ჩვენი გადაწყვეტილებაა — მივყვეთ იეჰოვას მოსაწონ ცხოვრების გზას

¹ კონგრესიდან „ღვთისმოსაწონი ცხოვრების გზა“ განსაკუთრებით შეიძლება გამოიყოს დასკვნითი მოხსენებისას მიღებული რეზოლუცია. ის შემდეგი განაცხადით დაიწყო: „ჩვენ. . . მთელი გულით ვეთანხმებით, რომ ღვთის გზა წარმოადგენს ცხოვრებაში საუკეთესო გზას“. გავიხსენოთ ზოგიერთი მნიშვნელოვანი პუნქტი რეზოლუციიდან, რომელზეც განვაცხადეთ „დიახ!“.

² გადაწყვეტილი გვაქვს, წმინდად და წუთისოფლისგან შეურყვნელად დავრჩეთ იეჰოვას წინაშე. ჩვენ კვლავაც პირველ ადგილს დავუთმობთ ღვთის ნების შესრულებას ჩვენს ცხოვრებაში. გამოვიყენებთ ღვთის სიტყვას, ბიბლიას, როგორც ჩვენს სახელმძღვანელოს, და არ გადავუხვევთ არც მარჯვნივ და არც მარცხნივ, რითაც დავამტკიცებთ, რომ ღვთის გზა წუთისოფლის ნებისმიერ გზაზე აღმატებულია.

³ ქვეყნიერება უგულებელყოფს ღვთისმოსაწონ ცხოვრების გზას და იმკის კიდეც ამის შედეგებს (იერ. 10:23). ამიტომ უნდა ვცდილობდეთ, რომ ყოველთვის განვისწავლებოდეთ ჩვენი დიდებული მასწავლებლისგან, იეჰოვასგან, რომელიც ამბობს: „აჰა, გზა, იარეთ მასზე“ (ეს. 30:21). იეჰოვას მოსაწონი ცხოვრების გზა, რომელიც მოცემულია საღვთო წერილში, ყოველმხრივ აღმატებულია. ამ გზით რომ ვიაროთ, აუცილებელია სრული სარგებლობა მივიღოთ იეჰოვას სწავლებიდან.

⁴ იეჰოვას აღმატებული სწავლების პროგრამა. იეჰოვა გვასწავლის სიცოცხლის ნამდვილ აზრს და ჩვენი სიცოცხლის წლების საუკეთესოდ გამოყენებას. ის გვასწავლის, თუ როგორ გავიუმჯობესოთ ცხოვრება გონებრივად, მორალურად და სულიერად. ის გვასწავლის, თუ როგორ ვიცხოვროთ მშვიდობით ძმებთან, ოჯახთან და მოყვასთან. ის გვასწავლის თავისი სახელმძღვანელოთი, ბიბლიით, და თავისი ორგანიზაციის მეშვეობით.

⁵ სწავლების საკითხში ძალიან მნიშვნელოვან როლს ასრულებს კრების შეხვედრები. როდესაც რეგულარულად ვესწრებით ხუთივე შეხვედრას და ვმონაწილეობთ მათში, ჩვენ სრულად განვისწავლებით, როგორც კეთილი ცნობის მსახურები და ვსწავლობთ გაწონასწორებულ ქრისტიანულ ცხოვრებას (2 ტიმ. 3:16, 17). ჩვენი დიდებული მასწავლებელი თეოკრატიულ განათლებას კონგრესებზეც გვაძლევს. ჩვენი მიზანი უნდა იყოს, რომ არასოდეს გავაცდინოთ შეხვედრა ან პროგრამის ნაწილი, თუ ჯანმრთელობა ან სხვა რამე ხელს არ გვიშლის.

⁶ მოდი მომავალშიც მთელი გულმოდგინებით მივყვეთ ღვთისმოსაწონ ცხოვრების გზას, რათა განვადიდოთ იეჰოვა და მივიღოთ მარადიული სარგებლობა! (ეს. 48:17).