თავი 17
ჰპოვე უსაფრთხოება ღმერთის ხალხს შორის
1, 2. რით ჰგავს კაცობრიობის სიტუაცია ქარიშხლით განადგურებული ტერიტორიის მცხოვრებლების სიტუაციას?
წარმოიდგინე, რომ ძლიერმა ქარიშხალმა გაანადგურა ის დასახლებული ტერიტორია, სადაც შენ ცხოვრობ. შენი სახლი დაინგრა და ყველაფერი, რაც გაგაჩნდა, განადგურდა. საკვების მარაგიც მცირეა. სიტუაცია უიმედო გეჩვენება. შემდეგ, მოულოდნელად ჩამოდის მატერიალური დახმარება. უხვად ხარ უზრუნველყოფილი პროდუქტითა და ტანსაცმლით. შენთვის აშენებულია ახალი სახლი. რასაკვირველია, მადლიერი იქნებოდი იმ პიროვნების, რომელმაც ასეთი ღონისძიებები ხელმისაწვდომი გახადა.
2 რაღაცა ამის მსგავსი ხდება დღესაც. ქარიშხლის მსგავსად, ადამისა და ევას აჯანყებამ კაცობრიობას დიდი ზარალი მოუტანა. ადამიანების სახლი — სამოთხე — დაკარგული იქნა. აქედან მოყოლებული, ადამიანთა მთავრობები უძლურნი არიან, დაიცვან ხალხი ომის, დანაშაულისა და უსამართლობისგან. რელიგიებმა ადამიანები სასარგებლო სულიერი საკვების გარეშე დატოვეს. მაგრამ სულიერი გაგებით, იეჰოვა ღმერთი ამჟამად ტანსაცმლით, პროდუქტითა და თავშესაფრით უზრუნველყოფს მათ. როგორ აკეთებს ის ამას?
„ერთგული და გონიერი მონა“
3. როგორ უზრუნველყოფს იეჰოვა კაცობრიობას ღონისძიებებით, როგორც ნაჩვენები იყო ზოგი მაგალითით?
3 მატერიალური დახმარება, ჩვეულებრივ, ორგანიზებული არხის მეშვეობით ნაწილდება და იეჰოვას აქვს მსგავსი არხი, რომლის მეშვეობითაც სულიერად ეხმარება თავის ხალხს. მაგალითად, ისრაელი 1 500 წლის განმავლობაში ‘უფლის კრებული’ იყო. მათ შორის იყვნენ ისეთები, რომლებიც ღმერთის არხს წარმოადგენდნენ, რათა ესწავლებინათ მისი რჯული (პირველი ნეშტთა 28:8; მეორე ნეშტთა 17:7–9). ახალი წელთაღრიცხვით პირველ საუკუნეში იეჰოვამ ჩამოაყალიბა ქრისტიანული ორგანიზაცია. ჩამოყალიბებული იყო კრებები და ისინი ფუნქციონირებდნენ მოციქულებისა და უხუცესებისგან შემდგარი ხელმძღვანელი კორპორაციის მითითებებით (საქმეები 15:22–31). ამის მსგავსად, დღეს იეჰოვა უკავშირდება თავის ხალხს ორგანიზებული ჯგუფის მეშვეობით. საიდან ვიცით ეს?
4. ვინ აღმოჩნდა „ერთგული და გონიერი მონა“ დღეს და როგორ გახდა ღმერთის სულიერი ღონისძიებები ხელმისაწვდომი?
4 იესომ თქვა, რომ სამეფო ძალაუფლებით თავისი თანდასწრების დროს ჰპოვებდა ‘ერთგულ და გონიერ მონას’, რომელიც მის მიმდევრებს ‘დროული საზრდოთი’ უზრუნველყოფდა (მათე 24:45–47). როდესაც იესო გამეფდა 1914 წელს, როგორც სამეფოს მეფე, ვინ გამოვლინდა, როგორც „მონა“? რა თქმა უნდა, ეს არ იყო ქრისტიანული სამყაროს სამღვდელოება. უმთავრესად ისინი თავიანთ ფარას კვებავდნენ პროპაგანდით, რომელიც პირველ მსოფლიო ომში მხარს უჭერდა მათ ეროვნულ მთავრობებს. მაგრამ სათანადო და დროული სულიერი საკვები ნაწილდებოდა ჭეშმარიტ ქრისტიანთა ჯგუფის მიერ, რომლებიც იყვნენ ღმერთის სულიწმიდით ცხებული და წარმოადგენდნენ იესოს მიერ მოხსენიებული ‘მცირე სამწყსოს’ ნაწილს (ლუკა 12:32). ეს ცხებული ქრისტიანები ქადაგებდნენ არა ადამიანთა მთავრობების შესახებ, არამედ ღმერთის სამეფოს შესახებ. შედეგად, წლების განმავლობაში, მილიონობით სწორად განწყობილი ‘სხვა ცხვარი’ შეუერთდა სულითცხებულ ‘მონას’ ჭეშმარიტ თაყვანისმცემლობაში (იოანე 10:16). ‘ერთგული მონისა’ და მისი ახლანდელი ხელმძღვანელი კორპორაციის მეშვეობით, ღმერთი ხელმძღვანელობს თავის ორგანიზებულ ხალხს, რომ სულიერი საკვები, ტანსაცმელი და თავშესაფარი ხელმისაწვდომი გახადოს ყველა მსურველისთვის.
‘დროული საზრდო’
5. როგორი სულიერი მდგომარეობაა დღეს მსოფლიოში და რას აკეთებს იეჰოვა ამ საკითხთან დაკავშირებით?
5 იესომ თქვა: „არა პურითა ერთითა ცოცხლობს კაცი, არამედ ღვთის პირიდან მომდინარე ყოველი სიტყვით“ (მათე 4:4). მიუხედავად ამისა, სამწუხაროდ, ხალხის უმრავლესობა ყურადღებას არ აქცევს ღმერთის სიტყვებს. როგორც ნაწინასწარმეტყველები იყო იეჰოვას წინასწარმეტყველი ამოსის მიერ, არსებობს ‘არა შიმშილი პურისა და წყურვილი წყლისა, არამედ უფლის სიტყვების მოსმენის შიმშილი’ (ამოსი 8:11). თვით ძალიან მორწმუნე ადამიანებიც კი სულიერად მშივრები არიან. მაგრამ იეჰოვას სურს, რომ „ყველა ადამიანი გადარჩეს და მიაღწიოს ჭეშმარიტების შემეცნებას“ (1 ტიმოთე 2:3, 4). ამის შესაბამისად, ის უხვად გვამარაგებს სულიერი საკვებით. მაგრამ სად შეიძლება ამის მიღება?
6. როგორ კვებავდა იეჰოვა თავის ხალხს წარსულში?
6 მთელი ისტორიის განმავლობაში, იეჰოვა თავის ხალხს, როგორც ჯგუფს, სულიერ საზრდოს აწვდიდა (ესაია 65:13). მაგალითად, ისრაელი მღვდლები კრებდნენ მამაკაცებს, ქალებსა და ბავშვებს, ღმერთის კანონის ჯგუფური შესწავლისთვის (მეორე რჯული 31:9, 12). ხელმძღვანელი კორპორაციის ხელმძღვანელობით, პირველი საუკუნის ქრისტიანები აყალიბებდნენ კრებებს და ყველას სასწავლებლად და გასამხნევებლად აწყობდნენ შეხვედრებს (რომაელთა 16:5; ფილიმონი 1, 2). იეჰოვას მოწმეები მიჰყვებიან ამ ნიმუშს. ისინი შენც გულითადად გიწვევენ, დაესწრო მათ ყველა შეხვედრას.
7. როგორ არის დაკავშირებული ქრისტიანულ შეხვედრებზე რეგულარული დასწრება შემეცნებასა და რწმენასთან?
7 შენ, შეიძლება, უკვე ბევრი რამე გაიგე ბიბლიის პირადი შესწავლიდან. შესაძლოა, ამაში ერთ-ერთი მოწმე დაგეხმარა (საქმეები 8:30–35). მაგრამ შენი რწმენა შეიძლება შეადარო მცენარეს, რომელიც ჭკნება და კვდება, თუ მასზე საკმარისად არ იზრუნე. ამიტომ, შენ უნდა მიიღო სათანადო სულიერი საზრდო (1 ტიმოთე 4:6). ქრისტიანული კრებები უზრუნველყოფს სწავლების განუწყვეტელ პროგრამას, რომელიც განკუთვნილია იმისთვის, რომ იკვებო სულიერად და დაგეხმაროს რწმენისა და ღვთის შემეცნების ზრდაში (კოლასელთა 1:9, 10).
8. რატომ გვამხნევებენ, დავესწროთ იეჰოვას მოწმეთა კრებებს?
8 კრებები ემსახურება სხვა მნიშვნელოვან მიზანსაც. პავლემ დაწერა: „ყურადღებით მოვეკიდოთ ერთმანეთს, წავახალისოთ სიყვარულისა და კეთილი საქმეებისათვის. ნუ მივატოვებთ ჩვენს შესაკრებელს“ (ებრაელთა 10:24, 25). ბერძნული სიტყვა „წავახალისოთ“ აგრეთვე ნიშნავს „ავლესოთ“. ბიბლიაში ჩაწერილი იგავი გვატყობინებს: „რკინა რკინით ილესება, კაცი კი კაცის სახეს ლესავს“ (იგავნი 27:17). ყველა ჩვენგანს ესაჭიროება გამუდმებული ‘ალესვა’. ამ წუთისოფლის ყოველდღიურ ზემოქმედებას შეუძლია ჩვენი რწმენის „დაბლაგვება“. როდესაც ვესწრებით ქრისტიანულ შეხვედრებს, ჩვენ ვამხნევებთ ერთმანეთს (რომაელთა 1:11, 12). კრების წევრები მიჰყვებიან პავლეს მითითებას: „შეაგონეთ ერთმანეთს და აღაშენეთ ერთმანეთი“, ასეთი მოქმედებები ლესავს ჩვენს რწმენას (1 თესალონიკელთა 5:11). ქრისტიანულ კრებებზე რეგულარული დასწრება აგრეთვე მიუთითებს ღმერთისადმი ჩვენს სიყვარულზე და გვაძლევს მისი განდიდების საშუალებას (ფსალმუნი 34:18).
„დაურთეთ სიყვარული“
9. სიყვარულის გამოვლენის როგორი მაგალითი დაგვიტოვა იეჰოვამ?
9 პავლე წერდა: „დაურთეთ სიყვარული [შეიმოსეთ სიყვარულით, აქ], რაც სრულქმნილობის კავშირია“ (კოლასელთა 3:14). იეჰოვა გულმოწყალედ უზრუნველგვყოფს ამ სამოსელით. როგორ? ქრისტიანებს შეუძლიათ სიყვარულის გამოვლენა, იმიტომ რომ ის არის იეჰოვას სულიწმიდის ნაყოფი — ღმერთისგან ბოძებული ნაყოფებიდან ერთ-ერთი (გალატელთა 5:22, 23). იეჰოვამ თავად გამოავლინა უდიდესი სიყვარული თავისი მხოლოდშობილი ძის გამოგზავნით, რათა გვქონოდა მარადიული სიცოცხლე (იოანე 3:16). უმაღლესი სიყვარულის გამოვლენით, მან მოგვცა მაგალითი, რომ ჩვენც გამოვხატოთ ეს თვისება. „თუკი ასე შეგვიყვარა ღმერთმა, — წერდა მოციქული იოანე, — ჩვენც გვმართებს ერთმანეთის სიყვარული“ (1 იოანე 4:11).
10. როგორ შეგვიძლია სარგებელი მივიღოთ ‘მთელი საძმოსგან’?
10 სამეფო დარბაზში კრებებზე დასწრება სიყვარულის გამომჟღავნების შესანიშნავ საშუალებას მოგცემს. იქ შეხვდები სხვადასხვანაირ ადამიანებს. უეჭველია, შენ დაუყოვნებლივ მიგიზიდავს მრავალი მათგანი. რა თქმა უნდა, იეჰოვას მსახურებიც განსხვავდებიან ერთმანეთისგან თავიანთი ხასიათებით. შესაძლოა, წარსულში, უბრალოდ, თავს არიდებდი ისეთ ადამიანებს, რომელთა ინტერესები და თვისებები სრულიად განსხვავდებოდა შენი ინტერესებისგან. მაგრამ ქრისტიანებს ‘უყვართ მთელი საძმო’ (1 პეტრე 2:17, აქ). ამიტომ, მიზნად დაისახე, სამეფო დარბაზში ყველა გაიცნო — ის პიროვნებებიც კი, რომლებიც შენგან განსხვავდებიან ასაკით, ხასიათით, რასობრივი წარმოშობითა და განათლების დონით. შენ, ალბათ, დაინახავ, რომ ყოველი მათგანი გამოირჩევა სხვადასხვა მიმზიდველი თვისებებით.
11. რატომ არ უნდა შეგვაწუხოს იმ ფაქტმა, რომ ღმერთის ხალხს შორის სხვადასხვა ხასიათის ადამიანები არიან?
11 არ უნდა აგაღელვოს იმან, რომ კრებებზე სხვადასხვაგვარი პიროვნებებია. მაგალითისთვის, წარმოიდგინე მრავალი ავტომობილი, რომლებიც შენს გვერდით მიემართებიან გზაზე. ყველა ერთნაირი სიჩქარით არ მოძრაობს და ყველას ერთნაირი ტექნიკური მდგომარეობა არა აქვს. ზოგმა უკვე გაიარა მრავალი კილომეტრი, მაგრამ შენს მსგავსად, ზოგი მხოლოდ ახლა დაიძრა ადგილიდან. მიუხედავად ამ განსხვავებებისა, ყველა ერთი მიმართულებით მიდის. იმავეს თქმა შეიძლება კრების წევრების შესახებაც. ყველა ერთი სისწრაფით ვერ ავითარებს ქრისტიანულ თვისებებს. გარდა ამისა, ყველა არ არის ერთნაირ ფიზიკურ და ემოციურ მდგომარეობაში. ზოგიერთი წლების მანძილზე ემსახურება იეჰოვას, სხვებმა კი მხოლოდ ახლა დაიწყეს. მაგრამ ყველა, „გაერთიანებული. . . გონებით და აზრით“, მიემართება მარადიული სიცოცხლისკენ მიმავალ გზაზე (1 კორინთელთა 1:10). ამიტომ, კრებაში უფრო მეტად ყურადღება მიაქციე აღმატებულ თვისებებს, ვიდრე სისუსტეებს. ასე მოქმედება გაათბობს შენს გულს და მიხვდები, რომ ღმერთი ნამდვილად ამ ხალხთან არის. სინამდვილეში, ეს ზუსტად ის ადგილია, სადაც შენ გსურს ყოფნა (1 კორინთელთა 14:25).
12, 13. ა) რა შეგიძლია გააკეთო, თუ კრებაში ვინმემ გაწყენინა? ბ) რატომ არის მნიშვნელოვანი, არ დაგრჩეს გულისწყრომა?
12 რადგან ყველა ადამიანი არასრულყოფილია, შესაძლოა, დროდადრო, კრებაში ვინმემ თქვას ან გააკეთოს ის, რაც არ გესიამოვნება (რომაელთა 3:23). მოციქული იაკობი ზუსტად წერდა: „ჩვენ ყველანი ბევრს ვცოდავთ. ვინც სიტყვით არ ცდება, სრულყოფილი ადამიანია“ (იაკობი 3:2). როგორ მოიქცევი, თუ ვინმე გაწყენინებს? ბიბლიური იგავი გვეუბნება: „გონიერი კაცი სულგრძელია და მისი დიდება ცოდვის მიტევებაა“ (იგავნი 19:11). გქონდეს გონიერება — ნიშნავს, ღრმად ჩაიხედო სიტუაციაში, ჩასწვდე იმ ძირითად ფაქტორებს, რომლებმაც აიძულა პიროვნება, ელაპარაკა ან მოქცეულიყო განსაზღვრული სახით. მრავალი ჩვენგანი ავლენს გონიერებას საკუთარი თავისადმი შეცდომების მიტევებაში. აგრეთვე, რატომ არ გამოვიყენოთ ჩვენი გონიერება, რომ გავუგოთ სხვებს და დავფაროთ მათი არასრულყოფილი მხარეები (მათე 7:1–5; კოლასელთა 3:13).
13 ნურასდროს დაგვავიწყდება, რომ უნდა ვაპატიოთ სხვებს, თუ გვსურს თვითონ მივიღოთ იეჰოვას პატიება (მათე 6:9, 12, 14, 15). თუ ვცხოვრობთ ჭეშმარიტებით, მაშინ სიყვარულით მოვექცევით სხვებს (1 იოანე 1:6, 7; 3:14–16; 4:20, 21). ამიტომ, თუ შენ მოულოდნელად წამოგეჭრა პრობლემა კრებაში რომელიმე პიროვნებასთან, თავი შეიკავე გულისწყრომისგან. თუ სიყვარულით შეიმოსები, შენ შეეცდები პრობლემის გადაჭრას და არ დააყოვნებ ბოდიშის მოხდას, თუ ვინმეს აწყენინე (მათე 5:23, 24; 18:15–17).
14. როგორი თვისებებით უნდა შევიმოსოთ?
14 ჩვენი სულიერი შემოსვა უნდა შეიცავდეს სხვა თვისებებსაც, რომლებიც ახლოს არის დაკავშირებული სიყვარულთან. პავლე წერდა: „შეიმოსეთ მოწყალება, სახიერება, თავმდაბლობა, სიმშვიდე, სულგრძელობა“. სიყვარულით გარშემორტყმული ასეთი თვისებები არის ღვთისნიერი ‘ახალი პიროვნების’ (აქ) ნაწილი (კოლასელთა 3:10, 12). მოახმარ ყოველ ღონეს, რომ შეიმოსო ასეთი თვისებებით? განსაკუთრებით, თუ შეიმოსები ძმური სიყვარულით, შენ გექნება ქრისტეს მოწაფის ამოსაცნობი ნიშანი, რადგან ქრისტემ თქვა: „ჩემი მოწაფეები რომ ხართ, იმით გაიგებენ ყველანი, თუ სიყვარული გექნებათ ურთიერთს შორის“ (იოანე 13:35).
უსაფრთხოების ადგილი
15. რითი ჰგავს კრება თავშესაფარს?
15 კრება აგრეთვე ემსახურება, როგორც სიმაგრე, დამცავი თავშესაფარი, სადაც შეგიძლია თავი უსაფრთხოდ იგრძნო. შენ იქ იპოვი გულწრფელ ადამიანებს, რომლებიც ცდილობენ, გააკეთონ ის, რაც ღმერთის თვალში მოსაწონია. ზოგიერთმა მათგანმა მოიცილა ცუდი ჩვევები და აზროვნება, რასაც, შესაძლოა, შენც ებრძვი, რომ დასძლიო (ტიტე 3:3). მათ შეუძლიათ დაგეხმარონ, რადგან ბიბლია გვეუბნება: „ატარეთ ერთმანეთის ტვირთი“ (გალატელთა 6:2). რასაკვირველია, გაჰყვე გზას, რომელსაც მარადიული სიცოცხლისკენ მიჰყავს, ეს საბოლოოდ შენი პირადი პასუხისმგებლობაა (გალატელთა 6:5; ფილიპელთა 2:12). მაგრამ იეჰოვა უზრუნველყოფს ქრისტიანულ კრებას დახმარებისა და მხარში ამოდგომის შესანიშნავი საშუალებებით. მნიშვნელობა არა აქვს, როგორი დამამწუხრებელიც არ უნდა იყოს შენი პრობლემები, შენთვის ხელმისაწვდომია ძვირფასი საშუალება — მოსიყვარულე კრება, რომელიც შენთან ერთად იდგება გულისტკივილისა თუ დანაკლისის დროს (შეადარე ლუკა 10:29–37; საქმეები 20:35).
16. როგორი დახმარებით უზრუნველგვყოფენ უხუცესები?
16 მათ შორის, ვინც მხარში ამოგიდგება არიან — კრების დანიშნული უხუცესები ანუ ზედამხედველები — „ძღვენი ადამიანთა სახით“ (აქ), რომლებიც მწყემსავენ ფარას ნებაყოფლობითა და გულმოდგინებით (ეფესელთა 4:8, 11, 12; საქმეები 20:28; 1 პეტრე 5:2, 3). მათ შესახებ ესაიამ იწინასწარმეტყველა: „თითოეული იქნება როგორც საფარი ქარში, თავშესაფარი ავდარში, როგორც წყლის ნაკადულები უდაბნოში, როგორც მაღალი კლდისგან დაფენილი ჩრდილი ურწყულ მიწაზე“ (ესაია 32:2).
17. ა) განსაკუთრებით როგორი სახის დახმარების გაწევა სურდა იესოს? ბ) როგორი ღონისძიების გატარებას შეჰპირდა იეჰოვა თავის ხალხს?
17 როდესაც იესო დედამიწაზე იყო, სამწუხაროდ, ასეთი მოსიყვარულე ზედამხედველობა რელიგიური ბელადების მხრიდან არ იყო. ადამიანთა მდგომარეობამ ღრმად იმოქმედა იესოზე და მას სურდა განსაკუთრებით სულიერად დახმარებოდა მათ. იესოს ეცოდებოდა ისინი, რადგან „დაუძლურებულნი და დაფანტულნი იყვნენ, როგორც უმწყემსო ცხვარი“ (მათე 9:36). როგორ შესაფერად აღწერს ეს მრავალი ადამიანის დღევანდელ გაჭირვებულ მდგომარეობას, რომლებიც განიცდიან ენით გამოუთქმელ პრობლემებს და არავინ ჰყავთ, რომ მიმართონ სულიერი დახმარებისა და ნუგეშისთვის! მაგრამ იეჰოვას ხალხს აქვს სულიერი დახმარება, რადგან იეჰოვა დაჰპირდა: „დავუყენებ მწყემსებს და ისინი დამწყესავენ მათ, აღარ შეშინდებიან, არ დაფრთხებიან, არ დაიკარგებიან“ (იერემია 23:4).
18. რატომ უნდა მივმართოთ უხუცესს, თუ გვესაჭიროება სულიერი დახმარება?
18 გაეცანი კრებაში დანიშნულ უხუცესებს. მათ აქვთ ღვთის შემეცნების გამოყენების გამოცდილება, რადგან ისინი ზედამხედველობისთვის იმ მოთხოვნებს შეესაბამებიან, რომლებიც აღწერილია ბიბლიაში (1 ტიმოთე 3:1–7; ტიტე 1:5–9). ნუ მოგერიდება მიმართო ერთ-ერთ მათგანს, თუ გესაჭიროება სულიერი დახმარება რამე ჩვევის ან თვისების დასაძლევად, რომელიც ღმერთის მოთხოვნებს არ შეესაბამება. შენ ნახავ, რომ უხუცესები მიჰყვებიან პავლეს შეგონებას: „ანუგეშეთ სულმოკლენი, მხარი დაუჭირეთ უძლურთ და სულგრძელნი იყავით ყველას მიმართ“ (1 თესალონიკელთა 2:7, 8; 5:14).
ისიამოვნე უსაფრთხოებით იეჰოვას ხალხთან
19. როგორი კურთხევებით ასაჩუქრებს იეჰოვა მათ, ვინც უსაფრთხოებას მის ორგანიზაციაში ეძებს?
19 მიუხედავად იმისა, რომ ვცხოვრობთ არასრულყოფილ პირობებში, იეჰოვა უზრუნველგვყოფს სულიერი საკვებით, ტანსაცმლითა და თავშესაფრით. უეჭველია, უნდა დაველოდოთ ღმერთის მიერ აღთქმულ ახალ ქვეყნიერებას, რომ მრავალი სარგებელი მივიღოთ ფიზიკური სამოთხიდან. მაგრამ ისინი, ვინც იეჰოვას ორგანიზაციის ნაწილს წარმოადგენენ, ახლაც ტკბებიან სულიერი სამოთხის უსაფრთხოებით. ამის შესახებ ეზეკიელმა იწინასწარმეტყველა: „მშვიდად იცხოვრებენ და აღარ ეყოლებათ დამაფრთხობელი“ (ეზეკიელი 34:28; ფსალმუნი 3:8).
20. როგორ აანაზღაურებს იეჰოვა ყველაფერს, რასაც, შესაძლოა, გავწირავთ მისი თაყვანისცემის გამო?
20 როგორი მადლიერები შეგვიძლია ვიყოთ, რომ იეჰოვამ თავისი სიტყვისა და ორგანიზაციის მეშვეობით უზრუნველგვყო სიყვარულით აღსავსე სულიერი ღონისძიებებით! დაუახლოვდი ღმერთის ხალხს. ნუ დაგაბრკოლებს იმის შიში, თუ რას იფიქრებენ შენი მეგობრები ან ნათესავები ღვთის შემეცნების მიღებასთან დაკავშირებით. ზოგიერთმა შეიძლება დაგძრახოს, იმიტომ რომ, შენ კავშირი გაქვს იეჰოვას მოწმეებთან და ესწრები კრებებს სამეფო დარბაზში. მაგრამ ღმერთი სრულიად აგინაზღაურებს ნებისმიერ მსხვერპლს, რასაც მისი თაყვანისცემისთვის გაიღებ (მალაქია 3:10). უფრო მეტიც, იესომ თქვა: „არავინ არის, რომ ჩემი გულისთვის და სახარების გულისთვის მიეტოვებინოს სახლი, ან ძმები, ან დები, ან მამა, ან დედა, ან ცოლი, ან შვილები, ან ყანა, და ასწილად არ მიეღოს ახლა, ამჟამად, სახლები, ძმები და დები, დედები და შვილები, და ყანები ამ დევნასთან ერთად, ხოლო მომავალ საუკუნეში — საუკუნო სიცოცხლე“ (მარკოზი 10:29, 30). დიახ, სულერთია რა დატოვე ან რას ითმენ, შენ შეგიძლია ჰპოვო სასიამოვნო ურთიერთობა და სულიერი უსაფრთხოება ღმერთის ხალხს შორის.
შეამოწმე შენი ცოდნა
ვინ არის„ერთგული და გონიერი მონა“?
როგორ ღონისძიებას ატარებს იეჰოვა ჩვენი სულიერი კვებისთვის?
როგორი დახმარების გაწევა შეუძლიაქრისტიანულ კრებას?
[მთელი 165 გვერდი დათმობილი აქვს სურათს]