უწილადეთ სხვებს მათი საჭიროებების მიხედვით
1 იეჰოვა ერთგული ‘მონის’ მეშვეობით უზრუნველგვყოფს ყველაფრით, რაც აუცილებელია ჩვენი სულიერი საჭიროებების დასაკმაყოფილებლად (მათ. 24:45–47). მრავალი მათგანი წარმოდგენილია ისეთი ფორმით, როგორიცაა: წიგნები, ბიბლიები, აკინძული ტომები, ვიდეოფილმები, აუდიოკასეტების ჩანაწერები და კომპიუტერის დისკები ბიბლიის გამოსაკვლევად. ის, რითაც იეჰოვა უზრუნველგვყოფს, ყოველთვის საკმარისია, ვინაიდან არ იფლანგება. ის ჩვენგან მოელის, რომ ვუწილადოთ ერთმანეთს და დარწმუნებულია, რომ ყველა თანაბრად სარგებლობს.
2 ყოველივე იმის დამზადებას, რაც აუცილებელია, დიდი თანხები სჭირდება. ამ დანახარჯებს მსოფლიო საძმო ფარავს. ეს ასეა განსაკუთრებით იმ დროიდან, რაც ორგანიზაციამ ლიტერატურის უფასო განაწილება შემოიღო და ამისთვის გაწეული ხარჯების დაფარვა მთლიანად ნებაყოფლობით შესაწირავებზეა დამოკიდებული. გარდა ამისა, მრავალი ფილიალი საგუშაგო კოშკის საზოგადოებისგან დაბალ ფასებში იძენს ყოველივე აუცილებელს და ეს ძმებს შესაძლებლობას აძლევს, შეზღუდული მატერიალური სახსრების მიუხედავად, ჰქონდეთ, რაც შეხვედრებისა და სამქადაგებლო საქმიანობისთვის სჭირდებათ.
3 როგორ შეგვიძლია დახმარება: ჩვენ შეგვიძლია გამოვეხმაუროთ პავლეს შეგონებას — ვუწილადოთ სხვებს ‘მათი საჭიროებების მიხედვით’ (რომ. 12:13, აქ). სამეფოს საქმისთვის ფინანსების შეწირვით ჩვენ უშუალოდ ვუწილადებთ, რაც გაგვაჩნია, ჩვენს ძმებს მთელ მსოფლიოში. ამის მხედველობაში მიღებით, ზოგმა გადაწყვიტა, სამეფოს საქმის მხარდასაჭერად ყოველთვიურად გადადოს თანხა, ზუსტად ისევე, როგორც სამეფო დარბაზისთვის გაწეულ ხარჯებზე აკეთებენ. მათ ესმით, რომ ეს ფულადი სახსრები მხოლოდ ლიტერატურის დასამზადებლად არ გამოიყენება, არამედ მსახურების ყველა სფეროში. წარმოიდგინე დიდი სარგებლობა, რასაც ჩვენი მსოფლიო საძმო ნახავდა, თუკი ამგვარად მეტი ადამიანი რეგულარულად უწილადებდა თავისას.
4 გარდა ამისა, ძმებს იმით შეგვიძლია ვუწილადოთ, თუ მოკრძალებას ვავლენთ, როცა ჩვენთვის ადვილად ხელმისაწვდომ რამეს ვითხოვთ. მხოლოდ ისეთი რამის შეკვეთა, რაც სინამდვილეში გვჭირდება, სადმე სხვაგან მცხოვრებ ჩვენს ძმებს საშუალებას აძლევს, იყვნენ სულიერად უზრუნველყოფილი, რაც მათაც ესაჭიროებათ სიმტკიცის შესანარჩუნებლად და მათ მხარეში კეთილი ცნობის ქადაგების წინ წასაწევად (ებრ. 13:16).
5 ეს განსაკუთრებით მაშინ უნდა მივიღოთ მხედველობაში, როცა ისეთ რამეს ვითხოვთ, რის დამზადებაც საზოგადოებას მნიშვნელოვან ფასად უჯდება. ამაში შედის: ვიდეოკასეტები, CD–ROM-ის დისკები, დიდი ცნობარები, აკინძული ტომები და აუდიოკასეტების გამოწერა. იმის მაგიერ, რომ თითოეულ წევრს პირადად მოეთხოვა ზემოხსენებული, ხომ არ შეეძლო მთელ ოჯახს, მხოლოდ ერთით დაკმაყოფილებულიყო? თუ შევიზღუდებით იმაში, რასაც ჩვენთვის ვიღებთ, საშუალებას მივცემთ სხვებს, მიიღონ ისეთივე კარგი ნივთები, როგორსაც ჩვენ ვფლობთ (ფილ. 2:4).
6 სამქადაგებლო საქმიანობისას ჩვენს მიერ გავრცელებული ლიტერატურისთვის საჭირო ხარჯები შესაძლებელია ნაწილობრივ ანაზღაურდეს იმით, რასაც სამეფოს საქმისთვის ვწირავთ სამეფო დარბაზში და იმით, რასაც დაინტერესებული პირები სწირავენ, რომლებიც ლიტერატურას იღებენ. მაგრამ, როცა ლიტერატურასთან ერთად მოდის ისეთი რამ, რაც პირადი სარგებლობისთვის მოვითხოვეთ, მათ შორის: საგალობლების წიგნები, წელიწდეულები, მდიდრული ბიბლიები და ასე შემდეგ, არ შეგვიძლია მოველოდეთ, რომ ჩვენს საჭიროებებზე გარეშეები იზრუნებენ. იეჰოვას მიძღვნილი მსახურები ამ ფინანსური მხარდაჭერის მთავარ წყაროს წარმოადგენენ. ამის გათვალისწინებით, მრავალი მაუწყებელი ანგარიშობს, რა დაჯდებოდა ესა თუ ის ნივთი, გასაყიდად რომ დამზადებულიყო, შემდეგ კი სათანადოდ სწირავს. მაგალითად, მრავალ ქვეყანაში მდიდრული, ოქროსფერკიდეებიანი ბიბლია ეღირება მინიმუმ 20 ამერიკული დოლარი, ცნობარი, შესაძლოა, — 40 ამერიკული დოლარი და მეტიც, კედლის ფერადი კალენდარი სულ ცოტა — 5 ამერიკული დოლარი, ენციკლოპედია CD–ROM-ზე დაჯდება 50–100 ამერიკული დოლარი ან უფრო ძვირი, მუსიკალური კომპაქტ-დისკები, ჩვეულებრივ, ეღირება დაახლოებით 20 ამერიკული დოლარი, ზოგი ვიდეოკასეტი კი ხშირად ბევრად უფრო ძვირად იყიდება. ხარჯების დასაფარავად საკმარისი თანხის შეწირვის მხედველობიდან გამოტოვება, საბოლოოდ, ორგანიზაციას შეზღუდავს იმის გაკეთებაში, რაც მას შეუძლია სამეფოს საქმის წინ წასაწევად.
7 იესომ განაცხადა, რომ მის ჭეშმარიტ მოწაფეებს აშკარად ამოიცნობდნენ მათ შორის არსებული სიყვარულით (იოან. 13:34, 35). ჩვენი მატერიალური ხელგაშლილობა და უანგარობა სხვების საჭიროებებში მონაწილეობის მიღებისას, უდავოდ, შესანიშნავი საშუალებებია იმის დასამტკიცებლად, რომ ჭეშმარიტი ქრისტიანები ვართ.