მოკრძალებულობის გამოვლენა ჩაცმულობასა და მთელ ჩვენს გარეგნობაში

¹ „ყველა მამაკაცი, პატარა ბიჭებიც კი, ჰალსტუხებით არიან. ყველა ქალსა თუ გოგონას — როგორც მოზარდს, ისე პატარას — ან კაბა, ან ქვედა ბოლო აცვია. ვერავის ნახავთ ჯინსებში ან გაღეღილი პერანგებით. ყველას სახე უბრწყინავს“, — იუწყებოდა ერთ-ერთი საინფორმაციო წყარო. ადამიანთა რომელ თავყრილობაზე იყო აქ საუბარი? პოლიტიკურზე? რაიმე სპორტულ ღონისძიებაზე? თუ როკ-მუსიკის კონცერტზე? სულაც არა! საუბარი იყო ჩვენს ძმებსა და დებზე, რომლებიც ზაფხულში საოლქო კონგრესს ესწრებოდნენ.

² სხვა ქალაქში ჩატარებულ კონგრესზე დამსწრე იეჰოვას მოწმეთა შესახებ საგაზეთო სტატია იუწყებოდა: „ყველა მამაკაცი სუფთად არის ჩაცმული; შარვალ-კოსტიუმში არიან გამოწყობილი და ჰალსტუხები უკეთიათ. ქალები მოკრძალებულად, მაგრამ ელეგანტურად არიან ჩაცმული“. დაცვაში მომუშავე ერთმა დამკვირვებელმა კი აღნიშნა: „თქვენ კარგი ყოფაქცევის, თავაზიანი, სუფთა და აკურატული ხალხი ხართ. მოხიბლული ვარ თქვენით. ამ ბინძური წუთისოფლიდან თქვენ ჭუჭყის გატანას ცდილობთ!“. ჩვენ მიმართ ნათქვამი რა დიდებული სიტყვებია! განა მადლიერი არა ვართ იმისათვის, რომ ჩვენს საძმოზე ასე კარგად ილაპარაკეს? რა თქმა უნდა, თავისი სამაგალითო გარეგნობით იეჰოვას ნებისმიერ მოწმეს შეაქვს წვლილი სხვების მხრიდან ასე დადებითად შეფასებაში.

³ მთელ მსოფლიოში ჩვენ გვეცნობიან როგორც გარეგნობით წუთისოფლისგან სრულიად განსხვავებულ ადამიანებს (მალ. 3:18). რატომ? იმიტომ რომ ვითვალისწინებთ ბიბლიურ რჩევას: ‘შეიმოსეთ წესიერი სამოსლით, მორცხვობითა და კდემამოსილებით, როგორც შეჰფერით [ადამიანებს], რომლებმაც ღვთისმოსაობა ირჩიეს’ (1 ტიმ. 2:9, 10).

⁴ რას აჩვენებთ თქვენი ჩაცმულობითა და მთლიანი გარეგნობით? ის, თუ რა გვაცვია და როგორ გვაცვია, ბევრ რამეს ლაპარაკობს ჩვენზე — ჩვენს მრწამსზე, აზროვნებასა თუ მიზნებზე. სტილი, რომელსაც ვირჩევთ, იმაზე მეტყველებს, ვინ ვართ და რას წარმოვადგენთ. არასოდეს უნდა ავყვეთ ფეხის ხმას და გავითავისოთ წუსითოფლისეული გახრწნილი აზროვნება თუ მოქმედებები. უკანასკნელ მოდაზე ჩაცმაზე კი არ ვიზრუნებთ, არამედ იმაზე, შეეფერება თუ არა ღვთის მსახურს ჩვენ მიერ არჩეული ჩაცმის სტილი (რომ. 12:2). ნაცვლად იმისა, რომ ჩვენს ჩაცმულობაში დამოუკიდებლობის სული ირეკლებოდეს ან ვინმეს ჩვენზე აფიქრებინოს, რომ მსუბუქი ყოფაქცევის ვართ, ყოველნაირად ცხადვყოფთ, რომ ნამდვილად ‘განვადიდებთ ღმერთს’ (1 პეტ. 2:12).

⁵ ზოგჯერ რწმენაში ახლებმა, გამოუცდელებმა ან სულიერად სუსტებმა შეიძლება ისეთი ჩაცმის სტილი, ვარცხნილობა და მაკიაჟი აირჩიონ, რომელსაც წუთისოფელი უწევს რეკლამას და თავიდან არც კი დაფიქრდნენ, რა შთაბეჭდილებას შეუქმნის ეს სხვებს იეჰოვასა და მის ორგანიზაციაზე. თითოეულმა ჩვენგანმა შეიძლება საკუთარ თავს კრიტიკული თვალით შეხედოს და გამოიკვლიოს, წუთისოფლის აზროვნებამ ხომ არ მოახდინა ჩვენზე გავლენა. შეგვიძლია მივიდეთ სულიერად მოწიფულ ძმასთან ან დასთან და ვთხოვოთ, გულახდილად გვითხრას, როგორია ჩვენი ჩაცმის სტილი თუ, საერთოდ, გარეგნობა, შემდეგ კი მის ნათქვამზე დავფიქრდეთ.

⁶ ზოგი შეიძლება ყურადღებას აქცევს თავის ჩაცმულობას კონგრესზე ყოფნის დროს, მაგრამ პროგრამის დამთავრების შემდეგ თავისუფალ დროს ამაზე მაინცდამაინც არ ზრუნავს. იყავით ყოველთვის მოწოდების დონეზე და ისე, როგორც ეს ქრისტიან მსახურს შეეფერება (2 კორ. 6:3, 4). სადაც არ უნდა ვიყოთ, ჩვენი სამკერდე ნიშანი, სათანადო ჩაცმულობა თუ მთლიანად გარეგნობა იმაზე უნდა მეტყველებდეს, რომ ჩვენ იეჰოვას მოწმეები ვართ. ამიტომ ყოველთვის კარგად და მოკრძალებულად ჩავიცვათ, რითაც ცხადვყოფთ, რომ ‘არ ვართ წუთისოფლისანი’ (იოან. 15:19).

⁷ მოდი ძალ-ღონე არ დავიშუროთ და წელს საოლქო კონგრესზე „სამეფოს შესახებ გულმოდგინე მაუწყებლები“ დავამტკიცოთ, რომ იეჰოვას „წმინდა ერი“ ვართ. დადებითი შთაბეჭდილება, რომელსაც სხვებზე ჩვენი გარეგნობით დავტოვებთ, ‘დიდებას, სახელსა და პატივს’ შეჰმატებს იეჰოვას (რჯლ. 26:19).

[ჩარჩო 7 გვერდზე]

როგორ განვადიდოთ იეჰოვა:

■ ჩავიცვათ ისე, როგორც ღვთის მსახურს შეეფერება.

■ მოვერიდოთ სტილს, რომელიც წუთისოფლის სულს ირეკლავს.

■ გამოვავლინოთ მოკრძალება, რომელსაც, ჩვეულებრივ, გონიერნი ავლენენ.