1. რას ვიგებთ აღმზრდელობითი ზომების შესახებ ბიბლიიდან?

„აღმზრდელობითი ზომები“ თქვენთვის, ალბათ, უპირველესად დასჯასთან ასოცირდება. თუმცა ამ სიტყვებში გაცილებით მეტი იგულისხმება. ბიბლიიდან ვიგებთ, რომ აღმზრდელობითი ზომები ჩვენს კეთილდღეობას ემსახურება. ღვთის სიტყვა მას ზოგჯერ ცოდნაზე, სიბრძნეზე, სიყვარულსა და სიცოცხლეზე საუბრისას მოიხსენიებს (იგავ. 1:2—7; 4:11—13). ამგვარად, ღვთის აღმზრდელობითი ზომები მის სიყვარულზე მეტყველებს და გვარწმუნებს, რომ მას ჩვენთვის მარადიული სიცოცხლე სურს (ებრ. 12:6). მიუხედავად იმისა, რომ ღვთის აღმზრდელობით ზომებში შეიძლება დასჯაც შედიოდეს, ის არასდროს არის შეურაცხმყოფელი და ზედმეტად მკაცრი. აღმზრდელობით ზომებში უმთავრესად იგულისხმება ვინმესთვის რჩევა-დარიგებების მიცემა, ისევე როგორც მშობელი ცდილობს აღზრდის პროცესში შვილის სიყვარულით დარიგებას.

2, 3. საიდან ჩანს, რომ აღმზრდელობით ზომაში შეიძლება დარიგებაც შედიოდეს და დასჯაც? (იხილეთ სურათი ამავე გვერდზე)

² დავფიქრდეთ შემდეგ მაგალითზე: პატარა ბიჭუნა, სახელად ჯონი, სახლში ბურთით თამაშობს. დედა ეუბნება: „ჯონი, ხომ იცი, რომ სახლში ბურთით არ უნდა ითამაშო; შეიძლება რამე გატეხო!“. ჯონი ყურს არ უგდებს დედის რჩევას და შემთხვევით ვაზას ამტვრევს. როგორ მოიქცევა დედა? მან შეიძლება აღმზრდელობით ზომას მიმართოს, რაშიც შესაძლოა დარიგებაც შედიოდეს და დასჯაც. დარიგების დროს ის ახსენებს შვილს, რა იყო არასწორი მის საქციელში და ანახვებს, რომ მშობლების მორჩილება გონივრულია. ის უხსნის ჯონის, რომ მშობლები შვილებს საჭირო და მართებულ წესებს უდგენენ. ჭკუის სასწავლებლად შეიძლება დედამ გადაწყვიტოს, რომ დასაჯოს კიდეც ჯონი, მაგალითად, ცოტა ხნით ბურთი ჩამოართვას. ამგვარად, ეს ბავშვს დაანახვებს, რომ ურჩობას ცუდი შედეგები მოჰყვება.

³ როგორც ქრისტიანული კრების წევრები, ჩვენ ღვთის სახლეულობას მივეკუთვნებით (1 ტიმ. 3:15). ამიტომ გვესმის, რომ იეჰოვას აქვს უფლება, დაგვიდგინოს ნორმები და მათი დარღვევის შემთხვევაში სიყვარულიდან გამომდინარე ჩვენ მიმართ აღმზრდელობითი ზომები გამოიყენოს. გარდა ამისა, თუ ჩვენს არასწორ საქციელს ცუდი შედეგები მოჰყვება, ღვთის აღმზრდელობითი ზომები დაგვანახვებს, რამდენად აუცილებელია, ჩვენს ზეციერ მამას დავემორჩილოთ (გალ. 6:7). ღმერთი ზრუნავს ჩვენზე და გვიფრთხილდება, რომ გული არ გვეტკინოს (1 პეტ. 5:6, 7).

4. ა) როგორ მცდელობას აკურთხებს იეჰოვა? ბ) რას განვიხილავთ ამ სტატიაში?

⁴ ბიბლიაზე დაფუძნებული რჩევა-დარიგებებით ჩვენს შვილებსა თუ ბიბლიის შემსწავლელებს ვეხმარებით, მიაღწიონ თავიანთ მიზანს და გახდნენ ქრისტეს მოწაფეები. ღვთის სიტყვა, რომელიც სწავლების ძირითადი საშუალებაა, გვეხმარება, რომ შვილები თუ ბიბლიის შემსწავლელები „სიმართლეში აღვზარდოთ“. ამგვარად მათ ვეხმარებით, ჩასწვდნენ და დაიცვან ყველაფერი, რაც იესომ მცნებად დაგვიდო (2 ტიმ. 3:16; მათ. 28:19, 20). იეჰოვა აკურთხებს ამგვარ მცდელობას, რადგან ასეთი სახით ვამზადებთ მათ, რომ თავადაც დაეხმარონ სხვებს ქრისტეს მოწაფედ გახდომაში (წაიკითხეთ ტიტეს 2:11—14). მოდი პასუხი გავცეთ სამ მნიშვნელოვან კითხვას: 1) როგორ ვლინდება ღვთის აღმზრდელობით ზომებში ჩვენდამი სიყვარული? 2) რას ვსწავლობთ იმ ადამიანებისგან, რომელთა შემთხვევებშიც იეჰოვამ აღმზრდელობით ზომებს მიმართა? 3) როგორ შეგვიძლია მივბაძოთ იეჰოვასა და იესოს, როცა აღმზრდელობით ზომებს მივმართავთ?

ღვთის აღმზრდელობით ზომებში სიყვარული ვლინდება

5. როგორ ვლინდება იეჰოვას აღმზრდელობით ზომებში სიყვარული?

⁵ იეჰოვას ჩვენდამი სიყვარული აღძრავს, რომ შეცდომებზე მიგვითითოს, აღგვზარდოს და მოგვამზადოს, რათა მის სიყვარულში დავრჩეთ და სიცოცხლის გზიდან არ გადავუხვიოთ (1 იოან. 4:16). ის არასდროს გვამცირებს და არ შეურაცხგვყოფს. მისი აღმზრდელობითი ზომები არასდროს გვიკარგავს ღირსების გრძნობას (იგავ. 12:18). პირიქით, იეჰოვა კარგს ხედავს ჩვენში. ის არ გვიზღუდავს ნების თავისუფლებას. თქვენც ასე უყურებთ იეჰოვას აღმზრდელობით ზომებს, რომელიც ჩვენს აღსაზრდელად თავის სიტყვას, ბიბლიაზე დაფუძნებულ პუბლიკაციებს, ქრისტიან მშობლებს ან კრების უხუცესებს იყენებს? როცა „მცდარ ნაბიჯს“ ვდგამთ, რასაც ზოგჯერ შეიძლება გაუცნობიერებლად ვაკეთებთ, უხუცესები ცდილობენ, რბილად და სიყვარულით შეგვისწორონ თვალსაზრისი, რითაც იეჰოვას ჰბაძავენ სიყვარულის გამოვლენაში (გალ. 6:1).

6. როგორ ჩანს ღვთის აღმზრდელობით ზომებში სიყვარული მაშინაც კი, როცა ის რჩევა-დარიგებაზე მეტს მოიცავს?

⁶ აღმზრდელობით ზომებში ზოგჯერ მხოლოდ რჩევა-დარიგება არ იგულისხმება. სერიოზული ცოდვის ჩადენის შემთხვევაში ქრისტიანმა შეიძლება კრებაში პასუხისმგებლობები დაკარგოს. იეჰოვას ასეთ აღმზრდელობით ზომაშიც კი ჩანს მისი სიყვარული. მაგალითად, პასუხისმგებლობების დაკარგვამ შეიძლება შემცოდველი დააფიქროს, რამდენად მნიშვნელოვანია, უფრო მეტი დრო დაუთმოს ბიბლიის პირად შესწავლას, შესწავლილზე ფიქრსა და ლოცვას. ეს ყველაფერი მას სულიერად გააძლიერებს (ფსალმ. 19:7). დროთა განმავლობაში მან შეიძლება ისევ მიიღოს კრებაში პასუხისმგებლობები. ღვთის სიყვარულზე მეტყველებს შემცოდველის ქრისტიანული კრებიდან გარიცხვაც, რადგან ეს კრებას ცუდი გავლენისგან იცავს (1 კორ. 5:6, 7, 11). ვინაიდან იეჰოვა ჩვენს გამოსასწორებლად ყოველთვის სამართლიან ზომებს მიმართავს, გარიცხვა შემცოდველს ანახვებს ჩადენილი ცოდვის სერიოზულობას და აღძრავს მონანიებისკენ (საქ. 3:19).

იეჰოვას აღმზრდელობითი ზომები ჩვენს კეთილდღეობას ემსახურება

7. ვინ იყო შებნა და რა ცუდი თვისება განივითარა?

⁷ უკეთ რომ დავინახოთ, რამდენად მნიშვნელოვანია აღმზრდელობითი ზომები, განვიხილოთ ორი ადამიანის მაგალითი, რომელთა შემთხვევაშიც იეჰოვამ აღმზრდელობით ზომებს მიმართა. ჯერ შებნაზე ვისაუბროთ, რომელიც მეფე ხიზკიას დროს ცხოვრობდა, შემდეგ კი ჩვენს დროში მცხოვრები ძმის, გრემის შემთხვევა განვიხილოთ. შებნა გამგებელი იყო, რომელსაც, სავარაუდოდ, მეფე ხიზკიას სასახლე ებარა. ეს საკმაოდ დიდ თანამდებობად ითვლებოდა (ეს. 22:15). სამწუხაროდ, ის გაამაყდა და საკუთარი თავის განდიდება მოისურვა. მან დიდებული სამარხიც კი გამოიკვეთა და „დიდების ეტლებით“ დადიოდა (ეს. 22:16—18).

8. რა აღმზრდელობით ზომას მიმართა იეჰოვამ შებნას შემთხვევაში და რა მოჰყვა ამას შედეგად?

⁸ პატივმოყვარე შებნა იეჰოვამ მაღალი მდგომარეობიდან გადააყენა და მის ადგილას ელიაკიმი დანიშნა (ეს. 22:19—21). ეს მაშინ მოხდა, როცა ასურეთის მეფე სინახერიბი იერუსალიმზე თავდასხმას გეგმავდა. მოგვიანებით სინახერიბმა დიდ ჯართან ერთად იერუსალიმში სამეფო კარის მოხელეები გაგზავნა, რათა ებრაელები სულიერად გაეტეხა და ხიზკია დანებებაზე დაეყოლიებინა (2 მეფ. 18:17—25). მეფე ხიზკიამ მათთან მოსალაპარაკებლად ელიაკიმი გაგზავნა, რომელსაც ორი კაცი ახლდა თან; ერთ-ერთი შებნა იყო, რომელიც ახლა სამეფო კარზე მწერლად მსახურობდა. აქედან ჩანს, რომ შებნა არ განაწყენებულა და არ გაბრაზებულა მომხდარის გამო. ის თავმდაბლად ასრულებდა საქმეს მიუხედავად იმისა, რომ უწინდებურად მაღალი მდგომარეობა აღარ ეკავა. რის სწავლა შეგვიძლია შებნას შემთხვევიდან? განვიხილოთ სამი მხარე.

9—11. ა) რა მნიშვნელოვანი გაკვეთილის სწავლა შეგვიძლია შებნას შემთხვევიდან? ბ) როგორ გამხნევებთ შებნასადმი იეჰოვას დამოკიდებულება?

⁹ პირველი, შებნამ დაკარგა თავისი მდგომარეობა. მისი შემთხვევა გვარწმუნებს, რომ „სიამაყე წინ უძღვის დაცემას, ამპარტავნობის სული — წაბორძიკებას“ (იგავ. 16:18). ცდილობთ, თავმდაბლობა შეინარჩუნოთ მაშინაც კი, თუ კრებაში პასუხისმგებლობები გაკისრიათ და შესაძლოა ამის გამო ზოგი გამორჩეულად გეპყრობათ? მიაგებთ იეჰოვას პატივს თქვენი ნიჭის, უნარისა თუ შესრულებული საქმის გამო? (1 კორ. 4:7). მოციქულმა პავლემ დაწერა: „ვეუბნები ყოველ თქვენგანს: თქვენს თავზე იმაზე მეტად ნუ იფიქრებთ, ვიდრე უნდა ფიქრობდეთ, არამედ ისე იფიქრეთ, რომ საღი აზროვნება გქონდეთ“ (რომ. 12:3).

¹⁰ მეორე, მკაცრად შეგონებით იეჰოვამ ცხადყო, რომ შებნას გამოსწორების იმედი ჰქონდა (იგავ. 3:11, 12). რა კარგი მაგალითია ეს მათთვის, ვინც კრებაში პასუხისმგებლობები დაკარგა! გაბრაზების ან განაწყენების ნაცვლად, მათ შეუძლიათ კვლავაც საუკეთესო გაიღონ იეჰოვასთვის და აღმზრდელობით ზომებში მისი სიყვარული დაინახონ. გახსოვდეთ: თუ თავს დავიმდაბლებთ, საბოლოოდ იეჰოვა დაგვაჯილდოებს (წაიკითხეთ 1 პეტრეს 5:6, 7). იეჰოვა აღმზრდელობითი ზომების მეშვეობით სიყვარულით გვძერწავს, ამიტომ მოდი კვლავაც რბილ თიხად დავრჩეთ მის ხელში!

¹¹ მესამე, შებნასადმი იეჰოვას დამოკიდებულება კარგი გაკვეთილია მათთვის, ვისაც აღმზრდელობითი ზომების გატარების პასუხისმგებლობა აკისრია, მაგალითად მშობლებისა და კრების უხუცესებისთვის. რის სწავლა შეუძლიათ მათ? მიუხედავად იმისა, რომ იეჰოვას აღმზრდელობით ზომებში ცოდვისადმი სიძულვილი ჩანს, შემცოდველი მის მზრუნველობასა და სიყვარულს გრძნობს. მშობლებო და უხუცესებო, იეჰოვას მსგავსად თქვენც შეიძულებთ ცოდვას და შეეცდებით, კარგი დაინახოთ თქვენს შვილსა თუ თანაქრისტიანში? (იუდ. 22, 23).

12—14. ა) როგორ რეაგირებს ზოგი ღვთის აღმზრდელობით ზომებზე? ბ) როგორ დაეხმარა ღვთის სიტყვა ერთ ძმას თვალსაზრისის შეცვლაში და რა შედეგი მოჰყვა ამას?

¹² სამწუხაროა, რომ ზოგმა, ვის მიმართაც აღმზრდელობითი ზომები გაატარეს, წყენა გულში ჩაიტოვა და ჩამოშორდა ღმერთსა და მის ხალხს (ებრ. 3:12, 13). მაგრამ ნიშნავს ეს იმას, რომ ისინი მიტოვებულები არიან? დაფიქრდით გრემის მაგალითზე, რომელიც ადრე გარიცხული იყო, შემდეგ დაბრუნდა კრებაში, მაგრამ არააქტიური გახდა. რამდენიმე წლის შემდეგ ერთ უხუცესს, რომელიც მასთან დამეგობრებას ცდილობდა, გრემმა სთხოვა, მისთვის ბიბლია ესწავლებინა.

¹³ ამ უხუცესმა გაიხსენა: „გრემის პრობლემა სიამაყე იყო. ის კრიტიკულად იყო განწყობილი იმ უხუცესების მიმართ, რომლებმაც მის გარიცხვაში მიიღეს მონაწილეობა. ამიტომ რამდენიმე გაკვეთილი იმ ბიბლიურ მუხლებზე ვმსჯელობდით, რომლებიც სიამაყესა და მის შედეგებს ეხებოდა. გრემმა ნათლად დაინახა ღვთის სიტყვის სარკეში თავისი თავი და ძალიან არ მოეწონა. ამან გასაოცარი შედეგი გამოიღო! მან აღიარა, რომ სიამაყემ დააბრმავა და კრიტიკული აზროვნება მისი პრობლემა იყო. ამის შემდეგ გრემმა მალევე მოახდინა ცვლილებები. მან რეგულარულად დაიწყო კრების შეხვედრებზე დასწრება, გულმოდგინედ სწავლობდა ღვთის სიტყვას და ჩვევად გაიხადა ყოველდღე ლოცვა. ცოლ-შვილის გასახარად მან, როგორც ოჯახისთავმა, მათ სულიერობაზეც დაიწყო ზრუნვა“ (ლუკ. 6:41, 42; იაკ. 1:23—25).

¹⁴ უხუცესმა დასძინა: «ერთ დღესაც გრემმა ისეთი რამ თქვა, რამაც ძალიან იმოქმედა ჩემზე. მან მითხრა: „წლებია ჭეშმარიტება ვიცი, პიონერადაც ვმსახურობდი, მაგრამ მხოლოდ ახლა შემიძლია გულწრფელად ვთქვა, რომ იეჰოვა მიყვარს“. ამის შემდეგ მას მალევე დაავალეს, რომ სამეფო დარბაზში და-ძმებს მიკროფონით მომსახურებოდა. ის ამას ძალიან აფასებს. გრემის მაგალითიდან ვსწავლობ, რომ იეჰოვა უშურველად აკურთხებს მას, ვინც თავს იმდაბლებს მის წინაშე და ემორჩილება აღმზრდელობით ზომებს!».

აღმზრდელობითი ზომების დროს მიჰბაძეთ ღმერთსა და ქრისტეს

15. რის გაკეთება გვმართებს, რომ ჩვენ მიერ გატარებულმა აღმზრდელობითმა ზომებმა შედეგი გამოიღოს?

¹⁵ ადამიანი რომ კარგი მასწავლებელი გახდეს, ჯერ კარგი მოსწავლე უნდა იყოს (1 ტიმ. 4:15, 16). მსგავსად, ისინი, ვისაც იეჰოვამ აღმზრდელობითი ზომების გატარების პასუხისმგებლობა დააკისრა, თავადაც უნდა ემორჩილებოდნენ მის ხელმძღვანელობას. ამგვარი თავმდაბლობის გამო ისინი და-ძმების პატივისცემასაც იმსახურებენ და სიტყვაში სითამამეც აქვთ, რომ ასწავლონ და რჩევები მისცენ სხვებს. დავფიქრდეთ იესოს მაგალითზე.

16. რას ვსწავლობთ იესოსგან?

¹⁶ იესო მაშინაც კი ემორჩილებოდა მამას, როცა ამის გაკეთება ძალიან რთული იყო (მათ. 26:39). თავისი სწავლებებისა და სიბრძნისთვის ის დიდებას იეჰოვას მიაგებდა (იოან. 5:19, 30). იესოს თავმდაბლობა და მორჩილება გულწრფელ ადამიანებს მისკენ იზიდავდა. ეს თვისებები მას ეხმარებოდა, რომ სწავლების დროს თანაგრძნობა და სულგრძელობა გამოევლინა (წაიკითხეთ მათეს 11:29). მისი თბილი სიტყვები მალამოსავით ედებოდა მათ, ვინც გადატანითი მნიშვნელობით გადატეხილ ლერწამს ან მბჟუტავ პატრუქს ჰგავდა (მათ. 12:20). იესო მაშინაც კი კეთილი და მოსიყვარულე იყო, როცა მისი მოთმინება იცდებოდა. ეს ცხადი გახდა მაშინ, როცა მან მოციქულებს ეგოისტური და ამბიციური აზროვნება შეუსწორა (მარ. 9:33—37; ლუკ. 22:24—27).

17. რომელი თვისებები დაეხმარება უხუცესებს, რომ ღვთის სამწყსოს კარგი მწყემსები იყვნენ?

¹⁷ ისინი, ვისაც აღმზრდელობითი ზომების გატარების პასუხისმგებლობა აკისრია, გონივრულად იქცევიან, როცა ქრისტეს მაგალითს ჰბაძავენ. ამით ისინი ცხადყოფენ, რომ სურთ, იეჰოვამ და იესომ უხელმძღვანელონ. პეტრე მოციქული წერდა: „მწყემსეთ თქვენთვის მობარებული ღვთის სამწყსო, ოღონდ არა იძულებით, არამედ ხალისით, არა უპატიოსნო შემოსავლის სიყვარულით, არამედ გულმოდგინებით. ნუ იბატონებთ მათზე, ვინც ღვთის საკუთრებაა, არამედ მაგალითი იყავით სამწყსოსთვის“ (1 პეტ. 5:2—4). როცა უხუცესები სიხარულით ემორჩილებიან ღმერთს და ქრისტეს, როგორც კრების თავს, კურთხევებს თავადაც იღებენ და კრების სხვა წევრებიც (ეს. 32:1, 2, 17, 18).

18. ა) რას ითხოვს იეჰოვა მშობლებისგან? ბ) როგორ ეხმარება ღმერთი მშობლებს მათი პასუხისმგებლობების შესრულებაში?

¹⁸ ამავე პრინციპებით უნდა ვიხელმძღვანელოთ ოჯახში. ბიბლია ოჯახისთავებს მოუწოდებს: „ნუ გააღიზიანებთ თქვენს შვილებს, არამედ იზრუნეთ მათზე — იეჰოვას მოსაწონად აღზარდეთ და დაარიგეთ“ (ეფეს. 6:4). რამდენად სერიოზულია ეს საკითხი? იგავების 19:18-დან ჩანს, რომ აღმზრდელობითი ზომების გამოყენებაზე ხშირად შვილების სიცოცხლეა დამოკიდებული. თუ ქრისტიანი მშობლები არ შეასრულებენ ამ პასუხისმგებლობას, ისინი იეჰოვას წინაშე აგებენ პასუხს (1 სამ. 3:12—14). თუმცა იეჰოვა საჭირო სიბრძნესა და ძალას აძლევს მშობლებს, როცა ისინი თავმდაბლად სთხოვენ ამას ლოცვაში და მის სიტყვასა და წმინდა სულს ხელმძღვანელობის საშუალებას აძლევენ (წაიკითხეთ იაკობის 1:5).

მოემზადეთ მარადიული მშვიდობისთვის

19, 20. ა) რა კურთხევები მოაქვს ღვთის აღმზრდელობითი ზომების მორჩილებას? ბ) რას განვიხილავთ შემდეგ სტატიაში?

¹⁹ თუ ჩვენ მიმართ გატარებულ აღმზრდელობით ზომებს დავემორჩილებით ან სხვების მიმართ აღმზრდელობითი ზომების გატარების დროს იეჰოვასა და იესოს მივბაძავთ, უამრავ კურთხევას მივიღებთ! შედეგად, ოჯახსა და კრებაში მშვიდობა დაისადგურებს, თითოეული იგრძნობს, რომ უყვართ, აფასებენ და იცავენ. ეს მხოლოდ მცირე ჩამონათვალია იმ კურთხევებიდან, რომლებიც მომავალში გვექნება (ფსალმ. 72:7). გადაჭარბებული არ იქნება, თუ ვიტყვით, რომ იეჰოვას აღმზრდელობითი ზომები გვამზადებს, მშვიდობიანად ვიცხოვროთ მარადიულად როგორც ერთმა დიდმა ოჯახმა (წაიკითხეთ ესაიას 11:9). თუ ასე შევხედავთ ღვთის აღმზრდელობით ზომებს, უკეთ დავინახავთ, რომ ეს მისი უსაზღვრო სიყვარულის შესანიშნავი მოწმობაა.

²⁰ შემდეგ სტატიაში უფრო ვრცლად შევეხებით ოჯახსა და კრებაში აღმზრდელობითი ზომების სხვადასხვა მხარეს. აგრეთვე ვისაუბრებთ, თუ როგორ შეგვიძლია საკუთარი თავის გაკონტროლება და რა მოგვაყენებს ღვთის აღმზრდელობითი ზომებით გამოწვეულ დროებით ტკივილზე უფრო დიდ ტკივილს.

1. როგორ ვიძენთ ღვთიურ სიბრძნეს და რა სიკეთე მოაქვს ამას ჩვენთვის?

იეჰოვა სიბრძნის წყაროა, რომელიც თავის სიბრძნეს ყველას უხვად აძლევს. იაკობის 1:5-ში ნათქვამია: „თუ რომელიმე თქვენგანს სიბრძნე აკლია, გამუდმებით სთხოვოს ღმერთს, რომელიც ყველას უხვად და დაუყვედრებლად აძლევს“. ღვთის სიბრძნის შეძენის ერთ-ერთი საშუალება მისი დარიგებების გათვალისწინებაა. ღვთისგან მომდინარე სიბრძნე როგორც ზნეობრივი, ისე სულიერი ზიანისგან გვიცავს (იგავ. 2:10—12). შედეგად, „ღვთის სიყვარულში“ ვრჩებით და ჩვენში მარადიული სიცოცხლის იმედი ცოცხლობს (იუდ. 21).

2. როგორ შეგვიძლია დავაფასოთ იეჰოვას დარიგებები?

² თუმცა არასრულყოფილების, აღზრდისა თუ სხვა ფაქტორების გამო გვიჭირს რჩევა-დარიგებების გათვალისწინება და მათი დადებითი კუთხით დანახვა. ხშირად რჩევის ფასს მაშინ ვხვდებით, როცა ვითვალისწინებთ მას და კარგ შედეგებს ვხედავთ. ამ დროს კიდევ ერთხელ ვრწმუნდებით ღვთის სიყვარულში. იგავების 3:11, 12-ში ვკითხულობთ: „შვილო, იეჰოვას დარიგებას ნუ უგულებელყოფ . . . რადგან იეჰოვა იმას შეაგონებს, ვინც უყვარს“. დიახ, არასდროს უნდა დაგვავიწყდეს, რომ იეჰოვას ჩვენთვის საუკეთესო სურს (წაიკითხეთ ებრაელების 12:5—11). ვინაიდან ღმერთი კარგად გვიცნობს, მისი აღმზრდელობითი ზომები ყოველთვის სათანადო და ზომიერია. ქვემოთ განვიხილავთ ოთხ მხარეს: 1) საკუთარი თავის კონტროლი, 2) მშობლების რჩევა-დარიგებები, 3) აღმზრდელობითი ზომები ქრისტიანულ კრებაში და 4) შედეგები, რომლებიც აღმზრდელობით ზომებზე მტკივნეულია.

თვითკონტროლი სიბრძნის მაჩვენებელია

3. როგორ სწავლობს ბავშვი საკუთარი თავის კონტროლს? მოიყვანეთ მაგალითი.

³ თვითკონტროლი ნიშნავს საკუთარი მოქმედებისა და ფიქრების გაკონტროლებას. ეს თვისება დაბადებიდან არ დაგვყვება; მას შეძენა სჭირდება. მაგალითად, როცა ბავშვი ველოსიპედის ტარებას სწავლობს, მშობელს ხშირად ხელით უჭირავს ველოსიპედი. მაგრამ, როცა ბავშვი ნელ-ნელა ეჩვევა წონასწორობის შენარჩუნებას, მშობელი დროდადრო ხელს უშვებს ველოსიპედს. დამოუკიდებლად ტარების უფლებას კი მაშინ აძლევს, როცა ბავშვს აღარ უჭირს წონასწორობის შენარჩუნება. მსგავსად ამისა, როცა მშობლები მოთმინებით ცდილობენ შვილების იეჰოვას მოსაწონად აღზრდასა და დარიგებას, მათ საკუთარი თავის კონტროლს და იეჰოვას სიბრძნეს ასწავლიან (ეფეს. 6:4).

4, 5. ა) რატომ არის თვითკონტროლი „ახალი პიროვნებისთვის“ დამახასიათებელი მნიშვნელოვანი თვისება? ბ) რატომ არ უნდა ჩაიქნიოს ხელი ღვთის მსახურმა, „შვიდჯერაც რომ დაეცეს“?

⁴ იმავეს თქმა შეიძლება მათზე, ვინც იეჰოვას მსახური ზრდასრულ ასაკში გახდა. მართალია, ისინი ზრდადასრულებულები არიან და გარკვეულწილად შეუძლიათ საკუთარი თავის კონტროლი, მაგრამ, როგორც ღვთის ახალი მსახურები, ისინი სულიერად მოუმწიფებლები არიან. როცა ასეთი ქრისტიანები ცდილობენ, მიჰბაძონ იესოს და „ახალი პიროვნებით“ შეიმოსონ, თანდათანობით სულიერ მოწიფულობას აღწევენ (ეფეს. 4:23, 24). საკუთარი თავის გაკონტროლების უნარი მნიშვნელოვნად უწყობს ხელს ადამიანის სულიერ ზრდას, რადგან ეს გვეხმარება, „უარვყოთ უღმერთოება და ქვეყნიური სურვილები, ახლანდელ ქვეყნიერებაში კი აზრიანად, სიმართლითა და ღვთისადმი ერთგულებით ვიცხოვროთ“ (ტიტ. 2:12).

⁵ ფაქტია, ყველანი ცოდვილები ვართ (ეკლ. 7:20). ამიტომ დროებითი დაცემა არც სრულ დამარცხებას ნიშნავს და არც იმის მაჩვენებელია, რომ საკუთარი თავის გაკონტროლება საერთოდ არ შეგვიძლია. „მართალი შვიდჯერაც რომ დაეცეს, უეჭველად წამოდგება“, — ნათქვამია იგავების 24:16-ში. რა დაგვეხმარება წამოდგომაში? რა თქმა უნდა, ამას მხოლოდ იეჰოვას სულის დახმარებით შევძლებთ (წაიკითხეთ ფილიპელების 4:13). თვითკონტროლი თავისი მნიშვნელობით ძალიან ახლოს დგას თავშეკავებასთან, რომელიც სულის ნაყოფის ერთ-ერთი თვისებაა.

6. რა დაგვეხმარება, რომ ღვთის სიტყვის უკეთესი მკვლევრები გავხდეთ? (იხილეთ სურათი 28-ე გვერდზე)

⁶ საკუთარი თავის გაკონტროლებასა და თვითდისციპლინის განვითარებაში მთელი გულით ლოცვა, ბიბლიის კითხვა და წაკითხულზე ფიქრიც დაგვეხმარება. მაგრამ რის გაკეთება შეგიძლიათ, თუ გიჭირთ ბიბლიის კვლევა? შეიძლება ფიქრობთ, რომ არც ისე ბეჯითი ხართ. მაგრამ გახსოვდეთ, რომ იეჰოვა აუცილებლად დაგეხმარებათ, თუ მისცემთ ამის საშუალებას. ის დაგეხმარებათ, რომ განივითაროთ მისი სიტყვისადმი სწრაფვა (1 პეტ. 2:2). თავდაპირველად, სთხოვეთ იეჰოვას დახმარება, რომ შეძლოთ მობილიზება ღვთის სიტყვის შესასწავლად, შემდეგ კი ლოცვის შესაბამისად თუნდაც ცოტა დრო გამოყავით კვლევისთვის. დროთა განმავლობაში ღვთის სიტყვის კვლევა თქვენთვის უფრო ადვილი და სასიამოვნო პროცესი გახდება. ეჭვგარეშეა, თქვენთვის სასიამოვნო წუთებად იქცევა ის დრო, რომელსაც ღვთის აზრებზე დასაფიქრებლად გამოყოფთ (1 ტიმ. 4:15).

7. როგორ გვეხმარება თვითდისციპლინა სულიერი მიზნების მიღწევაში?

⁷ თვითდისციპლინა სულიერი მიზნების მიღწევაშიც დაგვეხმარება. დავფიქრდეთ ერთი დაოჯახებული მამაკაცის შემთხვევაზე, რომელიც გრძნობდა, რომ უწინდებური შემართებით აღარ ემსახურებოდა ღმერთს. მან მიზნად პიონერად მსახურება დაისახა. ამ საკითხთან დაკავშირებით ის ჩვენს ჟურნალებში დაბეჭდილ სტატიებს კითხულობდა და ლოცულობდა. ამან ის სულიერად გააძლიერა და ძალა შემატა, რომ მიზნისთვის მიეღწია. დროდადრო, როცა შესაძლებლობა მიეცემოდა, დამხმარე პიონერად მსახურობდა. ხელის შემშლელი ფაქტორების მიუხედავად, ის პიონერობისკენ ისწრაფოდა და მიაღწია კიდეც თავის მიზანს.

იეჰოვას დარიგებებით აღზარდეთ შვილები

8—10. რა დაეხმარება ქრისტიან მშობლებს, რომ იეჰოვას მსახურებად აღზარდონ შვილები? მოიყვანეთ მაგალითი.

⁸ ქრისტიან მშობლებს უდიდესი პატივი ხვდათ წილად, რომ შვილები იეჰოვას მოსაწონად აღზარდონ და დაარიგონ (ეფეს. 6:4). ეს საპასუხისმგებლო საქმეა, განსაკუთრებით დღევანდელ ქვეყნიერებაში (2 ტიმ. 3:1—5). ცხადია, ბავშვებმა დაბადებიდანვე არ იციან, რა არის კარგი და რა ცუდი. ისინი იბადებიან სინდისით, თუმცა ამ სინდისს განსწავლა და გაწაფვა სჭირდება (რომ. 2:14, 15). ერთ ბიბლიურ ნაშრომში ნათქვამია, რომ აღზრდად ნათარგმნი ბერძნული სიტყვა შეიძლება ბავშვის პიროვნებად ჩამოყალიბებასაც ნიშნავდეს.

⁹ ბავშვები, რომელთაც რჩევა-დარიგებებს სიყვარულით აძლევენ, უფრო დაცულად გრძნობენ თავს. ისინი სწავლობენ, რომ თავისუფლებას აქვს საზღვრები და მათ გადაწყვეტილებებსა თუ საქციელს აუცილებლად მოჰყვება შედეგი — კარგი ან ცუდი. ამიტომ ძალიან მნიშვნელოვანია, რომ ქრისტიანმა მშობლებმა ხელმძღვანელობისთვის იეჰოვას მიმართონ. ნუ დაგავიწყდებათ, რომ აღზრდის მეთოდები ყველა კულტურასა და თაობაში განსხვავებულია. როცა მშობლები მიჰყვებიან ღვთის ხელმძღვანელობას, მათ არ უწევთ გამუდმებით იმაზე ფიქრი, როგორ აღზარდონ შვილები, და არც ადამიანურ სიბრძნესა და გამოცდილებას ეყრდნობიან.

¹⁰ განვიხილოთ ნოეს მაგალითი. როცა იეჰოვამ კიდობნის აგება დაავალა, ნოე საკუთარ გამოცდილებას ვერ დაენდობოდა, რადგან კიდობანი არასდროს აუშენებია. ის იეჰოვას უნდა მინდობოდა. მან ყველაფერი „სწორედ ისე“ გააკეთა, როგორც იეჰოვამ უთხრა (დაბ. 6:22). შედეგად, ნოეც გადარჩა და მისი ოჯახიც. ნოე კარგი ოჯახისთავიც იყო, რადგან ის ისევ და ისევ იეჰოვას სიბრძნეზე იყო დანდობილი. მან კარგად აღზარდა შვილები და მისაბაძი მაგალითი მისცა მათ, რაც არც ისე ადვილი იქნებოდა წარღვნამდელ ბოროტ ქვეყნიერებაში (დაბ. 6:5).

11. რამდენად მნიშვნელოვანია შვილების აღზრდის დროს მშობლების მაგალითი?

¹¹ როგორც მშობლებს, როგორ შეგიძლიათ ყველაფერი „სწორედ ისე“ გააკეთოთ, როგორც იეჰოვა გეუბნებათ? მოუსმინეთ იეჰოვას! მიეცით მას საშუალება, რომ შვილების აღზრდის დროს თავისი სიტყვითა და ორგანიზაციის მიერ მოწვდილი მითითებებით გიხელმძღვანელოთ. თუ ასე მოიქცევით, შვილები თავის დროზე დაგიფასებენ ძალისხმევას! ერთმა ახალგაზრდა ძმამ თქვა: „ძალიან მადლიერი ვარ, რომ მშობლებმა ასე აღმზარდეს. მათ ყველაფერი გააკეთეს, რომ ჭეშმარიტება შემყვარებოდა. ამიტომ ჩემი სულიერი წინსვლა მეტწილად მათი დამსახურებაა“. მაგრამ მშობლების ძალისხმევის მიუხედავად, ზოგიერთი ბავშვი ტოვებს ორგანიზაციას. ასეთ მშობლებს, რომლებმაც ყველაფერი გააკეთეს შვილებისთვის ჭეშმარიტების ჩასანერგად, სუფთა სინდისი აქვთ. ისინი არ კარგავენ იმედს, რომ ერთ მშვენიერ დღეს მათი შვილი დაუბრუნდება იეჰოვას.

12, 13. ა) როგორ შეუძლიათ გარიცხული შვილის მშობლებს ცხადყონ, რომ ღმერთს ემორჩილებიან? ბ) რა შედეგი მოუტანა ერთ ოჯახს იმან, რომ მშობლები ემორჩილებოდნენ იეჰოვას?

¹² ზოგიერთი მშობლისთვის ღვთის მორჩილების ერთ-ერთი უდიდესი გამოცდა გარიცხულ შვილთან ურთიერთობაა. განვიხილოთ ერთი დის მაგალითი, რომლის გარიცხული ქალიშვილიც სახლიდან წავიდა. ეს და ამბობს: „ჩვენს პუბლიკაციებში ხელჩასაჭიდ აზრებს ვეძებდი, რომ შვილთან და შვილიშვილთან ურთიერთობა მქონოდა. მაგრამ ქმარმა რბილად დამანახვა, რომ ის უკვე იეჰოვას ხელში იყო და არ უნდა ჩავრეულიყავით მისი აღზრდის პროცესში“.

¹³ რამდენიმე წლის შემდეგ მათი ქალიშვილი დაბრუნდა კრებაში. „ახლა ის თითქმის ყოველდღე მირეკავს ან მწერს! — ამბობს ეს და. — ის ძალიან გვაფასებს, რადგან ხვდება, რომ იეჰოვას ვემორჩილებოდით. დღეს ჩვენ შესანიშნავი ურთიერთობა გვაქვს“. თუ თქვენი შვილიც გარიცხულია, მიენდობით „იეჰოვას მთელი გულით“ და შეეცდებით, რომ საკუთარ გონებას არ დაეყრდნოთ? (იგავ. 3:5, 6). გახსოვდეთ, რომ იეჰოვას აღმზრდელობით ზომებში მისი შეუდარებელი სიბრძნე და სიყვარული ჩანს. ნუ დაგავიწყდებათ, რომ მან საკუთარი შვილი გაიღო ყველასთვის, მათ შორის თქვენი შვილისთვის. მას არ სურს, რომ ვინმე დაიღუპოს (წაიკითხეთ 2 პეტრეს 3:9). ამიტომ მიენდეთ იეჰოვას აღმზრდელობით ზომებსა და ხელმძღვანელობას. ეს მაშინაც გააკეთეთ, როცა თქვენთვის, როგორც მშობლისთვის, მტკივნეულია იმის კეთება, რასაც იეჰოვა ითხოვს. ასე რომ, მხარი დაუჭირეთ ღვთის აღმზრდელობით ზომებს და ნუ წახვალთ მათ წინააღმდეგ.

კრებაში

14. რა სიკეთე მოაქვს იეჰოვას მითითებებს, რომელთაც ერთგული მმართველი გვაწვდის?

¹⁴ იეჰოვა დაგვპირდა, რომ იზრუნებდა, დაიცავდა და უხელმძღვანელებდა ქრისტიანულ კრებას. ის ამას სხვადასხვა საშუალებით აკეთებს. მაგალითად, მან კრების თავად იესო დანიშნა, რომელმაც ერთგული მმართველი დააყენა, რათა დროულად მიეწოდებინა კრებისთვის სულიერი საზრდო (ლუკ. 12:42). სულიერი საზრდო, რომელიც სხვადასხვა საშუალებით არის ხელმისაწვდომი, ფასდაუდებელ რჩევებსა და მითითებებს შეიცავს. ჰკითხეთ საკუთარ თავს: „ხშირად აღმძრავს საჯარო მოხსენება ან ჩვენს ჟურნალებში დაბეჭდილი სტატიები, რომ აზროვნებასა თუ საქციელში ცვლილებები მოვახდინო?“. თუ თქვენი პასუხი დადებითია, ეს კარგის ნიშანია. აქედან ჩანს, რომ თქვენ საშუალებას აძლევთ იეჰოვას, გამოგძერწოთ, ანუ აღგზარდოთ, რაც თქვენთვისვეა კარგი (იგავ. 2:1—5).

15, 16. ა) რა სიკეთე მოაქვს კრებისთვის „ძღვენს ადამიანთა სახით“? ბ) როგორ შეგვიძლია გავუადვილოთ საქმე უხუცესებს?

¹⁵ ქრისტემ კრებაში აგრეთვე „მოგვცა ძღვენი ადამიანთა სახით“, ანუ ღვთის სამწყსოს მწყემსებად უხუცესები დანიშნა (ეფეს. 4:8, 11—13). როგორ შეგვიძლია ვისარგებლოთ ამ ძღვნით? ერთ-ერთი საშუალებაა, მივბაძოთ უხუცესების რწმენასა და კარგ მაგალითს. აგრეთვე შეგვიძლია გავითვალისწინოთ მათ მიერ მოცემული რჩევები (წაიკითხეთ ებრაელების 13:7, 17). გახსოვდეთ, რომ უხუცესებს ვუყვარვართ და სურთ, რომ სულიერად გავიზარდოთ. მაგალითად, თუ ისინი შენიშნავენ, რომ კრების შეხვედრები გვიცდება ან უწინდებური შემართებით აღარ ვმსახურობთ, ისინი მაშინვე შეეცდებიან ჩვენს დახმარებას. უხუცესები მოგვისმენენ, გაგვაძლიერებენ, გაგვამხნევებენ და სათანადო ბიბლიურ რჩევას მოგვცემენ. მიიჩნევთ მათ დახმარებას იეჰოვას სიყვარულის გამოვლინებად?

¹⁶ არც ის უნდა დაგვავიწყდეს, რომ ზოგჯერ უხუცესებისთვის შეიძლება რთული იყოს ჩვენთან მოსვლა და საჭირო რჩევის მოცემა. წარმოიდგინეთ, რა ძნელი იქნებოდა წინასწარმეტყველ ნათანისთვის მეფე დავითთან მისვლა, რომელიც მძიმე ცოდვის მიჩქმალვას ცდილობდა (2 სამ. 12:1—14). მსგავსად, პავლე მოციქულსაც გაბედულება სჭირდებოდა, რომ პეტრესთვის, 12 მოციქულიდან ერთ-ერთისთვის, აზროვნება შეესწორებინა, როცა მან იუდეველი ძმების მიმართ მიკერძოება გამოიჩინა (გალ. 2:11—14). დაფიქრდით, როგორ შეგიძლიათ შეუმსუბუქოთ ეს ტვირთი კრების უხუცესებს? იყავით თავმდაბალი, უშუალო და მადლიერი. მათი დახმარება თქვენდამი ღვთის სიყვარულის გამოვლინებად მიიჩნიეთ. ეს არა მხოლოდ თქვენ დაგეხმარებათ, არამედ უხუცესებსაც შეუწყობს ხელს, უფრო მეტი სიხარულით შეასრულონ თავიანთი საქმე.

17. როგორ დაეხმარნენ სიყვარულით ერთ დას კრების უხუცესები?

¹⁷ თავისი წარსულის გამო ერთ დას ძალიან უჭირდა იეჰოვას შეყვარება. „როცა ჩემმა წარსულმა და სხვა პრობლემებმა ემოციურად გამომფიტა, მივხვდი, რომ უხუცესებთან უნდა მელაპარაკა, — ამბობს ის. — ისინი არ გაბრაზებულან და არ გავუკრიტიკებივარ. პირიქით, გამამხნევეს და გამაძლიერეს. ყოველი კრების შემდეგ, რაც არ უნდა დაკავებულები ყოფილიყვნენ, ერთი უხუცესი მაინც მეკითხებოდა, როგორ ვგრძნობდი თავს. ჩემი წარსულის გამო თავს ღვთის სიყვარულის ღირსად არ ვთვლიდი. მაგრამ იეჰოვა ისევ და ისევ მიმტკიცებდა თავის სიყვარულს კრების წევრებისა და უხუცესების მეშვეობით. ვევედრები იეჰოვას დამეხმაროს, რომ არასდროს მივატოვო ის“.

აღმზრდელობითი ზომებით გამოწვეულ ტკივილზე უარესი

18, 19. რა შეიძლება იყოს აღმზრდელობითი ზომებით გამოწვეულ ტკივილზე უარესი? ახსენით.

¹⁸ მიუხედავად იმისა, რომ აღმზრდელობითი ზომები შეიძლება მტკივნეული იყოს, არის რაღაც, რაც უფრო მტკივნეულია — ეს არის აღმზრდელობითი ზომების უგულებელყოფით გამოწვეული ზიანი (ებრ. 12:11). განვიხილოთ კაენისა და მეფე ციდკიას შემთხვევები. როცა კაენმა ისე შეიძულა აბელი, რომ მისი მოკვლა გაივლო გულში, ღმერთმა ჰკითხა: „რატომ აენთე რისხვით და რატომ მოგეღუშა სახე? თუ კარგს გააკეთებ, განა არ მიგიღებ?! მაგრამ თუ არ გააკეთებ კარგს, ცოდვაა ჩასაფრებული კართან და შენკენ ისწრაფვის. იბატონებ მასზე?!“ (დაბ. 4:6, 7). კაენმა არ მოუსმინა იეჰოვას, ამიტომ ცოდვამ სძლია და მთელი ცხოვრება სავალალო შედეგებს იმკიდა (დაბ. 4:11, 12). კაენს ღმერთისთვის რომ დაეჯერებინა, ამხელა ტკივილს არ მიაყენებდა საკუთარ თავს.

¹⁹ ციდკია ბოროტი და სუსტი ნებისყოფის მქონე მმართველი იყო, რომელიც იერუსალიმში საკმაოდ რთულ პერიოდში მეფობდა. წინასწარმეტყველმა იერემიამ არაერთხელ გააფრთხილა ციდკია, მიეტოვებინა ბოროტი საქმეები, მაგრამ მეფემ ყურად არ იღო შეგონება. შედეგად, მისი ცხოვრება ტრაგიკულად დასრულდა (იერ. 52:8—11). იეჰოვას ნამდვილად არ სურს, რომ ზედმეტი ტკივილი მივაყენოთ საკუთარ თავს! (წაიკითხეთ ესაიას 48:17, 18).

20. რა მომავალი ელის მათ, ვინც ყურად იღებს ღვთის დარიგებებს და ვინც უგულებელყოფს მათ?

²⁰ ღვთის აღმზრდელობით ზომებს დღეს ბევრი არაფრად აგდებს. ამიტომ ასეთი ადამიანები ბოროტებთან ერთად სავალალო შედეგებს მოიმკიან (იგავ. 1:24—31). ასე რომ, მოუსმინეთ დარიგებას და დაბრძენდით! იგავების 4:13 თითოეულ ჩვენგანს მოგვიწოდებს: „ჩაეჭიდე დარიგებას და ნუ მიატოვებ. დაიცავი, რადგან ის შენი სიცოცხლეა“.