. 1:5—8).

⁶ ჩვენ „ყოველი ღონე“ უნდა მოვახმაროთ ისეთი საქმეების კეთებას, რაც ღვთისმოსაწონი თვისებების გამომუშავებაში დაგვეხმარება. მაგალითად, ძალისხმევა სჭირდება კრების ყველა შეხვედრაზე დასწრებას, ბიბლიის ყოველდღე კითხვასა და კარგ პირად შესწავლას. აგრეთვე დიდი მონდომება და კარგი დაგეგმვაა საჭირო ოჯახთან ერთად თაყვანისცემის საღამო რეგულარული, სასიამოვნო და საინტერესო რომ იყოს. თუ გეგმას მივყვებით, კარგი საქმეების კეთება ჩვევად გვექცევა და მათი შესრულება უფრო გაგვიადვილდება, განსაკუთრებით მაშინ, როცა მის სასიკეთო შედეგებს დავინახავთ.

7, 8. ა) რა აღნიშნა ზოგმა ოჯახური თაყვანისცემის შესახებ? ბ) თქვენ რისი თქმა შეგიძლიათ?

⁷ ოჯახთან ერთად თაყვანისცემის საღამოს შესახებ ერთმა დამ დაწერა: „ოჯახური თაყვანისცემა უამრავ თემაზე მსჯელობის შესაძლებლობას გვაძლევს“. სხვა და ამბობს: „გულწრფელად რომ გითხრათ, გული დამწყდა წიგნის შესწავლა რომ გაუქმდა, რადგან ყველაზე მეტად ეს შეხვედრა მიყვარდა. მაგრამ ახლა, როცა ოჯახთან ერთად თაყვანისცემის საღამო გვაქვს, ვხვდები, რომ იეჰოვამ იცის, როდის რა გვჭირდება“. ერთი ოჯახისთავი ამბობს: „ვერ წარმოიდგენთ, როგორ გვეხმარება ოჯახური თაყვანისცემა. ამ შეხვედრაზე მე და ჩემს ცოლს შეგვიძლია ის საკითხები განვიხილოთ, რაც ჩვენს ოჯახს სჭირდება. ორივე ვგრძნობთ, რომ წმინდა სულის ნაყოფს უფრო მეტად ვავლენთ და მსახურებაც უფრო მეტ სიხარულს გვგვრის“. ერთი მამა ამბობს: „ბავშვები დამოუკიდებლად იკვლევენ სხვადასხვა საკითხებს და ბევრს სწავლობენ; ისინი ამას დიდი სიხარულით აკეთებენ. ოჯახურმა თაყვანისცემამ კიდევ ერთხელ დაგვარწმუნა, რომ იეჰოვამ იცის, რა გვჭირდება და, რომ ის პასუხობს ჩვენს ლოცვებს“. თქვენც იმავეს ფიქრობთ ოჯახთან ერთად თაყვანისცემის საღამოზე?

⁸ ეცადეთ, უმნიშვნელო საქმეებმა ხელი არ შეგიშალოთ ოჯახური თაყვანისცემის ჩატარებაში. ერთი ცოლ-ქმარი გვიზიარებს: „ბოლო ერთი თვის განმავლობაში ყოველ ხუთშაბათ საღამოს რაღაც ისეთი ხდებოდა, რის გამოც შესწავლა შეიძლებოდა ჩაგვშლოდა, მაგრამ ყველაფრის მიუხედავად შესწავლას მაინც ვატარებდით“. ბუნებრივია, ზოგჯერ შეიძლება გეგმის შეცვლა დაგჭირდეთ. მაგრამ, არ დაუშვათ, რომ ოჯახთან ერთად თაყვანისცემის საღამო, თუნდაც ერთხელ გაგიცდეთ!

9. როგორ დაეხმარა იეჰოვა იერემიას და რას ვსწავლობთ მისი მაგალითიდან?

⁹ წინასწარმეტყველი იერემია ჩვენთვის კარგი მაგალითია. მას სულიერი დახმარება სჭირდებოდა, რაც იეჰოვასგან მიიღო და ამისთვის ძალიან მადლიერი იყო. იეჰოვას დახმარებით ის მოთმინებით ქადაგებდა გულგრილად განწყობილ ხალხში. „ძვლებში დამწყვდეული ცეცხლივით ამიგიზგიზდა ის [იეჰოვას სიტყვა] გულში“, — დაწერა იერემიამ (იერ. 20:8, 9). ღვთის სიტყვა დაეხმარა იერემიას, აეტანა რთული დრო, რომელიც იერუსალიმის განადგურებით დამთავრდა. იეჰოვას წერილობითი სიტყვა დღეს ჩვენ სრული სახით გვაქვს. თუ ღვთის სიტყვას გულმოდგინედ ვსწავლობთ და ყველაფერს ღვთის თვალით ვუყურებთ, იერემიას მსგავსად, არც ჩვენ დავკარგავთ მსახურების სიხარულს; განსაცდელების დროს ღვთის ერთგულები დავრჩებით და ზნეობრივ და სულიერ სიწმინდეს შევინარჩუნებთ (იაკ. 5:10).

დარჩით ‘უმწიკვლოები და უმანკოები’

10, 11. რატომ უნდა ვეცადოთ ყველანაირად, „უმწიკვლოები და უმანკოები“ დავრჩეთ და რა მოგვეთხოვება ამისათვის?

¹⁰ ქრისტიანებმა ვიცით, რომ ბოლო დღეებში ვცხოვრობთ. ამიტომ არ გვიკვირს, რომ მთელ მსოფლიოში ასე ფართოდ არის გავრცელებული ის ყველაფერი, რაც საძულველია იეჰოვასთვის, მაგალითად, სიხარბე, სექსუალური აღვირახსნილობა და ძალადობა. სატანის თავდასხმის სტრატეგია შეიძლება ასე ჩამოვაყალიბოთ: იქ სადაც დაშინება არ ჭრის, იქნებ გახრწნამ გაჭრას (გამოცხ. 2:13, 14). აქედან გამომდინარე, გულთან ახლოს უნდა მივიტანოთ პეტრეს სიყვარულით მოცემული რჩევა: „ყველანაირად ეცადეთ, რომ მის [ღვთის] წინაშე წარდგეთ უმწიკვლოები, უმანკოები და მშვიდობის მქონეები“ (2 პეტ. 3:14).

¹¹ ფრაზა „ყველანაირად ეცადეთ“ მსგავსია პეტრეს მიერ მანამდე გამოყენებული ფრაზისა, „ყოველი ღონე“ მოახმარეთ. აშკარაა, იეჰოვამ, ვინც პეტრე ამ სიტყვების დასაწერად აღძრა, იცის, რომ სატანის ბინძურ ქვეყნიერებაში დიდი მცდელობის გარეშე გაგვიჭირდება ‘უმწიკვლოდ და უმანკოდ’ დარჩენა. ამისათვის, მანკიერ სურვილებს არ უნდა მივცეთ ჩვენს გულში ფესვის გადგმის საშუალება (წაიკითხეთ იგავების 4:23; იაკობის 1:14, 15 ). გარდა ამისა, მტკიცედ უნდა დავიცვათ ჩვენი პოზიცია მათ წინაშე, ვინც ჩვენი ქრისტიანული ცხოვრების წესის გამო „საგონებელში არიან ჩაცვენილი“ და გვგმობენ (1 პეტ. 4:4).

12. რაში გვარწმუნებს ლუკას 11:13?

¹² ვინაიდან არასრულყოფილები ვართ, ბრძოლა გვჭირდება იმის საკეთებლად, რაც სწორია (რომ. 7:21—25). ამ ბრძოლაში მაშინ გავიმარჯვებთ, თუ ვიქნებით იეჰოვასთან, რომელიც გულუხვად აძლევს წმინდა სულს მას, ვინც სთხოვს (ლუკ. 11:13). ეს სული ღვთისმოსაწონი თვისებების გამომუშავებაში გვეხმარება, რაც თავის მხრივ, არა მარტო ცდუნებებს დაგვაძლევინებს, არამედ განსაცდელებსაც გადაგვატანინებს; განსაცდელები კი იეჰოვას დღის მოახლოებასთან ერთად კიდევ უფრო მეტი გვექნება.

დაე, განსაცდელებმა გაგაძლიეროთ

13. რა დაგვეხმარება განსაცდელების ატანაში?

¹³ სანამ ამ ქვეყნიერებაში ვცხოვრობთ, განსაცდელებს თავიდან ვერ ავირიდებთ. ამ დროს სულით არ უნდა დავეცეთ; განსაცდელების დროს შესაძლებლობა გვეძლევა დავამტკიცოთ, რამდენად გვიყვარს ღმერთი და გვაქვს თუ არა ღვთისა და ბიბლიის ძლიერი რწმენა. მოწაფე იაკობმა დაწერა: „ჩემო ძმებო, ნებისმიერ განსაცდელს სიხარულით შეხვდით, რადგან იცით, რომ ასე გამონაცადი რწმენა მოთმინებას გამოგიმუშავებთ“ (იაკ. 1:2—4). ისიც გახსოვდეთ, რომ „იცის იეჰოვამ, როგორ დაიხსნას განსაცდელისგან ღვთის ერთგულები“ (2 პეტ. 2:9).

14. პირადად თქვენ როგორ გამხნევებთ იოსების მაგალითი?

¹⁴ განვიხილოთ იაკობის ძის, იოსების მაგალითი, რომელიც საკუთარმა ძმებმა მონად გაყიდეს (დაბ. 37:23—28; 42:21). შეერყა იოსებს რწმენა იმის გამო, რომ მას ასე სასტიკად მოექცნენ? განაწყენდა ღმერთზე, რომ თავს ასეთი უბედურება დაატყდა? ღვთის სიტყვიდან აშკარად ჩანს, რომ არა. იოსების განსაცდელები ამით არ დამთავრებულა. მოგვიანებით მას გაუპატიურების მცდელობისთვის უსამართლოდ დასდეს ბრალი და საპყრობილეში ჩასვეს. მაგრამ იოსების რწმენა არც ამ შემთხვევაში შერყეულა (დაბ. 39:9—21). პირიქით, მან იცოდა, რომ განსაცდელებს მისი რწმენის გაძლიერება შეეძლო და ასეთი დამოკიდებულებისთვის იეჰოვამ ის უხვად აკურთხა.

15. რისი სწავლა შეგვიძლია ნაომის მაგალითიდან?

¹⁵ ბუნებრივია, განსაცდელები ამწუხრებს ადამიანს და ზოგჯერ დეპრესიაშიც აგდებს. ალბათ, იოსებიც არაერთხელ დამწუხრდებოდა. ასეთი გრძნობა ღვთის სხვა ერთგული მსახურებისთვისაც არ ყოფილა უცხო. მაგალითად, ნაომიმ, რომელსაც ქმარი და ორი ვაჟი დაეღუპა, თქვა: „ნაომის ნუღარ დამიძახებთ. მარა დამიძახეთ [ნიშნავს მწარეს], რადგან მეტისმეტად გამამწარა ყოვლისშემძლემ“ (რუთ. 1:20, 21, სქოლიო). ნაომის რეაქცია აბსოლუტურად ბუნებრივი და გასაგები იყო. იოსების მსგავსად, არც ნაომი დასუსტებულა სულიერად და ღვთის რწმენა არ დაუკარგავს. ამიტომ ამ ძვირფას ადამიანს იეჰოვამ კურთხევა არ მოაკლო (რუთ. 4:13—17, 22). ახალ ქვეყნიერებაში კი ღმერთი სრულად აუნაზღაურებს ნაომის იმ დანაკლისს, რაც სატანამ და მისმა ბოროტმა ქვეყნიერებამ მიაყენა. „აღარ გაიხსენებენ წინანდელს და არც გულში გაივლებენ“ (ეს. 65:17).

16. რა დამოკიდებულება უნდა გვქონდეს ლოცვის მიმართ და რატომ?

¹⁶ რა განსაცდელსაც უნდა შევხვდეთ, იმის ცოდნა, რომ ღმერთს ვუყვარვართ, ყველაფერს აგვატანინებს (წაიკითხეთ რომაელების 8:35—39). სატანა კვლავაც შეეცდება ჩვენს გატეხვას, მაგრამ არაფერი გამოუვა, თუ ‘საღად ვიაზროვნებთ და ლოცვაში სიფხიზლეს შევინარჩუნებთ’ (1 პეტ. 4:7). იესომ გვითხრა: „იფხიზლეთ და მუდამ იმის ვედრებაში იყავით, რომ თავი დააღწიოთ მოსახდენს და წარსდგეთ კაცის ძის წინაშე“ (ლუკ. 21:36). ყურადღება მიაქციეთ, რომ იესომ სიტყვა „ვედრება“ გამოიყენა, რაც მხურვალე ლოცვას ნიშნავს. იესომ მოგვიწოდა, მუდამ ვედრებაში ვყოფილიყავით, რითაც ხაზი გაუსვა იმას, რომ დღეს ძალიან მნიშვნელოვანია ღვთისა და მის წინაშე კარგი სახელის მოპოვება. იეჰოვას დღეს გადარჩენის იმედი მხოლოდ მათ უნდა ჰქონდეთ, ვინც ღვთის თვალში კარგი რეპუტაციით სარგებლობს.

აქტიურად ემსახურეთ იეჰოვას

17. როგორ დაგეხმარებათ ძველად მცხოვრები წინასწარმეტყველების მაგალითები, თუ თქვენს ტერიტორიაზე ქადაგება რთულია?

¹⁷ პეტრეს სიტყვები „როგორები უნდა იყოთ წმინდა საქციელსა და ღვთისადმი ერთგულებაში!“, ხაზს უსვამს იმას, რომ ძალიან მნიშვნელოვანია გამომაცოცხლებელ სულიერ საქმეებში მონაწილეობის მიღება, ანუ ღვთისადმი ერთგულების დამამტკიცებელი საქმეების კეთება (2 პეტ. 3:11). ამ საქმეთაგან უმთავრესი სასიხარულო ცნობის ქადაგებაა (მათ. 24:14). ზოგ ტერიტორიაზე ქადაგება ადვილი არ არის გულგრილობის, წინააღმდეგობის ან იმის გამო, რომ ხალხი მეტისმეტად დაკავებულია ცხოვრებისეული საზრუნავით. მსგავს დამოკიდებულებას ძველ დროში მცხოვრები იეჰოვას მსახურებიც ხვდებოდნენ; მაგრამ მათ ხელი არ ჩაუქნევიათ და ღვთის ცნობას გამუდმებით გადასცემდნენ (წაიკითხეთ 2 მატიანეს 36:15, 16; იერ. 7:24—26). რა დაეხმარა მათ, რომ მოთმინებით ეკეთებინათ ღვთის საქმე? ისინი ამ დავალებას ღვთის თვალით უყურებდნენ და არა ქვეყნიერების თვალით. გარდა ამისა, მათთვის დიდი პატივი იყო ღვთის სახელის ტარება (იერ. 15:16).

18. როგორ განდიდდება მომავალში ღვთის სახელი ჩვენი ქადაგებით?

¹⁸ ჩვენც გვხვდა წილად პატივი, ხალხს იეჰოვას სახელი და მისი განზრახვები გავუცხადოთ. დაფიქრდით, იეჰოვას დიდ დღეს ღვთის მტრები თავს ვერ გაიმართლებენ იმით, რომ არაფერი იცოდნენ ღვთის გაფრთხილების შესახებ და ეს იმიტომ, რომ ჩვენ ვქადაგებთ. ფარაონის მსგავსად, ისინიც მიხვდებიან, რომ იეჰოვაა მათ წინააღმდეგ გამოსული (გამ. 8:1, 20; 14:25). ხოლო თავის ერთგულ მსახურებს იეჰოვა განადიდებს, რადგან აბსოლუტურად ყველასთვის გახდება ცხადი, რომ ისინი ნამდვილად მისი წარმომადგენლები იყვნენ დედამიწაზე (წაიკითხეთ ეზეკიელის 2:5; 33:33).

19. რით ცხადვყოფთ, რომ საუკეთესოდ ვიყენებთ იმ დროს, ვიდრე იეჰოვა ითმენს?

¹⁹ მეორე წერილის დასასრულს პეტრემ თანამორწმუნეებს მისწერა: „ჩვენი უფლის მოთმინება კი ხსნად მიიჩნიეთ“ (2 პეტ. 3:15). მაშ, მოდით საუკეთესოდ გამოვიყენოთ ის დრო, ვიდრე იეჰოვა ითმენს. როგორ? გამოვიმუშავოთ ღვთისმოსაწონი თვისებები, დავრჩეთ ‘უმწიკვლოები და უმანკოები’, სწორი დამოკიდებულება გვქონდეს განსაცდელების მიმართ და აქტიურად მივიღოთ მონაწილეობა სამეფოს საქმეში. ამგვარად, უხვ და უსასრულო კურთხევებს მივიღებთ, როცა „ახალი ცა და ახალი დედამიწა“ იქნება (2 პეტ. 3:13).