რის წყალობით არსებობს ჭეშმარიტი ქრისტიანული ერთიანობა?
1 რა აერთიანებს 234 ქვეყანაში მცხოვრებ ექვს მილიონ ადამიანს, რომლებიც დაახლოებით 380 ენაზე ლაპარაკობენ? მხოლოდ იეჰოვასადმი თაყვანისმცემლობა (მიქ. 2:12; 4:1—3). იეჰოვას მოწმეებმა თავიანთი გამოცდილებიდან იციან, რომ ჭეშმარიტი ქრისტიანული ერთიანობა დღეს რეალობაა. ჩვენ ვართ „ერთი ფარა“, რომელსაც „ერთი მწყემსი“ ჰყავს და გადაწყვეტილი გვაქვს, წინააღმდეგობა გავუწიოთ ქვეყნიერებისთვის დამახასიათებელ განხეთქილების სულს (იოან. 10:16; ეფეს. 2:2).
2 იეჰოვა ღმერთის უცვლელი განზრახვაა, რომ ყველა გონიერი ქმნილება გაერთიანებული იყოს ჭეშმარიტ თაყვანისმცემლობაში (გამოცხ. 5:13). იესოს ესმოდა ეს და ხშირად ლოცულობდა, რომ მისი მიმდევრები გაერთიანებულები ყოფილიყვნენ (იოან. 17:20, 21). როგორ შეგვიძლია თითოეულს წვლილის შეტანა ქრისტიანული კრების ერთიანობაში?
3 როგორ მიიღწევა ერთიანობა. ღვთის სიტყვისა და მისი სულის დახმარების გარეშე შეუძლებელი იქნებოდა ქრისტიანული ერთობა. როდესაც ვიყენებთ იმას, რასაც ბიბლიაში ვკითხულობთ, ღვთის სულიწმიდა თავისუფლად მოქმედებს ჩვენს ცხოვრებაზე. ეს კი საშუალებას გვაძლევს, შევინარჩუნოთ „სულის ერთიანობა მშვიდობის კავშირით“ (ეფეს. 4:3, აფ). ასეთი მოქმედება აღგვძრავს, შევიწყნაროთ ერთმანეთი სიყვარულით (კოლ. 3:13, 14; 1 პეტ. 4:8). უწყობ ხელს ერთიანობას ღვთის სიტყვაზე ყოველდღიურად ფიქრით?
4 ჩვენ სამქადაგებლო საქმიანობა და მოწაფეების მომზადებაც გვაერთიანებს. ქრისტიანულ მსახურებაში სხვებთან თანამშრომლობისას ‘ერთსულოვნად ვიღწვით სახარების რწმენისათვის’, რისი წყალობითაც „ჭეშმარიტების თანამშრომელნი“ ვხდებით (ფილ. 1:27; 3 იოან. 8). თუ ასე ვიქცევით, კრებაში სიყვარულის კავშირი კიდევ უფრო განმტკიცდება. რატომ არ მიგეწვია მსახურებაში ის, ვისთანაც დიდი ხანია არ გიმსახურია?
5 დედამიწაზე არსებული ერთადერთი ჭეშმარიტი საერთაშორისო საძმოს წევრად ყოფნა უდიდესი პატივია! (1 პეტ. 5:9). ახლახან, ათასობით ადამიანმა პირადად გამოსცადა ასეთი ერთსულოვნება საერთაშორისო კონგრესებზე, სახელწოდებით „დიდება მივაგოთ ღმერთს“. დაე, ყველამ წვლილი შევიტანოთ ფასდაუდებელ ერთიანობაში ღვთის სიტყვის ყოველდღიური კითხვით, უთანხმოებების სიყვარულით გადაჭრითა და სასიხარულო ცნობის „ერთსულოვნად“ გავრცელებით (რომ. 15:6).