თავი 11

ნორმალურია ინტერნეტით მეგობრობა?

როგორ გირჩევნია ურთიერთობა?

□ პირისპირ

□ ტელეფონით

□ ინტერნეტით

ყველაზე მეტად ვისთან გიადვილდება საუბარი?

□ კლასელებთან

□ ოჯახის წევრებთან

□ თანაქრისტიანებთან

სად გრძნობ თავს ყველაზე თავისუფლად?

□ სკოლაში

□ სახლში

□ კრების შეხვედრებზე

ყურადღება მიაქციე პირველ კითხვაზე გაცემულ შენს პასუხს. თუ ინტერნეტით ამჯობინებ ურთიერთობას, ნამდვილად არა ხარ გამონაკლისი. ინტერნეტით ბევრი ახალგაზრდა იწყებს მეგობრობას. ელეინი ამბობს: „მარტო ის რად ღირს, რომ მსოფლიოს ნებისმიერი კუთხიდან გაიცნობ მათ, ვისაც სხვაგვარად ვერასდროს შეხვდებოდი“. 19 წლის ტამი კიდევ ერთ მიმზიდველ მხარეზე საუბრობს: „უშუალოდ ურთიერთობისას ვიღაცას არ მოეწონები და მორჩა, ვეღარაფერს გააკეთებ. ინტერნეტში კი ეს პრობლემა არა გაქვს“.

ახლა მეორე და მესამე კითხვის პასუხები ნახე. ნუ გაიკვირვებ, თუ კლასელებთან უფრო მოგწონს ურთიერთობა, ვიდრე თანაქრისტიანებთან. ჟასმინი ამბობს: „სკოლაში უფრო ადვილად ნახულობ მათ, ვისთანაც ბევრი გაქვს საერთო და უფრო თავისუფლად გრძნობ თავს“.

ასე რომ, ბევრისთვის კლასელებთან ინტერნეტით ურთიერთობა საუკეთესო ვარიანტია. ამან ერთ დროს ტამიც გაიტაცა. ის გვიყვება: „ჩემი კლასელებიდან ყველა ჩეთაობდა და არ მინდოდა, მათ ჩამოვრჩენილიყავი“a. ნატალიმ, რომელიც 20 წლისაა, მეგობრებთან ურთიერთობისთვის ვებ-გვერდიც კი გახსნა. ის ამბობს: „ტექნიკა წინ მიდის. ურთიერთობის ახალი საშუალებები ჩნდება. ერთ-ერთი ინტერნეტია და მე ეს მომწონს“.

საფრთხე

არავინ უარყოფს, რომ ბევრისთვის ინტერნეტით ურთიერთობა უფრო ადვილია. „ამ დროს უფრო თავისუფლად გრძნობ თავს“, — ამბობს ნატალი. ტამისაც იგივე აზრი აქვს: „თუ მორცხვი ხარ, ჩეთი მისწრებაა, რადგან საუბრისას არ იბნევი“.

მაგრამ არსებობს საფრთხეც და ამის იგნორირება სწორი არ იქნება. ივლი თვალებახვეული სახიფათო ადგილებში? მაშ, რატომ უნდა დახუჭო თვალი იმ საფრთხეზე, რაც ინტერნეტით ურთიერთობაში იმალება.

ვიმსჯელოთ, თუ რა საფრთხე შეიძლება იყოს ეს. ერთ დროს ელენს მოსწონდა უცხოებთან ვირტუალური ურთიერთობა. დღეს ის ამბობს: «ძალიან ადვილად გადაეყრები ისეთებს, რომლებიც რამდენიმე წუთში უკვე ბინძურ სიტყვებზე გადადიან ან გეკითხებიან: „ქალიშვილი ხარ? ორალურ სექსთან როგორ ხარ?“. ზოგი კიბერსექსსაც გთავაზობს [იგულისხმება ინტერნეტით უხამსი საუბრები სექსუალური სიამოვნების მიღების მიზნით]».

სიფრთხილე მაშინაც გმართებს, თუ ინტერნეტით სანდო მეგობართან გაქვს ურთიერთობა. ჯოანი ამბობს: „შეიძლება საათობით გაგიგრძელდეს საუბარი საპირისპირო სქესის ადამიანთან, რომელსაც უბრალოდ მეგობრად თვლი. და რაც უფრო დიდ დროს უთმობ ამას, უფრო უახლოვდებით ერთმანეთს და ადვილად გადადიხართ ძალიან პირადულ საკითხებზე“.

თვალთმაქცები, რომლებიც ნამდვილ სახეს მალავენ

მეფე დავითმა კარგად იცოდა, ვისთან მეგობრობას უნდა მორიდებოდა. მან დაწერა: „ცრუ ხალხთან არ ვზივარ და თვალთმაქცებთან არ დავდივარ“ (ფსალმუნი 26:4).

შენც შეხვედრიხარ ინტერნეტში ისეთ ადამიანებს, როგორებსაც დავითი გულისხმობდა? როგორ ფიქრობ, რა შემთხვევებში მალავს ზოგი თავის ნამდვილ სახეს? ․․․․․

ზოგჯერ შენც ხომ არ მალავ შენს ნამდვილ სახეს? აბიგაილი ადრე ხშირად შედიოდა ჩეთში. ის ამბობს: „თავს ისე ვაჩვენებდი, ვითომ მათნაირი ვიყავი“.

ლინი კიდევ ერთ პრობლემაზე საუბრობს: „ინტერნეტით რეგულარულად ვესაუბრებოდი ერთ ბიჭს მეზობელი კრებიდან. ცოტა ხანში უკვე სიყვარულს ვუმტკიცებდით ერთმანეთს. როცა მშობლები შემოდიოდნენ, ვასწრებდი გვერდის ჩაკეცვას. ამიტომ ვერაფერს ხვდებოდნენ. რას იფიქრებდნენ, რომ მათი 13 წლის გოგო სასიყვარულო წერილებს სწერდა 14 წლის ბიჭს“.

თავი საფრთხეში რომ არ ჩაიგდო

ფაქტია, რომ ინტერნეტით ურთიერთობა ზოგჯერ საჭიროა. მაგალითად, ბევრი ასე უკავშირდება მეგობრებს. თუ შენც სარგებლობ ინტერნეტით, რის გაკეთება შეგიძლია უსაფრთხოების მიზნით? გადახედე შემდეგ რჩევებს.

● აკონტროლე, თუ რამდენ დროს უთმობ ინტერნეტს. ნუ შესწირავ მას უფრო მნიშვნელოვანი საქმეებისთვის და ძილისთვის საჭირო დროს. „ზოგი სკოლაში ამბობს ხოლმე, რომ ღამის სამ საათამდე უზის ინტერნეტს“, — ამბობს ბრაიანი (ეფესოელები 5:15, 16).

● მხოლოდ მათთან გქონდეს ურთიერთობა, ვისაც იცნობ ან ვისი ვინაობის შემოწმებაც შეგიძლია. ზნეობრივად გახრწნილი ადამიანები ხშირად ინტერნეტით ცდილობენ გამოუცდელი ახალგაზრდების გამოჭერას (რომაელები 16:18).

● განსაკუთრებით იფრთხილე, როცა ინტერნეტს საქმიანი მიზნებისთვის იყენებ. ნუ გასცემ პირად მონაცემებს. თუ არ იფრთხილებ, შეიძლება ვინმემ ბოროტად ისარგებლოს ამ ინფორმაციით (მათე 10:16).

● როცა მეგობრებს შენს ფოტოსურათებს უგზავნი, დაფიქრდი: ამ სურათების შემხედვარე ადამიანი იტყვის, რომ შენ ღვთის მსახური ხარ? (ტიტე 2:7, 8).

● დროულად შეწყვიტე საუბარი, თუ შეუფერებელ თემებზე გადადის, როგორც ამას პირისპირ ურთიერთობისას გააკეთებდი (ეფესოელები 5:3, 4).

● ყოველთვის გულწრფელი იყავი, როცა ინტერნეტით სარგებლობ. თუ რამეს უმალავ მშობლებს, ეს უკვე პრობლემაა. „დედაჩემს არაფერს ვუმალავ. ყოველთვის ვაჩვენებ, რას ვაკეთებ ინტერნეტში“, — ამბობს კარი (ებრაელები 13:18).

„ხვდები, რომ ლოდინი ღირდა“

სავსებით ნორმალურია იმის სურვილი, რომ გყავდეს მეგობრები. ადამიანებს გვსიამოვნებს სხვებთან ურთიერთობა (დაბადება 2:18). ჩვენ ასე ვართ შექმნილნი. მთავარია, გონივრულად აირჩიო მეგობრები.

კარგ მეგობრებს აუცილებლად იპოვი, თუ მათი არჩევისას ბიბლიურ პრინციპებს გაითვალისწინებ. ერთი 15 წლის გოგო ამბობს: „ისეთი მეგობრები უნდა ეძებო, რომლებსაც ეყვარებათ იეჰოვა და შენც შეგიყვარებენ. ეს ადვილი არ არის, მაგრამ როცა პოულობ, ხვდები, რომ ლოდინი ღირდა“.

[სქოლიო]

საკვანძო ბიბლიური მუხლი

„ცრუ ხალხთან არ ვზივარ და თვალთმაქცებთან არ დავდივარ“ (ფსალმუნი 26:4).

რჩევა

როცა ინტერნეტში ხარ, დრო სწრაფად გარბის. ამიტომ წინასწარ განსაზღვრე, რამდენ დროს დაუთმობ ინტერნეტს. დადგენილ დროს რომ არ გადააცილო, შეგიძლია ზარი დააყენო.

იცოდი, რომ . . . ?

შენი გვარი, სკოლის ნომერი და ტელეფონი საკმარისია იმისათვის, რომ ინტერნეტით გაცნობილმა არაკეთილსინდისიერმა ადამიანმა მოგძებნოს.

რა უნდა გავაკეთო

კვირაში ინტერნეტს მხოლოდ ․․․․․ საათს დავუთმობ და ამ გეგმას რომ მივყვე ․․․․․

თუ მოხდა ისე, რომ უცხოსთან დავიწყე საუბარი ინტერნეტით, მაშინ ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● რა პლუსები და რა მინუსები აქვს ინტერნეტით ურთიერთობას პირისპირ საუბართან შედარებით?

● რატომ არის ადვილი ინტერნეტით ურთიერთობის დროს ნამდვილი სახის დამალვა?

● როგორ უნდა აკონტროლო დრო, რომელსაც ინტერნეტს უთმობ?

● რა მხრივ შეიძლება იყოს სასარგებლო ინტერნეტით ურთიერთობა?

[ჩანართი 103 გვერდზე]

„ინტერნეტით ურთიერთობა არა მაქვს უცნობებთან და მათთან, ვისთანაც რეალურ ცხოვრებაში არ ვიმეგობრებდი“ (ჯოანი).

[სურათი 100, 101 გვერდზე]

ივლი თვალებახვეული სახიფათო ადგილებში? ნუ დახუჭავ თვალს ინტერნეტით ურთიერთობის საფრთხეზე.