სიყვარული — ნაყოფიერი მსახურების საწინდარი
1 „მოდით ჩემთან . . . და მე გამოგაცოცხლებთ“ (მათ. 11:28). ამ თბილი სიტყვებიდან ჩანს, თუ რამდენად უყვარდა იესოს ადამიანები. ჩვენ, როგორც ქრისტიანებს, გვსურს, მივბაძოთ იესოს და სიყვარული გამოვავლინოთ იმ ადამიანების მიმართ, რომლებსაც ამ უსიყვარულო ქვეყნიერებამ ძალა გამოაცალა. როგორ შეგვიძლია ამის გაკეთება, როდესაც ხალხს სასიხარულო ცნობას ვუზიარებთ?
2 სიტყვით: ხალხის სიყვარულით აღძრული იესო ყველა შესაძლებლობას იყენებდა მათთვის სასიხარულო ცნობის გასაზიარებლად (იოან. 4:7—14). სიყვარული დაგვეხმარება, გადავლახოთ გაუბედაობის გრძნობა და არაფორმალურად ვიქადაგოთ. ექვსი წლის გოგონამ, რომელიც თავის რიგს ელოდებოდა ექიმთან შესასვლელად, გვერდით მჯდომ ქალბატონს უქადაგა. რამ აღძრა ის ამისკენ? გოგონა გვიხსნის: „იმ დეიდას ისეთი სახე ჰქონდა, რომ მისთვის იეჰოვას შესახებ უნდა მომეყოლა“.
3 ხალხისადმი ინტერესი შეგვიძლია თბილი ღიმილითა და მეგობრული საუბრით გამოვხატოთ. სიყვარულს ადამიანებს იმითაც ვუჩვენებთ, თუ ყურადღებით მოვუსმენთ, გავიზიარებთ მათ გულისტკივილს და გულწრფელ ინტერესს გამოვავლენთ მათ მიმართ (იგავ. 15:23). იესოს მსგავსად, ხალხს ყურადღება უნდა გავუმახვილოთ სამეფოს შესახებ სასიხარულო ცნობაზე და იმაზე, თუ როგორ უყვარს იეჰოვას ადამიანები და როგორ ებრალება ისინი (მათ. 24:14; ლუკ. 4:18).
4 საქმით: იესო მზად იყო, საქმითაც დახმარებოდა სხვებს (მათ. 15:32). მსახურებაში შეიძლება ჩვენც მოგვეცეს სხვებისთვის სიკეთის კეთების შესაძლებლობა. ერთმა დამ შენიშნა, რომ ქალბატონი, რომელიც ტელეფონით საუბრობდა, ვერ იგებდა მოსაუბრის ნათქვამს. ის დაეხმარა ამ ქალბატონს, რომ მათი საუბარი გადაეთარგმნა. ამან შესაძლებლობა მისცა დას, ექადაგა ქალბატონისთვის და მასთან ბიბლიის შესწავლა დაეწყო. ერთ ძმას განმეორებითი მონახულების დროს მობინადრე გაღიზიანებული დახვდა, რადგან ტახტი კარში ვერ შეჰქონდა. ის ამ მამაკაცს ტახტის შეტანაში დაეხმარა. მალე ამ ტახტზე მოკალათებულმა ძმამ ბიბლიის შესწავლა დაიწყო მადლიერ მობინადრესთან.
5 მსახურებაში მონაწილეობით ღვთისა და მოყვასისადმი სიყვარულს ვავლენთ (მათ. 22:36—40). სიტყვითა და საქმით გამოვლენილი სიყვარული გულწრფელ ადამიანებს არწმუნებს, რომ ჭეშმარიტება ჩვენთანაა.