ნუ დაემონებით ალკოჰოლს!

პირველ სტატიაში მოხსენიებული ტონის ცხოვრება სხვაგვარად წარიმართებოდა, თუ ის აღიარებდა, რომ სმასთან დაკავშირებით პრობლემები ჰქონდა. მაგრამ ტონი დარწმუნებული იყო, რომ უზომოდ სმა არანაირ პრობლემას არ უქმნიდა და საკუთარ თავს აკონტროლებდა. რატომ აკეთებდა ის ასეთ არასწორ დასკვნას?

ალკოჰოლის გადაჭარბებულად მიღებამ მას განსჯის უნარი დააკარგვინა. მიუხედავად იმისა, აცნობიერებდა თუ არა ტონი ამას, მისი ტვინი, რომელიც მის ფიზიკურ, გონებრივ და ემოციურ მდგომარეობაზე იყო პასუხისმგებელი, სათანადოდ არ ფუნქციონირებდა, როცა ის უზომოდ სვამდა. რაც მეტს სვამდა, მით ნაკლებად შეეძლო მის ტვინს მისი მდგომარეობის რეალურად შეფასება.

ტონის კიდევ ერთი პრობლემა ის იყო, რომ სმისთვის თავის დანებება არ უნდოდა. ალენიც, რომელიც პირველ სტატიაში იყო მოხსენიებული, თავიდან უარყოფდა, რომ ალკოჰოლთან დაკავშირებით პრობლემა ჰქონდა. „ვმალავდი, რომ ვსვამდი, — ამბობს ის. — თავს ვიმართლებდი და ყოველთვის იმაზე ნაკლებს ვამბობდი, ვიდრე ვსვამდი. არ მინდოდა, ვინმეს ჩემთვის სმა დაეშალა“. მაშინაც კი, როცა სხვები ხედავდნენ, რომ მათ ზედმეტი მოსდიოდათ, ტონი და ალენი თავს იტყუებდნენ, რომ ყველაფერი რიგზე იყო. თითოეულ მათგანს ზომები უნდა მიეღო, რომ უზომოდ სმისთვის თავი დაენებებინა. რა უნდა გაეკეთებინათ მათ?

გადადგით კონკრეტული ნაბიჯები

ბევრმა იმიტომ შეწყვიტა ალკოჰოლის ბოროტად გამოყენება, რომ იესოს შემდეგი სიტყვები გაითვალისწინა: „თუ მარჯვენა თვალი გაბრკოლებს, ამოითხარე და გადააგდე, რადგან უმჯობესია, სხეულის ერთი ნაწილი დაკარგო, ვიდრე მთელი შენი სხეული ჩავარდეს გეენაში“ (მათე 5:29).

ცხადია, იესო ამ სიტყვებში არ გულისხმობდა იმას, რომ ადამიანს საკუთარი თავი დაესახიჩრებინა. მან მეტაფორა გამოიყენა, რითაც დაგვანახვა, რომ უნდა მოვიშოროთ ყველაფერი, რაც სულიერ ზიანს მოგვაყენებს. მართალია, ზომების მიღება შეიძლება მტკივნეული იყოს, მაგრამ ეს დაგვიცავს ისეთი აზროვნებისა და სიტუაციებისგან, რომლებიც ალკოჰოლის ბოროტად გამოყენებამდე მიგვიყვანდა. ასე რომ, თუ სხვები წუხან იმის გამო, რომ ბევრს სვამთ, დაუყოვნებლივ მიიღეთ ზომები.a თუ არ შეგიძლიათ, ზომიერად დალიოთ, მაშინ მზად იყავით, რომ საერთოდ უარი თქვათ სასმელზე. ამის გაკეთება შეიძლება რთული იყოს, მაგრამ გაცილებით იოლი ასატანი იქნება იმ სირთულეებთან შედარებით, რაც სმას მოჰყვება.

შეიძლება ალკოჰოლიკი არა ხართ, მაგრამ მიდრეკილი ხართ ბევრის დალევისკენ; რის გაკეთება შეგიძლიათ, რომ ზომიერების ფარგლებს არ გასცდეთ?

რა დაგეხმარებათ?

1. გჯეროდეთ, რომ ხშირად და მხურვალედ ლოცვას დიდი ძალა აქვს. ვისაც სურს, ღვთის მოსაწონად მოიქცეს, ბიბლია ურჩევს: „ლოცვით, ვედრებითა და მადლიერებით აცნობეთ ყველა თქვენი სათხოვარი ღმერთს და ღვთის მშვიდობა, რომელიც ნებისმიერ აზრს აღემატება, დაიცავს თქვენს გულებსა და გონებას ქრისტე იესოს მეშვეობით“ (ფილიპელები 4:6, 7). როგორ უნდა ილოცოთ, რომ ღვთის მშვიდობა დაგეუფლოთ?

გულწრფელად აღიარეთ ღვთის წინაშე, რომ ალკოჰოლთან დაკავშირებით პრობლემა გაქვთ, რომლის გადაჭრაზეც მხოლოდ თქვენა ხართ პასუხისმგებელი. უთხარით ღმერთს, რის გაკეთება გინდათ ამ პრობლემის გადასაჭრელად და სთხოვეთ, აკურთხოს თქვენი ძალისხმევა, რომ შვება იგრძნოთ და თავიდან აირიდოთ სერიოზული გართულებები. ბიბლიაში ვკითხულობთ: „ვინც თავის ცოდვებს მალავს, ხელი არ მოემართება, ხოლო ვინც მათ აღიარებს და მიატოვებს, შეწყალებული იქნება“ (იგავები 28:13). იესომაც გვირჩია, რომ ღვთისთვის გვეთხოვა: „ნუ შეგვიყვან ცდუნებაში, არამედ გვიხსენი ბოროტისგან“ (მათე 6:13). როგორ შეგიძლიათ ლოცვის შესაბამისად მოქცევა და ღვთისგან დახმარების მიღება?

2. მიიღეთ ძალა ღვთის სიტყვიდან. „ღვთის სიტყვა არის ცოცხალი, მოქმედი . . . და არკვევს გულის აზრებსა და ზრახვებს“ (ებრაელები 4:12). ბევრ მსმელს დაეხმარა ბიბლიური მუხლების ყოველდღე კითხვა და მათზე ფიქრი. ღვთისმოშიში ფსალმუნმომღერალი წერდა: „ბედნიერია კაცი, რომელიც ბოროტთა რჩევისამებრ არ დადის . . . [არამედ] იეჰოვას კანონი ანიჭებს მას სიამოვნებას და კითხულობს მის კანონს დღედაღამ . . . ყველაფერში, რასაც აკეთებს, ხელი მოემართება“ (ფსალმუნი 1:1—3).

ალენს იეჰოვას მოწმეებთან ბიბლიის შესწავლა დაეხმარა ალკოჰოლიზმთან ბრძოლაში. ის ამბობს: „დარწმუნებული ვარ, ბიბლია და ბიბლიური პრინციპები რომ არ დამხმარებოდა, უკვე მკვდარი ვიქნებოდი“.

3. განივითარეთ თავშეკავება. ბიბლიიდან ვიგებთ, რომ პირველ საუკუნეში მცხოვრები ზოგი ქრისტიანი წარსულში ლოთი იყო, მაგრამ „ღვთის სულით“ განიწმინდნენ (1 კორინთელები 6:9—11). ერთ-ერთი რამ, რაც მათ ღრეობისა და გადამეტებული სმისთვის თავის დანებებაში დაეხმარა, თავშეკავება იყო. ეს თვისება მათ ღვთის სულის დახმარებით განივითარეს. „ნუ დათვრებით ღვინით, რაშიც აღვირახსნილობაა, არამედ სულით ივსებოდეთ“ (ეფესოელები 5:18; გალატელები 5:21—23). იესო ქრისტე დაგვპირდა, რომ „ზეციერი მამა მისცემს წმინდა სულს მათ, ვინც სთხოვს!“. ამიტომ „ითხოვეთ და მოგეცემათ“ (ლუკა 11:9, 13).

ვისაც სურს, იეჰოვას სცეს თაყვანი მისაღები სახით, თავშეკავება უნდა განივითაროს, რაშიც ბიბლიის შესწავლა და მთელი გულით ლოცვა დაეხმარება. გულს ნუ გაიტეხთ! დარწმუნებული იყავით ღვთის სიტყვის ჭეშმარიტებაში: „ვინც სულისთვის თესავს, სულისგან მარადიულ სიცოცხლეს მოიმკის. ასე რომ, ნუ მოვიშლით კარგის კეთებას, რადგან თავის დროზე მოვიმკით, თუ არ დავიღლებით“ (გალატელები 6:8, 9).

4. შეარჩიეთ მეგობრები. „ბრძენებთან მოსიარულე თავადაც დაბრძენდება, სულელებთან საქმის დამჭერი კი ხიფათს გადაეყრება“ (იგავები 13:20). უთხარით თქვენს მეგობრებს, რომ გადაწყვეტილი გაქვთ, ზომაზე მეტი არ დალიოთ. თუმცა ღვთის სიტყვა იმასაც გვაფრთხილებს, რომ ზოგი თქვენი მეგობარი შეიძლება საგონებელში ჩავარდეს და დაგგმოთ კიდეც, როცა „ღვინის უზომოდ სმას, ღრეობას [და] სმაში შეჯიბრებას“ თავს დაანებებთ (1 პეტრე 4:3, 4). ამიტომ გაწყვიტეთ ურთიერთობა მათთან, ვინც არ იწონებს თქვენს გადაწყვეტილებას.

5. დაადგინეთ ზღვარი. „ნუღარ იცხოვრებთ ქვეყნიერების ყაიდაზე, არამედ განიახლეთ გონება და გარდაიქმენით, რათა დარწმუნდეთ, რა არის ღვთის ნება — კარგი, მოსაწონი და სრულყოფილი“ (რომაელები 12:2). თუ ამ ზღვარს ბიბლიის პრინციპების მიხედვით დაადგენთ და არა იმის მიხედვით, რასაც თქვენი მეგობრები მიიჩნევენ სწორად ან რაც ამ ქვეყნიერებაშია მიღებული, ეს თქვენს ცხოვრებას უკეთესობისკენ შეცვლის და ღმერთსაც ასიამოვნებთ. მაგრამ, როგორ უნდა განსაზღვროთ, რამდენის დალევაა თქვენთვის საკმარისი?

ალკოჰოლის ნებისმიერი რაოდენობა, რომელიც განსჯისა და საღად აზროვნების უნარს გაკარგვინებთ, უკვე ზედმეტია. თუ გადაწყვეტთ დალევას, წინასწარ განსაზღვრეთ, იმდენი დალიოთ, რომ სასმელი არ მოგეკიდოთ, რომ აღარაფერი ვთქვათ დათრობაზე. გულწრფელად შეაფასეთ საკუთარი თავი, რათა ზომაზე მეტი არ მოგივიდეთ. ზომიერების ფარგლებში დაადგინეთ, რამდენია თქვენთვის ნორმა.

6. ისწავლეთ უარის თქმა. „თქვენი დიახ იყოს დიახ, არა კი — არა“ (მათე 5:37). ისწავლეთ, რომ გულუხვ მასპინძელს თავაზიანად უთხრათ უარი, როცა ის სასმელს გაძალებთ. „თქვენი სიტყვა ყოველთვის მადლიანი იყოს, მარილით შეზავებული, რათა იცოდეთ, ვის როგორი პასუხი გასცეთ“ (კოლოსელები 4:6).

7. ითხოვეთ დახმარება. მიმართეთ მეგობრებს, რომლებიც სულიერად მხარში ამოგიდგებიან და დაგეხმარებიან, ზომაზე მეტი არ დალიოთ. „ორის ერთად ყოფნა სჯობს მარტო ყოფნას, რადგან კარგ საზღაურს მიიღებენ თავიანთი გარჯის სანაცვლოდ. თუ ერთი დაეცემა, მეორე წამოაყენებს თავის ამხანაგს“ (ეკლესიასტე 4:9, 10; იაკობი 5:14, 16). შეერთებული შტატების ალკოჰოლის ბოროტად გამოყენებისა და ალკოჰოლიზმის ეროვნული ინსტიტუტი გვირჩევს: „სასმლის მიტოვება თქვენთვის შეიძლება რთული იყოს. ამიტომ დახმარებისთვის ოჯახის წევრებსა და მეგობრებს მიმართეთ“.

8. მოიქეცით გადაწყვეტილების თანახმად. „იყავით სიტყვის შემსრულებელნი და არა მხოლოდ მომსმენნი, თავს რომ იტყუებენ მცდარი აზროვნებით . . . ხოლო ვინც უკვირდება თავისუფლების სრულყოფილ კანონს და ასე განაგრძობს, ბედნიერი იქნება, რადგან გახდა არა გულმავიწყი მსმენელი, არამედ საქმის შემსრულებელი“ (იაკობი 1:22, 25).

თავი დააღწიეთ ალკოჰოლიზმს

ყველა, ვინც გადაჭარბებულად სვამს, ალკოჰოლიკი არ არის. მაგრამ ზოგი იმდენად ბევრს სვამს ან იმდენად ხშირად, რომ ალკოჰოლზე დამოკიდებული ხდება. რამდენადაც ალკოჰოლზე ადამიანი ფიზიკურად და ფსიქოლოგიურად ხდება დამოკიდებული, ის შეიძლება მხოლოდ საკუთარი ძალისხმევისა და სულიერი დახმარების შედეგად ვერ გათავისუფლდეს ალკოჰოლის მონობისგან. ალენი იხსენებს: „როდესაც ვცდილობდი, სმისთვის თავი დამენებებინა, საშინელი ტკივილები მტანჯავდა. მივხვდი, რომ სულიერი დახმარების გარდა, სამედიცინო დახმარებაც მჭირდებოდა“.

ბევრ მსმელს მკურნალობა სჭირდება, რომ ალკოჰოლს თავი დაანებოს და გადაჭარბებით აღარ დალიოს.b ალკოჰოლის მიტოვების შედეგად შეიძლება გარკვეულმა სიმპტომებმა იჩინოს თავი და საჭირო გახდეს ადამიანის ჰოსპიტალიზაცია ან ისეთი მედიკამენტების მიღება, რომლებიც ალკოჰოლის მიღების ძლიერ სურვილს შეუსუსტებს და თავშეკავების გამოვლენაში დაეხმარება. ღვთის ძემ აღნიშნა: „ექიმი ჯანმრთელებს კი არა, ავადმყოფებს სჭირდებათ“ (მარკოზი 2:17).

ღვთის მითითებების დაცვა სასარგებლოა

ალკოჰოლთან დაკავშირებით ბიბლიაში ჩაწერილი რჩევები ჭეშმარიტი ღვთისგან მომდინარეობს, რომელსაც ჩვენთვის დროებითი ბედნიერება კი არა, მარადიული ბედნიერება სურს. ალენი, რომელმაც ოცდაოთხი წლის წინ დაანება თავი სმას, ამბობს: „ბედნიერი ვიყავი, როცა გავიგე, რომ იეჰოვას სურდა დამხმარებოდა, რათა შევცვლილიყავი და მიმეტოვებინა ცუდი ჩვევები, რომ მას . . .“. ალენს თვალზე ცრემლები მოადგა და შემდეგ განაგრძო: „მას ესმის ჩემი, ზრუნავს და საჭირო დახმარებას მიწევს; ძალიან რთულია, ეს გრძნობა სიტყვებით გადმოსცე“.

თუ ალკოჰოლს გადაჭარბებულად სვამთ ან მასზე ხართ დამოკიდებული, გულს ნუ გაიტეხთ და ნაჩქარევად ნუ დაასკვნით, რომ გამოსავალი არ არსებობს. ალენი და სხვა ბევრი თქვენნაირ მდგომარეობაში იყვნენ, მაგრამ მათ შეძლეს ალკოჰოლის ზომიერად გამოყენება ან საერთოდ უარი თქვეს მასზე. ისინი არ ნანობენ, რომ ასეთი ნაბიჯი გადადგეს და ამას არც თქვენ ინანებთ.

თქვენი გადასაწყვეტია, ზომიერად მიიღებთ ალკოჰოლს თუ საერთოდ უარს იტყვით მასზე. ნებისმიერ შემთხვევაში გახსოვდეთ ღვთისგან სიყვარულით მოცემული მითითება: „ო, ნეტავ ყურად გეღო ჩემი მცნებები! მაშინ მდინარესავით იქნებოდა შენი მშვიდობა და შენი სიმართლე — ზღვის ტალღებივით“ (ესაია 48:18).

[სქოლიოები]

[ჩარჩო⁄სურათი 8 გვერდზე]

ზომაზე მეტს ხომ არ სვამთ?

ჰკითხეთ საკუთარ თავს:

• ადრინდელთან შედარებით უფრო მეტს ხომ არ ვსვამ?

• ადრინდელთან შედარებით უფრო ხშირად ხომ არ ვსვამ?

• ხომ არ მივეჩვიე უფრო ძლიერ სასმელებს?

• ვსვამ დაძაბულობის მოსახსნელად ან პრობლემების დასავიწყებლად?

• წუხს ოჯახის წევრი ან მეგობარი იმის გამო, რომ ვსვამ?

• მიქმნის დალევა პრობლემას ოჯახში, სამუშაოზე ან მგზავრობისას?

• ხომ არ მიჭირს ერთი კვირა სასმლის გარეშე გაძლება?

• უხერხულად ვგრძნობ თავს, როცა სხვები უარს ამბობენ დალევაზე?

• ვუმალავ სხვებს, რამდენს ვსვამ?

თუ ერთ კითხვას მაინც გაეცით დადებითი პასუხი, დროა საჭირო ზომები მიიღოთ.

[ჩარჩო⁄სურათი 9 გვერდზე]

მიიღეთ გონივრული გადაწყვეტილებები

სანამ დალევთ, დაფიქრდით:

• მიზანშეწონილია დალევა თუ ჯობია, უარი ვთქვა?

რჩევა: ვისაც არ შეუძლია ზომიერად დალევა, საერთოდ არ უნდა დალიოს.

• რამდენი უნდა დავლიო?

რჩევა: მანამდე განსაზღვრეთ, რამდენს დალევთ, სანამ ალკოჰოლი განსჯის უნარს დაგაკარგვინებთ.

• როდის უნდა დავლიო?

რჩევა: ნუ დალევთ საჭესთან დაჯდომდე ან ისეთ საქმიანობამდე, რომელიც სიფხიზლესა და ყურადღებას მოითხოვს; ასევე ნუ დალევთ, თუ რელიგიურ მსახურებაში უნდა მიიღოთ მონაწილეობა, ფეხმძიმედ ხართ ან გარკვეულ მედიკამენტებს იღებთ.

• სად უნდა დავლიო?

რჩევა: ჯანსაღ გარემოში; არ დალიოთ მალულად ან ისეთ ხალხთან, რომლებზეც ალკოჰოლი უარყოფითად მოქმედებს.

• ვისთან ერთად უნდა დავლიო?

რჩევა: მეგობრებთან და ოჯახის წევრებთან, რომლებიც შენზე დადებით გავლენას ახდენენ და არა მათთან, ვისაც სმასთან დაკავშირებით პრობლემები აქვთ.

[ჩარჩო⁄სურათი 10 გვერდზე]

ღვთის სიტყვა ალკოჰოლიკს გამოსწორებაში დაეხმარა

ტაილანდში მცხოვრები სუპოტი მაგარი მსმელი იყო. თავიდან ის მხოლოდ საღამოობით სვამდა. თანდათანობით მან დილით, მერე კი შუადღისითაც დაიწყო დალევა. ხშირად ის მხოლოდ დასათრობად სვამდა. მოგვიანებით მან იეჰოვას მოწმეებთან დაიწყო ბიბლიის შესწავლა. როცა სუპოტმა გაიგო, რომ იეჰოვა ღმერთი განსჯიდა ლოთობას, სმას თავი დაანება. თუმცა გარკვეული დროის შემდეგ ისევ დაიწყო დალევა. მისი ოჯახის წევრები თავს განადგურებულად გრძნობდნენ.

სუპოტს მაინც უყვარდა იეჰოვა და სურდა მისთვის თაყვანი სათანადო სახით ეცა. მეგობრები განგრძობდნენ მის დახმარებას და მის ოჯახს ამხნევებდნენ, რომ სუპოტს მხარში ამოსდგომოდნენ და მასთან მეტი დრო გაეტარებინათ. იმ პერიოდში სუპოტს 1 კორინთელების 6:10-ში ჩაწერილი სიტყვები დაეხმარა თავისი პრობლემის სერიოზულობის დანახვაში. ამ მუხლში ნათქვამია, რომ ლოთები „ვერ დაიმკვიდრებენ ღვთის სამეფოს“. ის მიხვდა, რომ ყველანაირად უნდა ეცადა, სმისთვის თავი დაენებებინა.

სუპოტმა გადაწყვიტა, საერთოდ უარი ეთქვა სასმელზე. ღვთის წმინდა სულის, კრებისა და ოჯახის წევრების დახმარებით და ბიბლიური პრინციპების გამოყენებით სუპოტი სულიერად გაძლიერდა და ალკოჰოლის მიღების სურვილი დაძლია. მისი ოჯახის სიხარულს საზღვარი არ ჰქონდა, როცა მან ღმერთს თავი მიუძღვნა და მოინათლა. დღეს სუპოტს ახლო ურთიერთობა აქვს ღმერთთან და თავის დროსა და ენერგიას იმისთვის იყენებს, რომ ხალხს სულიერად დაეხმაროს.