თავი 3
ვინ არის ჭეშმარიტი ღმერთი?
1. რატომ ეთანხმება მრავალი ბიბლიის პირველ სიტყვებს?
როდესაც ღამით მოწმენდილ ცას შეჰყურებ, ნუთუ არ გაოცებს ამდენი ვარსკვლავის დანახვა? როგორ შეგიძლია ახსნა მათი არსებობა? რა შეიძლება ითქვას დედამიწის ცოცხალი სამყაროს შესახებ: მრავალფეროვან ყვავილებზე, საამურად მოჭიკჭიკე ჩიტებზე, ძლიერ ვეშაპებზე, რომლებიც ოკეანეში წყლის ზედაპირზე ნახტომებს აკეთებენ? ჩამოთვლა შეგვეძლო უსასრულოდ გაგვეგრძელებინა. ეს ყველაფერი შეუძლებელია შემთხვევით გაჩენილიყო. ამიტომ გასაკვირი არ არის, რომ მრავალი ეთანხმება ბიბლიის პირველ სიტყვებს: „თავდაპირველად ღმერთმა შექმნა ცა და მიწა“! (დაბადება 1:1).
2. რას ლაპარაკობს ბიბლია ღმერთის შესახებ და რისკენ მოგვიწოდებს ჩვენ?
2 ღმერთის შესახებ ადამიანთა თვალსაზრისი ძალიან განსხვავებულია. ზოგიერთი ფიქრობს, რომ ის არის ძალა და არა პიროვნება. მილიონობით ადამიანი ეთაყვანება გარდაცვლილ წინაპრებს, რადგან სჯერათ, რომ ღმერთი მიუწვდომელია. მაგრამ ბიბლია ხსნის, რომ ჭეშმარიტი ღმერთი არის ნამდვილი პიროვნება, რომელიც გულთბილ ინტერესს ამჟღავნებს თითოეული ჩვენგანის, როგორც პიროვნების მიმართ. ამიტომაც ბიბლია აღგვძრავს, ‘ვეძებოთ ღმერთი’, როდესაც ამბობს: „[ის] შორს როდია თითოეული ჩვენთაგანისაგან“ (საქმეები 17:27).
3. რატომ არის შეუძლებელი ღმერთის გამოსახულების შექმნა?
3 როგორ გამოიყურება ღმერთი? მის რამდენიმე თაყვანისმცემელს ჰქონდა მისი დიდებული თანდასწრების ხილვები. ამ შემთხვევებში ის სიმბოლურად გამოხატავდა საკუთარ პიროვნებას, როგორც ტახტზე მჯდომარეს და შიშის მომგვრელი ბრწყინვალება იფრქვეოდა მისგან. მაგრამ მათ, ვინც ასეთი ხილვები ნახა, არასოდეს აუწერიათ მისი სახე მკაფიოდ (დანიელი 7:9, 10; გამოცხადება 4:2, 3). ეს იმიტომ, რომ „ღმერთი არის სული“, მას არა აქვს ფიზიკური სხეული (იოანე 4:24). სინამდვილეში, შეუძლებელია ჩვენი შემოქმედის ზუსტი ფიზიკური გამოსახულების შექმნა, რადგან „ღმერთი არასდროს არავის უნახავს“ (იოანე 1:18; გამოსვლა 33:20). მაგრამ ბიბლია უფრო მეტს გვასწავლის ღმერთის შესახებ.
ჭეშმარიტ ღმერთს აქვს სახელი
4. რომელია ღმერთის ზოგიერთი აზრით აღსავსე წოდება, რომლებიც ბიბლიაში გამოიყენება?
4 ბიბლიაში ჭეშმარიტი ღმერთი აღწერილია ისეთი გამოთქმებით, როგორიცაა: „ღმერთი ძლიერი“, ‘უზენაესი’, „გამჩენი“, ‘მოძღვარი’, ‘უზენაესი უფალი’, ‘საუკუნეთა მეფე’ (დაბადება 17:1; ფსალმუნი 49:14; ეკლესიასტე 12:1; ესაია 30:20; საქმეები 4:24, აქ; 1 ტიმოთე 1:17). ამ წოდებებზე დაფიქრება, შესაძლოა, დაგვეხმაროს, გავიზარდოთ ღვთის შემეცნებაში.
5. რა ჰქვია ღმერთს და რამდენჯერ გვხვდება მისი სახელი ებრაულ წერილებში?
5 მაგრამ ღმერთს აქვს შეუდარებელი სახელი, რომელიც მხოლოდ ებრაულ წერილებში თითქმის 7 000-ჯერ გვხვდება, უფრო ხშირად, ვიდრე მისი სხვა წოდება. დაახლოებით 1 900 წლის წინ, იუდეველებმა ცრურწმენის გამო შეწყვიტეს ღვთიური სახელის ხსენება. ბიბლიის დასაწერად გამოყენებული ძველი ებრაული იწერებოდა ხმოვნების გარეშე. ამიტომ ჩვენ ზუსტად არ ვიცით ძველ დროს როგორ გამოთქვამდნენ მოსე, დავითი ან სხვები ოთხ თანხმოვანს (יהוה), რომლისგანაც შედგება ღმერთის სახელი. ზოგიერთი სწავლული ვარაუდობს, რომ ღმერთის სახელი წარმოითქმებოდა, როგორც „იაჰვე“, მაგრამ ისინი არ არიან ამაში დარწმუნებული. გამოთქმა „იეჰოვა“ გამოიყენებოდა დიდი ხნის მანძილზე და მისი ეკვივალენტი დღესაც ფართოდაა გავრცელებული მრავალ ენაზე.
რატომ უნდა გამოიყენო ღმერთის სახელი
6. რას ამბობს იეჰოვას შესახებ ფსალმუნის 82:19 და რატომ უნდა გამოვიყენოთ მისი სახელი?
6 ღმერთის შეუდარებელი სახელი, იეჰოვა, განასხვავებს მას ყველა სხვა ღმერთისგან. ამიტომ გვხვდება ეს სახელი ასე ხშირად ბიბლიაში, განსაკუთრებით კი, ებრაულ ტექსტში. ბევრმა მთარგმნელმა არ გამოიყენა ეს ღვთიური სახელი, მაგრამ ფსალმუნის 82:19 ნათლად ამბობს: „შენი სახელია უფალი [იეჰოვა, „მეფე იაკობის თარგმანი“ (King James Version)], მხოლოდ შენ ხარ უზენაესი მთელ ქვეყნიერებაზე“. ამიტომ მართებულია, გამოვიყენოთ ღმერთის პირადი სახელი, როდესაც მასზე ვლაპარაკობთ.
7. რას გვასწავლის ღმერთის შესახებ მისი სახელი იეჰოვა?
7 სახელი „იეჰოვა“ არის იმ ებრაული ზმნის კაუზატიური ფორმა, რომელიც ნიშნავს „გადაქცევას“ (ანუ „გახდომას“). ამიტომ, ღმერთის სახელი ნიშნავს „აქცევინებს“. ამგვარად, იეჰოვა ღმერთი წარმოგვიდგენს თავის პიროვნებას, როგორც დიდებულ განმზრახველს. ის ყოველთვის ისე მოქმედებს, რომ მისი განზრახვები რეალობად იქცეს. მხოლოდ ჭეშმარიტ ღმერთს შეუძლია სამართლიანად ატაროს ეს სახელი, რადგან ადამიანებს არასოდეს შეუძლიათ იყვნენ დარწმუნებული, რომ მათი გეგმები წარმატებით განხორციელდება (იაკობი 4:13, 14). მხოლოდ იეჰოვას შეუძლია თქვას: ‘ასევე იქნება ჩემი სიტყვა, რომელიც გამოდის ჩემი პირიდან. . . აღასრულებს ჩემს ნებას და მიაღწევს იმას, რისთვისაც მივავლინე’ (ესაია 55:11).
8. რა განზრახვა განაცხადა იეჰოვამ მოსეს მეშვეობით?
8 ებრაელი პატრიარქები: აბრაამი, ისააკი და იაკობი ‘ახსენებდნენ უფლის სახელს’, მაგრამ მათ არ იცოდნენ ღვთიური სახელის სრული მნიშვნელობა (დაბადება 21:33; 26:25; 32:9; გამოსვლა 6:3). მოგვიანებით, როდესაც იეჰოვამ ამცნო მათ თავისი განზრახვა, გაეთავისუფლებინა მათი შთამომავლობა — ისრაელები — ეგვიპტის მონობიდან და მიეცა მათთვის ‘ქვეყანა, სადაც ღვარად მოედინებოდა რძე და თაფლი’, ეს, შესაძლოა, წარმოუდგენლად ეჩვენებოდათ (გამოსვლა 3:17). მაგრამ ღმერთმა ხაზი გაუსვა თავისი სახელის მარადიულ მნიშვნელობას, როდესაც უთხრა წინასწარმეტყველ მოსეს: „ასე უთხარი ისრაელიანებს: უფალმა [იეჰოვამ, აქ], თქვენი მამა-პაპის ღმერთმა, აბრაამის ღმერთმა, ისაკის ღმერთმა, იაკობის ღმერთმა გამომგზავნა თქვენთან. ეს არის ჩემი სახელი უკუნითი უკუნისამდე, ეს არის ჩემი სახსენებელი თაობიდან თაობამდე“ (გამოსვლა 3:15).
9. რას ფიქრობდა ფარაონი იეჰოვაზე?
9 მოსემ სთხოვა, ეგვიპტის ფარაონს, რომ ნება დაერთო ისრაელებისთვის, წასულიყვნენ უდაბნოში იეჰოვას თაყვანის საცემად. მაგრამ ფარაონმა, რომელსაც ღმერთად მიიჩნევდნენ და რომელიც ეგვიპტის სხვა ღმერთებს ეთაყვანებოდა, განაცხადა: „ვინ არის უფალი [იეჰოვა, აქ], რომ დავუჯერო და გავუშვა ისრაელი? არც უფალი [იეჰოვა, აქ], ვიცი და არც ისრაელს გავუშვებ“ (გამოსვლა 5:1, 2).
10. რა მოიმოქმედა იეჰოვამ ძველ ეგვიპტეში, რომ შეესრულებინა თავისი განზრახვა ისრაელებთან დაკავშირებით?
10 იეჰოვა შეუდგა მტკიცე მოქმედებას, რომ შეესრულებინა თავისი განზრახვა და მოქმედებდა თავისი სახელის მნიშვნელობის შესაბამისად. მან ათი სასჯელი დაატეხა თავს ძველ ეგვიპტელებს. ბოლო სასჯელით მოკვდა ეგვიპტელთა ყველა პირმშო, ამაყი ფარაონის ძის ჩათვლით. ამის შემდეგ ეგვიპტელებმა ძლიერ მოისურვეს ისრაელების გაშვება. მაგრამ იეჰოვას ძალამ ისეთი ღრმა შთაბეჭდილება მოახდინა ზოგიერთ ეგვიპტელზე, რომ ისინი შეუერთდნენ ებრაელებს და მათთან ერთად დატოვეს ეგვიპტე (გამოსვლა 12:35–38).
11. როგორი სასწაული მოახდინა იეჰოვამ მეწამულ ზღვაზე და რა აღიარეს ძალაუნებურად მისმა მტრებმა?
11 ჯიუტი ფარაონი და მისი ჯარი 600 საომარი ეტლით დაედევნენ ისრაელებს, რომ შეეპყროთ თავიანთი ყოფილი მონები. რადგან ეგვიპტელები წამოეწივნენ ისრაელებს, ღმერთმა სასწაულით გაყო მეწამული ზღვა, რომ ისრაელებს შეძლებოდათ ხმელეთზე გავლა. როდესაც მდევარი ისრაელებს შეჰყვა ზღვის ფსკერზე, იეჰოვამ ‘ბორბლები დააძრო მათ ეტლებს და გაუძნელა სვლა’. ეგვიპტელი მეომრები აყვირდნენ: „გავერიდოთ ისრაელს, რადგან მისი გულისთვის ებრძვის უფალი ეგვიპტელებს“. მაგრამ უკვე ძალიან გვიან იყო. წყლის უზარმაზარი კედლები ჩამოიქცა და „დაფარა ეტლები, მხედრები და ფარაონის მთელი ლაშქარი“ (გამოსვლა 14:22–25, 28). ამგვარად განადიდა იეჰოვამ თავისი დიდებული სახელი და ეს შემთხვევა დღესაც არ არის დავიწყებული (იესო ნავეს ძე 2:9–11).
12, 13. ა) როგორი მნიშვნელობა აქვს დღეს ჩვენთვის ღმერთის სახელს? ბ) ადამიანებს რისი სწავლა ესაჭიროებათ გადაუდებლად და რატომ?
12 იმ სახელს, რომელიც ღმერთმა თავისთვის შეიქმნა, დღეს ჩვენთვის დიდი მნიშვნელობა აქვს. მისი სახელი, იეჰოვა, იმის მტკიცე გარანტიაა, რომ ყველაფერს, რაც მან განიზრახა, ჭეშმარიტად შეასრულებს. ამაში შედის მისი თავდაპირველი განზრახვის შესრულება, რომ ჩვენი დედამიწა სამოთხედ გადაიქცეს (დაბადება 1:28; 2:8). ამ მიზნით ღმერთი ჩამოიშორებს თავისი უზენაესი ხელისუფლების ყველა მოწინააღმდეგეს, რადგან მან განაცხადა: „მაშინ მიხვდებიან, რომ უფალი [იეჰოვა, აქ] ვარ“ (ეზეკიელი 38:23). შემდეგ ის შეასრულებს თავის აღთქმას, რომლის თანახმადაც თავის მსახურებს გადაიყვანს ახალ სამართლიან ქვეყნიერებაში (2 პეტრე 3:13).
13 ყველამ, ვისაც სურს ღმერთის კეთილგანწყობილება, უნდა ისწავლოს მისი სახელის რწმენით მოხმობა. ბიბლია გვპირდება: „ყოველი, ვინც უფლის სახელს მოუხმობს, გადარჩება“ (რომაელთა 10:13). დიახ, სახელი იეჰოვა არის მნიშვნელობით აღსავსე. იეჰოვას, როგორც შენი ღმერთისა და მხსნელის მოხმობამ, შეიძლება უსასრულო ბედნიერებამდე მიგიყვანოს.
ჭეშმარიტი ღმერთის თვისებები
14. ღმერთის რომელ ძირითად თვისებებს გამოყოფს ბიბლია?
14 ეგვიპტის მონობიდან ისრაელი ერის გათავისუფლების შესახებ ბიბლიური ცნობის გამოკვლევა გამოყოფს ღმერთის ოთხ ძირითად თვისებას, რომლებსაც ის სრული წონასწორობით ფლობს. ფარაონისადმი მისმა მოპყრობამ გამოავლინა მისი შემაძრწუნებელი ძალა (გამოსვლა 9:16). ღმერთის ჩინებულმა მოქმედებამ ამ რთულ სიტუაციაში ცხადყო მისი შეუდარებელი სიბრძნე (რომაელთა 11:33). მან გამოავლინა თავისი სამართლიანობა, როდესაც განაჩენი გამოუტანა თავისი ხალხის ჯიუტ შემავიწროებლებსა და მოწინააღმდეგეებს (მეორე რჯული 32:4). ღმერთის გამოჩენილი თვისება არის სიყვარული (1 იოანე 4:16). იეჰოვამ უდიდესი სიყვარული გამოავლინა, როდესაც შეასრულა თავისი დაპირება აბრაამის შთამომავლობასთან დაკავშირებით (მეორე რჯული 7:8). მან სიყვარული გამოამჟღავნა აგრეთვე, როდესაც ნება დართო ზოგიერთ ეგვიპტელს, დაეტოვებინა თავიანთი ცრუ ღმერთები და დიდი სარგებელი მიეღო ჭეშმარიტი ღმერთის მხარეზე დგომით.
15, 16. რაში ავლენს იეჰოვა სიყვარულს?
15 ბიბლიის კითხვისას შეამჩნევ, რომ სიყვარული არის ღმერთის ძირითადი თვისება და ის მრავალი სახით ავლენს მას. მაგალითად, ის სიყვარულის გამო გახდა შემოქმედი და პირველად, სიცოცხლის სიხარულს სულიერი ქმნილებები აზიარა. ამ ასობით მილიონ ანგელოზს უყვარს ღმერთი და ადიდებს მას (იობი 38:4, 7; დანიელი 7:10). ღმერთმა, აგრეთვე, სიყვარული გამოავლინა, როდესაც შექმნა დედამიწა და მოამზადა ის ადამიანების ბედნიერი არსებობისთვის (დაბადება 1:1, 26–28; ფსალმუნი 113:24).
16 ჩვენ ღმერთის სიყვარულისგან ისე მრავალ სარგებელს ვიღებთ, რომ ყველაფერს ვერც კი მოვიხსენიებთ. ჯერ ერთი ის, რომ ღმერთმა სიყვარულით შექმნა ჩვენი სხეული ისე სასწაულებრივად, რომ ჩვენ შეგვიძლია სიცოცხლით ტკბობა (ფსალმუნი 138:14). მისი სიყვარული ვლინდება იმაშიც, რომ ის გვაძლევს ‘წვიმას და ნაყოფის მომცემ დროებს, საზრდოთი და სიხარულით ავსებს ჩვენს გულებს’ (საქმეები 14:17). ღმერთს „თავისი მზე ამოჰყავს ბოროტთა და კეთილთა თავზე და წვიმას უგზავნის მართლებსა და უსამართლოებს“ (მათე 5:45). აგრეთვე, სიყვარული აღძრავს ჩვენს შემოქმედს, რომ დაგვეხმაროს, მივიღოთ ღვთის შემეცნება და ვემსახუროთ მას ბედნიერებით, როგორც მისი თაყვანისმცემლები. ნამდვილად, „ღმერთი სიყვარულია“ (1 იოანე 4:8). მაგრამ არსებობს მისი პიროვნების დამახასიათებელი კიდევ მრავალი მხარე.
„ღმერთი მწყალობელი და შემბრალებელი“
17. რას ვსწავლობთ ღმერთის შესახებ გამოსვლის 34:6, 7-დან?
17 მას შემდეგ, რაც ისრაელებმა გადაკვეთეს მეწამული ზღვა, მათ ჯერ კიდევ ესაჭიროებოდათ, ღმერთის უკეთესად შეცნობა. მოსე გრძნობდა ამ აუცილებლობას და ლოცულობდა: „თუ მართლაც მადლი მიპოვნია შენს თვალში, მასწავლე შენი გზა და მეც შეგიცნობ, რომ მადლი ვპოვო შენს თვალში“ (გამოსვლა 33:13). მოსემ უკეთესად შეიცნო ღმერთი, როდესაც მოისმინა მისი პირადი განაცხადი: „იეჰოვა, იეჰოვა! ღმერთი მწყალობელი და შემბრალებელი, რისხვაში ნელი, სიყვარულით აღსავსე სიკეთის მქონე და ჭეშმარიტი სიყვარულით აღსავსე სიკეთის შემნახველი ათასთა მიმართ, დანაშაულთა, ბრალთა და ცოდვათა მიმტევებელი, მაგრამ დამსჯელი“ (გამოსვლა 34:6, 7, აქ). ღმერთს სიყვარული გაწონასწორებული აქვს სამართლიანობასთან და არ იხსნის განზრახ შემცოდველებს მათი ცოდვილი მოქმედებების შედეგებისგან.
18. როგორ ამტკიცებს იეჰოვა, რომ მოწყალეა?
18 როგორც მოსემ დაინახა, იეჰოვა ავლენს წყალობას. მოწყალე პიროვნებას ყოველთვის ეცოდება ის, ვინც იტანჯება და ცდილობს, შვება მოუტანოს მას. ამგვარად, ტანჯვის, ავადმყოფობისა და სიკვდილისგან მუდმივი შვების უზრუნველყოფით ღმერთმა თანაგრძნობა გამოავლინა კაცობრიობის მიმართ (გამოცხადება 21:3–5). ღმერთის მსახურებმა, შეიძლება, ბოროტი სისტემის პირობების გამო გასაჭირი განიცადონ ან, შესაძლოა, არაბრძნულად მოიქცნენ და ბევრ უსიამოვნებას გადაეყარონ. მაგრამ თუ ისინი თავმდაბლურად მიმართავენ იეჰოვას დახმარებისთვის, ის ანუგეშებს და დაეხმარება მათ. რატომ? იმიტომ, რომ ის გულმოწყალებით სათუთად ზრუნავს თავის თაყვანისმცემლებზე (ფსალმუნი 85:15; 1 პეტრე 5:6, 7).
19. რატომ შეგვიძლია ვთქვათ, რომ ღმერთი შემბრალებელია?
19 ძალაუფლების მქონე მრავალი ადამიანი სასტიკად ეპყრობა სხვებს. მათგან განსხვავებით, როგორი შემბრალებელია იეჰოვა თავისი თავმდაბალი მსახურების მიმართ! მიუხედავად იმისა, რომ მას უზენაესი ძალაუფლება უპყრია სამყაროში, ის უდიდეს სიკეთეს ავლენს მთელი კაცობრიობისადმი (ფსალმუნი 8:4, 5; ლუკა 6:35). აგრეთვე, იეჰოვა მწყალობელია პიროვნებების მიმართ, როდესაც პასუხობს მათ წყალობის შესახებ განსაკუთრებულ თხოვნაზე (გამოსვლა 22:25, 26; ლუკა 18:13, 14). რა თქმა უნდა, ღმერთი არ არის ვალდებული, გამოავლინოს კეთილგანწყობილება ან მოწყალება ვინმეს მიმართ (გამოსვლა 33:19). ამიტომ, საჭიროა, გამოვავლინოთ დიდი მადლიერება ღმერთის წყალობისა და შემბრალებლობისთვის (ფსალმუნი 145:1, 8).
რისხვაში ნელი, მიუკერძოებელი და სამართლიანი
20. რა გვიჩვენებს, რომ იეჰოვა არის მიუკერძოებელი და რისხვაში ნელი?
20 ღმერთი რისხვაში ნელია. მაგრამ ეს სულაც არ ნიშნავს, რომ ის არანაირ ზომებს არ იღებს, რადგან ჩვენ დავინახეთ, როგორ გაანადგურა მან ჯიუტი ფარაონი და მისი ჯარი მეწამულ ზღვაში. იეჰოვა, აგრეთვე, მიუკერძოებელია. ამიტომ მისმა რჩეულმა ხალხმა, ისრაელმა, საბოლოოდ დაკარგა მისი კეთილგანწყობილება, მუდმივი ცოდვილი მოქმედებების გამო. ღმერთი ყველა ერიდან ღებულობს თავის თაყვანისმცემლებად ადამიანებს, მაგრამ მხოლოდ მათ, ვინც ემორჩილება მის სამართლიან გზებს (საქმეები 10:34, 35).
21. ა) რას გვასწავლის გამოცხადების 15:2–4 ღმერთის შესახებ? ბ) რა გაგვიადვილებს ვაკეთოთ ის, რის შესახებაც ღმერთი გვეუბნება, რომ სწორია?
21 ბიბლიის წიგნი „გამოცხადება“ ხაზგასმით გვიჩვენებს აუცილებლობას, გავიცნოთ ღმერთის ‘სიმართლენი’. ის მოგვითხრობს, რომ ზეციერი ქმნილებები მღერიან: „დიდი და საოცარია შენი საქმენი, უფალო ღმერთო ყოვლისმპყრობელო! მართალი და ჭეშმარიტია შენი გზები, ერების მეფეო! ვის არ შეეშინდება უფალო, და არ ადიდებს შენს სახელს? რამეთუ მარტო შენ ხარ წმიდა. ყველა ერი მოვა და თაყვანს გცემს შენს წინაშე, ვინაიდან გამოვლინდნენ შენი სიმართლენი“ (გამოცხადება 15:2–4, „ახალი აღთქმა და ფსალმუნი“, 1990 წლის გამოცემა). ჩვენ ვავლენთ სასარგებლო შიშს, ანუ მოკრძალებას იეჰოვასადმი, რადგან ვემორჩილებით იმას, რის შესახებაც ის ამბობს, რომ სწორია. ამის გაკეთება ადვილია, თუ ყოველთვის გვემახსოვრება, რამდენად ბრძენი და მოსიყვარულეა იეჰოვა. ყოველი მისი მცნება ჩვენს სასიკეთოდ არის (ესაია 48:17, 18).
‘იეჰოვა, ჩვენი ღმერთი, არის ერთი’
22. რატომ არ უნდა ეთაყვანებოდნენ სამებას ისინი, ვინც ბიბლიას ღმერთის სიტყვად თვლის?
22 ძველი ეგვიპტელები ეთაყვანებოდნენ მრავალ ღმერთს, მაგრამ იეჰოვა არის ‘განსაკუთრებული ერთგულების მომთხოვნი ღმერთი’ (გამოსვლა 20:5, აქ). მოსემ შეახსენა ისრაელებს რომ „იეჰოვა ჩვენი ღმერთი არის ერთი იეჰოვა“ (მეორე რჯული 6:4, აქ). იესო ქრისტემ გაიმეორა ეს სიტყვები (მარკოზი 12:28, 29). ასე რომ, ვინც აღიარებს ბიბლიას, როგორც ღმერთის სიტყვას, არ უნდა ეთაყვანებოდეს სამებას, რომელიც შეიცავს სამ პიროვნებას, ანუ სამ ღმერთს ერთში. სინამდვილეში, სიტყვა „სამება“ არც კი გვხვდება ბიბლიაში. ჭეშმარიტი ღმერთი არის ერთი პიროვნება, ცალკე მდგომი იესო ქრისტესგან (იოანე 14:28; 1 კორინთელთა 15:28). ღმერთის სულიწმიდა არ არის პიროვნება. ის არის იეჰოვას მოქმედი ძალა, რომელსაც ყოვლისშემძლე თავისი განზრახვების შესასრულებლად იყენებს (დაბადება 1:2; საქმეები 2:1–4, 32, 33; 2 პეტრე 1:20, 21).
23. ა) რისი საშუალებით გაიზრდება შენი სიყვარული ღმერთისადმი? ბ) რა თქვა იესომ მოსიყვარულე ღმერთის შესახებ და რისი ცოდნა გვჭირდება იესო ქრისტეს შესახებ?
23 როდესაც შენ იგებ, როგორი საოცარი ღმერთია იეჰოვა, ნუთუ არ ეთანხმები იმ აზრს, რომ ის ნამდვილად იმსახურებს თაყვანისცემას? მისი სიტყვის, ბიბლიის შესწავლით, უკეთესად გაეცნობი მას და გაიგებ, რომ ყველაფერი, რასაც ის შენგან მოითხოვს, შენი მარადიული კეთილდღეობისა და ბედნიერებისთვის არის (მათე 5:3, 6). გარდა ამისა, შენი სიყვარული მისადმი გაიზრდება. და ეს არ არის გასაკვირი, რადგან იესომ თქვა: „შეიყვარე უფალი, ღმერთი შენი, ყოვლითა გულითა შენით, და ყოვლითა სულითა შენითა და ყოვლითა გონებითა შენითა და ყოვლითა ძალითა შენითა“ (მარკოზი 12:30). ნათელია, იესოს ჰქონდა ასეთი სიყვარული ღმერთისადმი. მაგრამ რას გვეუბნება ბიბლია იესო ქრისტეს შესახებ? რა ადგილი უკავია მას იეჰოვას განზრახვაში?
შეამოწმე შენი ცოდნა
რა ჰქვია ღმერთს და რამდენჯერ გამოიყენება მისი სახელი ებრაულ წერილებში?
რატომ უნდა გამოიყენო ღმერთის სახელი?
ღმერთის რომელი თვისებებია განსაკუთრებით მიმზიდველი შენთვის?
[სურათი 29 გვერდზე]
რამდენად კარგად იცნობ ყოველივეს შემოქმედს?