მთელ ქვეყანას ვამცნოთ იეჰოვას სახელი
1 როდესაც იესომ თავის მოწაფეებს დაავალა, ყოფილიყვნენ მოწმეები „ქვეყნის კიდემდე“, უკვე მაგალითი ჰქონდა მათთვის მიცემული (საქ. 1:8). როცა და სადაც უნდა შეხვედროდა ხალხს, ის კაცობრიობასთან დაკავშირებულ ღვთის განზრახვაზე ელაპარაკებოდა. ერთგული მონის კლასი იესოს ბაძავს და მრავალ საშუალებას იყენებს, რომ იეჰოვას სახელი „მთელ ქვეყანას მოედოს“ (ეს. 12:4, 5).
2 რა გაკეთდა ადრე. ადრე ქადაგება ხდებოდა გაზეთებით, გამოვიდა და მილიონებმა ნახეს „შემოქმედების ფოტოდრამა“, გამოიყენებოდა ხმის გამაძლიერებელი სისტემით აღჭურვილი ავტომობილები, ფართო გამოყენება ჰქონდა აგრეთვე გრამაფონსა და გარკვეული დროის განმავლობაში — რადიოს; ყოველივე ეს კეთილი ცნობის საქადაგებლად კეთდებოდა. რასაკვირველია, ძირითადი ყურადღება ყოველთვის ხალხთან უშუალოდ დაკავშირებაზე მახვილდებოდა, რომ მაუწყებლებს გამოვლენილ ინტერესზე ეზრუნათ. შედეგად ამისა, კარდაკარ მსახურება ძალიან ეფექტური საშუალება აღმოჩნდა, რომ იეჰოვას სახელი ყველგან ცნობილი გამხდარიყო (საქ. 5:42).
3 რა კეთდება დღეს. რაც დრო გადის, წუთისოფელი მით უფრო ბობოქარ ცხოვრებას ეწევა, ამიტომ ბევრგან ძნელია ხალხის სახლში ნახვა. მცირეოდენს თუ აინტერესებს სულიერ საკითხებთან დაკავშირებით კითხვა და მსჯელობა. ამიტომ ჩვენი მსახურება შესაბამისად უნდა მოვარგოთ სიტუაციას. კარგია, თუ კარდაკარ მსახურებით უბნის არაერთხელ დამუშავების გარდა ყველგან მივდივართ, სადაც კი ხალხია, და „მუდამ მზად“ ვართ ჩვენი იმედის დასაცავად (1 პეტ. 3:15). ეს ნიშნავს, ვეცადოთ ვუქადაგოთ თანამშრომელებს, თანაკლასელებს, აგრეთვე ადამიანებს, რომლებიც გვხვდებიან ქუჩაში, პარკში, ავტოსადგომებზე, მაღაზიებში და ნებისმიერ სხვა ადგილას. იეჰოვას მხარდაჭერით, ჩვენი მცდელობები კარგ ნაყოფს იღებს. შენ თუ ცდილობ, ყველგან მიაწვდინო ხალხს კეთილი ცნობა?
4 დაე თითოეულმა ჩვენგანმა ერთი კუთხე-კუნჭულიც არ დატოვოს, რომ იეჰოვას სახელი ცნობილი გახდეს ჩვენს უბანზე. სრულად მსახურებით ჩვენ დიდ კმაყოფილებას ვიგრძნობთ იმის მოლოდინში, რომ იეჰოვა მოიყვანს გულმართალ ადამიანებს (იოან. 6:44).