სიხარული ჰპოვე წმინდა მსახურებაში
1 ისინი „სიხარულით“ დაბრუნდნენ. ბიბლიურ ცნობაში მოთხრობილია, თუ რას გრძნობდა 70 მოწაფე ხანგრძლივი სამქადაგებლო კამპანიის შემდეგ იესოსთან დაბრუნებისას. მათ განიცადეს ღვთის ნების შესრულებით გამოწვეული სიხარულის შინაგანი გრძნობა (ლუკ. 10:17). რა დაგეხმარება, ჰპოვო მსგავსი სიხარული შენს წმინდა მსახურებაში?
2 დადებითი თვალსაზრისი. ღმერთმა პატივი დაგდო, რომ ამცნო ადამიანებს იეჰოვას დიდებული განზრახვა. ქადაგებით შეგიძლია დაეხმარო ადამიანს ქვეყნიური ბიწიერი საქმეებისა და ცრუ რელიგიის ბორკილებისგან გათავისუფლებაში. შეგიძლია შესთავაზო ადამიანებს ისეთ ქვეყნიერებაში ცხოვრების იმედი, სადაც აღარ იქნება დღეს არსებული განხეთქილებები. იფიქრე იმ სიხარულზე, რომელსაც იეჰოვა განიცდის, როცა წარმატებით თესავ ჭეშმარიტების თესლს მომსმენი ადამიანების გულებში. ილოცე, რომ ღვთის სულმა წარმოქმნას შენში სიხარულის ნაყოფი მაშინ, როცა მთელი გულით ასრულებ მსახურებას.
3 პრაქტიკული მომზადება. შეხვედრა, რომლის დროსაც იესომ მითითებები მისცა თავის 70 მოწაფეს, შეიძლება შევადაროთ დღევანდელ სამსახურებრივ შეხვედრას. მან ისინი მსახურების უფრო ეფექტურად შესრულების მიზნით მოამზადა (ლუკ. 10:1—16). დღეს სამსახურებრივი შეხვედრა გვამზადებს იმისთვის, თუ როგორ მივიდეთ ადამიანებთან, როგორ წამოვიწყოთ საუბარი და როგორ დავიწყოთ და ჩავატაროთ ბიბლიური შესწავლები. თუ ამ საქმეს მოკიდებ ხელს და გაიუმჯობესებ ქადაგების უნარს, აღმოაჩენ, რომ ნებისმიერი უხერხულობისა თუ არასრულფასოვნების გრძნობა, რომელიც შეიძლება გქონდეს, გაქრება და დაიჩრდილება გამბედაობითა და სიხარულით.
4 ყურადღება გადაიტანე მომავალზე. ტანჯვის მიუხედავად, რომელსაც იესო განიცდიდა, ის სიხარულს იღებდა თავის წმინდა მსახურებაში. რატომ? იმიტომ რომ მას არ მოუცილებია თვალი თავის წინაშე მდებარე მომავალი კურთხევებისა და უპირატესობებისთვის (ებრ. 12:2, აქ). შენც შეგიძლია ამნაირადვე მოიქცე და შენი გონება და გული მიმართო იეჰოვას სახელისა და ღვთის მომავალი ახალი ქვეყნიერების კურთხევებისკენ. ეს სიხარულსა და აზრს შემატებს შენს მსახურებას.
5 იეჰოვასადმი წმინდა მსახურებაში მონაწილეობა უდიდესი პატივია, რომელიც კი შეგიძლია გქონდეს დღეს. დაე შენც თქვი: „შენი სურვილის შესრულება მინდოდა, ღმერთო, და რჯული შენი ჩემს გულშია“ (ფსალმ. 39:9).