განაწყე გული გამჭრიახობისკენ

«რადგან უფალი იძლევა სიბრძნეს და მის ბაგეთაგან არის ცოდნა და შეგნება [„გამჭრიახობა“, აქ]» (იგავნი 2:6).

1. როგორ შეგვიძლია განვაწყოთ გული გამჭრიახობისკენ?

იეჰოვა ჩვენი დიდებული მოძღვარია (ესაია 30:20, 21). მაგრამ რა უნდა გავაკეთოთ მის სიტყვაში მოცემული ‘ღვთის შემეცნებიდან’ სარგებლობის მისაღებად? გარკვეული გაგებით ჩვენ „გული უნდა განვაწყოთ გამჭრიახობისკენ“ (აქ) — გულწრფელად უნდა ვისურვოთ ამ თვისების მოპოვება და გამოვლენა. ამისთვის ჩვენ ღმერთს უნდა მივმართოთ, რადგან ბრძენმა მამაკაცმა თქვა: «უფალი იძლევა სიბრძნეს და მის ბაგეთაგან არის ცოდნა და შეგნება [„შემეცნება და გამჭრიახობა“, აქ]» (იგავნი 2:1–6). რა არის შემეცნება, სიბრძნე და გამჭრიახობა?

2. ა) რა არის შემეცნება? ბ) როგორ განმარტავდი სიბრძნეს? გ) რა არის გამჭრიახობა?

² შემეცნება არის გამოცდილების, დაკვირვების ან გამოკვლევის შედეგად შეძენილი ფაქტების კარგი ცოდნა. სიბრძნე საქმეში შემეცნების გამოყენების უნარია (მათე 11:19). მეფე სოლომონმა სიბრძნე გამოავლინა, როცა ორი ქალი ერთსა და იმავე ბავშვზე უფლებას აცხადებდა; კამათის გადასაწყვეტად მან შვილისადმი დედის ერთგულების ცოდნა გამოიყენა (მესამე მეფეთა 3:16–28). გამჭრიახობა „მახვილი აზროვნებაა“. ეს „გონებრივი უნარია, რომლის საშუალებითაც ის განასხვავებს ერთს მეორისგან“ („უებსტერის უნივერსალური ლექსიკონი“ [Webster’s Universal Dictionary]). თუ ჩვენს გულებს გამჭრიახობისკენ განვაწყობთ, იეჰოვა მოგვცემს მას თავისი ძის მეშვეობით (2 ტიმოთე 2:1, 7). მაგრამ როგორ შეუძლია გამჭრიახობას ცხოვრების სხვადასხვა მხარეზე გავლენის მოხდენა?

გამჭრიახობა და ჩვენი მეტყველება

3. როგორ ახსნიდი იგავნის 11:12, 13 და რას ნიშნავს ‘უგულობა’?

³ გამჭრიახობა გვეხმარება იმის შეგნებაში, რომ არის „ჟამი დუმილისა და ჟამი უბნობისა“ (ეკლესიასტე 3:7). ეს თვისება აგრეთვე ლაპარაკში ფრთხილებს გვხდის. იგავნის 11:12, 13-ში ნათქვამია: «ჭკუათხელი [„უგულო“, აქ] თავის ახლობელს აწყენინებს, გონიერი [„გამჭრიახი“, აქ] კაცი კი დადუმებულია. ამბისტანია ამჟღავნებს საიდუმლოს, ერთგული სული კი ინახავს სიტყვას». დიახ, მამაკაცი თუ ქალი, რომელიც სხვა ადამიანს აბუჩად იგდებს, ‘უგულოა’. ლექსიკოგრაფის, ვილჰელმ გეზენიუსის სიტყვების თანახმად, ასეთ ადამიანს „გაგება არა აქვს“. მისი მსჯელობა უსარგებლოა და სიტყვა ‘უგულოს’ გამოყენება ცხადყოფს, რომ შინაგან პიროვნებას დადებითი თვისებები აკლია. თუ მოლაქლაქე, რომელიც საკუთარ თავს ქრისტიანად აცხადებს, ცილისწამებასა და ლანძღვა-გინებაზე გადადის, დანიშნულმა უხუცესებმა ბოლო უნდა მოუღონ კრებაში ასეთ არაჯანსაღ ვითარებას (ლევიანნი 19:16; ფსალმუნი 100:5; 1 კორინთელთა 5:11).

4. როგორ მოქმედებენ გამჭრიახი და ერთგული ქრისტიანები საიდუმლო ინფორმაციის შემთხვევაში?

⁴ ‘უგულოსგან’ განსხვავებით „გამჭრიახი“ დუმს სათანადო მდგომარეობაში. ის არ არის საიდუმლოს გამტეხი (იგავნი 20:19). რადგან იცის, რომ წინდაუხედავი ლაპარაკი შეიძლება მავნებელი იყოს, გამჭრიახი ‘ერთგულია’. ასეთი ადამიანები თანამორწმუნეების ერთგულნი არიან და არ ახმაურებენ საიდუმლო საკითხებს, რომლებმაც შეიძლება თანამორწმუნეები საფრთხეში ჩააგდოს. კრებასთან დაკავშირებული ნებისმიერი საიდუმლო ინფორმაციის გაგების შემთხვევაში გამჭრიახი ქრისტიანები ინახავენ მას, სანამ იეჰოვას ორგანიზაცია სათანადოდ არ მიიჩნევს საკუთარი პუბლიკაციების საშუალებით მის გამოქვეყნებას.

გამჭრიახობა და ჩვენი ყოფაქცევა

5. როგორ უყურებენ ‘უგუნურები’ თავაშვებულ ყოფაქცევას და რატომ?

⁵ ბიბლიის იგავები ხელს გვიწყობს გამჭრიახობის გამოყენებასა და შეუფერებელი ყოფაქცევის არიდებაში. მაგალითად, იგავნის 10:23-ში ნათქვამია: «უგუნურის ხალისი [„ხუმრობა“, აქ] ავის ქმნაშია, ხოლო გონიერი [„გამჭრიახი“, აქ] კაცისა — სიბრძნეში» (იგავნი 10:23). ადამიანები, რომლებისთვისაც თავაშვებული ყოფაქცევა ‘ხუმრობაა’ ბრმებივით ვერ ხედავენ თავიანთ მცდარ ყოფაქცევას და უგულებელყოფენ ღმერთს, როგორც პიროვნებას, რომელსაც ყველამ ანგარიში უნდა ჩააბაროს (რომაელთა 14:12). ასეთი ‘უგუნურები’ იმ ზომამდე ირყვნებიან თავიანთ მსჯელობაში, რომ ფიქრობენ, ღმერთი ვერ ხედავს მათ ბოროტმოქმედებას. ფაქტობრივად, თავიანთი მოქმედებით ისინი ამბობენ: „არ არის ღმერთი“ (ფსალმუნი 13:1–3; ესაია 29:15, 16). რადგან ღვთის პრინციპებით არ ხელმძღვანელობენ, მათ არა აქვთ გამჭრიახობა და საქმეებსაც ვერ განსჯიან სწორად (იგავნი 28:5).

6. რატომ არის თავაშვებული ყოფაქცევა უგუნურება და როგორ შევხედავთ მას, თუ გამჭრიახები ვართ?

⁶ ‘გამჭრიახ კაცს’ ესმის, რომ თავაშვებული ყოფაქცევა „ხუმრობა“, თამაში არ არის. მან იცის, რომ ასეთ ყოფაქცევას ღვთის უსიამოვნების გამოწვევა და მასთან დამოკიდებულების გაფუჭებაც კი შეუძლია. ასეთი ყოფაქცევა უგუნურებაა, რადგან ის ადამიანებს ღირსების გრძნობას ართმევს, ქორწინებებს ანგრევს, გონებასა და სხეულს ავნებს და სულიერობის დაკარგვას იწვევს. ამიტომ, მოდი განვაწყოთ გული გამჭრიახობისკენ და მოვერიდოთ თავაშვებულ ყოფაქცევასა თუ ყოველგვარ უზნეობას (იგავნი 5:1–23).

გამჭრიახობა და ჩვენი განწყობილება

7. რა ფიზიკური შედეგები აქვს რისხვას?

⁷ გამჭრიახობისკენ ჩვენი გულის განწყობა აგრეთვე ჩვენი განწყობილების გაკონტროლებაში გვეხმარება. «სულგრძელ კაცს დიდი გონიერება [„გამჭრიახობა“, აქ] ახლავს, — ამბობს იგავნის 14:29 — ხელმოკლე კი [„სულმოკლე“, „ძველი აღთქმის ორტომეული“, 1884 წლის გამოცემა] სიბრიყვეს ამხელს». ერთ-ერთი მიზეზი, რომლის გამოც გამჭრიახი ადამიანი დაუოკებელი რისხვის არიდებას ცდილობს ის არის, რომ ასეთი რისხვა პირადად ჩვენზე მოქმედებს საზიანოდ. ასეთმა რისხვამ შეიძლება სისხლის წნევა აწიოს და სასუნთქი ორგანოების პრობლემები გამოიწვიოს. ექიმები მიუთითებენ რისხვასა და გააფთრებაზე, როგორც ემოციური მდგომარეობის გაუარესებაზე ან ისეთი დაავადებების გამომწვევზე, როგორიცაა ასთმა, კანის დაავადებები, კუჭ-ნაწლავთან დაკავშირებული პრობლემები და წყლულები.

8. რის გამოწვევა შეუძლია სულმოკლეობას, მაგრამ როგორ გვეხმარება გამჭრიახობა ამ შემთხვევაში?

⁸ გამჭრიახები და ‘სულგრძელები’ მხოლოდ ჯანმრთელობისთვის ზიანის ასარიდებლად არ უნდა ვიყოთ. სულმოკლეობამ შეიძლება სიბრიყვე ჩაგვადენინოს, რომელზეც მოგვიანებით ვინანებთ. გამჭრიახობა დაგვაფიქრებს, თუ რა შეიძლება მოჰყვეს შეუკავებელ ლაპარაკსა თუ წინდაუხედავ ქცევას და ამრიგად გვიცავს უგუნური მოქმედებით გამოწვეული ‘სიბრიყვისგან’. გამჭრიახობა განსაკუთრებით იმის შეგნებაში გვეხმარება, რომ რისხვამ შეიძლება ჩვენი აზროვნება მოშალოს და ამრიგად საღ მსჯელობაში ხელი შეგვიშალოს. ეს დაასუსტებდა ღვთის ნების შესრულების უნარსა და მისი სამართლიანი პრინციპების თანახმად ცხოვრებას. დიახ, დაუოკებელ რისხვაზე თვალების დახუჭვა საზიანოა სულიერად. სინამდვილეში, „რისხვა“ ‘ხორცის იმ საძაგელ საქმეებში’ შედის, რომლებიც შეგვიშლიდა ღვთის სამეფოს დამკვიდრებაში (გალატელთა 5:19–21). ამიტომ, მოდი როგორც გამჭრიახი ქრისტიანები, ვიყოთ „სმენაში მკვირცხლი, სიტყვასა და რისხვაში ნელი“ (იაკობი 1:19).

9. როგორ შეუძლია გამჭრიახობასა და ძმურ სიყვარულს დაგვეხმაროს უთანხმოებების მოწესრიგებაში?

⁹ გაბრაზების შემთხვევაში გამჭრიახობამ შეიძლება გვიჩვენოს, რომ კონფლიქტის ასარიდებლად საჭირო მოქმედება გაჩუმებაა. იგავნის 17:27-ში ნათქვამია: «მცოდნე კაცი სიტყვაძუნწია და გონების [„გამჭრიახობის“, აქ] კაცი დიდსულოვანია [„გულმშვიდი“, აქ]». გამჭრიახობა და ძმური სიყვარული დაგვეხმარება იმის დანახვაში, რომ აუცილებელია რამე საწყენის წამოროშვისკენ მიდრეკილების გაკონტროლება. ხოლო უკვე გადმონთხეული რისხვის შემთხვევაში, სიყვარული და თავმდაბლობა აღგვძრავს მობოდიშებისა და ზიანის ანაზღაურებისკენ. მაგრამ, დავუშვათ ვინმემ გვაწყენინა. მაშინ, მოდი ვესაუბროთ მას განცალკევებით, მშვიდად, მოკრძალებულად და რაც მთავარია, მშვიდობის დამყარების მიზნით (მათე 5:23, 24; 18:15–17).

გამჭრიახობა და ჩვენი ოჯახი

10. რა როლს თამაშობს სიბრძნე და გამჭრიახობა ოჯახურ ცხოვრებაში?

¹⁰ ოჯახის წევრებმა სიბრძნე და გამჭრიახობა უნდა გამოავლინონ, რადგან ეს თვისებები ოჯახის გამაძლიერებელია. იგავნის 24:3, 4 ამბობს: «სიბრძნით შენდება სახლი და გონიერებით [„გამჭრიახობით“, აქ] არის დაფუძნებული. ცოდნის წყალობით ივსება ოთახები ყოველგვარი ძვირფასი და საუცხოო ქონებით». წარმატებული ოჯახური ცხოვრებისთვის სიბრძნე და გამჭრიახობა შესანიშნავი სამშენებლო ქვების მსგავსია. გამჭრიახობა ეხმარება ქრისტიან მშობლებს, აღძრან შვილები გრძნობებისა და წუხილის გამოსათქმელად. გამჭრიახ პიროვნებას არ უჭირს მეუღლესთან ურთიერთობის დამყარება, მისი მოსმენა და გრძნობებისა და ფიქრების განჭვრეტა (იგავნი 20:5).

11. როგორ შეუძლია გამჭრიახ გათხოვილ ქალს ‘სახლის აშენება’?

¹¹ სიბრძნე და გამჭრიახობა, უეჭველად, მნიშვნელოვანია ბედნიერი ოჯახური ცხოვრებისთვის. მაგალითად, იგავნის 14:1-ში ნათქვამია: „ბრძენი დედაკაცი თავის სახლს აშენებს, ბრიყვი კი საკუთარი ხელით ანგრევს მას“. ბრძენი, გამჭრიახი და სათანადოდ ქმრის მორჩილი ქალი გულმოდგინედ იშრომებს ოჯახის კეთილდღეობისთვის და, ამრიგად, ხელს შეუწყობს მის აშენებას. ერთ-ერთი საშუალება, რომელიც ‘მის სახლს ააშენებს’, არის ქმრის შესახებ ყოველთვის დადებითად ლაპარაკი და, ამრიგად, ქმრისადმი სხვების პატივისცემის გაზრდა. ხოლო უნარიანი, გამჭრიახი ცოლი, რომელსაც იეჰოვასადმი მოკრძალებული შიში აქვს, ქების ღირსია (იგავნი 12:4; 31:28, 30).

გამჭრიახობა და ჩვენი ცხოვრების გზა

12. როგორ უყურებენ ‘უგულოები’ სისულელეს და რატომ?

¹² გამჭრიახობა ყველა საქმეში გვეხმარება მართებული გზის შენარჩუნებაში. ეს ნაჩვენებია იგავნის 15:21-ში, რომელშიც ნათქვამია: «სისულელე ჭკუათხელის სიხარულია, ხოლო გონიერი [„გამჭრიახი“, აქ] კაცი სწორ გზაზე დადის». როგორ უნდა გვესმოდეს ეს იგავი? უგუნური მამაკაცების, ქალებისა და ახალგაზრდებისთვის სულელურად, ანუ უგუნურად მოქცევა სიხარულის მიზეზია. ისინი ‘უგულოები’, კეთილ მოტივებს მოკლებულები და ისეთი უგუნურები არიან, რომ უხარიათ სისულელე.

13. რა აღმოაჩინა სოლომონმა სიცილსა და ქარაფშუტობასთან დაკავშირებით?

¹³ ისრაელის გამჭრიახმა მეფე სოლომონმა აღმოაჩინა, რომ ქარაფშუტობას ყოველგვარი აზრი აკლია. მან აღიარა: „ვუთხარი ჩემს თავს: მოდი, გამოვცდი მხიარულებას და მივეცემი სიამეთა — და აჰა, ესეც ამაოება ყოფილა მხოლოდ. მივხვდი, გართობა ფუჭი საქმეა; მხიარულება რის მაქნისია?“ (ეკლესიასტე 2:1, 2). როგორც გამჭრიახი მამაკაცი, სოლომონი ხედავდა, რომ ცარიელი მხიარულება და სიცილი არ არის დამაკმაყოფილებელი, რადგან არ წარმოშობს ნამდვილ და ხანგრძლივ ბედნიერებას. სიცილმა შეიძლება დროებით დაგვავიწყებინოს პრობლემები, მაგრამ მოგვიანებით ისინი შეიძლება კვლავ ამოტივტივდეს, თანაც უფრო გართულებულ ფორმაში. სოლომონს სამართლიანად შეეძლო სიცილისთვის ‘ფუჭი საქმე’ ეწოდებინა. რატომ? იმიტომ, რომ უაზრო სიცილი აბუნდოვნებს საღ მსჯელობას. მან შეიძლება ძალიან სერიოზული საკითხები გულგრილად მიგვაღებინოს. სამასხარაო სიტყვებსა და მოქმედებებთან შეთანხმებული ასეთი გახარება საფუძვლიანს ვერაფერს წარმოშობს. ამიტომ სიცილსა და სიმხიარულესთან სოლომონის გამოკვლევის არსი გვეხმარება, რათა არ ვიყოთ „უფრო სიამეთა მოყვარულნი, ვიდრე ღვთისა“ (2 ტიმოთე 3:1, 4).

14. როგორ დადის „სწორ გზაზე“ გამჭრიახი კაცი?

¹⁴ როგორ დადის გამჭრიახი კაცი „სწორ გზაზე“? სულიერ გამჭრიახობასა და ღვთის პრინციპების გამოყენებას ადამიანები სწორი, პირდაპირი გზით მიჰყავს. ბაინგტონის თარგმანი კონკრეტულად ამბობს: „სისულელე ნეტარებაა უტვინოსთვის, გონიერი კი პირდაპირ ივლის“. ღვთის სიტყვის გამოყენების საფუძველზე „გამჭრიახი კაცი“ სწორი გზით წარმართავს თავის ნაბიჯებს და ცხოვრებაში კეთილისა და ბოროტის გარჩევის შემძლეა (ებრაელთა 5:14; 12:12, 13).

გამჭრიახობისთვის მუდამ იეჰოვას მიმართე

15. რას ვსწავლობთ იგავნის 2:6–9-დან?

¹⁵ ცხოვრებაში სწორი გზით სიარულისთვის ყველამ ჩვენი არასრულყოფილება უნდა ვაღიაროთ და სულიერი გამჭრიახობისთვის იეჰოვას მივმართოთ. იგავნის 2:6–9-ში ნათქვამია: «რადგან უფალი იძლევა სიბრძნეს და მის ბაგეთაგან არის ცოდნა და შეგნება [„გამჭრიახობა“, აქ], მასთან არის მართალთა შეწევნა, ის არის ფარი უმწიკვლოთათვის, იცავს სამართლის გზებს და მადლიანთა სავალს იფარავს. მაშინ მიხვდები, რა არის სიმართლე, სამართალი და სამართლიანობა — ყოველი კეთილი საქმე» (შეადარე იაკობი 4:6).

16. რატომ არ არსებობს იეჰოვას საპირისპირო სიბრძნე, გამჭრიახობა თუ რჩევა?

¹⁶ იეჰოვაზე ჩვენი დამოკიდებულების შეგნებით, მოდი მისი სიტყვის ღრმა გამოკვლევით თავმდაბლურად მისივე ნების შეგნებას ვეძებდეთ. ის ფლობს სიბრძნეს სრული გაგებით და მისი რჩევა ყოველთვის სასარგებლოა (ესაია 40:13; რომაელთა 11:34). ფაქტობრივად, მისი სიტყვების წინააღმდეგ წარდგენილი ყოველი რჩევა-დარიგება უფასურია. იგავნის 21:30 გვატყობინებს: „არ არსებობს სიბრძნე, არ არსებობს ცოდნა, არ არსებობს რჩევა უფლის პირისპირ“ (შეადარე იგავნი 19:21). მხოლოდ ღვთის სიტყვის შესწავლის საშუალებითა და ‘ერთგული და გონიერი მონის’ მეშვეობით მოწოდებული პუბლიკაციების დახმარებით განვითარებული სულიერი გამჭრიახობა დაგვეხმარება ცხოვრებაში მართებული გზის მიყოლაში (მათე 24:45–47). ამიტომ, მოდი წარვმართოთ ცხოვრების გზა იეჰოვას რჩევასთან შეთანხმებით და იმის ცოდნით, რომ რამდენად დამაჯერებელიც არ უნდა ჩანდეს საწინააღმდეგო რჩევა, ის ვერ შეედრება მის სიტყვას.

17. რის გამოწვევა შეუძლია მცდარ რჩევას?

¹⁷ გამჭრიახ ქრისტიან მრჩეველებს ესმით, რომ რჩევა მყარად უნდა იყოს დაფუძნებული ღვთის სიტყვაზე და რომ შეკითხვაზე პასუხით დაკმაყოფილებამდე ბიბლიის შესწავლა და მასზე დაფიქრებაა საჭირო (იგავნი 15:28). სერიოზულ საკითხებზე გაცემულმა არასწორმა პასუხებმა შეიძლება ძალიან გააფუჭოს საქმე. ამიტომ ქრისტიანი უხუცესები სულიერად გამჭრიახები უნდა იყვნენ და თანამორწმუნეებისთვის სულიერ მხარდაჭერაში მცდელობისას იეჰოვას უნდა მიმართონ ლოცვით.

სულიერი გამჭრიახობის სიუხვე

18. როგორ დაგვეხმარება გამჭრიახობა სულიერი წონასწორობის შენარჩუნებაში თუ კრებაში პრობლემა წამოიჭრება?

¹⁸ იეჰოვას საამებლად ჩვენ გვჭირდება ‘გაგება [„გამჭრიახობა“, აქ] ყველაფერში’ (2 ტიმოთე 2:7). მონდომებით ბიბლიის შესწავლა და ღვთის სულისა და ორგანიზაციის ხელმძღვანელობასთან შეთანხმებულად მოქმედება დაგვეხმარება, გამოვარჩიოთ ჩვენი მოქმედება ისეთ მდგომარეობაში, რომელსაც შეუძლია მცდარ გზაზე წაგვიყვანოს. მაგალითად, წარმოვიდგინოთ, კრებაში, ჩვენი აზრით, რაღაცა ისე არ ხდება, როგორც საჭიროა. სულიერი გამჭრიახობა დაგვეხმარება იმის დანახვაში, რომ ეს საფუძველს არ გვაძლევს იეჰოვას ხალხთან ურთიერთობის შეწყვეტისთვის და ღვთისადმი მსახურების მიტოვებისთვის. დაფიქრდი იეჰოვასადმი ჩვენი მსახურების უპირატესობაზე, სულიერ თავისუფლებაზე, რომლითაც ვსარგებლობთ, სიხარულზე, რომელსაც სამეფოს მაუწყებლებად მსახურებიდან ვიძენთ. სულიერი გამჭრიახობა შესაძლებლობას გვაძლევს, სწორი მიზნები დავისახოთ და შევიგნოთ, რომ ღვთისადმი ვართ მიძღვნილები და სხვა ადამიანების მოქმედებისგან დამოუკიდებლად, მასთან ურთიერთობას ძალიან უნდა ვაფასებდეთ. თუ პრობლემას თეოკრატიულად ვერ ვუმკლავდებით, მდგომარეობის გამოსწორებას მოთმინებით იეჰოვასგან უნდა ველოდოთ. ხელის ჩაქნევისა და სასოწარკვეთილებაში ჩავარდნის ნაცვლად, მოდი ‘ღმერთს მივენდოთ’ (ფსალმუნი 41:6, 12).

19. ა) რა არსი ჰქონდა ფილიპელებისთვის პავლეს ლოცვას? ბ) როგორ დაგვეხმარება გამჭრიახობა, თუ სრულად არ გვესმის რომელიმე საკითხი?

¹⁹ სულიერი გამჭრიახობა გვეხმარება ღვთისა და მისი ხალხისადმი ერთგულების შენარჩუნებაში. ფილიპელ ქრისტიანებს პავლემ უთხრა: «ამაზე ვლოცულობ, რომ უფრო და უფრო გაიზარდოს თქვენი სიყვარული [„ზუსტ“, აქ] შემეცნებასა და შეგრძნებაში [„სრულ გამჭრიახობაში“, აქ], რათა გამოსცადოთ უმჯობესი და იყოთ წრფელნი და დაუბრკოლებელნი ქრისტეს დღეს» (ფილიპელთა 1:9, 10). მართებული მსჯელობისთვის ჩვენ ‘ზუსტ შემეცნებასა და სრულ გამჭრიახობას’ ვსაჭიროებთ. აქ ‘გამჭრიახობად’ გადმოთარგმნილი ბერძნული სიტყვა ნიშნავს „მგრძნობიარე ზნეობრივ აღქმას“. რომელიმე საკითხის შესწავლისას, ჩვენ გვსურს გავიგოთ ღმერთსა და ქრისტესთან მისი კავშირი და ჩავუფიქრდეთ, თუ როგორ განადიდებს ის იეჰოვას თვისებებსა და გათვალისწინებულ ღონისძიებებს. ეს აღრმავებს ჩვენს გამჭრიახობას და მადლიერებას იეჰოვა ღმერთისა და იესო ქრისტეს მხრიდან ჩვენთვის გაღებულისთვის. თუ რომელიმე საკითხი სრულად არ გვესმის, გამჭრიახობა დაგვეხმარება იმის შეგნებაში, რომ არ უნდა უარვყოთ რწმენა ყველა იმ მნიშვნელოვანი საკითხისადმი, რომლებიც ქრისტესა და ღვთის და მისი განზრახვების შესახებ ვისწავლეთ.

20. როგორ შეგვიძლია ვიყოთ სულიერი გამჭრიახობით სავსე?

²⁰ ჩვენ სავსე ვიქნებით სულიერი გამჭრიახობით თუ ჩვენს აზრებსა და მოქმედებას ყოველთვის ღვთის სიტყვას შევუსაბამებთ (2 კორინთელთა 13:5). შემოქმედებითად ამის შესრულება გვეხმარება თავმდაბლობაში და ხელს უშლის თავდაჯერებულობასა და სხვების გაკრიტიკებას. გამჭრიახობა დაგვეხმარება, სარგებლობა მივიღოთ შესწორებიდან და უფრო მნიშვნელოვან საკითხებში დავრწმუნდეთ (იგავნი 3:7). მაშ, იეჰოვასთვის სიამოვნების მინიჭების სურვილით, მოდი მიზნად დავისახოთ მისი სიტყვის ზუსტი შემეცნებით ბოლომდე ავსება. ეს შესაძლებლობას მოგვცემს, გავარჩიოთ კეთილი ბოროტისგან, დავადგინოთ ნამდვილად მნიშვნელოვანი საკითხები და ერთგულად მივეკრათ იეჰოვასთან ჩვენს ძვირფას დამოკიდებულებას. ყოველივე ეს მაშინ არის შესაძლებელი, თუ განვაწყობთ გულს გამჭრიახობისკენ. მაგრამ ამისთვის კიდევ რაღაცაა საჭირო. ჩვენ ნება უნდა დავრთოთ, რომ გამჭრიახობამ დაგვიცვას.

დაე დაგიცვას გამჭრიახობამ

«გონიერება დაგიფარავს და შეგნება [„გამჭრიახობა“, აქ] დაგიცავს» (იგავნი 2:11).

1. რისგან შეუძლია ჩვენი დაცვა გამჭრიახობას?

იეჰოვას სურს, რომ გამჭრიახი იყო. რატომ? რადგან მან იცის, რომ ეს დაგიცავს ყველანაირი ხიფათისგან. ფაქტიურად, იგავნის 2:10–19 იწყება ასეთი სიტყვებით: «თუ სიბრძნე შევიდა შენს გულში და ცოდნა ეტკბო შენს სულს, გონიერება დაგიფარავს და შეგნება [„გამჭრიახობა“, აქ] დაგიცავს». რისგან დაგიცავს? ‘ბოროტების გზისგან’ და მათგან, ვინც სწორ გზას ტოვებს და რომელთა საქციელი უკუღმართია.

2. რა არის გამჭრიახობა და განსაკუთრებით როგორი გამჭრიახობა სურთ ქრისტიანებს?

² ალბათ გახსოვს, რომ გამჭრიახობა გონებრივი შემძლეობა, ანუ უნარია, რომლის საშუალებითაც გონება ერთ რამეს მეორისგან განასხვავებს. გამჭრიახი ადამიანი სწვდება აზრებისა თუ საკითხების სხვაობას და კარგი განსჯის უნარი აქვს. როგორც ქრისტიანებს, ჩვენ განსაკუთრებით გვსურს ღვთის სიტყვის ზუსტ შემეცნებაზე დაფუძნებული სულიერი გამჭრიახობა. საღვთო წერილის შესწავლის დროს, ჩვენ თითქოს სულიერი გამჭრიახობის ასაშენებელ ქვებს ვიძენთ. ხოლო შესწავლილს შეუძლია დაგვეხმაროს იეჰოვას მოსაწონი გადაწყვეტილებების მიღებაში.

3. როგორ შეგვიძლია სულიერი გამჭრიახობის მოპოვება?

³ როცა ღმერთმა ჰკითხა ისრაელის მეფე სოლომონს, რომელ კურთხევას ისურვებდა, ახალგაზრდა მმართველმა უპასუხა: „მიანიჭე შენს მორჩილს გამგები გული, რათა განაგოს შენი ერი, რომ სიკეთე გაარჩიოს ბოროტებისგან“. სოლომონმა გამჭრიახობა სთხოვა და იეჰოვამ არაჩვეულებრივი სიუხვით მისცა მას (მესამე მეფეთა 3:9; 4:30). გამჭრიახობის მოსაპოვებლად ჩვენ უნდა ვილოცოთ და ღვთის სიტყვა შევისწავლოთ ‘ერთგული და გონიერი მონის’ მეშვეობით მოწოდებული სულიერად საგანმანათლებლო პუბლიკაციების დახმარებით (მათე 24:45–47). ეს დაგვეხმარება, განვავითაროთ სულიერი გამჭრიახობა იმ ზომამდე, რომ გავხდეთ „გონებისთვის. . . სრულწლოვანნი“ და შევძლოთ ‘კეთილისა და ბოროტის გარჩევა’ (1 კორინთელთა 14:20; ებრაელთა 5:14).

გამჭრიახობის განსაკუთრებული საჭიროება

4. რას ნიშნავს, გვქონდეს ‘სუფთა’ თვალი და რა სარგებლობა მოაქვს მას ჩვენთვის?

⁴ გამჭრიახობის სწორად გამოყენებით ჩვენ შეგვიძლია ვიმოქმედოთ იესო ქრისტეს სიტყვების თანახმად: „უწინარეს ეძიეთ ღვთის სასუფეველი და [ღვთის] სიმართლე, და ეს ყოველივე [მატერიალური] შეგემატებათ“ (მათე 6:33). აგრეთვე იესომ თქვა: „სხეულის სანთელი შენი თვალია. როცა შენი თვალი სუფთაა, მთელი შენი სხეულიც ნათელია“ (ლუკა 11:34). დიახ, თვალი ფიგურალური სანთელია. ‘სუფთა’ თვალი უბრალოა და მთელ ყურადღებას ერთ მიზანს აპყრობს. თუ ასეთი თვალი გვაქვს, ჩვენ შევძლებთ გამჭრიახობის გამოვლენას და არ დავბრკოლდებით სულიერად.

5. რა უნდა გვახსოვდეს ქრისტიანული კრების დანიშნულების შესახებ სავაჭრო საქმეებთან დაკავშირებით?

⁵ თვალის სუფთად შენახვის ნაცვლად, მაცდური სავაჭრო საქმეებით ზოგი ართულებს, როგორც საკუთარ, აგრეთვე სხვების ცხოვრებას. მაგრამ ჩვენ უნდა გვახსოვდეს, რომ ქრისტიანული კრება ‘ჭეშმარიტების სვეტი და საფუძველია’ (1 ტიმოთე 3:15). შენობის სვეტის მსგავსად, კრება, ნებისმიერი პირის სავაჭრო მეწარმეობის ნაცვლად, ღვთის ჭეშმარიტების საყრდენია. იეჰოვას მოწმეთა კრებები არ დაფუძნებულა კომერციული ინტერესების, საქონლისა და სხვადასხვა მომსახურების რეკლამირებისთვის. თავი უნდა შევიკავოთ სამეფო დარბაზში პირადი სავაჭრო საქმეების მოგვარებისგან. გამჭრიახობა გვეხმარება იმის დანახვაში, რომ სამეფო დარბაზები, კრების წიგნის შესწავლა და იეჰოვას მოწმეების დიდი თუ პატარა კონგრესები წარმოადგენს ქრისტიანული ურთიერთობისა და სულიერი საუბრებისთვის განკუთვნილ ადგილებს. განა კომერციის რომელიმე სფეროს წინ წასაწევად სულიერი ურთიერთობების გამოყენება სულიერი ფასეულობებისადმი, სულ მცირე, მადლიერების ნაკლებობას არ გამოავლენდა? კრებაში ნაცნობობა არასდროს არ უნდა გამოიყენებოდეს ფინანსური მოგების მიზნით.

6. რატომ არ უნდა ყიდდნენ ან რეკლამას უკეთებდნენ კომერციულ ნაწარმსა თუ მომსახურებას კრების შეხვედრებზე?

⁶ ზოგი თეოკრატიული წრის ნაცნობებს იყენებს, რათა გაყიდოს სამკურნალო და კოსმეტიკური საშუალებები, ვიტამინები, დისტანციური კავშირის საგნები, სამშენებლო მასალა, კომპიუტერის პროგრამები და დანადგარები, მოაწყოს სამოგზაურო ტურები და ასე შემდეგ. მაგრამ კრების შეხვედრები არ არის ნაწარმის გაყიდვისა თუ მომსახურებების რეკლამირების ადგილი. ამ საკითხში ჩვენ შეგვიძლია ძირითადი პრინციპი დავინახოთ, თუ გვეხსომება, რომ იესომ «გამორეკა ტაძრიდან ყველა, აგრეთვე ხარებიც და ცხვრებიც, ფულის გადამცვლელებს ფული დაუბნია და მაგიდები აუყირავა. მტრედების გამყიდველებს უთხრა: „გაიყვანეთ ესენი აქედან და მამაჩემის სახლს ნუ გახდით სავაჭრო სახლად“» (იოანე 2:15, 16).

რას ვიტყვით დაბანდებაზე?

7. რატომ არის აუცილებელი გამჭრიახობა და სიფრთხილე დაბანდების დროს?

⁷ სარისკო სავაჭრო საქმეში თანხის დაბანდების დროს გამჭრიახობა და სიფრთხილე აუცილებელია. დავუშვათ ვინმეს სურს ფული ისესხოს შენგან და ამის მსგავსად გპირდება: „გარანტიას გაძლევ, ფულს მოიგებ“. „არაფერს წააგებ. ეს საიმედო საქმეა“. გაფრთხილდი, რომ ვინმემ ამგვარად არ დაგარწმუნოს. ის ან რეალობას ვერ ხედავს ან უპატიოსნოდ იქცევა, რადგან თანხის დაბანდება ძალიან იშვიათად თუ არის საიმედო. სინამდვილეში, ზოგი შემპარავად მოსაუბრე და უნამუსო ადამიანი ატყუებს კრების წევრებს. ეს გვახსენებს ‘უღვთოებს’, რომლებიც პირველი საუკუნის კრებაში შეიპარნენ და „ღვთის მადლი გარყვნილებად აქციეს“. ისინი წყალქვეშა კბილოვანი ლოდების მსგავსნი იყვნენ, რომლებმაც შეიძლება დასეროს და მოკლას მოცურავეები (იუდა 4, 12, აქ). მართალია, გაიძვერების მოტივები განსხვავებულია, მაგრამ ისინიც ატყუებენ კრების წევრებს.

8. რა ხდება გარეგნულად შემოსავლიან სარისკო სავაჭრო საქმეებთან დაკავშირებით?

⁸ კეთილი განზრახვების მქონე ქრისტიანებსაც კი გაუზიარებიათ სხვა ქრისტიანებისთვის ინფორმაცია გარეგნულად შემოსავლიანი სარისკო საქმის შესახებ და მიმბაძველებთან ერთად მხოლოდ დაუკარგავთ დაბანდებული ფული. ამის შედეგად, ქრისტიანების გარკვეული რიცხვი კარგავს უპირატესობებს კრებაში. როცა ჩნდება, რომ სწრაფად გამამდიდრებელი სარისკო საქმე ჩაწყობილი იყო, ერთადერთი, ვისაც ამაში მოგება აქვს, არის მატყუარა, რომელიც მაშინვე უჩინარდება. როგორ შეუძლია გამჭრიახობას, დაეხმაროს პიროვნებას ასეთი მდგომარეობის არიდებაში?

9. რატომ არის აუცილებელი გამჭრიახობა ფულის დაბანდებასთან დაკავშირებით შესაფასებლად?

⁹ გამჭრიახობა გაურკვევლობაში ჩაწვდომის უნარის მნიშვნელობას ატარებს. ეს თვისება აუცილებელია ფულის დაბანდებასთან დაკავშირებით მტკიცებების შესაფასებლად. ქრისტიანები ენდობიან ერთმანეთს და ზოგმა შეიძლება იფიქროს, რომ სულიერი და-ძმები არ ჩაებმებოდნენ ისეთ სარისკო საქმეში, რომელიც თანამორწმუნეების სახსრებს დაემუქრებოდა. მაგრამ ის ფაქტი, რომ კომერსანტი ქრისტიანია, არ იძლევა იმის გარანტიას, რომ ის გამოირჩევა კომერციულ საქმეებში ან, რომ მისი საქმე წარმატებით დასრულდება.

10. რატომ ეძებს ზოგი ქრისტიანი სესხს თანამორწმუნეებთან და რა შეიძლება მოხდეს ასეთი დაბანდებების შემთხვევაში?

¹⁰ კომერციული საქმისთვის ზოგი ქრისტიანი სესხს თანამორწმუნეებთან ეძებს, რადგან კარგი რეპუტაციის მქონე გამსესხებელი დაწესებულებები არასდროს მოამარაგებდნენ ფულით მათ სარისკო წარმოებას. მრავალი ტყუვდება იმაზე ფიქრით, რომ მხოლოდ ფულის დაბანდებით და მცირე ძალების დახარჯვით ან, შესაძლოა, საერთოდ ძალების გამოყენების გარეშე, სწრაფად და ადვილად გაუღიმებს ბედი. ზოგს ფულის დაბანდება მისი მომხიბლავი ძალის გამო ატყვევებს. მაგრამ ისინი მხოლოდ მთელი ცხოვრების დანაზოგს კარგავენ! ერთმა ქრისტიანმა დიდი თანხა დააბანდა და 25-პროცენტიან მოგებას ელოდებოდა, სულ რაღაც, ორ კვირაში. როცა კომპანია გაკოტრებულად გამოცხადდა, მან ყველაფერი დაკარგა! სხვა სარისკო სავაჭრო საქმის შემთხვევაში, უძრავი ქონებით მოვაჭრემ კრებაში სხვებისგან დიდი ვალი აიღო. ის უგუნურად ძალიან დიდ მოგებას შეჰპირდა, მაგრამ გაკოტრდა და ნასესხები ფული დაკარგა.

როცა სარისკო სავაჭრო საქმეები წარუმატებელია

11. რა რჩევა მოგვცა პავლემ ანგარებასა და ფულის სიყვარულთან დაკავშირებით?

¹¹ სავაჭრო საქმეებში წარუმატებლობა იწვევს გულგატეხილობას და სულიერობასაც კი უკარგავს ზოგ ქრისტიანს, რომლებიც არასაიმედო საქმეებში ებმებიან. გამჭრიახობის, როგორც დამცველის უგულებელყოფას გულისტკივილი მოაქვს და მსხვერპლთა ცხოვრებას ამწარებს. ანგარებამ მრავალი გააბა მახეში. „ანგარება აღარ იხსენებოდეს თქვენს შორის, როგორც წმიდებს შეშვენით“, — წერდა პავლე (ეფესელთა 5:3). აგრეთვე ის აფრთხილებდა: „გამდიდრების მსურველნი ცვივიან განსაცდელსა და მახეში, მრავალ ბრიყვულ და მავნე გულისთქმაში, რომელნიც გასანადგურებლად და დასაღუპად უბიძგებენ ადამიანს. ვინაიდან ყოველგვარი ბოროტების ფესვი ვერცხლისმოყვარეობაა და ზოგიერთები, რომლებიც მან გაიტაცა, განშორდნენ რწმენას და თავიანთ თავს მრავალი ტკივილი მიაყენეს“ (1 ტიმოთე 6:9, 10).

12. რა უნდა ახსოვდეთ ქრისტიანებს განსაკუთრებით, თუ სავაჭრო საქმეში თანამშრომლობენ?

¹² თუ ქრისტიანს ფულის სიყვარული განუვითარდა, მან შეიძლება დიდი სულიერი ზიანი მიაყენოს საკუთარ თავს. ფარისევლები ფულის მოყვარულნი იყვნენ და სწორედ ეს არის ამ უკანასკნელ დღეებში მცხოვრები ადამიანების ერთ-ერთი დამახასიათებელი თვისება (ლუკა 16:14; 2 ტიმოთე 3:1, 2). ამის საპირისპიროდ, ქრისტიანის ცხოვრების „გზა [უნდა] იყოს ვერცხლის სიყვარულის გარეშე“ (ებრაელთა 13:5). რასაკვირველია, ქრისტიანებს შეუძლიათ სავაჭრო საქმეში თანამშრომლობა ან ერთად საქმის წამოწყება. მაგრამ ასეთ შემთხვევებში, მოლაპარაკებები და პირობების განხილვა კრების საქმეებისგან ცალკე უნდა ხდებოდეს. და გახსოვდეთ: სულიერ ძმებთან თანამშრომლობის დროსაც კი სავაჭრო ხელშეკრულებები ყოველთვის წერილობით ჩამოაყალიბეთ. ამასთან დაკავშირებით ძალიან დამხმარეა სტატია სათაურით „რად დაგიჯდება ბიზნესი?“, გამოქვეყნებული 1995 წლის 1 მაისის ჟურნალში „საგუშაგო კოშკი“ (რუს.), გვერდები 28–31.

13. როგორ გამოიყენებდი იგავნის 22:7-ს სარისკო სავაჭრო საქმეებთან?

¹³ იგავნის 22:7 გვეუბნება: „მოვალე მევალის მონაა“. ხშირად, უგუნურების გამო საკუთარ თავს ან ჩვენს ძმას მონის მდგომარეობაში ვაქცევთ. როცა სარისკო სავაჭრო საქმის წამოსაწყებად ვინმე ფულს გვთხოვს მიზანშეწონილი იქნებოდა, გაგვეთვალისწინებინა, შეუძლია თუ არა მას თანხის დაბრუნება. სანდო და სარწმუნო ადამიანად არის ცნობილი? რასაკვირველია, ჩვენ უნდა გვესმოდეს, რომ ასეთი სესხის მიცემა შეიძლება ფულის დაკარგვად დაგვიჯდეს, რადგან მრავალი სარისკო საქმე იფუშება. მხოლოდ შეთანხმება არ იძლევა წარმატების გარანტიას. და საქმისთვის იმაზე უფრო დიდი თანხის სესხება, რომელსაც გამსესხებელი დასაკარგად გარისკავს, ნამდვილად არ მეტყველებს წინდახედულობაზე.

14. რატომ უნდა გამოვავლინოთ გამჭრიახობა მაშინ, როცა თანაქრისტიანი, რომელსაც ფული ვასესხეთ, სავაჭრო საქმეებში წარუმატებელია?

¹⁴ ჩვენ გამჭრიახობა უნდა გამოვავლინოთ, თუ ფულადი სახსრები, რომელიც სავაჭრო მიზნებისთვის ქრისტიანს ვასესხეთ, დაიკარგა, თუმცა უპატიოსნობას ადგილი არ ჰქონია. თუ თანამორწმუნე, რომელსაც ფული ვასესხეთ, უდანაშაულოა სავაჭრო საქმის წარუმატებლობაში, შეგვიძლია ვთქვათ, რომ რაღაცაში უსამართლოდ მოგვექცნენ? არა, რადგან ფული ჩვენი ნებით ვასესხეთ, ჩვენ, ალბათ, პროცენტული მოგების ინტერესი გვქონდა და უპატიოსნო არაფერი მომხდარა. რადგან ტყუილს ადგილი არ ჰქონდა, ჩვენ არ გვაქვს საფუძველი მოვალის წინააღმდეგ იურიდიული ზომების მისაღებად. რა სარგებელს მოგვიტანდა სასამართლოში პატიოსანი თანაქრისტიანის წინააღმდეგ საქმის აღძვრა, რომელსაც კეთილი მოტივებით წამოწყებული სავაჭრო საქმის ჩაფუშვის გამო გაკოტრების გამოცხადება მოუწია?

15. რა ფაქტორები მოითხოვს განხილვას გაკოტრების გამოცხადების შემთხვევაში?

¹⁵ ზოგჯერ ადამიანები, რომლებსაც სავაჭრო საქმეებში არ გაუმართლდათ, გამოსავალს გაკოტრების გამოცხადებაში ეძებენ. რადგან ვალის გასტუმრებაში ქრისტიანები გარკვეული ვალებისგან კანონიერად გათავისუფლების შემდეგაც კი არ არიან დაუდევრები, ზოგი კეთილსინდისიერად გრძნობს მორალურ ვალდებულებას, მაინც გადაიხადოს გაუქმებული ვალები, თუ ყოფილი გამსესხებლები აიღებენ დაბრუნებულ ფულს. მაგრამ რა ხდება, როცა ძმის ფულის დაკარგვის შემდეგ მოვალე უფრო ფუფუნებაში ცხოვრობს? ან რა მოხდება, თუ მოვალე იშოვის გასასტუმრებლად საკმარის თანხას, მაგრამ უგულებელყოფს მორალურ მოვალეობას, რომელიც შეიძლება თავისი ძმის წინაშე ფინანსურ საკითხში აქვს? ასეთ შემთხვევებში კითხვის ქვეშ დაისმებოდა კრებაში პასუხისმგებლად მსახურებისთვის იმ ძმის შესაძლებლობა, რომელმაც ფული ისესხა (1 ტიმოთე 3:3, 8; იხილე 1994 წლის 15 სექტემბრის „საგუშაგო კოშკი“ [რუს.], გვერდები 30–31).

რას ვიტყოდით თაღლითობაზე?

16. რა ნაბიჯები უნდა გადავდგათ, თუ სავაჭრო საქმეში თაღლითობის მსხვერპლი ვხდებით?

¹⁶ გამჭრიახობა გვეხმარება იმის შეგნებაში, რომ დაბანდება ყოველთვის მომგებიანი არ არის. მაგრამ რას ვიტყოდით, თუ თაღლითობას აქვს ადგილი? თაღლითობა არის „მოტყუებით, ეშმაკობითა და ჭეშმარიტების განზრახ დამახინჯებით სხვა პიროვნების დაყოლიება, რომ დაუთმოს თავისი კუთვნილი ძვირფასი საგანი ან კანონიერი უფლება“. იესო ქრისტემ ზოგადად მოხაზა ნაბიჯები, რომლებიც პიროვნებამ უნდა გადადგას, თუ ფიქრობს, რომ თანაქრისტიანმა მოატყუა. მათეს 18:15–17-ის თანახმად, იესომ თქვა: „თუ შენი ძმა შესცოდავს, მიდი და ამხილე იგი, როცა მარტონი იქნებით. თუ გაგიგონებს, შეგიძენია შენი ძმა. ხოლო თუ არ გაგიგონებს, წაიყოლე კიდევ ერთი ან ორი სხვა, რათა ორი ან სამი მოწმის პირით დამტკიცდეს ყოველი სიტყვა. თუ არც მათ გაუგონებს, ეკლესიას უთხარი. თუ არც ეკლესიას გაუგონებს, მაშინ იყოს იგი შენთვის, როგორც წარმართი და მებაჟე“. მაგალითი, რომელიც იესომ შემდეგ მოიყვანა, მიუთითებს, რომ ის ფინანსურ საკითხებთან და, მათ შორის, თაღლითობასთან დაკავშირებულ ცოდვებს გულისხმობდა (მათე 18:23–35).

17, 18. როგორ დაგვიცავს გამჭრიახობა, თუ ადამიანი, რომელიც თავს ქრისტიანად აცხადებს, გვატყუებს?

¹⁷ რასაკვირველია, მათეს 18:15–17-ში ზოგადად მოხსენიებული ნაბიჯების გადადგმისთვის არ იარსებებდა ბიბლიური საფუძველი, თუ თაღლითობა აშკარა ან, თუნდაც, ნაგულისხმები არ იქნებოდა. მაგრამ რა შეიძლება გაკეთდეს, თუ პიროვნებამ, რომელიც თავს ქრისტიანად აცხადებს, სინამდვილეში, მოგვატყუა? გამჭრიახობას შეუძლია დაგვიცვას ისეთი მოქმედებისგან, რომელიც კრებას ცუდ შუქს მოჰფენდა. თანაქრისტიანებს პავლე ურჩევდა, რომ ჯობდა ნაწყენი დარჩენილიყვნენ და დაზარალებულებიც კი, ვიდრე ძმა სასამართლოში წაეყვანათ (1 კორინთელთა 6:7).

¹⁸ ჩვენი ჭეშმარიტი და-ძმები არ არიან, გრძნეული ბარიესუსის მსგავსად, ‘მზაკვრობითა და სიბოროტით აღვსილნი’ (საქმეები 13:6–12). ამიტომ, მოდი გამჭრიახობა გამოვიყენოთ, როცა ვკარგავთ ფულს თანამორწმუნეების სარისკო სავაჭრო საქმეებში. თუ იურიდიულ ჩარევაზე ვფიქრობთ, უნდა გავითვალისწინოთ შესაძლო შედეგები, რომლებიც პირადად ჩვენზე, სხვაზე ან სხვებზე, კრებასა და გარეშეებზე იმოქმედებს. ანაზღაურების ძებნამ შეიძლება ჩვენი დროის, ენერგიისა და სხვა საშუალებების უმეტესი ნაწილი წაგვართვას. ამის შედეგად შეიძლება მხოლოდ ადვოკატები და სპეციალისტები გამდიდრდნენ. სამწუხაროა, რომ ამ საკითხებზე ყურადღების ზედმეტად მიპყრობამ ზოგი ქრისტიანის თეოკრატიული უპირატესობები იმსხვერპლა. სატანას უხარია ამგვარად ჩვენი მოტყუება, მაგრამ ჩვენ გვსურს, იეჰოვას გავუხაროთ გული (იგავნი 27:11). სხვა მხრივ, ფულის დაკარგვასთან შეგუებამ, შეიძლება გულისტკივილისგან დაგვიცვას და, როგორც ჩვენ, აგრეთვე უხუცესებს დიდი დროის დაკარგვისგან თავის არიდებაში დაეხმაროს. ეს ხელს შეუწყობს კრებაში მშვიდობის შენარჩუნებას და საშუალებას მოგვცემს, სამეფო ყოველთვის პირველ ადგილზე დავაყენოთ.

გამჭრიახობა და გადაწყვეტილების მიღება

19. რის გაკეთება შეუძლია ჩვენთვის სულიერ გამჭრიახობასა და ლოცვას მძიმე გადაწყვეტილებების მიღების დროს?

¹⁹ ფინანსურ თუ სავაჭრო საკითხებში გადაწყვეტილებების მიღება შეიძლება საკმაოდ მძიმე იყოს. მაგრამ სულიერ გამჭრიახობას შეუძლია დაგვეხმაროს, ყველა მხარის აწონ-დაწონაში და ბრძნული გადაწყვეტილებების მიღებაში. გარდა ამისა, ლოცვაში იეჰოვასადმი მინდობას შეუძლია მოგვიტანოს „ღვთის მშვიდობა“ (ფილიპელთა 4:6, 7). ეს არის იეჰოვასთან ახლო პირადი ურთიერთობიდან გამომდინარე სიმშვიდე და უშფოთველობა. უეჭველია, რთულ გადაწყვეტილებებთან შეხვედრისას ასეთი მშვიდობა დაგვეხმარება წონასწორობის შენარჩუნებაში.

20. რა უნდა გავაკეთოთ გადაწყვეტილად, როცა საქმე სავაჭრო საკითხებსა და კრებას ეხება?

²⁰ დაე ჩვენმა სიმტკიცემ არ დაუშვას, რომ სავაჭრო საქმეებით გამოწვეულმა კამათებმა დაანგრიოს ჩვენი ან კრების მშვიდობა. საჭიროა გვახსოვდეს, რომ ქრისტიანული კრება სულიერად გვეხმარება და არ არის კომერციული მიზნების მისაღწევი ცენტრი. სავაჭრო საკითხები არასდროს არ უნდა უკავშირდებოდეს კრების საქმიანობას. ჩვენ გამჭრიახები და ფრთხილები უნდა ვიყოთ სარისკო სავაჭრო საქმეების წამოწყების დროს. და მოდი, ყოველთვის შევინარჩუნოთ გაწონასწორებული თვალსაზრისი სავაჭრო საკითხებთან დაკავშირებით და პირველად სამეფოს ინტერესები ვეძებოთ. თუ სავაჭრო საქმე, რომელშიც ჩვენი ძმები ან დები არიან ჩართული, ჩაიფუშება, მოდი, მთელი ძალ-ღონე მოვახმაროთ, რომ დაზარალებულთათვის საუკეთესო გავაკეთოთ.

21. როგორ შეგვიძლია გამჭრიახობის გამოყენება და ფილიპელთა 1:9–11-ის თანახმად მოქმედება?

²¹ ფინანსურ საქმეებსა და სხვა ნაკლებად მნიშვნელოვან საკითხებზე გადამეტებული ზრუნვის ნაცვლად, მოდი, ყველამ მივაპყროთ გულები გამჭრიახობისკენ, ღვთის ხელმძღვანელობისთვის ვილოცოთ და სამეფოს ინტერესები პირველ ადგილზე დავაყენოთ. პავლეს ლოცვის თანახმად, დაე ‘გაიზარდოს ჩვენი სიყვარული ზუსტი შემეცნებითა და გამჭრიახობით, რათა გამოვცადოთ უმჯობესი და არ დავაბრკოლოთ სხვები’ ან საკუთარი თავი. ახლა, როცა ზეციერ ტახტზე ქრისტე მეფედ გვყავს, მოდი, გამოვავლინოთ გამჭრიახობა ცხოვრების ყველა მხარეში. დაე ვიყოთ ‘სიმართლის ნაყოფით აღვსილნი იესო ქრისტეს მიერ, ჩვენი ღვთის, უზენაესი უფლის, იეჰოვას, სადიდებლად და საქებრად’ (ფილიპელთა 1:9–11).