გამხნევდით — ხსნა ახლოვდება

«შენთანა ვარ, ამბობს უფალი, რომ დაგიფარო [„გიხსნა“, აქ]» (იერემია 1:19).

1, 2. რატომ საჭიროებს ხსნას ადამიანთა ოჯახი?

ხსნა! რა მანუგეშებელი სიტყვაა! გიხსნან ნიშნავს გადაგარჩინონ, გაგათავისუფლონ არახელსაყრელი, უბედური მდგომარეობიდან. ეს ბევრად უფრო საუკეთესო, სასიხარულო მდგომარეობაში გადასვლას მოიცავს.

² რა ძლიერ საჭიროებს ადამიანთა ოჯახი ასეთ ხსნას ამ დროში! ნებისმიერ კუთხეში მცხოვრები ადამიანები დაჩაგრულები და გულგატეხილები არიან რთული — ეკონომიკური, სოციალური, ფიზიკური, გონებრივი და ემოციური — პრობლემების გამო. დიდი უმრავლესობა უკმაყოფილო და გულაცრუებულია მსოფლიო მდგომარეობით და უარს არ იტყოდა უკეთესობისკენ მის შეცვლაზე (ესაია 60:2; მათე 9:36).

‘ძნელი გასამკლავებელი საზარელი ჟამი’

3, 4. რატომ არის ხსნა უფრო საჭირო ახლა?

³ რადგან XX საუკუნემ ნებისმიერ სხვა საუკუნეზე მეტი ტანჯვა იხილა, ადრინდელზე მეტად ახლა არსებობს ხსნის უფრო დიდი საჭიროება. დღეს მილიარდზე მეტი ადამიანი უკიდურეს სიღარიბეში ცხოვრობს და ამ ციფრს ყოველწლიურად დაახლოებით 25 მილიონი ემატება. არასაკმარისი კვებითა თუ სიღარიბით გამოწვეული სხვა მიზეზების გამო წელიწადში დაახლოებით 13 მილიონი — დღეში 35 000-ზე მეტი — ბავშვი კვდება! და სხვადასხვა დაავადებისგან მილიონობით უფროსი ასაკის ადამიანი ნაადრევად კვდება (ლუკა 21:11; გამოცხადება 6:8).

⁴ გამოუთქმელ ტანჯვას ომები და სამოქალაქო უწესრიგობა იწვევს. წიგნში „სიკვდილი მთავრობისგან“ (Death by Government) ნათქვამია, რომ ომებში, ეთნიკურ და რელიგიურ კონფლიქტებსა თუ მთავრობების მიერ საკუთარივე მოქალაქეების მასობრივ მკვლელობებში, „ამ საუკუნეში დაიღუპა 203 მილიონზე მეტი ადამიანი“. ის აგრძელებს: „ვარაუდობენ, რომ მკვდრების რიცხვი შეიძლება 360 მილიონს შეადგენდეს. იქმნება შთაბეჭდილება, თითქოს, ჩვენს მოდგმას თანამედროვე შავი ჭირი ანადგურებს. სინამდვილეში ასეც არის, მაგრამ მას, ბაქტერიოლოგიური ჭირის ნაცვლად, ძალაუფლების ჭირი სპობს“. მწერალმა რიჩარდ ჰარვუდმა შენიშნა: „ჩვენს საუკუნესთან შედარებით წინა საუკუნეების ბარბაროსული ომები ფერმკრთალი ჩანს“ (მათე 24:6, 7; გამოცხადება 6:4).

5, 6. რა ხდის ჩვენს დროს ასე შემაშფოთებელს?

⁵ ბოლო წლების შემაშფოთებელი პირობების საშინელ დამატებას წარმოადგენს ძალმომრეობითი დამნაშავეობის, უზნეობისა და ოჯახების ნგრევის უსაშველო ზრდა. შეერთებული შტატების განათლების ყოფილმა მდივანმა უილიამ ბენეტმა შენიშნა, რომ 30 წელიწადში აშშ-ს მოსახლეობის 41 პროცენტიან ზრდასთან ერთად მოძალადეობრივი დამნაშავეობა გაიზარდა 560 პროცენტით, უკანონო შობადობა — 400-ით, განქორწინება — 300-ით და მოზარდებში თვითმკვლელობის რიცხვი — 200 პროცენტით. პრინსტონის უნივერსიტეტის პროფესორი ჯონ დიულიო უმცროსი აფრთხილებდა ადამიანებს ახალგაზრდა „სუპერ-მტაცებლების“ მზარდ რიცხვზე, რომლებიც „კლავენ, თავს ესხმიან, აუპატიურებენ, ძარცვავენ, ბინებს ტეხავენ და სერიოზულ საერთო უწესრიგობას ქმნიან. რომლებსაც არც პატიმრობის დაღი და ტკივილები აშინებთ, არც სინდისი ქენჯნის“. ამ ქვეყანაში 15-დან 19 წლამდე ახალგაზრდებს შორის მკვლელობა დღეს სიკვდილის მიზეზებში მეორე ადგილს იკავებს. ხოლო ოთხ წლამდე ასაკის ბავშვების სიკვდილს უფრო ცუდი მოპყრობა იწვევს, ვიდრე დაავადებები.

⁶ ასეთი ბოროტმოქმედება და ძალადობა ერთი ქვეყნით არ შემოიფარგლება. ქვეყნების უმეტესობა მსგავს ტენდენციებზე იტყობინება. ასეთ მდგომარეობაში თავისი წვლილი ნარკოტიკების უკანონო გამოყენების უშველებელ ზვირთს შეაქვს, რომელიც ხრწნის მილიონობით ადამიანის ცხოვრებას. ავსტრალიური გაზეთი ამბობდა: „საერთაშორისო მასშტაბით ნარკოტიკებით ვაჭრობა იარაღით ვაჭრობის შემდეგ მსოფლიოს მეორე ყველაზე შემოსავლიან ბიზნესად იქცა“ (Sydney Morning Herald). კიდევ ერთი ფაქტორი ძალადობა და უზნეობაა, რომლითაც დღეს ტელევიზიაა გაჟღენთილი. მრავალ ქვეყანაში 18 წლის ასაკამდე მოზარდს ტელევიზიის საშუალებით ათი ათასობით ძალმომრეობითი და ურიცხვი უზნეო სცენა აქვს ნანახი. ეს საკმაოდ გამხრწნელი გავლენაა, რადგან ჩვენს პიროვნებას ის აყალიბებს, რითაც რეგულარულად გონებას ვკვებავთ (რომაელთა 12:2; ეფესელთა 5:3, 4).

7. როგორ იწინასწარმეტყველა ბიბლიამ დღევანდელი ცუდი პირობები?

⁷ ბიბლიამ ზუსტად იწინასწარმეტყველა ჩვენს საუკუნეში მოვლენების ეს შემაძრწუნებელი ტენდენცია. ამ წინასწარმეტყველებაში ნათქვამია, რომ იქნებოდა გლობალური ომები, ეპიდემიები, შიმშილობა და მზარდი უკანონობა (მათე 24:7–12; ლუკა 21:10, 11). ხოლო მეორე ტიმოთეს 3:1–5-ში ჩაწერილ წინასწარმეტყველებაზე დაფიქრება, თითქოს, ყოველდღიური ახალი ამბების მოსმენა იყოს. ჩვენს ეპოქას ის ‘უკანასკნელ დღეებს’ უწოდებს და აღწერს ადამიანებს, როგორც ‘თავმოყვარეებსა და ფულის მოყვარულებს, მშობლების ურჩებსა და მოღალატეებს, მოძულეებს, შეუკავებლებს, სასტიკებს, გაბღენძილებსა და ღმერთზე მეტად უფრო სიამეთა მოყვარულებს’. სწორედ ასეთია ქვეყნიერება დღეს. უილიამ ბენეტის სიტყვების თანახმად: „ცივილიზაციის გახრწნილობის. . . უბრალოდ, ძალიან ბევრი ნიშანი არსებობს“. ამის თაობაზე ისიც კი ითქვა, რომ პირველ მსოფლიო ომთან ერთად ცივილიზაციასაც ბოლო მოეღო.

8. რატომ მოახდინა ღმერთმა წარღვნა ნოეს დროს და როგორ უკავშირდება ეს ჩვენს პერიოდს?

⁸ ახლა მდგომარეობა ნოეს წარღვნამდელ პერიოდზეც კი უფრო უარესია, როცა «აივსო ქვეყანა უსამართლობით [„ძალადობით“, აქ]». მაშინ საერთოდ ადამიანებმა უარყვეს ცუდი მოქმედებების მონანიება. ამიტომ ღმერთმა თქვა: «აივსო ქვეყანა მათი უსამართლობით [„ძალადობით“, აქ]; და, აჰა, უნდა გავწყვიტო ისინი». წარღვნამ წალეკა ის მოძალადე ქვეყნიერება (დაბადება 6:11, 13; 7:17–24).

არ არსებობს ხსნა ადამიანების მიერ

9, 10. რატომ არ უნდა ვამყარებდეთ ხსნის იმედს ადამიანებზე?

⁹ შეიძლება თუ არა, რომ ადამიანთა მცდელობებმა გვიხსნას ამ ცუდი პირობებიდან? ღვთის სიტყვა გვპასუხობს: „იმედს ნუ დაამყარებთ მთავრებზე, ადამ[იანი]ს ძეზე, რომელსაც არ შეუძლია შველა“. „მიმავალი კაცი ვერ წარმართავს თავის ნაბიჯებს“ (ფსალმუნი 145:3; იერემია 10:23). ამ ჭეშმარიტებებს ისტორიის ათასობით წელი ადასტურებს. ადამიანებმა გამოსცადეს ყველა შესაძლებელი პოლიტიკური, ეკონომიკური და სოციალური სისტემა, მაგრამ პირობები უარესდება. შველა ადამიანთაგან რომ ყოფილიყო ეს დღემდე ნათლად გამოჩნდებოდა. მაგრამ, ამის საპირისპიროდ, სინამდვილე ის არის, რომ ‘კაცი კაცზე მძლავრობს მისდა საზიანოდ’ (ეკლესიასტე 8:9; იგავნი 29:2; იერემია 17:5, 6).

¹⁰ რამდენიმე წლის წინ, აშშ-ს ეროვნული უშიშროების საბჭოს ყოფილმა მრჩეველმა ზბიგნევ ბჟეზინსკიმ თქვა: „გლობალური ტენდენციის ნებისმიერი მიუკერძოებელი ანალიზის გარდაუვალი დასკვნა ის არის, რომ საზოგადოებრივი არევ-დარევა, პოლიტიკური მღელვარება, ეკონომიკური კრიზისები და საერთაშორისო უთანხმოება, ალბათ, კიდევ უფრო გაფართოვდება“. მან დაამატა: „კაცობრიობას გლობალური ანარქია ემუქრება“. მსოფლიო პირობების ასეთი შეფასება დღეს უფრო დასაბუთებულია. მზარდი ძალადობის ეპოქაზე კომენტარის გაკეთებით ნიუ-ჰეივენის (კონექტიკუტის შტატი, აშშ) გაზეთმა, სარედაქციო სტატიაში აღიარა: „როგორც ჩანს, ჩვენ ისე შორს შევტოპეთ, რომ ვეღარ შევჩერდებით“ (New Haven Register). არა, ამ ქვეყნიერების გაუარესება არ შეჩერდება, რადგან ‘უკანასკნელი დღეების’ შესახებ წინასწარმეტყველებაში აგრეთვე ნათქვამია: „ბოროტი ადამიანები და ცრუმარქვიები კი წინ წაიწევენ უარესისაკენ, სხვებსაც აცდენენ და თავადაც ცდუნებაში იქნებიან“ (2 ტიმოთე 3:13).

11. რატომ ვერ შეაბრუნებს ადამიანთა მცდელობები პირობების გაუარესებას?

¹¹ ადამიანები ვერ შეაბრუნებენ ამ ტენდენციას, რადგან სატანა არის ‘ამ წუთისოფლის ღმერთი’ (2 კორინთელთა 4:4). დიახ, «მთელი წუთისოფელი ბოროტებაში [„ბოროტის ძალაუფლებაში“, აქ] ძევს» (1 იოანე 5:19; იხილე აგრეთვე იოანე 14:30). ჩვენი პერიოდის შესახებ ბიბლია სავსებით სწორად აღნიშნავს: „ვაი, მიწასა და ზღვას, ვინაიდან თქვენთან ჩამოვიდა ეშმაკი დიდი მძვინვარებით, რადგან იცის, რომ დრო მცირეღა დარჩა“ (გამოცხადება 12:12). სატანამ იცის, რომ მისი მმართველობა და ქვეყნიერება დასასრულს მიუახლოვდა, და ამიტომ ის ‘მბრდღვინავი ლომივით ეძებს, ვინ ჩაყლაპოს’ (1 პეტრე 5:8).

ხსნა ახლოსაა — ვისთვის?

12. ვისთვის ახლოვდება ხსნა?

¹² დედამიწაზე პირობების უფრო და უფრო გართულება იმის მკვეთრი ნიშანია, რომ უდიდესი ცვლილება — ნამდვილად დიდებული ხსნა — ძალიან ახლოსაა! ვისთვის? ხსნა ახლოვდება იმ ადამიანებისთვის, რომლებიც ყურადღებას აქცევენ გამაფრთხილებელ ნიშნებს და სათანადოდ მოქმედებენ. პირველი იოანეს 2:17 ცხადყოფს, რის შესრულებაა აუცილებელი: „გადადის წუთისოფელი [სატანის სისტემა] და მისი გულისთქმაც, ღვთის ნების აღმსრულებელი კი რჩება უკუნისამდე“ (იხილე აგრეთვე 2 პეტრე 3:10–13).

13, 14. როგორ გაამახვილა იესომ ყურადღება სიფხიზლის შენარჩუნების აუცილებლობაზე?

¹³ იესომ იწინასწარმეტყველა, რომ დღევანდელი გახრწნილი საზოგადოება მალე განადგურებული უნდა იქნეს ისეთი გაჭირვების დროს, „როგორიც არ ყოფილა წუთისოფლის დასაბამიდან დღემდე და აღარც არასოდეს იქნება“ (მათე 24:21). სწორედ ამიტომ აფრთხილებდა ის ადამიანებს: „გაფრთხილდით, არ დამძიმდეს თქვენი გული ღრეობით, ლოთობითა და სიცოცხლეზე ზრუნვით, და იმ დღემ არ გიწიოთ მოულოდნელად. ვინაიდან ის, როგორც მახე, დაეცემა ყველა მკვიდრს მთელი დედამიწის ზურგზე. მაშ, ყოველჟამს იფხიზლეთ და ილოცეთ, რათა შეგეძლოთ ყოველგვარ ამ მოსახდენთაგან თავის დაღწევა“ (ლუკა 21:34–36).

¹⁴ ის, ვინც ‘ფრთხილობს’ და ‘ფხიზლობს’, გამოიკვლევს და შეასრულებს ღვთის ნებას (იგავნი 2:1–5; რომაელთა 12:2). ასეთი ადამიანები ‘თავს დააღწევენ’ განადგურებას, რომელიც მალე სატანის ქვეყნიერებას დაატყდება. და ისინი სავსებით დარწმუნებული უნდა იყვნენ, რომ დახსნილნი იქნებიან (ფსალმუნი 33:16; იგავნი 10:28–30).

მთავარი მხსნელი

15, 16. ვინ არის მთავარი მხსნელი და რატომ ვართ დარწმუნებულები, რომ მისი გადაწყვეტილებები სამართლიანი იქნება?

¹⁵ ღვთის მსახურების სახსნელად სატანა და მთელი მისი მსოფლიო სისტემა ჩამოცილებული უნდა იქნეს. ეს კი ხსნისთვის ადამიანებზე ბევრად უფრო ძლიერ წყაროს მოითხოვს. ეს წყარო იეჰოვა ღმერთია, უზენაესი მმართველი, მოწიწების აღმძვრელი სამყაროს ყოვლისშემძლე შემოქმედი. ის არის მთავარი მხსნელი: „მე ვარ, მე ვარ უფალი და არავინაა ჩემს გარდა მაცხოვარი!“ (ესაია 43:11; იგავნი 18:10).

¹⁶ იეჰოვა ფლობს უკიდურესად დიდ ძალას, სიბრძნეს, სამართლიანობასა და სიყვარულს (ფსალმუნი 146:5; იგავნი 2:6; ესაია 61:8; 1 იოანე 4:8). ამიტომ, შეგვიძლია დარწმუნებით გვწამდეს, რომ განაჩენების შესრულებისას ის სამართლიანად იმოქმედებს. აბრაამმა თქვა: „არ იქნება, რომ მთელი ქვეყნიერების მსაჯულმა სამართლიანად არ განსაჯოს“ (დაბადება 18:24–33). პავლემ ხმამაღლა წარმოთქვა: „ნუთუ უსამართლობაა ღმერთთან? არამც და არამც“! (რომაელთა 9:14). იოანემ დაწერა: „დიახ, უფალო ღმერთო ყოვლისმპყრობელო, ჭეშმარიტი და სამართლიანია შენი განკითხვანი“ (გამოცხადება 16:7).

17. როგორ გამოხატავდნენ იეჰოვას აღთქმებზე მინდობას წარსულში მცხოვრები მსახურები?

¹⁷ როცა იეჰოვა ხსნას პირდება, ის აუცილებლად შეასრულებს თავის სიტყვას. იესო ნავეს ძემ თქვა: „არ გაცუდებულა არცერთი სასიკეთო სიტყვა, რომელიც კი. . . უთქვამს უფალს“ (იესო ნავეს ძე 21:43). სოლომონმა განაცხადა: „ერთი სიტყვაც არ დარჩენილა აღუსრულებელი იმ სასიკეთო სიტყვებიდან, . . [უფალმა] რომ ბრძანა“ (მესამე მეფეთა 8:56). პავლე მოციქულმა შენიშნა, რომ აბრაამი „არ დაეჭვებულა. . . ურწმუნოებით. . . და გულდაჯერებული იყო, რომ ის [ღმერთი], შესრულებასაც შეძლებდა“. მსგავსად, სარამაც „სარწმუნოდ შერაცხა აღმთქმელი [ღმერთი]“ (რომაელთა 4:20, 21; ებრაელთა 11:11).

18. რატომ შეუძლიათ იეჰოვას დღევანდელ მსახურებს დარწმუნებული იყვნენ, რომ დახსნილები იქნებიან?

¹⁸ ადამიანებისგან განსხვავებით, იეჰოვა აბსოლუტურად სანდო და თავისი სიტყვის ერთგული პიროვნებაა. „დაიფიცა ცაბაოთ უფალმა და თქვა: როგორც ჩავიფიქრე, ისე იქნება; როგორც გადავწყვიტე, ისე მოხდება“ (ესაია 14:24). ამიტომ, როცა ბიბლია ამბობს, „იცის ღმერთმა, როგორ იხსნას განსაცდელისაგან ღვთისმოსავნი, ხოლო უკეთურნი შემოინახოს განკითხვის დღისათვის დასასჯელად“, სავსებით შეგვიძლია გვჯეროდეს, რომ ეს მოხდება (2 პეტრე 2:9). ძლიერი მტრების მხრიდან განადგურებით დაშინების შემთხვევაშიც კი, იეჰოვას მოწმეები მხნედ არიან, რადგან იციან საქმისადმი ღვთის დამოკიდებულება, რომელსაც ერთ-ერთი მისი წინასწარმეტყველისთვის ნათქვამი აღთქმა ირეკლავს: „შეგებრძოლებიან, მაგრამ ვერ გძლევენ, რადგან შენთანა ვარ, ამბობს უფალი, რომ დაგიფარო“ (იერემია 1:19; ფსალმუნი 32:18, 19; ტიტე 1:2).

ხსნა წარსულში

19. როგორ იხსნა იეჰოვამ ლოტი და რით ჰგავს ეს შემთხვევა ჩვენს დროს?

¹⁹ ჩვენთვის შეიძლება ძალიან გამამხნევებელი იყოს იეჰოვას ადრინდელი გადამრჩენი მოქმედებების გახსენება. მაგალითად, ლოტი „დაჩაგრული“ იყო სოდომისა და გომორის ბოროტების გამო. მაგრამ იეჰოვამ ყურადღება მიაქცია ამ ქალაქების წინააღმდეგ ‘სამდურავს’. თავის დროზე მან მაცნეები გაგზავნა, რათა დაერწმუნებინათ ლოტი და მისი ოჯახი, დაუყოვნებლივ მოშორებოდნენ იმ ტერიტორიას. რა მოჰყვა ამას? იეჰოვამ „მართალი ლოტი. . . იხსნა“, ხოლო ‘სოდომისა და გომორის ქალაქები ფერფლად აქცია’ (2 პეტრე 2:6–8; დაბადება 18:20, 21). დღესაც ასეა, იეჰოვა ყურადღებას აქცევს ქვეყნიერების აშკარა ბოროტებასთან დაკავშირებულ სამდურავს. როცა მისი დღევანდელი მაცნეები დამოწმების გადაუდებელ საქმიანობას იმ ზომით შეასრულებენ, რა ზომითაც თვითონ სურს, ის გამოვა ამ ქვეყნიერების წინააღმდეგ და ისევე იხსნის თავის მსახურებს, როგორც ლოტი იხსნა (მათე 24:14).

20. აღწერე იეჰოვას მიერ ეგვიპტიდან ძველი დროის ისრაელის ხსნა.

²⁰ ღვთის ხალხის მილიონობით წარმომადგენელი ძველი ეგვიპტის მონობაში იყო. მათ შესახებ იეჰოვამ თქვა: „მომესმა. . . გამწარებულთა ღაღადი. . . გავიგე [მათი] გასაჭირი. ჩამოვედი, რომ ვიხსნა [ისინი]“ (გამოსვლა 3:7, 8). მაგრამ ღვთის ხალხის გაშვების შემდეგ ფარაონმა გადაიფიქრა და თავისი მძლავრი ჯარით დაედევნა მათ. მეწამული ზღვის ნაპირთან ისრაელები, თითქოს, მახეში იყვნენ მოქცეულნი. ასეთი მდგომარეობის მიუხედავად, მოსემ თქვა: ‘ნუ გეშინიათ, მტკიცედ იდექით და დაინახავთ, რომ დღეს შეგეწევათ უფალი’ (გამოსვლა 14:8–14). იეჰოვამ გაჰყო მეწამული ზღვა და ისრაელები გაიქცნენ. ფარაონის ჯარები დაედევნენ, მაგრამ იეჰოვამ ისე გამოიყენა ძალა, რომ „ზღვამ დაფარა ისინი; ტყვიასავით ჩაიძირნენ ბობოქარ წყლებში“. მოგვიანებით იეჰოვასადმი სიმღერაში მოსე ხარობდა: „ვინ არის, შენს მსგავსად რომ იყოს ძლიერი სიწმიდით, ქებათა ღირსი, სასწაულმოქმედი?“ (გამოსვლა 15:4–12, 19).

21. როგორ დაიცვა იეჰოვამ თავისი ხალხი ყამონელებისგან, მოაბელებისა და სეყირის მთიელებისგან?

²¹ სხვა შემთხვევაში იეჰოვას ხალხს განადგურებით ემუქრებოდნენ მტრულად განწყობილი ერები: ყამონელები, მოაბელები და სეყირის მთიელები (ედომელები). იეჰოვამ განაცხადა: „ნუ გეშინიათ და ნუ შეძრწუნდებით ამ უზარმაზარი [მტრული] ურდოს წინაშე, რადგან თქვენ კი არ გმართებთ ომი, არამედ ღმერთს. . . თქვენ არ იბრძოლებთ. . . დადექით და უცქირეთ უფლის მიერ თქვენს ხსნას“. მტრების რიგებში დაბნეულობის შეტანით, რის შედეგადაც მათ ერთმანეთი დახოცეს, იეჰოვამ იხსნა თავისი ხალხი (მეორე ნეშტთა 20:15–23).

22. რა სასწაულით იხსნა იეჰოვამ ისრაელი ასურელებისგან?

²² როცა მსოფლიო მპყრობელი ასურეთი იერუსალიმის წინააღმდეგ გამოვიდა, მეფე სანხერიბმა გესლიანად დასცინა იეჰოვას და ქალაქის კედელზე მყოფ ხალხს უთხრა: «რომელ ღმერთს უხსნია ამ [ჩემს მიერ დაპყრობილი] ქვეყნების ღმერთთა შორის თავისი ქვეყანა ჩემი ხელიდან, რომ უფალმა [„იეჰოვამ“, აქ] იხსნას ჩემი ხელიდან იერუსალიმი?“ ღვთის მსახურებს მან უთხრა: „ნუ გაიმედებთ ხიზკიაჰუ უფლით [„იეჰოვათი“, აქ], გვიხსნის უფალი [„იეჰოვაო“, აქ]“. მოგვიანებით ხიზკიაჰუ მხურვალედ ლოცულობდა ღვთისადმი ხსნისთვის, ‘რათა გაეგო ქვეყნიერების ყველა სამეფოს, რომ ის იყო უფალი, ერთადერთი ღმერთი’. იეჰოვამ მუსრი გაავლო 185 000 ასურელ ჯარისკაცს და იხსნა თავისი მსახურები. შემდეგში, ცრუ ღვთისადმი თაყვანისცემის დროს სანხერიბი საკუთარმა ვაჟიშვილებმა მოკლეს (ესაია თავები 36 და 37).

23. რომელი კითხვები მოითხოვს პასუხს დღევანდელ ხსნასთან დაკავშირებით?

²³ ჩვენ ნამდვილად შეგვიძლია გავმხნევდეთ, როცა ვხედავთ, თუ რა სასწაულებრივად იხსნიდა იეჰოვა თავის ხალხს წარსულში. რას ვიტყოდით დღევანდელი დღის შესახებ? რა სახიფათო მდგომარეობაში ჩავარდებიან მალე მისი ერთგული მსახურები, რომლიდანაც სასწაულებრივი ხსნა დასჭირდებათ? რატომ აყოვნებს დღემდე მათ დახსნას? როგორ შესრულდება იესოს სიტყვები: „როცა ამის ახდენა დაიწყება, გაიმართეთ და თავი ასწიეთ, რადგან ახლოვდება თქვენი ხსნა“? (ლუკა 21:28). და როგორ იხსნის ღმერთი თავის მსახურებს, რომლებიც უკვე მოკვდნენ? მომდევნო სტატია განიხილავს ამ საკითხებს.

ხსნა სამართლიან ახალ ქვეყნიერებაში საცხოვრებლად

„[ისინი] დაამდებიან დიდი მშვიდობით“ (ფსალმუნი 36:11).

1, 2. ა) რა სხვაობა იქნება ჩვენი დროის ხსნასა და ხსნის იმ შემთხვევებს შორის, რომლებიც ძველ დროში მოხდა? ბ) რა ქვეყნიერებაში მიიყვანს იეჰოვა თავის ხალხს?

იეჰოვა მხსნელი ღმერთია. ძველ დროს მას მრავალჯერ უხსნია თავისი ხალხი. იმ შემთხვევებში ხსნა დროებითი იყო, რადგან იეჰოვას არც ერთხელ არ შეუსრულებია სატანის მთელი ქვეყნიერებისთვის სამუდამო განაჩენი. მაგრამ ჩვენს დროში, მალე, იეჰოვა ყველაზე დიდებულად იხსნის ყველა თავის მსახურს. ამჯერად ის მთელ დედამიწაზე მოფენილი სატანის სისტემის კვალსაც არ დატოვებს და მიიყვანს თავის მსახურებს მუდმივ სამართლიან ახალ ქვეყნიერებაში (2 პეტრე 2:9; 3:10–13).

² იეჰოვა გვპირდება: „კიდევ ცოტა და აღარ იქნება ბოროტი, . . ხოლო თავმდაბალნი დაიმკვიდრებენ ქვეყნიერებას და დაამდებიან დიდი მშვიდობით“ (ფსალმუნი 36:10, 11). რამდენი ხნით? „მართალნი დაიმკვიდრებენ ქვეყანას და იარსებებენ მასზე უკუნისამდე“ (ფსალმუნი 36:29; მათე 5:5). მაგრამ, სანამ ეს მოხდებოდეს, ქვეყნიერება ისეთი გაჭირვების პერიოდს გაივლის, როგორიც არასდროს უნახავს.

„დიდი გასაჭირი“

3. როგორ აღწერა იესომ „დიდი გასაჭირი“?

³ ათას ცხრაას თოთხმეტ წელს ამ ქვეყნიერებამ თავის „უკანასკნელ დღეებში“ შეაბიჯა (2 ტიმოთე 3:1–5, 13). ახლა ჩვენ ამ პერიოდში უკვე 83 წელია, რაც ვცხოვრობთ და ვუახლოვდებით მის აღსასრულს, როცა იესოს წინასწარმეტყველების თანახმად, შემდეგი მოხდება: „იქნება დიდი გასაჭირი, როგორიც არ ყოფილა წუთისოფლის დასაბამიდან დღემდე და აღარც არასოდეს იქნება“ (მათე 24:21). დიახ, მეორე მსოფლიო ომზე უარესი, რომელმაც დაახლოებით 50 მილიონი სიცოცხლე იმსხვერპლა. რა დრო ახლოვდება ძალიან სწრაფად — დრო, რომელიც შეაზანზარებს ქვეყნიერებას!

4. რატომ გამოაქვს ღმერთს განაჩენი ‘დიდი ბაბილონის’ წინააღმდეგ?

⁴ „დიდი გასაჭირი“ გამაოგნებლად სწრაფად მოვა, „ერთ საათში“ (გამოცხადება 18:10). მის მოულოდნელ დაწყებას აღნიშნავს ღვთის განაჩენის შესრულება მთელი ცრუ რელიგიის წინააღმდეგ, რომელსაც ღვთის სიტყვა ‘დიდ ბაბილონს’ უწოდებს (გამოცხადება 17:1–6, 15). ძველი ბაბილონის მთავარი დამახასიათებელი ნაწილი ცრუ რელიგია იყო. ადრინდელის ტყუპისცალივით დღევანდელი ბაბილონი ცრუ რელიგიის მსოფლიო მპყრობელს წარმოადგენს. პოლიტიკურ სტრუქტურებთან სამარცხვინო ურთიერთობით ის მეძავის როლს თამაშობს. ის მხარს უჭერს მათ ომებს და საწინააღმდეგო მხარეთა ჯარებს აკურთხებს, რის შედეგადაც ერთი რელიგიის ადამიანები ერთმანეთს ხოცავენ (მათე 26:51, 52; 1 იოანე 4:20, 21). ის თვალს ხუჭავს თავის მომხრეთა გახრწნილ საქმეებზე და დევნის ჭეშმარიტ ქრისტიანებს (გამოცხადება 18:5, 24).

5. როგორ დაიწყება „დიდი გასაჭირი“?

⁵ ‘დიდი გასაჭირის’ დაწყებას აღნიშნავს პოლიტიკური სტრუქტურების მხრიდან ‘დიდ ბაბილონზე’ მოულოდნელი თავდასხმა. ისინი „შეიძულებენ მეძავს, დაარბევენ მას და გააშიშვლებენ, მის ხორცს შეჭამენ და მას ცეცხლში დაწვავენ“ (გამოცხადება 17:16). ამის შემდეგ მისი ყოფილი მომხრეები „იტირებენ და იგლოვებენ მას“ (გამოცხადება 18:9–19). ხოლო იეჰოვას მსახურები, რომლებიც ამ მოვლენას დიდი ხნის მანძილზე ელოდებიან, წამოიძახებენ: «ალილუია! [„აქეთ იაჰ!“ აქ]. . . რადგან მან განიკითხა დიდი მეძავი, რომელმაც წარყვნა დედამიწა თავისი მეძავობით, და იძია თავისი მონების სისხლი მისი ხელიდან» (გამოცხადება 19:1, 2).

ღვთის მსახურებს თავს ესხმიან

6, 7. რატომ შეუძლიათ იეჰოვას მსახურებს, ‘დიდ გასაჭირში’ მათზე თავდასხმის პერიოდში დარწმუნებული იყვნენ წარმატებაში?

⁶ ცრუ რელიგიის განადგურების შემდეგ პოლიტიკური სტრუქტურები თავის ყურადღებას იეჰოვას მსახურებს მიაპყრობენ. წინასწარმეტყველებაში სატანა, ‘გოგ მაგოგელი’, ამბობს: „თავს დავესხმები უზრუნველ ხალხს, მშვიდად მცხოვრებთ“. რადგან იოლ ნადავლად წარმოუდგენია, ის ‘ქვეყნის დამფარავი ღრუბლის მსგავსი ურიცხვი ლაშქრით’ თავს დაესხმის მათ (ეზეკიელი 38:2, 10–16). იეჰოვას ხალხმა იცის, რომ ეს თავდასხმა წარუმატებელი იქნება, რადგან ისინი იეჰოვაზე არიან მინდობილნი.

⁷ როცა ფარაონი და მისი ჯარები ფიქრობდნენ, რომ ღვთის მსახურები მეწამულ ზღვასთან მახეში მოქცეული ჰყავდათ, იეჰოვამ სასწაულებრივად იხსნა თავისი ხალხი და გაანადგურა ეგვიპტის ჯარები (გამოსვლა 14:26–28). ‘დიდი გასაჭირის’ დროს, როცა ერები იეჰოვას ხალხს მახეში დაჭერილად ჩათვლიან, ის კვლავ მოვა სასწაულებრივად სახსნელად: „იმ დღეს. . . აღიგზნება ჩემი რისხვა ჩემს ნესტოებში. შურითა და რისხვის ცეცხლით ვლაპარაკობ“ (ეზეკიელი 38:18, 19). ამ დროს ‘დიდი გასაჭირის’ კულმინაცია გარდაუვალი იქნება!

8. რომელი ზებუნებრივი მოვლენები მოხდება, სანამ იეჰოვა დასჯის ბოროტებს და რა შედეგი ექნება მათ?

⁸ ‘დიდი გასაჭირის’ დაწყების შემდეგ, მაგრამ ქვეყნიერების დანარჩენ ნაწილზე იეჰოვას მიერ განაჩენის შესრულებამდე, გარკვეულ ეტაპზე ზებუნებრივ მოვლენებს ექნება ადგილი. ყურადღება მიაქციე, რა შედეგი ექნება ამ მოვლენებს. „მაშინ გამოჩნდება კაცის ძის [ქრისტეს] ნიშანი ზეცაში და მაშინ მოჰყვება მოთქმას დედამიწის ყველა ტომი, და იხილავენ კაცის ძეს, ცის ღრუბლებზე მომავალს, დიადი ძალითა და დიდებით“ (მათე 24:29, 30). „იქნება ნიშნები მზეზე და მთვარეზე და ვარსკვლავებზე. . . ხალხს გული შეუწუხდება შიშით და ქვეყნად მომავალთა მოლოდინით“ (ლუკა 21:25, 26).

„ახლოვდება თქვენი ხსნა“

9. რატომ შეძლებენ იეჰოვას მსახურები ‘თავის აწევას’ ზებუნებრივი მოვლენების დროს?

⁹ ლუკას 21:28-ში მოცემული წინასწარმეტყველება სწორედ ამ განსაკუთრებულ დროს ეხება. იესომ თქვა: „როცა ამის ახდენა დაიწყება, გაიმართეთ და თავი ასწიეთ, რადგან ახლოვდება თქვენი ხსნა“. ღვთის მტრები აკანკალდებიან შიშისგან, რადგან მიხვდებიან, რომ მოქმედი ზებუნებრივი მოვლენები იეჰოვასგან გამომდინარეობს. ხოლო იეჰოვას მსახურები გაიხარებენ, რადგან ეცოდინებათ, რომ მათი ხსნა ახლოვდება.

10. როგორ აღწერს ღვთის სიტყვა ‘დიდი გასაჭირის’ კულმინაციას?

¹⁰ მაშინ იეჰოვა საბოლოოდ და სასიკვდილოდ დასცხებს სატანის სისტემას: „დავსჯი მათ შავი ჭირით და სისხლით; თავსხმას, ქვის სეტყვას, ცეცხლსა და წუმწუმას ვაწვიმებ მათზე, მის ურდოებზე. . . მაშინ მიხვდებიან, რომ უფალი ვარ“ (ეზეკიელი 38:22, 23). სატანის სისტემის ბოლო კვალიც წაიშლება. ღვთის უგულებელმყოფელ ადამიანთა მთელი საზოგადოება განადგურებული იქნება. ასეთი იქნება ‘დიდ გასაჭირში’ არმაგედონის კულმინაცია (იერემია 25:31–33; 2 თესალონიკელთა 1:6–8; გამოცხადება 16:14, 16; 19:11–21).

11. რატომ იქნებიან დახსნილნი იეჰოვას მსახურები ‘დიდი გასაჭირიდან’?

¹¹ მთელ დედამიწაზე ‘დიდი გასაჭირისგან’ დახსნილი იეჰოვას მილიონობით თაყვანისმცემელი იქნება. ესენი შეადგენენ „ყოველი ერიდან და ტომიდან, ხალხებიდან და ენებიდან“ გამოსულ ‘უამრავ ხალხს’. რატომ დაიხსნის მათ იეჰოვა ასეთი თრთოლვის მომგვრელი საშუალებით? რადგან ისინი „ემსახურებიან მას დღე და ღამე“. ამიტომ ისინი გადაურჩებიან ამ ქვეყნიერების აღსასრულს და შევლენ სამართლიან ახალ ქვეყნიერებაში (გამოცხადება 7:9–15). ამრიგად, ისინი დაამოწმებენ იეჰოვას აღთქმის შესრულებას: „მიენდე უფალს და დაიცავი მისი გზა, და ის აგამაღლებს, რომ დაიმკვიდრო ქვეყანა, და დაინახავ უკეთურთა განადგურებას“ (ფსალმუნი 36:34).

ახალი ქვეყნიერება

12. რის იმედი შეიძლება ჰქონდეთ არმაგედონგადატანილებს?

¹² რა ამაღელვებელი დრო იქნება ეს — ბოროტების აღმოფხვრა და ადამიანთა მთელ ისტორიაში ყველაზე დიდებული ეპოქის გათენება! (გამოცხადება 20:1–4). რა დიდ მადლობას მიუძღვნიან არმაგედონგადატანილები იეჰოვას, როცა შევლენ ღვთის შექმნილ ბრწყინვალე, წმინდა ცივილიზაციაში — დედამიწაზე ახალ ქვეყნიერებაში — დედამიწაზე, რომელიც სამოთხედ გარდაიქმნება! (ლუკა 23:43, აქ). და მათ აღარასდროს მოუწევთ სიკვდილი! (იოანე 11:26). ნამდვილად, იმ დროიდან მათ ექნებათ ისეთივე ხანგრძლივი სიცოცხლის საოცარი, სასწაულებრივი პერსპექტივა, რა ხანგრძლივი სიცოცხლეც იეჰოვას აქვს!

13. როგორ განაგრძობს იესო დედამიწაზე დაწყებულ სამკურნალო პრაქტიკას?

¹³ იესო, რომელიც იეჰოვამ ზეციერ მეფედ დანიშნა, ზედამხედველობას გაუწევს სასწაულებრივ კურთხევებს, რომლებითაც დახსნილები ისარგებლებენ. დედამიწაზე ყოფნისას ის ბრმებს მხედველობას და ყრუებს სმენას უბრუნებდა და „კურნავდა ყოველგვარ სენს და ყოველგვარ უძლურებას“ (მათე 9:35; 15:30, 31). ახალ ქვეყნიერებაში ის განაგრძობს ამ დიდებულ სამკურნალო პრაქტიკას, მაგრამ უკვე გლობალური მასშტაბით. როგორც ღვთის წარმომადგენელი, ის შეასრულებს აღთქმას: „[ღმერთი] მოსწმედს ყველა ცრემლს მათი თვალებიდან და აღარ იქნება სიკვდილი. გლოვა, გოდება და ტკივილიც აღარ იქნება, რადგან წინანდელნი გარდახდნენ“ (გამოცხადება 21:4). ხალხს აღარასდროს დასჭირდება ექიმების ან დამკრძალავების დახმარება! (ესაია 25:8; 33:24).

14. რა ხსნა ელით იეჰოვას მსახურებს, რომლებიც უკვე გარდაცვლილები არიან?

¹⁴ აგრეთვე დახსნილებს შორის ღვთის ყველა ის ერთგული მსახური იქნება, რომლებიც წარსულში გარდაიცვალნენ. ახალ ქვეყნიერებაში ის გამოგლეჯს მათ საფლავის კლანჭებიდან. იეჰოვა გარანტიას იძლევა: „იქნება მკვდრეთით აღდგომა როგორც მართალთა, ისე უკეთურთა“ (საქმეები 24:15). როგორც ჩანს, ‘მართლები’ უფრო ადრე იქნებიან აღდგენილები და თავიანთ წვლილს შეიტანენ სამოთხის გაფართოებაში. რა საინტერესო იქნება არმაგედონგადატანილებისთვის ძველი დროის ერთგული ადამიანების მრავალი გამოცდილების მოსმენა, რომლებიც ახლა სიცოცხლეს დაუბრუნდებიან! (იოანე 5:28, 29).

15. აღწერე რამდენიმე პირობა, რომლებშიც ადამიანები ახალ ქვეყნიერებაში იცხოვრებენ.

¹⁵ მაშინ ყველა მცხოვრები შეიგრძნობს იეჰოვას შესახებ ფსალმუნმომღერლის ნათქვამს: „აღაპყრობ შენს ხელს და დააკმაყოფილებ ყოველ სულდგმულს“ (ფსალმუნი 144:16). აღარ იქნება შიმშილობა: დედამიწა აღიდგენს ეკოლოგიურ წონასწორობას და უხვად წარმოშობს ნაყოფს (ფსალმუნი 71:16). აღარ იქნებიან უსახლკაროები: „ააშენებენ სახლებს და იცხოვრებენ“ და თითოეული „თავისი ვაზის და ლეღვის ქვეშ იჯდება და არავინ იქნება დამაფრთხობელი“ (ესაია 65:21, 22; მიქა 4:4). აღარ იქნება შიში: აღარ იქნება ომი, ძალადობა თუ დამნაშავეობა (ფსალმუნი 45:9, 10; იგავნი 2:22). „დაისვენა, დამყუდროვდა მთელი ქვეყანა, მხიარულად ყიჟინობს“ (ესაია 14:7).

16. რატომ გაჟღენთს ახალ ქვეყნიერებას სამართლიანობა?

¹⁶ ახალ ქვეყნიერებაში გაუქმდება სატანის პროპაგანდის საშუალებები. მის ნაცვლად, ‘სამყაროს მკვიდრნი სიმართლეს ისწავლიან’ (ესაია 26:9; 54:13). წლიდან წლამდე საღი სულიერი სწავლებით „აივსება მიწა უფლის ცოდნით, როგორც ზღვა არის წყლებით დაფარული“ (ესაია 11:9). კაცობრიობა გაიჟღინთება აღმშენებლური აზრებითა და მოქმედებებით (ფილიპელთა 4:8). წარმოიდგინე დამნაშავეობის, ეგოტიზმისა და შურისგან თავისუფალ ადამიანთა მსოფლიო საზოგადოება — საერთაშორისო ძმობა, რომელშიც ყველა გამოავლენს ღვთის სულის ნაყოფებს. სინამდვილეში, ასეთ თვისებებს უამრავი ხალხი უკვე დღეს ავითარებს (გალატელთა 5:22, 23).

რატომ ასე დიდხანს?

17. რატომ აყოვნებს იეჰოვა ასე დიდხანს ბოროტების განადგურებას?

¹⁷ მაგრამ, რატომ აყოვნებს იეჰოვა ასე დიდხანს ბოროტების განადგურებასა და ახალ ქვეყნიერებაში საცხოვრებლად თავისი ხალხის ხსნას? განვიხილოთ, რა უნდა შესრულებულიყო. ყველაზე მნიშვნელოვანი არის იეჰოვას უზენაესი ხელისუფლების, მართვის უფლების გამართლება. საკმარისი დროის დათმობით მან, ყოველგვარი ეჭვის გარეშე, ცხადყო, რომ მისი უზენაესი ხელისუფლების გარეშე ადამიანთა მმართველობა არნახულ მარცხს განიცდის (იერემია 10:23). ამიტომ, ახლა იეჰოვა სრულიად გამართლებულია თავის მოქმედებაში — შეცვალოს ადამიანთა მმართველობა თავისი ზეციერი სამეფოს მმართველობით, რომელსაც ქრისტე უხელმძღვანელებს (დანიელი 2:44; მათე 6:9, 10).

18. როდის დაიმკვიდრებდნენ აბრაამის შთამომავლები ქანაანის ქვეყანას?

¹⁸ ამ საუკუნეების განმავლობაში მომხდარი აბრაამის დროს მომხდარის ანალოგიურია. იეჰოვამ უთხრა აბრაამს, რომ მისი შთამომავლები ქანაანის ქვეყანას დაიმკვიდრებდნენ — მაგრამ ეს არ მოხდებოდა მომდევნო ოთხასი წლის განმავლობაში, რადგან ჯერ არ „[ავსებულა] ამორეველების უკეთურებათა საწყაული“ (დაბადება 12:1–5; 15:13–16). აქ გამოყენებული სიტყვა ‘ამორეველები’ (გაბატონებული ტომი), როგორც ჩანს, მთლიანობაში ქანაანელებს წარმოადგენს. ამრიგად, დაახლოებით ოთხ საუკუნეს უნდა გაევლო, სანამ იეჰოვა შესაძლებლობას მისცემდა თავის ხალხს, ქანაანი დაეპყროთ. ამასობაში იეჰოვა ნებას რთავდა ქანაანში მცხოვრებ ერებს, თავიანთი საზოგადოებები ჩამოეყალიბებინათ. რა შედეგით?

19, 20. რა საზოგადოებები ჩამოაყალიბეს ქანაანელებმა?

¹⁹ ჰენრი ჰ. ჰალეის „ბიბლიის ცნობარი“ (Bible Handbook) აღნიშნავს, რომ მეგიდოში არქეოლოგებმა ბაალის ქალღმერთ-ცოლის აშთორეთის ტაძრის ნანგრევები აღმოაჩინეს. ის წერს: „ტაძრიდან რამდენიმე ნაბიჯში არსებულ სასაფლაოზე აღმოაჩინეს დოქები, რომლებიც ამ ტაძარში მსხვერპლად შეწირული პატარა ბავშვების ნეშტით იყო სავსე. . . ბაალისა და აშთორეთის წინასწარმეტყველები პატარა ბავშვების ოფიციალური მკვლელები იყვნენ“. «კიდევ ერთი შემაძრწუნებელი წეს-ჩვეულება [ის] იყო, რასაც „საძირკვლის მსხვერპლს“ უწოდებდნენ. სახლის აშენებისას ბავშვს სწირავდნენ და მის სხეულს კედელში ატანდნენ».

²⁰ ჰალეი შენიშნავს: „ბაალისადმი, აშთორეთისა და ქანაანელთა სხვა ღმერთებისადმი თაყვანისმცემლობა უკიდურეს აღვირახსნილობას შეიცავდა; მათი ტაძრები ბიწიერების ცენტრებს წარმოადგენდა. . . თავიანთი ღმერთებისადმი ქანაანელების თაყვანისმცემლობაში შედიოდა უზნეო გართობა. . . და შემდეგ იმავე ღმერთებისადმი საკუთარი პირველშობილი ბავშვების შეწირვა. იქმნება შთაბეჭდილება, რომ უფრო ფართო გაგებით ქანაანელების ქვეყანა როგორც ერი, სოდომისა და გომორის მსგავსი გახდა. . . განა ასეთ საზიზღრად გარყვნილ და მხეცურ ცივილიზაციას ჰქონდა კვლავ არსებობის უფლება? . . არქეოლოგებს, რომლებიც ქანაანელთა ქალაქების გათხრებს აწარმოებდნენ, უკვირდათ, რომ ღმერთმა ადრევე არ გაანადგურა ისინი (შეადარე მესამე მეფეთა 21:25, 26).

21. რა მსგავსებაა ქანაანელების პერიოდსა და ჩვენს დროს შორის?

²¹ ამორეველების ბოროტების ‘საწყაული აივსო’. ამიტომ მათ გასანადგურებლად იეჰოვას მოქმედება სრულიად გამართლებული იყო. დღესაც იგივე მდგომარეობაა. ეს ქვეყნიერება გაჟღენთილია ძალადობით, უზნეობითა და ღვთის კანონებისადმი სიძულვილით. და, რადგან ჩვენ მართებულად გვაშფოთებს ძველი დროის ქანაანელების მიერ ბავშვების შემაძრწუნებელი შეწირვა, რას ვიტყოდით ამ ქვეყნიერების ომებში შეწირული ათეულობით მილიონი ახალგაზრდის შესახებ, რომლებიც ქანაანში შეწირულზე ბევრად უფრო უარეს მსხვერპლს წარმოადგენენ? ნამდვილად, ახლა იეჰოვას მხრიდან ამ ბოროტი სისტემის განადგურება სრულიად გამართლებულია.

კიდევ რაღაცის შესრულება

22. რა სრულდება დღეს იეჰოვას მოთმინების წყალობით?

²² ამ უკანასკნელ დღეებში იეჰოვას მოთმინების შედეგად კიდევ რაღაცა სრულდება. ის შეკრებისა და განათლების დროს აძლევს უამრავ ხალხს, რომელთა რიცხვი უკვე ხუთ მილიონზე მეტს ითვლის. იეჰოვას ხელმძღვანელობით ისინი ჩამოყალიბდნენ პროგრესულ ორგანიზაციად. მამაკაცები, ქალები და ახალგაზრდობა მომზადებულია სხვებისთვის ბიბლიის ჭეშმარიტებების სასწავლებლად. კრებებისა და ბიბლიური პუბლიკაციების საშუალებით ისინი ღვთის მოსიყვარულე გზებს სწავლობენ (იოანე 13:34, 35; კოლასელთა 3:14; ებრაელთა 10:24, 25). ამასთანავე, „კეთილი ცნობის“ (აქ) ქადაგების მხარდასაჭერად ისინი ოსტატდებიან მშენებლობასა და ელექტრონიკაში, ბეჭდვასა და სხვა სფეროებში (მათე 24:14). მოსალოდნელია, რომ ასეთი სასწავლო და სამშენებლო ხელოვნება ფართოდ იქნება გამოყენებული ახალ ქვეყნიერებაში.

23. რატომ წარმოადგენს დიდებულ პრივილეგიას ჩვენს დროში ცხოვრება?

²³ დიახ, დღეს იეჰოვა ამზადებს თავის მსახურებს, რომ გადაიტანონ „დიდი გასაჭირი“ და იცხოვრონ სამართლიან ახალ ქვეყნიერებაში. მაშინ აღარ იქნება სატანა და ბოროტი ქვეყნიერება, რომელთა წინააღმდეგ ბრძოლა მოუწევდათ, აღარ იქნება დაავადებები, მწუხარება და სიკვდილი. ღვთის ხალხი დიდი ენთუზიაზმითა და სიხარულით შეასრულებს სამოთხის გაშენებასთან დაკავშირებულ სასიხარულო დავალებას, სადაც ყოველდღე „დაამდებიან“ სიცოცხლით. რა დიდებული პრივილეგია გვაქვს — ჩვენ ვცხოვრობთ ეპოქათა ასეთ კულმინაციურ პერიოდში, ჩვენ ვიცნობთ და ვემსახურებით იეჰოვას და გვესმის, რომ ძალიან მალე ჩვენ ‘ავწევთ თავს, რადგან ჩვენი ხსნა ახლოვდება’! (ლუკა 21:28; ფსალმუნი 145:5).